ស្ត្រីដែលបានស្លាប់បន្ទាប់ពីសម្រាលកូនបាន៤ម៉ោង នៅមន្ទីរពេទ្យបង្អែកប៉ោយប៉ែត ស្ថិតក្នុងក្រុងប៉ោយប៉ែត ខេត្តបន្ទាយមានជ័យនេះ មានឈ្មោះ ឈួយ សុគន្ធា អាយុ៣៣ឆ្នាំ មានកូនពីរនាក់កូនស្រីច្បងអាយុ៥ឆ្នាំ និងកូនប្រុសដែលទើបនឹងកើតមានទម្ងន់៣គីឡូ១ខាំ។
លោក រូ ឧត្តម ដែលជាប្តីរបស់សពស្ត្រីដែលស្លាប់ បានបង្ហោះនៅលើហ្វេសប៊ុករបស់ខ្លួនថា «ប្រពន្ធខ្ញុំស្លាប់ហើយបងប្អូនឆ្លងទន្លេរួច កូនសុវត្ថិភាព តែម្តាយធ្លាក់ឈាម ឥតបានលាមួយម៉ាត់ សូមអូនទៅកាន់សុគតិភព កម្មវិធីបុណ្យសពនៅភូមិព្រៃគប់»។
ជុំវិញការស្លាប់នេះ «សារព័ត៌មានSBTស្នេហាជាតិ» បានធ្វើការផ្សាយបន្តផ្ទាល់ពីពិធីបុណ្យសពនៅភូមិព្រៃគប់សង្កាត់អូរឫស្សី១ ក្រុងប៉ោយប៉ែត កាលពីថ្ងៃទី២២ខែមេសា ដោយបានសម្ភាសន៍ជាមួយ លោក រូ ឧត្តម និងសមាជិកគ្រួសារស្ត្រីរងគ្រោះមួយចំនួន។
លោក រូ ឧត្តម បាននិយាយរៀបរាប់ថា បន្ទាប់ពីប្រពន្ធរបស់លោកបានឈឺពោះតិចៗ នៅវេលាម៉ោង២កន្លះទៀបភ្លឺថ្ងៃទី២១ ខែមេសា លោកបាននាំប្រពន្ធទៅដល់មណ្ឌលសុខភាពអូរឫស្សី១ ប៉ុន្តែពេលទៅដល់ក៏លែងឈឺពោះ។
ដល់ពេលម៉ោង៣ ទើបបានឈឺពោះទៀតហើយឈឺរហូតដល់ម៉ោង ៥:៥៥នាទី ទើបបានសម្រាលកូនតាមធម្មជាតិ ហើយពេលសម្រាលកូនរួចមើលទៅទាំងកូនទាំងម្តាយមានសុខភាពល្អ។
ប៉ុន្តែប្រហែល២០នាទីក្រោយមក ប្រពន្ធរបស់លោកបានហូរឈាមយ៉ាងខ្លាំង ហើយគ្រូពេទ្យប្រាប់ថា ដោយសារស្បូនខ្សោយ ដូច្នេះត្រូវបញ្ជូនទៅមន្ទីរពេទ្យបង្អែកប៉ោយប៉ែត។
លោកថា៖ «ពេលទៅដល់មន្ទីរពេទ្យដំបូងគេអត់មានធ្វើអីទេ គឺគាត់សួរខ្ញុំថា ប្រពន្ធខ្ញុំឈាមប្រភេទអី? ខ្ញុំក៏ប្រាប់គាត់ថា អត់ដឹងគាត់ឈាមប្រភេទអីទេ ហើយក៏អត់បានវះកាត់អីដែរ ដោយឃើញពេទ្យបូមឈាមយកទៅពិនិត្យទាំងដែលអ្នកជំងឺធ្វើទុក្ខយ៉ាងខ្លាំងបែកពពុះមាត់ហើយ ហើយខ្ញុំក៏ឆ្ងល់ដែរហេតុអីក៏ពេទ្យមិនវះកាត់ និងមិនបញ្ចូលឈាមក្នុងពេលហ្នឹងតែម្តង ហេតុអីក៏បណ្តោយទុកឱ្យគាត់បាត់បង់ជីវិតក្នុងពេលហ្នឹងតែម្តង»។
