អធិការដ្ឋាននគរបាលក្រុងប៉ោយប៉ែត ចេញលិខិតមួយសន្លឹកបដិសេធថា សារសំឡេងសន្ទនា រវាងមន្ត្រីជំនាញ និងឈ្មួញជួញដូរគ្រឿងញៀន ដែលគេបានទម្លាយ មិនមែនចេតនាទទួលសំណូក ដើម្បីជាថ្នូរមិនបង្ក្រាបបទល្មើសនេះទេ តែថា ជាកម្លាំងបង្កប់ ដើម្បីឈានទៅបង្ក្រាបបទល្មើសគ្រឿងញៀន។
តាមលិខិតបំភ្លឺ ចុះថ្ងៃទី២២ ខែមេសា ឆ្នាំ២០២៥ អធិការដ្ឋានគរបាលក្រុងប៉ោយប៉ែត នៃស្នងការដ្ឋាននគរបាលខេត្តបន្ទាយមានជ័យ បានលើកឡើងថា កាលពីថ្ងៃទី២១ ខែមេសា ឆ្នាំ២០២៥ មានគណនីហ្វេសប៊ុកមួយឈ្មោះ Na Det បានបង្ហោះសំឡេងសន្ទនា រវាងលោកអធិការរងគ្រឿងញៀន កែវ ដួល និងឈ្មួញជួញដូរគ្រឿងញៀន ឈ្មោះ ចាន់ ពៅ ហៅ ពៅ ហ៊ុប អំពីទំនាក់ទំនងការទទួលសំណូកកន្លងមក ជាថ្នូរការការមិនបង្ក្រាបគ្រឿងញៀន ។
ប្រភពនោះអះអាងថា តាមការស្រាវជ្រាវ ឈ្មោះ ចាន់ ពៅ ជាកម្លាំងបណ្តាញសម្ងាត់របស់លោក កែវ ដួល អធិការរងទទួលផែនការងារប្រឆាំងគ្រឿងញៀន ហើយថា ការចោទប្រកាន់ទៅលើ លោក កែវ ដួល ថា ទទួលសំណូកនោះគឺជារឿងមិនពិត។
នគរបាលក្រុងប៉ោងប៉ែត បកស្រាយថា សារសំឡេងសន្ទនាដែលបានបែកធ្លាយនោះ គឺជានីតិវិធីរបស់នគរបាល ក្នុងការញុះញង់ ឱ្យសហការជាមួយកម្លាំងជំនាញ ដើម្បីឈានដល់ការបង្ក្រាបបទល្មើសគ្រឿងញៀនតែប៉ុណ្ណោះ មិនមែនជាការសន្ទនា ដើម្បីទទួលសំណូលនោះទេ ។
ជុំវិញអំពើពុករលួយគ្រឿងញៀននេះ រដ្ឋមន្ត្រីក្រសួងមហាផ្ទៃ លោក ស សុខា កាលពីខែមីនា ធ្លាប់ព្រមានប្រើកណ្តាប់ដៃដែក លើវិធានតំណែងមន្ត្រីទាំងឡាយណា ដែលមិនព្រមដកខ្លួនពីការទទួលផលពីបទឧក្រិដ្ឋជួញដូរគ្រឿងញៀនេះ ខណៈបទឧក្រិដ្ឋនេះបានហក់ឡើងយ៉ាងគំហុក។
លោកថា៖ «ខ្ញុំជឿជាក់ថា បញ្ហាគ្រឿងញៀននេះ បានមិនពាក់ព័ន្ធនឹងអ្នកផ្ទៃក្នុងទេ គ្រឿងញៀនវាមិនសូវធំដល់ម្ល៉េះទេ សម្រាប់កិច្ចការនេះ ខ្ញុំក៏សុំឱ្យពង្រឹងនិងមានការយកចិត្តទុកដាក់ ពន្លៀតការស្រាវជ្រាវ ហើយការស្រាវជ្រាវ តែពួកអ្នកជួញដូរទេ ត្រូវស្រាវជ្រាវពន្លៀតលើសមត្ថកិច្ចផងដែរ ដល់អីចឹងទៅព័ត៌មានមួយចំនួនមិនទាន់ចុះបង្ក្រាបផងដឹងអស់រលីង។ សំណួរសួរថាបើគ្មានការផ្តល់ជូនមុន វាមិនបែកនោះទេ»។
បើតាមរបាយការណ៍មន្ត្រីជំនាញ ក្នុងឆ្នាំ២០២៤ គ្រឿងញៀនដែលសមត្ថកិច្ច រឹបអូសបាន ជិត១៥តោន (១៤.៩តោន) ខណៈឆ្នាំ២០២៣ បង្ក្រាបបានប្រមាណជា ៤តោន។ តួរលេខនេះ បង្ហាញថា កំណើនហក់ឡើងជិត៤ដង នៅឆ្នាំ២០២៤៕
