Social Issues, បរិស្ថាន, ព័ត៌មានជាតិ

ក្រុមហ៊ុនកុកអានដែលចាក់ដីលុបដៃទន្លេនឹងត្រូវប្តូរទីតាំងក្រោយមហាជនប្រតិកម្ម

លោក ប៉ុល សម្បត្តិ
| ២១ មេសា ២០២៥
ម៉ោង ២២:៤១

រដ្ឋាភិបាលប្តូរជំហរផ្លាស់ប្តូរទីតាំងក្រុមហ៊ុនអានកូ របស់អ្នកឧកញ៉ា កុក អាន ដែលបានចាក់ដីលុបដៃបឹងទន្លេសាប នៅក្នុងខេត្តកំពង់ឆ្នាំង ទៅទីតាំងថ្មី ក្រោយមហាជនផ្ទុះប្រតិកម្មរិះគន់សកម្មភាពនេះ និងបានចែករំលែកតៗគ្នាលើបណ្តាញសង្គម។

បរិបទនេះ ត្រូវបានគេមើលឃើញថា បញ្ហាអយុត្តិធម៌សង្គមរាប់ម៉ឺនករណី រួមទាំងបញ្ហាព្រំដែន អាចនឹងត្រូវបានស្តារឡើងវិញ បើមហាជនស្រុះដៃគ្នា បញ្ចេញប្រតិកម្មព្រមៗគ្នា ដូចករណីនេះដែរ។

ជុំវិញបញ្ហានេះ អភិបាលខេត្តកំពង់ឆ្នាំង លោក ស៊ុន សុវណ្ណារិទ្ធ ប្រាប់VODនៅថ្ងៃទី២១ខែមេសាថា ករណីចាក់ដីចូលទន្លេសាបនេះ កើតឡើង៣ថ្ងៃមុនថ្ងៃចូលឆ្នាំថ្មីប្រពៃណីជាតិ គឺក្រុមហ៊ុនអានកូរបស់អ្នកឧកញ៉ា កុក អាន។

លោកបន្តថា ទីតាំងកើតហេតុស្ថិតនៅត្រង់ចំណុចផែថ្មី ភូមិទី៨ សង្កាត់ខ្សាម ក្រុងកំពង់ឆ្នាំង គឺករណីចាក់ដីនេះ សម្រាប់បូមទឹកទុកបម្រើសេវាកម្មផ្គត់ផ្គង់ទឹកស្អាត ជូនប្រជាពលរដ្ឋក្នុងក្រុងកំពង់ឆ្នាំង ដែលខ្វះខាតទឹកស្អាតក្នុងរដូវប្រាំង ដោយពុំមានចេតនាហ៊ុមព័ទ្ធយកជាកម្មសិទ្ធិនោះទេ។

យ៉ាងណា លោកបញ្ជាក់ថា លោកនិងមន្រ្តីធនធានទឹក នឹងផ្អាកឬកែសម្រួលទីតាំងបូមទឹកសម្រាប់ផ្គត់ផ្គង់ទឹកស្អាតឡើងវិញ បើមហាជនមិនពេញចិត្ត ឬគិតថាបង្កផលប៉ះពាល់បរិស្ថាន សោភណ្ឌភាពទន្លេសាប។

លោកថា៖ «យើងបានធ្វើការជាមួយក្រុមហ៊ុនហើយដោយនៃក្រសួងធនធានទឹកហើយ ឲ្យដឹងថា បឹងទន្លេសាបឲ្យថ្ងៃនេះកំពុងប្រជុំគ្នា ដើម្បីសម្របសម្រួលប្លង់ ដើម្បីធ្វើរបៀបម៉េចឲ្យវាល្អ។ ចឹងជំនាញកំពុងប្រជុំដើម្បីកែសម្រួល ឬកែសម្រួលប្លង់ជាមួយក្រសួងធនធានទឹក គេកំពុងប្រជុំថ្ងៃហ្នឹង។ ចឹងបានខ្ញុំសុំបញ្ជាក់ថា គាត់មិនមែនមកចាក់ដើម្បីយកដីអីទេ គាត់គ្រាន់តែចាក់ដើម្បីព័ទ្ធក្បាលបូមគាត់ ដើម្បីឲ្យជ្រៅ ដើម្បីបូមទឹកយកមកបម្រើជូនប្រជាពលរដ្ឋក្នុងក្រុងកំពង់ឆ្នាំង»។