បុរសជាប្តីរូបនេះ បានបន្ទោសការស្លាប់ប្រពន្ធរបស់ខ្លួនទៅលើភាពយឺតយ៉ាវយ៉ាងខ្លាំងនៃរថយន្តសាមុយដឹកអ្នកជំងឺ និងអសមត្ថភាពរបស់គ្រូពេទ្យ។
វីអូឌី មិនអាចទាក់ទងសុំការបំភ្លឺលើបញ្ហានេះពី លោកឱក ទីនណា ប្រធានមន្ទីរពេទ្យបង្អែកប៉ោយប៉ែត និងលោក ឡេ ច័ន្ទសង្វាត ប្រធានមន្ទីរសុខាភិបាលខេត្តបន្ទាយមានជ័យ បានទេកាលពីថ្ងៃទី២៤ ខែមេសា។
ប៉ុន្តែជុំវិញការស្លាប់របស់ស្ត្រីសម្រាលកូននេះ មន្ទីរពេទ្យបង្អែកប៉ោយប៉ែត នៅថ្ងៃទី២៣ ខែមេសា បានចេញសេចក្តីបំភ្លឺចំពោះការការចុះផ្សាយរបស់គណនីហ្វេសប៊ុកឈ្មោះ «សារព័ត៌មានSBTស្នេហាជាតិ» ដែលបានលើកឡើថា គួរឱ្យសង្វេគម្តាយសម្រាលកូនដាក់លើដើមទ្រូងបាន២០នាទី ហូរឈាមមិនឈប់រហូតដឹកទៅសង្គ្រោះនៅមន្ទីរពេទ្យបង្អែកប៉ោយប៉ែត ក៏នៅតែស្លាប់ចោលកូន តើនេះជាកំហុសអ្នកណា?
មន្ទីរពេទ្យបង្អែកប៉ោយប៉ែត បានបញ្ជាក់លើសេចក្តីបំភ្លឺថា តាមការពិនិត្យដំបូងរបស់គ្រូពេទ្យឃើញថា ស្ត្រីបានបែកទឹកភ្លោះនៅផ្ទះមុនពេលបញ្ជូនមកដល់មណ្ឌលសុខភាព ហើយបុគ្គលិកឆ្មបបានរៀបចំទទួលស្ត្រីឱ្យសម្រាកពិនិត្យសុខភាពនិងបានផ្តល់ប្រឹក្សាដល់ស្ត្រី និងស្វាមី អំពីស្ថានភាពសុខភាពនិងដំណាក់កាលនៃការឈឺពោះសម្រាលកូនតាមលក្ខណៈបច្ចេកទេស។
មន្ទីរពេទ្យបង្អែកប៉ោយប៉ែត បានអះអាងថា បុគ្គលិកឆ្មបបានយកចិត្តទុកដាក់តាមដានអំពីស្ថានភាពសុខភាព និងការឈឺពោះរបស់ស្ត្រីរូបនេះ រហូតដល់ម៉ោង៥និង៣៥នាទីព្រឹក ទើបមាត់ស្បូនបើកអស់ហើយឆ្មបក៏បានសម្រាលកូនជូនគាត់មានទម្ងន់៣ ១០០ក្រាម ភេទប្រុស ព្រមទាំងអនុវត្តដំណាក់កាលទម្លាក់សុកតាមលក្ខណៈបច្ចេកទេស។
ក្រោយទម្លាក់សុក ស្ត្រីមានការធ្លាក់ឈាម ឆ្មបមណ្ឌលសុខភាពក៏បានទំនាក់ទំនងហៅរថយន្តគិលានសង្គ្រោះពីមន្ទីរពេទ្យបង្អែកប៉ោយប៉ែត នៅម៉ោង៦និង២៦នាទីព្រឹក ដើម្បីបញ្ជូនស្ត្រីមកធ្វើការជួយសង្គ្រោះបន្តនៅមន្ទីរពេទ្យបង្អែកប៉ោយប៉ែត។
