អតីតឧកញ៉ា ហេង សិទ្ធី ដែលត្រូវបានគេទម្លាយថា កំពុងជាប់ពន្ធនាគារនៅប្រទេសរុស្សី តាមបណ្តឹងអ្នកឧកញ៉ា ហ៊ុន តូ នោះ បានអំពាវនាវឱ្យប្រជាពលរដ្ឋខ្មែរ រួមដៃគ្នាផ្លាស់ប្តូរគ្រួសារហ៊ុន ដើម្បីសង្គ្រោះកម្ពុជាចេញពីជម្រកពួកឧក្រិដ្ឋជន។
នេះបើតាមសំបុត្រសរសេរដោយដៃកម្រាស់៣ទំព័ររបស់អតីតឧកញ៉ា ហេង សិទ្ធី ដែលត្រូវបានគេទម្លាយឱ្យVODនៅថ្ងៃទី២១ ខែមេសា ឆ្នាំ២០២៥នេះ។
ប្រភពសិ្នទ្ធិលោក ហេង សិទ្ធី ប្រាប់VODដោយសុំមិនបញ្ចេញឈ្មោះ និងសំឡេងថា បច្ចុប្បន្ន លោក ហេង សិទ្ធី ត្រូវជាប់ឃុំនៅប្រទេសរុស្សីបណ្តោះអាសន្ន ដោយមិនទាន់ត្រូវបានបញ្ជូនមកកម្ពុជាទេ។
ប្រភពដដែលថា មន្រ្តីកម្ពុជាបានព្យាយាមសុំឱ្យភាគីរុស្សីបញ្ជូនលោក ហេង សិទ្ធី មកកម្ពុជាវិញតែត្រូវបានមេធាវីអន្តរជាតិការពារឱ្យលោក ហេង សិទ្ធី ប្រឆាំងនឹងការស្នើសុំនេះ។
ប្រភពដដែលនិយាយក្នុងសម្តីដើមថា៖ «គោលបំណងរបស់ លោក ហេង សិទ្ធី គាត់ចង់ឱ្យយើងបំផុសធ្វើយ៉ាងណា ដើម្បីឱ្យយុវជនប្រជាពលរដ្ឋជួយគាំទ្រគាត់ ព្រោះគាត់ឥឡូវកំពុងតែថិតក្នុងភាពអយុត្តិធម៌ គាត់ចង់ទាមទារយុត្តិធម៌មកវិញ»។
បើតាមសំបុត្ររបស់លោក ហេង សិទ្ធី បានសរសេរថា សម័យឬរបបលោក ហ៊ុន សែន ស្រឡាញ់តែអ្នកប្រាជ្ញចេះធ្វើល្ងង់ ឬមនុស្សស្ងប់ធ្វើប្រាជ្ញ បង្ហាញនូវភក្តីភាពឥតព្រំដែនក្លែងក្លាយមួយ ធ្វើឱ្យអ្នកមានចំណេះដឹងមានឆន្ទៈស្រឡាញ់ជាតិមាតុភូមិជាតិនិយមត្រូវខ្ទាតចេញ។
លោកថា ការដែលលោក ហ៊ុន សែន បង្កើតងារសម្តេចនេះ សម្តេចនោះ ព្រោះគេចង់ឱ្យប្រជាជនមានជំនឿពីភាពអស្ចារ្យ និងភាពខុសគ្នារវាងគ្នា រវាងវណ្ណៈនិយម តែប៉ុណ្ណោះ ការពិតពួកគេត្រូវតែជាមនុស្សធម្មតាដែលស្រែកឃ្លានការគោរព និងអំណាច ដោយការបង្ខិតបង្ខំតែប៉ុណ្ណោះ។
បន្ថែមលើនេះ លោកថា របបលោក ហ៊ុន សែន បំផ្លាញអ្នកប្រាជ្ញ និងបុគ្គលដែលមានទស្សនៈគំនិតនិយម ឱ្យមកជឿលើការដឹកនាំអទិទេព ហើយបង្រួមអំណាចរាជានិយម និងសង្គមនិយមជាពិសេសកម្លាំងកកើតថ្មីនៃយុវជនជំនាន់ក្រោយ ឱ្យយល់ថាបើគ្មានពួកគេប្រទេសនឹងមានភាពចលាចល និងសង្រ្គាមបង្ហូរឈាម។