ជុំវិញបញ្ហានេះ សហស្ថាបនិកគណបក្សកែទម្រង់កម្ពុជា លោក អ៊ូ ច័ន្ទរ័ត្ន គាំទ្រចំពោះទង្វើអភិបាលខេត្តកំពង់ឆ្នាំង លុបចោលគម្រោងចាក់ដីចូលទន្លេ បំផ្លាញសោភណ្ឌភាពបឹងទន្លេសាបក្នុងខេត្តកំពង់ឆ្នាំងនេះ។

លោកសង្ឃឹមថា អាជ្ញាធរខេត្តនឹងចាត់វិធានច្បាប់តឹងរឹង ដោយមិនបណ្តែតបណ្តោយឱ្យក្រុមហ៊ុនអ្នកមានលុយ មានអំណាចបន្តគឃ្លើនបំផ្លាញធនធានធម្មជាតិ បង្កផលប៉ះពាល់ដល់បរិស្ថានទៀតនោះទេ។

លោកបន្តថា ការផ្អាកចាក់ដីបំផ្លាញដៃទន្លេសាបនេះ គឺដោយសារកម្លាំងរិះគន់ដើម្បីស្ថាបនារបស់ពលរដ្ឋខ្មែរដែលឈឺឆ្អាលបញ្ហាបរិស្ថាន ទើបអាជ្ញាធរខេត្តបញ្ឈប់សកម្មភាពក្រុមហ៊ុនឧកញ៉ា កុក អាន នេះ។

លោកថា៖ «ទី១ខ្ញុំស្វាគមន៍ អបអរសាទរចំពោះមតិចូលរួមរបស់ប្រជាពលរដ្ឋខ្មែរ ក្នុងនាមជាម្ចាស់អំណាចជាម្ចាស់ប្រទេស។ ការចូលរួមមានសារៈសំខាន់ណាស់ ដូច្នេះម្ដងហើយម្ដងទៀត ខ្ញុំនៅតែទទូចឲ្យប្រជាពលរដ្ឋខ្មែរក្នុងនាមជាម្ចាស់ ត្រូវតែមានមតិចូលរួមក្នុងកិច្ចការសង្គម ក្នុងកិច្ចការនយោបាយនេះគឺចៀសមិនផុតពីយើងក្នុងនាមជាម្ចាស់ទេ ហើយកុំឲ្យមានការភ័យខ្លាចច្រើនពេក ត្រូវតែមានមតិដើម្បីការពារផលប្រយោជន៍រួម ប្រយោជន៍ជាតិ»។

អាខោនហ្វេសប៊ុកឈ្មោះថា ទូច សោភណ្ឌ សរសេរថា បើមន្រ្តីខេត្តមិនបើកដៃ ក្រុមហ៊ុនខិលខូចក៏មិនហ៊ានប្រព្រឹត្តិដែរ។

អាខោនហ្វេសប៊ុកម្នាក់ទៀត ឈ្មោះថា គីម សុភាណា សរសេរថា ឱ! បឹងទន្លេសាបខ្មែរអើយ មន្រ្តីត្រូវដង ត្រូវផ្លែគ្នាអស់ហើយ សូម្បីតែដៃទន្លេក៏គេចង់បំផ្លាញចោលដែរ។

ចំណែក មន្រ្តីសម្របសម្រួលសមាគមអាដហុកប្រចាំខេត្តកំពង់ឆ្នាំង លោក សំ ច័ន្ទគា យល់ថា បើគ្មានចរន្តរិះគន់ខ្លាំងពីមហាជនទេ អាជ្ញាធរខេត្តនិងក្រុមហ៊ុនប្រាកដជាមិនបញ្ឈប់សកម្មភាពរបស់ខ្លួនទេ។