នៅម៉ោង៧និង១៥នាទីព្រឹក អ្នកជំងឺបានដឹកមកដល់មន្ទីរពេទ្យប៉ោយប៉ែត ហើយត្រូវបានបញ្ជូនចូលផ្នែកសង្គ្រោះបន្ទាន់ ដោយមានក្រុមគ្រូពេទ្យ និងអ្នកបច្ចេកទេស រង់ចាំរួចជាស្រេចក្នុងការជួយសង្គ្រោះ។
ប្រភពដដែលបន្តថា ទោះបីស្ថានភាពអ្នកជំងឺធ្ងន់ធ្ងរ ក៏ក្រុមគ្រូពេទ្យនៅតែបន្តយកចិត្តទុកដាក់អនុវត្តការងារសង្គ្រោះតាមលក្ខណៈបច្ចេកទេស និងមានការបញ្ចូលឈាមជាបន្តបន្ទាប់ ជាមួយបច្ចេកទេសសង្គ្រោះបន្តធ្វើយ៉ាងសកម្ម ប៉ុន្តែស្ថានភាពអ្នកជំងឺបានវិវត្តន៍ទៅរកភាពធ្ងន់ធ្ងរ ទោះបីក្រុមគ្រូពេទ្យប្រឹងប្រែងជួយសង្គ្រោះយ៉ាងណាក៏ដោយ នៅតែមិនអាចជួយបាន រហូតដល់អ្នកជំងឺទទួលមរណៈភាព នៅម៉ោង៩និង៣០នាទីព្រឹកថ្ងៃទី២១ខែមេសា។
សេចក្តីបំភ្លឺរបស់មន្ទីរពេទ្យបញ្ជាក់ថា តាមការពិនិត្យស៊ីជម្រៅតាមលក្ខណៈបច្ចេកទេសរបស់ក្រុមគ្រូពេទ្យស្ត្រីអាយុ៣៣ឆ្នាំរូបនេះ បានទទួលមរណៈភាពដោយសាររោគវិនិច្ឆ័យ «ធ្លាក់ឈាមធ្ងន់ធ្ងរក្រោយសម្រាល និងស្បូនទន់មិនកន្រា្តក់»។
ប៉ុន្តែបើតាម លោក រូ ឧត្តម នៅពេលប្រពន្ធលោកដឹកទៅដល់មន្ទីរពេទ្យបង្អែកប៉ោយប៉ែត លោកឃើញគ្រូពេទ្យគ្រាន់តែយកដៃច្របាញ់ញីពោះ និងសង្កត់ដើមទ្រូងធ្វើចលនាបេះដូង ហើយដល់ពេលប្រពន្ធលោកត្រដរខ្យល់ខ្លាំង ទើបបានយកឈាមមកដាក់ មិនឃើញមានប្រើឧបករណ៍ទំនើបអ្វីក្នុងការជួយសង្គ្រោះនោះទេ។ ដោយសារតែមិនទុកចិត្តគ្រូពេទ្យនៅមន្ទីរពេទ្យបង្អែកប៉ោយប៉ែត លោក រូ ឧត្តម បានស្នើសុំយកប្រពន្ធលោកទៅមន្ទីរពេទ្យខេត្តបន្ទាយមានជ័យទៀត។ ប៉ុន្តែគ្រូពេទ្យបានបដិសេធមិនឱ្យយកចេញឡើយទុករហូតដល់ប្រពន្ធលោកស្លាប់នៅម៉ោងជាង៩ព្រឹក។
បុគ្គលិកពេទ្យ នៅមន្ទីរពេទ្យបង្អែកប៉ោយប៉ែតម្នាក់ ដែលស្ថិតនៅក្នុងហេតុការណ៍នេះ បានប្រាប់វីអូឌី ក្នុងលក្ខខណ្ឌមិនបញ្ចេញឈ្មោះ កាលពីថ្ងៃទី២២ខែមេសាថា ការស្លាប់របស់ស្ត្រីសម្រាលកូនឆ្លងទន្លេរូបនេះ គឺបណ្តាលមកពីគ្រូពេទ្យអសម្ថភាពទាំងបច្ចេកទេសនិងការគ្រប់គ្រង ជាពិសេសការអសមត្ថភាពរបស់ប្រធានមន្ទីរពេទ្យតែម្តង។