អតីតឧកញ៉ា លោក ហេង សិទ្ធី ចាប់ពីខែវិច្ឆិកា ឆ្នាំ២០២៤មក បានប្រើប្រាស់ហ្វេសប៊ុកផ្ទាល់ខ្លួនលាតត្រដាងពីការរួមដៃគ្នា រវាងមន្ត្រីរដ្ឋាភិបាលជាមួយឧក្រិដ្ឋជន បើកល្បែងអនឡាញខុសច្បាប់ និងការជួញដូរមនុស្សតាមអនឡាញជាដើម។
មន្រ្តីជាន់ខ្ពស់ដែលលោក ហេង សិទ្ធី ចោទប្រកាន់មានដូចជា លោក គួច ចំរើន លោក ស ថេត លោក ស សុខា លោក កើត រិទ្ធិ រួមទាំងមន្ត្រីអន្តោប្រវេសន៍ជាដើម។
បន្ថែមលើនេះ លោកទម្លាយទៀតថា ឧកញ៉ា ហ៊ុន តូ ដែលជាបងប្អូនជីដូនមួយលោកនាយករដ្ឋមន្ត្រី ហ៊ុន ម៉ាណែត គឺជាជនឧក្រិដ្ឋឆបោក ការចាប់ជំរិត និងមេខ្លោងគ្រឿងញៀន ដែលមានការគាំទ្រពីមន្រ្តីរដ្ឋាភិបាលទាំងនោះថែមទៀត។
លោក ហេង សិទ្ធី ក៏បានដាក់ពាក្យទៅកាន់អង្គភាពប្រឆាំងអំពើពុករលួយ ក្រសួងមហាផ្ទៃ និងខុទ្ទកាល័យ លោក ហ៊ុន ម៉ាណែត ដើម្បីឱ្យស៊ើបអង្កេតលើមន្រ្តីពាក់ព័ន្ធ ប៉ុន្តែគ្មានការស៊ើបអង្កេតនោះទេ។
ជាមួយគ្នានេះ លោក ហេង សិទ្ធី ក៏បានបង្ហោះពាក្យបណ្តឹងចុះថ្ងៃទី៣ ខែមករា ឆ្នាំ២០២៤ របស់ខ្លួន ដោយទាមទារឱ្យលោក កើត រិទ្ធ រដ្ឋមន្ត្រីក្រសួងយុត្តិធម៌ បើកការស៊ើបអង្កេតលើលោក ហ៊ុន តូ។
ប៉ុន្តែ ៥ថ្ងៃក្រោយនៃការដាក់ពាក្យបណ្តឹងនេះ ក្រសួងការបរទេសកម្ពុជា បានចេញលិខិតមួយច្បាប់នៅថ្ងៃទី៨ ខែមករា ឆ្នាំ២០២៥ ប្រាប់ទៅកាន់ឯកអគ្គរាជទូតកម្ពុជាប្រចាំនៅបរទេសថា លិខិតឆ្លងដែនរបស់លោក ហេង សិទ្ធី ត្រូវបានមោឃភាពចោលតាមសំណើររបស់ក្រសួងមហាផ្ទៃ។
ជុំវិញរឿងនេះ តំណាងរាស្រ្តគណាបក្សសង្រ្គោះជាតិ លោក អ៊ុំ សំអាន ព្រមានថា បើគ្រួសារហ៊ុនបន្តដឹកនាំប្រទេសបែបផ្តាច់ការចាប់ចងមនុស្សតាមទំនើងចិត្ត ជាពិសេសលើមនុស្សដែលហ៊ានលាតត្រដាងការពិតក្នុងសង្គមនោះ អំណាចគ្រួសារហ៊ុននឹងអាចដួលរំលំក្រោមអំណាចមហាជននៅថ្ងៃណាមួយ។