លោកថា កម្លាំងមហាជនដែលចូលរួមឈឺឆ្អាលពីបញ្ហាសង្គមជាតិ បញ្ហាបរិស្ថាន និងបញ្ហាសិទ្ធិមនុស្សនេះហើយ ដែលសង្គមប្រជាធិបតេយ្យ ត្រូវការដើម្បីរួមចំណែកអភិវឌ្ឍន៍ប្រទេសជាតិឱ្យរីកចម្រើន។

សម្រាប់លោក ច័ន្ទគា លើកចិត្តទឹកឱ្យមហាជនបន្តចូលរួមតាមដានបញ្ហាសង្គមជាតិ បរិស្ថាន និងភាពអសកម្មរបស់អាជ្ញាធរមានសមត្ថកិច្ច ដែលបណ្តោយឱ្យក្រុមហ៊ុនអ្នកមានលុយ មានអំណាចបន្តបំផ្លាញធនធានធម្មជាតិរបស់ខ្មែរ។

ម្យ៉ាងវិញទៀត លោកយល់ថា ក្នុងសង្គមប្រជាធិបតេយ្យចាំបាច់ណាស់ ត្រូវការចូលរួមឈឺឆ្អាល និងតាមដានបញ្ហាសង្គមជាតិពីសំណាក់ប្រជាពលរដ្ឋ ទើបសង្គមជាតិនោះរីកចម្រើននិងអភិវឌ្ឍន៍កាន់តែប្រសើរ។

លោកថា៖ «ការចូលរួមរបស់ពលរដ្ឋគឺល្អ ពលរដ្ឋគាត់ចូលរួមដោយសារតែទ្រព្យទាំងអស់ហ្នឹង គឺជាទ្រព្យសាធារណៈ អ៊ីចឹងបើទ្រព្យសាធារណៈពលរដ្ឋណាក៏មានសិទ្ធិក្នុងការចូលរួម ក្នុងការផ្តល់យោបល់និងសំណូមពរទៅរដ្ឋាភិបាលដែរ។ ដែលរដ្ឋាភិបាលទាល់តែមានការរិះគន់ ឬមួយប្រតិកម្មបានលោកចាត់វិធានការ អានេះហើយជាកង្វះខាតរបស់រដ្ឋាភិបាលនោះ អ៊ីចឹងរដ្ឋាភិបាលក៏គួរតែពិចារណា ក្នុងការបើកសេរីភាពបញ្ចេញមតិហ្នឹង ឲ្យបានច្រើន ដើម្បីឲ្យមហាជនក្នុងការធ្វើជាភ្នែកច្រមុះ និងការផ្តល់ព័ត៌មាននិងជួយដល់រដ្ឋាភិបាលវិញដែរ»។

ប៉ុន្មានឆ្នាំចុងក្រោយនេះ ពលរដ្ឋច្រើនម៉ឺននាក់ បានអះអាងពីការចាញ់បោកក្រុមឧកញ៉ា ដែលស្និទ្ធនឹងមេដឹកនាំ ដូចជាអ្នកចាញ់បោក អតីតឧកញ៉ា ឡេង ចាន់ណា អតីតឧកញ៉ា ហ៊ី គីមហុង និងឧកញ៉ា ឡេង ណាវ៉ាត្រា ជាដើម ដែលយុត្តិធម៌ពួកគេ ត្រូវបានប្រព័ន្ធយុត្តិធម៌កប់ចោលច្រើនឆ្នាំ ធ្វើឱ្យជនរងគ្រោះខ្លះ ស្លាប់ជាបន្តបន្ទាប់ ដោយសារវិបត្តិបំណុល។

រីឯក្រុមឧកញ៉ា ជាមេឧក្រិដ្ឋជនឆបោកទាំងនោះ ត្រូវបានគេមើលឃើញថា បានការពារដោយមេដឹកនាំ ក្រោមសារ «មិនសម្លាប់មេមាន់ ដើម្បីយកពង»៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។