ប្រភពដដែល បានអះអាងក្នុងសម្តីដើមថា៖ «ពេលបញ្ជូនអ្នកជំងឺមកពីមណ្ឌលសុខភាពម្តងៗ ពិបាកណាស់ តៃកុងឡាន ប្រចាំគ្នា ហើយទាល់តែមេបញ្ជាផ្ទាល់ទើបឡានអាចចេញទៅយកអ្នកជំងឺបាន ហើយពេលខ្លះយប់ជ្រៅ បុគ្គលិកតេទៅប្រធានមន្ទីរពេទ្យមិនចូល ពេលខ្លះចូលហើយក្រលើកទូរសព្ទ ដល់អ៊ីចឹងអ្នកជំងឺធ្ងន់ខ្លះហួសពេលទៅយកហើយបានស្លាប់ក៏មាន»។
សូមរំឭកថា កាលពីខែមីនា ឆ្នាំ២០២៤ ស្ត្រីម្នាក់ដែលឈឺពោះសម្រាលកូនហើយមានអាការៈធ្លាក់ឈាមខ្លាំងដូចស្ត្រីខាងលើ ក៏បានស្លាប់ដែរ នៅក្នុងវេនប្រចាំការរបស់អ្នកគ្រូពេទ្យ ឡាយ អ៊ីជួង ដែលជាប្រធានផ្នែកសម្ពព និងជាអនុប្រធានមន្ទីរពេទ្យបង្អែកប៉ោយប៉ែត។
បុគ្គលិកនៅមន្ទីរពេទ្យបង្អែកប៉ោយប៉ែត ធ្លាប់បានអះអាងប្រាប់វីអូឌីក្នុងលក្ខខណ្ឌមិនបញ្ចេញឈ្មោះថា អ្នកស្រី អ៊ីជួង គ្មានជំនាញក្នុងការជួយសង្គ្រោះស្ត្រី ដែលឈឺពោះសម្រាលកូននោះទេ ទើបធ្វើឱ្យស្ត្រីដែលមកសម្រាលកូននៅមន្ទីរពេទ្យនេះ ច្រើនតែស្លាប់ជាញឹកញាប់ នៅចំវេនដែលអ្នកស្រី អីជួង ប្រចាំការ។
បុគ្គលិកមន្ទីរពេទ្យបង្អែកប៉ោយប៉ែត បានអះអាងថា យ៉ាងហោចណាស់ មានម្តាយនិង ទារកជាង ១០នាក់បានស្លាប់ជាបន្តបន្ទាប់នៅក្នុងឆ្នាំ២០២៤កន្លងមក នៅមន្ទីរពេទ្យបង្អែកប៉ោយប៉ែតផ្នែកសម្ភព។ ប៉ុន្តែនៅក្នុងរបាយការណ៍ដែលមន្ទីរពេទ្យនេះដាក់ទៅថ្នាក់ជាតិ បែរជាថា គ្មានម្តាយនិងទារកស្លាប់ទៅវិញ។
គួររំឭកថា នៅក្នុងពិធីបើកការដ្ឋានសាងសង់មន្ទីរពេទ្យ សាកលវិទ្យាល័យវិទ្យាសាស្ត្រសុខាភិបាល កាលពីថ្ងៃទី១០ ខែធ្នូ ឆ្នាំ២០២៤ លោកនាយករដ្ឋមន្ត្រី ហ៊ុន ម៉ាណែត បានជំរុញឱ្យមានការយកចិត្តទុកដាក់លើការពង្រឹងធនធានមនុស្សក្នុងវិស័យសុខាភិបាល គឺត្រូវពង្រឹងសមត្ថភាពគ្រូពេទ្យ បុគ្គលិកពេទ្យឱ្យមានគុណភាព ក្រមសីលធម៌វិជ្ជាជីវៈ និងក្រមប្រតិបត្តិ។
លោកក៏បានណែនាំឱ្យក្រសួងសុខាភិបាល ត្រូវបន្តពង្រឹងការអនុវត្តយន្តការតាមដាន និងការកែលម្អគុណភាពសេវា នៅមូលដ្ឋានសុខាភិបាលគ្រប់កម្រិតផងដែរ។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាល ក៏មិនអាចសុំការបញ្ជាក់លើបញ្ហានេះបានដែរ នៅថ្ងៃទី២៤ខែមេសា។
