នាយករដ្ឋមន្រ្តីកម្ពុជា លោក ហ៊ុន ម៉ាណែត រងការរិះគន់ថា កំពុងរួមដៃជាមួយឧកញ៉ា ឡេង ណាវ៉ាត្រា បោកប្រាស់ពលរដ្ឋក្រោមរូបភាពជួយឃោសនាឱ្យបុរីឧកញ៉ារូបនេះ លើបណ្តាញសង្គម ចំពេលអតិថិជនទាមទារយុត្តិធម៌ករណីសង់ផ្ទះគ្មានស្តង់ដារនិងខ្លះទិញផ្ទះជាង៣ឆ្នាំតែមិនបានផ្ទះ។
ការរិះគន់នេះ ក្រោយ លោក ហ៊ុន ម៉ាណែត ប្រើប្រាស់ហ្វេសប៊ុកខ្លួនផ្សព្វផ្សាយវីឌីអូជាង១នាទី បង្ហាញពីបុរសម្នាក់និយាយថា បានទទួលប្លង់ពីក្រសួងរៀបចំដែនដី ដែលក្រសួងលើកលែងពន្ធប្រថាប់ត្រា និងមិនគិតថ្លៃសេវារដ្ឋបាល ព្រោះគាត់ជាអតិថិជនបុរីឧកញ៉ា ឡេង ណាវ៉ាត្រា។
ក្នុងវីឌីអូដែល លោក ហ៊ុន ម៉ាណែត បង្ហោះកាលពីថ្ងៃទី២០ ខែមេសានោះ ត្រូវបានក្រុមជនរងគ្រោះចូលទៅបញ្ចេញមតិថា ឧកញ៉ា ឡេង ណាវ៉ាត្រា បានរំលោភលើកិច្ចសន្យាទិញលក់ ធ្វើឱ្យបាត់បង់ផលប្រយោជន៍អតិថិជន និងទាមទារឱ្យ លោក ហ៊ុន ម៉ាណែត រកយុត្តិធម៌។
ហ្វេសប៊ុកឈ្មោះ Tong Khorng សរសេរថា ការបំពានរបស់ឧកញ៉ា ឡេង ណាវ៉ាត្រា មានដូចជា សង់ផ្ទះយឺតឱ្យអតិថិជនម្នាក់ៗពី៣ទៅ៤ឆ្នាំ សន្យាប្រគល់ផ្ទះប្រគល់លុយសំណង តែបុរីធ្វើមិនបាន ប្រគល់តែផ្ទះនៅខ្វះលុយសំណង មិនដឹងថាសងលុយអតិថិជនលើសកុងត្រាពេលណា។
បន្ថែមលើនេះ បុរីឡេង ណាវ៉ាត្រា បង្ខំឱ្យអតិថិជនដោះដូរផ្ទះដែលបុរីមិនបានធ្វើទៅដល់ ឬដីមានបញ្ហា ដើម្បីកាត់បន្ថយការចំណាយថវិកាច្រើនក្នុងការចាក់ដីសាងសង់ ធ្វើឱ្យអតិថិជនខាតបង់ ដូចជា ថែមលុយ ថែមកុងត្រាសាងសង់២ឆ្នាំលើកុងត្រាចាស់ សរុប៥ឆ្នាំ ហើយលុយលើសកុងត្រារបស់អតិថិជនត្រូវបានភាគីបុរីកាត់ចោលទាំងអស់។
ប្រភពសរសេរក្នុងន័យដើមថា៖ «អំឡុងពាក់កណ្តាលឆ្នាំ២០២៤ ខាងបុរីបានកែប្រែប្លង់ Masterplan ដោយចិត្តឯង ដោយមិនប្រាប់ឬរកដំណោះស្រាយជូនអតិថិជនរងគ្រោះ ក្នុងការកែប្រែប្លង់បំបាត់ផ្លូវធំតូចអស់ជាច្រើនខ្សែ ជាពិសេសបានបំបាត់ផ្លូវ២០ម៉ែត្រនៅខាងក្រោយផ្សារក្នុង(ប្លុក៨៧)។ នេះហើយជាហេតុធ្វើឱ្យអតិថិជនដែលបានទិញផ្ទះនៅជុំវិញក្បែរៗនោះ កើតទុក្ខមិនសុខចិត្តជាខ្លាំង ពេលទិញប្លង់ឆ្នាំឆ្នាំ២០២០ មានផ្លូវធំតូចខ្វាត់ខ្វែង តែពេលឱ្យលុយអស់ក្នុងឆ្នាំ២០២៤ បែរជាខាងបុរីកែប្រែប្លង់ និងបានបំបាត់ផ្លូវធំតូចអស់ជាច្រើនខ្សែ»។