លោកថា៖ «ត្រកូលហ៊ុនគួរតែកែលម្អការដឹកនាំរបស់ខ្លួន ត្រូវបង្ក្រាបទៅលើបទឧក្រិដ្ឋដែលឆបោកដោយជនជាតិចិនដែលបង្ខាំងមនុស្សឱ្យឆបោកតាមអនឡាញ ហើយនិងបទចាប់ជំរិត ហើយនិងមានការគប់គិតជាមួយនឹងត្រកូលហ៊ុន ដូចជា លោក ហ៊ុន តូ និងឧកញ៉ាមួយចំនួនហ្នឹង គួរតែបង្ក្រាបបទល្មើសទាំងអស់ហ្នឹងហើយ កុំទៅចាប់អ្នកដែលហ៊ានលាតត្រដាងបទឧក្រិដ្ឋទាំងអស់ហ្នឹង។ អ្នកដែលរិះគន់បទឧក្រិដ្ឋទាំងអស់ហ្នឹង អាហ្នឹងទើបត្រកូលហ៊ុនអាចគេចផុត ពីការដែលទម្លាក់ដោយមហាជន ដែលគេអាចអត់ទ្រាំមិនបាននឹងការដឹកនាំផ្ដាច់ការរបស់ត្រកូលហ៊ុន»។
ប្រធានអង្គការប្រជាធិបតេយ្យខ្មែរប្រចាំប្រទេសអូស្រ្តាលី លោក ស៊ឹង សែនករុណា និយាយថា នៅកម្ពុជា សែស្រឡាយមេដឹកនាំអាចបញ្ជាប្រព័ន្ធតុលាការតាមអំពើចិត្តរបស់ពួកគេ ជាហេតុធ្វើឱ្យពាក្យបណ្តឹងរបស់ លោក ហេង សិទ្ធី ដាក់ទៅកាន់ស្ថាប័នពាក់ព័ន្ធគ្មានការស៊ើបអង្កេតទេ ហើយថា ការដឹកនាំបែបនេះកំពុងផ្តល់មហន្តរាយដល់ប្រទេសកម្ពុជា។
លោកថា៖ «គម្បីរដ្ឋាភិបាល ឬស្ថាប័នពាក់ព័ន្ធយកចិត្តទុកដាក់ទទួលនូវព័ត៌មានទាំងអស់ហ្នឹង ធ្វើការស៊ើបអង្កេតដើម្បីវែកមុខអ្នកដែលពាក់ព័ន្ធទៅនឹងបទឧក្រិដ្ឋទាំងអស់ហ្នឹង យកមកផ្តន្ទាទោស មិនមែនមកចាប់ខ្លួនអ្នករាយការណ៍ ពីបទល្មើសអ្នកដែលប្រព្រឹត្តអំពើឆបោក បែបឧក្រិដ្ឋកម្មអនឡាញទាំងអស់ ដែលជាអ្នករាយការណ៍អ៊ីចឹងទេ អ៊ីចឹងសួរថាតើថ្ងៃក្រោយបទល្មើសទាំងអស់ហ្នឹង ដែលសហគមន៍អន្តរជាតិគេរិះគន់មកកម្ពុជាយើង មានវិធានការដោះស្រាយដោយរបៀបម៉េច»។
ជុំវិញរឿងនេះ VOD មិនអាចសុំការបញ្ជាក់បន្ថែមពីអ្នកនាំពាក្យរងក្រសួងមហាផ្ទៃ លោក ទូច សុខៈ បានទេគិតត្រឹមម៉ោងផ្សាយនេះ។
ជុំវិញរឿងនេះ អ្នកប្រើប្រាស់បណ្តាញសង្គមជាច្រើន បានបញ្ចេញមតិរិះគន់ចំពោះការចាប់ខ្លួន អតីតឧកញ៉ា ហេង សិទ្ធី ដោយពួកគេបានជំរុញឱ្យស៊ើបអង្កេតចំពោះមន្ត្រីដែល លោក ហេង សិទ្ធី ទម្លាយឈ្មោះទាំងនោះ ដើម្បីបង្ហាញតម្លាភាពក្នុងប្រព័ន្ធច្បាប់កម្ពុជា ហើយអ្នកខ្លះទៀតបានកោតសរសើរចំពោះភាពក្លាហានរបស់ លោក ហេង សិទ្ធី ដែលហ៊ានទម្លាយបទឧក្រិដ្ឋឆបោកនៅកម្ពុជានេះ។
ខណៈអន្តរជាតិក៏រកឃើញដែរថា កម្ពុជា ជាសម្បុករបស់ឧក្រិដ្ឋជនយកធ្វើជាទីតាំងចាប់ជំរិតឆបោកតាមអនឡាញ ដែលកំពុងបង្កការគំរាមគំហែងដល់ប្រទេសក្នុងតំបន់ និងលើពិភពលោក៕