ប្រព័ន្ធសុខាភិបាលកម្ពុជាបច្ចុប្បន្ន ទទួលរងការរិះគន់ជាច្រើនពីប្រជាពលរដ្ឋ រហូតដល់គ្រួសារអ្នកជំងឺខ្លះបានចោទប្រកាន់គ្រូពេទ្យមួយចំនួនថា មិនយកចិត្តទុកដាក់ព្យាបាលអ្នកជំងឺ សម្តីអសីលធម៌ ទុកអ្នកជំងឺចោល ចាក់ថ្នាំ ឬផ្តល់ថ្នាំឱ្យអ្នកជំងឺលេប ដោយពុំបានធ្វើរោគវិនិច្ឆ័យ ធ្វើឱ្យអ្នកជំងឺដែលមិនគួរស្លាប់បែរជាស្លាប់។ នៅតាមមន្ទីរពេទ្យរដ្ឋ គ្រូពេទ្យទុកអ្នកជំងឺក្រីក្រដែលគ្មានប្រាក់បង់ថ្លៃព្យាបាលចោល និងអ្នករងរបួសក្នុងគ្រោះថ្នាក់ចរាចរណ៍ដែលសន្លប់ ក៏ត្រូវបានគេទុកចោលឱ្យហូរឈាមរហូតដល់ស្លាប់ផងដែរប្រសិនបើពុំមានអ្នកធានា និងបង់ប្រាក់ជាមុនទេនោះ។
ដោយសារតែកេរ្តិ៍ឈ្មោះគ្រូពេទ្យខ្មែរ តែងតែជះក្លិនមិនល្អ ទើបបច្ចុប្បន្នពលរដ្ឋខ្មែរដែលមានជីវភាពសមរម្យជាច្រើន បានសម្រេចចិត្តចាកចេញទៅព្យាបាលជំងឺ ឬក៏ពិនិត្យសុខភាពនៅប្រទេសថៃ និងវៀតណាម។
អ្នកជំនាញផ្នែកសុខភាព លោកវេជ្ជបណ្ឌិត គួច ម៉េងលី ដែលជាអគ្គនាយកប្រត្តិបត្តិក្រុមហ៊ុនម៉េងលី ជេគួច អេឌ្យូខេសិន បានថ្លែងកាលពីពេលថ្មីៗនេះថា មូលហេតុដែលមន្ទីរពេទ្យនៅប្រទេសជិតខាង នៅតែស្រូបទាញអ្នកជំងឺពីកម្ពុជា ដោយសារគ្រូពេទ្យគេផ្ដល់សេវាកម្មបែបទន់ភ្លន់ រួសរាយរាក់ទាក់ ប្រើប្រាស់សម្ភារៈទំនើប និងមានអនាម័យខ្ពស់ រួមទាំងមានបច្ចេកទេសខ្ពស់ក្នុងការព្យាបាលជំងឺ។
លោកថា ដើម្បីឱ្យការព្យាបាលនៅក្នុងស្រុកមានជំនឿទុកចិត្តពីពលរដ្ឋ កម្ពុជាត្រូវការពេលវេលាច្រើនបន្ថែមទៀត ទាំងការអប់រំ និងការកសាងហេដ្ឋារចនាសម្ព័ន្ធក្នុងវិស័យសុខាភិបាល ជាពិសេសនៅតាមមន្ទីរពេទ្យនានាត្រូវតែមានការបំពាក់ឧបករណ៍ទំនើប។
បើកម្ពុជាមានពេទ្យល្អច្រើន មានអ្នកជំនាញឯកទេសច្បាស់លាស់គ្រប់មុខ ហើយផ្តល់សេវាកម្មមានវិជ្ជាជីវៈច្បាស់លាស់ បូករួមទាំងគ្រូពេទ្យមានក្រមសីលធម៌ល្អ នោះប្រជាពលរដ្ឋនឹងមិនទៅព្យាបាលនៅក្រៅប្រទេសច្រើនឡើយ៕