បន្ថែមលើនេះ ហ្វេសប៊ុកឈ្មោះ Prom Sao រៀបរាប់ថា លោកទិញផ្ទះនៅបុរីឡេងណាវ៉ាត្រា គម្រោង៦A ប្លុកB តាំងពីឆ្នាំ២០២១ តែមិនបានផ្ទះ ហើយបច្ចុប្បន្នលោកជួលបន្ទប់ស្នាក់នៅ។
លោកអំពាវនាវឱ្យ លោក ហ៊ុន ម៉ាណែត ជំរុញទៅភាគីបុរីឱ្យកំណត់ពេលជាក់លាក់ ដើម្បីបញ្ចប់គម្រោងសាងសង់ផ្ទះឱ្យអតិថិជនរងគ្រោះនៅបុរីឡេងណាវ៉ាត្រា គម្រោង៦A។
លោកបញ្ជាក់ក្នុងន័យដើមថា៖ «ខ្ញុំបាទបានខ្ចីធនាគារមកបង់ផ្ដាច់ សុខចិត្តរកលុយបង់ធនាគារ គិតថាបានផ្ទះមួយគ្រាន់រស់នៅហ្នឹងគេ ឥលូវមានអារម្មណ៍ថាអស់សង្ឃឹមណាស់»។
ដោយឡែក ហ្វេសប៊ុក Pho Phanet ឱ្យដឹងថា គាត់ជាអតិថិជនរបស់បុរីឡេង ណាវ៉ាត្រា ៦A បានព្យាយាមរកដំណោះស្រាយពីភាគីបុរី តែគ្មានលទ្ធផលនិងការឆ្លើយតបទាល់តែសោះ។
បញ្ហាដែលគាត់ជួប រួមមាន ផ្ទះវីឡាបែបថៃដែលគាត់បានទិញ ម្ចាស់គំរោងបានបំពានដោយយកលូបង្ហូរទឹក និងទុយោទឹកស្អាតបង្កប់នៅក្នុងដីឯកជន ហើយក្រុមហ៊ុនមិនអនុញ្ញាតឱ្យធ្វើរបងទ្វារខាងមុខផ្ទះឡើយ។ ករណីនេះ អ្នកស្រីបារម្ភថា បើមានចោរចូលក្នុងផ្ទះ ឬបាត់បង់ទ្រព្យសម្បត្តិក្នុងរបងតើមានអ្នកណានឹងទទួលខុសត្រូវ។
ប្រភពបន្តថា នៅតំបន់ដោះដូរយកជាដីភាគីបុរីសន្យាថា អ្នកដោះដូរដីនឹងទទួលបានផ្លូវ៨ម៉ែត្រ តែជាក់ស្តែងខាងបុរីធ្វើផ្លូវតែ៦ម៉ែត្រ។
ជុំវិញរឿងនេះ តំណាងរាស្រ្តគណបក្សសង្រ្គោះជាតិ លោក ម៉ែន សុថាវរិន្ទ ចាត់ទុកគ្រួសារហ៊ុន និងឧកញ៉ា ឡេង ណាវ៉ាត្រា ជាបក្សពួកតែមួយ ទើបលោក ហ៊ុន ម៉ាណែត ហ៊ានផ្សព្វផ្សាយវីដេអូការពារបុរីឆបោកដោយចំហរបែបនេះ ដើម្បីឱ្យបន្តលក់ដី និងផ្ទះ ថែមទៀតដើម្បីរកលុយទ្រទ្រង់អំណាចគ្រួសារហ៊ុន។
លោកថា៖ «សុទ្ធតែបក្ខពួកគ្រួសារហ៊ុន ក្នុងនាមជានាយករដ្ឋមន្ត្រីជាអ្នកដឹកនាំប្រទេសជាតិ មិនដែលធ្វើអ៊ីចឹងទេ គេត្រូវតែជួយដោះស្រាយប្រជាពលរដ្ឋ ក្នុងនាមជារដ្ឋាភិបាលប្រទេសមួយ ត្រូវដោះស្រាយប្រជាពលរដ្ឋទាំងអស់ បញ្ហាហ្នឹងត្រូវតែដោះស្រាយឱ្យគេហើយ។ មិនដែលទៅដោះស្រាយឱ្យគេរឿងបុគ្គលម្នាក់ៗទេ។ ក្នុងនាមជាថ្នាក់ដឹកនាំ យើងត្រូវដោះស្រាយ ជាទូទៅ យើងគិតធ្វើម៉េច យើងដោះស្រាយជូនពលរដ្ឋទាំងអស់ ប៉ុន្តែតាមមើលទៅគឺគាត់អសមត្ថភាពនឹងធ្វើហើយ ក៏គាត់ខំដើរតួយ៉ាងណាក៏ដោយវាទៅមិនរួចយក»។
ប្រធានអង្គការប្រជាធិតេយ្យខ្មែរប្រចាំប្រទេសអូស្រ្តាលី លោក ស៊ឹង សែនករុណា ចាត់ទុកសកម្មភាព លោក ហ៊ុន ម៉ាណែត នេះថា កំពុងជួយការពារឧកញ៉ាខិលខូចជាហេតុធ្វើឱ្យច្បាប់ជាប់គាំង មិនហ៊ានកាត់ទោសឧកញ៉ាប្រព្រឹត្តល្មើសច្បាប់ស្និទ្ធិមេដឹកនាំបាន។
លោកថា៖ «បង្ហាញអំពីការទំនាក់ទំនង និងការជួយជ្រោមជ្រែងទៅវិញ អ៊ីចឹងអាចឲ្យប្រជាពលរដ្ឋ ឬក៏អ្នកដែលគេតាមដានអំពីបញ្ហាអយុត្តិធម៌សង្គម ឬក៏បញ្ហានយោបាយហ្នឹង គេឃើញកាន់តែច្បាស់ថា ឧកញ៉ានិងមេដឹកនាំប្រទេសនេះ គឺជាក្រុមតែមួយ គឺជាបក្ខពួកតែមួយ។ ជារឿងដែលឲ្យពួកគាត់ពិបាកក្នុងការទាមទាររកដំណោះស្រាយ និងទាមទាររកយុត្តិធម៌នៅពេលដែលពួកគាត់រងគ្រោះ ដោយសារតែឧកញ៉ាទាំងអស់ហ្នឹង។ ចឹងការទៅខំមិនអីទាំងអស់ហ្នឹង វាគឺជាព័ត៌មានគប្បីនាយករដ្ឋមន្ត្រីត្រូវយកចិត្តទុកដាក់ទៅលើប្រជាពលរដ្ឋ ដែលជាម្ចាស់ឆ្នោត ធ្វើការស្រាវជ្រាវព័ត៌មានឲ្យបានច្បាស់នៅក្នុងបញ្ហារបស់ប្រជាពលរដ្ឋ ហើយរកដំណោះស្រាយឲ្យឆ្លើយតបជាមួយនឹងការទាមទារ និងការចង់បានរបស់ប្រជាពលរដ្ឋ»។
យ៉ាងណា នាយករដ្ឋមន្រ្តីកម្ពុជា លោក ហ៊ុន ម៉ាណែត កាលពីខែមេសា ឆ្នាំ២០២៤ អំឡុងមានរលកតវ៉ាខ្លាំងពីជនរងគ្រោះចាញ់បោកឧកញ៉ាខិលខូច ធ្លាប់ថ្លែងជាសាធារណៈថា ការមិនចាត់ការលើក្រុមអ្នកជំនួញបោកពលរដ្ឋ ជាយុទ្ធសាស្រ្តរក្សាទុកមេមាន់ដើម្បីយកពង។
លោកថា៖ «រដ្ឋាភិបាលពិតណាស់ មិនងាកចាប់ៗនោះទេ យើងមិនអាចយករូបមន្តសម្លាប់មេមាន់នោះទេ យើងត្រូវធ្វើម៉េចឲ្យមេមាន់នៅរស់ ដើម្បីយកពងទៅនាំឲ្យបងប្អូនប្រជាពលរដ្ឋនេះជាគោលដៅធំ»។
ព្រះមហាក្សត្រកម្ពុជា បានចេញព្រះរាជ្យក្រឹត្យស្តីពីគោរម្យងារឧកញ៉ា នៅថ្ងៃទី២៣ ខែតុលា ឆ្នាំ២០២៤នេះ តម្រូវឱ្យលោកអ្នកឧកញ៉ា អ្នកឧកញ៉ា និងឧកញ៉ា ត្រូវគោរពរដ្ឋធម្មនុញ្ញ ច្បាប់ និងលិខិតបទដ្ឋានគតិយុត្តនានារបស់ព្រះរាជាណាចក្រកម្ពុជា ប្រកាន់ខ្ជាប់នូវសីលធម៌ល្អប្រកបមុខរបរស្របច្បាប់ និងចៀសវាងសកម្មភាពណា ដែលធ្វើឱ្យប៉ះពាល់ដល់កិត្តិយស និងសេចក្តីថ្លៃថ្នូររបស់គោរមងារឧកញ៉ា។
ប៉ុន្តែបើគេសង្កេតមើលករណីឧកញ៉ា ឡេង ណាវ៉ាត្រា បំពានកិច្ចសន្យាទិញលក់ផ្ទះច្រើនឆ្នាំទៅនេះ គ្មានចំណាត់ការច្បាប់ទេ ដែលរងការរិះគន់ថាមានគ្រួសារជាខ្នងបង្អែក ទើបធ្វើឱ្យចំណាត់ការផ្លូវច្បាប់ត្រូវជាប់គាំងច្រើនឆ្នាំបែបនេះ៕
