ការដែលកាសែតអូស្រ្តាលី ចុះផ្សាយករណីបណ្ឌិត សេង សារី បង្កប់ខ្លួនធ្វើចារកម្មឱ្យលោក ហ៊ុន សែន ត្រូវបានគេមើលឃើញថា ជាសញ្ញាប្រឈមនឹងការបណ្តេញចេញ ពីប្រទេសអូស្រ្តាលី និងជាសារព្រមានដល់ចារកម្មផ្សេងទៀត ឱ្យប្រញាប់ដកខ្លួនពីការធ្វើចារកម្មឱ្យគ្រួសារហ៊ុន ដើម្បីកុំឱ្យមានវាសនាត្រូវបានលោក ហ៊ុន សែន តាមកំទេចក្រោយអស់តម្លៃប្រើប្រាស់។
ការលើកឡើងនេះ ក្រោយកាសែតអូស្រ្តាលីឈ្មោះ ឌឹសាន់ ហើរ៉ល បានចុះផ្សាយកាលពីថ្ងៃទី២៧ខែមេសា ដាក់ចំណងជើងថា៖ «បណ្ឌិតដែលភៀសខ្លួនពីកម្ពុជាបានយកលុយពីរបបដែលខ្លួនរត់គេច»។
កាសែតនោះបានរៀបរាប់ថា លោក សេង សារី ជាបញ្ញាវន្តជនជាតិខ្មែរសារភាពថា ខ្លួនបានទទួលលុយពីមេដឹកនាំរបបដែលខ្លួនរត់គេចឈ្មោះ ហ៊ុន សែន។
ប្រភពនោះ បានដងស្រង់សម្តី លោក សេង សារី ផ្តល់បទសម្ភាសន៍ឱ្យវិទ្យុអាស៊ីសេរី កាលពីអំឡុងខែកុម្ភៈថា ខ្លួនបានធ្វើការងារសម្ងាត់នេះរយៈពេល៤ឆ្នាំហើយ ដោយដំបូងឡើយទទួលថវិកាផ្ទាល់ពី លោក ហ៊ុន សែន យ៉ាងហោចណាស់ ១២ម៉ឺនដុល្លារ។
ជុំវិញរឿងនេះ តំណាងរាស្រ្តគណបក្សសង្រ្គោះជាតិ លោក សួន សូរីដា យល់ថា លោក សេង សារី បានយកពីលោក ហ៊ុន សែន ដើម្បីតាមកំទេចអ្នកប្រជាធិបតេយ្យ កុហកប្រទេសអូស្រ្តាលី ក្រោមលេសគេចខ្លួនពីការធ្វើទុក្ខបុកម្នេញពីលោក ហ៊ុន សែន ដែលលោកថា ទម្រង់នៃអំពើឆបោក។ បញ្ហានេះ លោកថា លោក សេង សារី អាចប្រឈមការបណ្តេញចេញ ព្រោះតែលោកសេង សារី គ្មានភាពស្មោះត្រង់នឹងរដ្ឋាភិបាលអូស្រ្តាលី។
លោក សូរីដា គិតថា នេះជាសារព្រមានឱ្យចារកម្មរបស់លោក ហ៊ុន សែន ផ្សេងទៀតប្រញាប់ដកខ្លួនចេញកុំឱ្យមានវាសនាដូចលោក សេង សារី នៅពេលដែលលែងមានតម្លៃឱ្យលោក ហ៊ុន សែន ប្រើប្រាស់បន្ត។
លោកថា៖ «អ្នកដែលធ្វើជាចារកម្មឲ្យរដ្ឋាភិបាល ក្នុងការតាមកម្ទេចអ្នកប្រជាធិបតេយ្យនៅក្រៅប្រទេសហ្នឹង គួរតែមើលគំរូលោក សេង សារី ដែលរងគ្រោះបែបនេះ មានន័យថានៅពេលដែលខ្លួនអស់តម្លៃគេនឹងកម្ទេចខ្លួនហើយ។ អ៊ីចឹងបើយកល្អទេនៅពេលហ្នឹង អ្នកដែលធ្វើជាចារកម្មហ្នឹង គួរតែចេញមុខមកសារភាពទៅ វាអាចនឹងធូរស្រាលជាងការដែលគេបញ្ចេញ ឬក៏គេចាប់បានណាស់ភស្តុតាង»។
សម្រាប់លោក សូរីដា នយោបាយចារកម្មរបស់ លោក ហ៊ុន សែន កំពុងបង្កការភ័យខ្លាចដល់ពលរដ្ឋរស់នៅក្រៅប្រទេសដែលពួកចារកម្មអាចយកព័ត៌មានឱ្យរដ្ឋាភិបាលគ្រួសារហ៊ុន និងធ្វើឱ្យបរទេសអស់ជំនឿលើពលរដ្ឋខ្មែរជាដើម។
ជាមួយគ្នានេះ អ្នកសិក្សាផ្នែកច្បាប់ និងអភិបាលកិច្ចបែបប្រជាធិបតេយ្យ លោក វ៉ន ចាន់ឡូត បញ្ចេញមតិលើហ្វេសប៊ុករបស់ខ្លួន នៅថ្ងៃទី២៧ ខែមេសាថា វាមិនងាយស្រួលប៉ុន្មានទេ ដែលអ្នកកាន់អំណាចប្រើប្រាស់មនុស្សឱ្យធ្វើចារកម្មឱ្យខ្លួនទាំងបំពានច្បាប់អន្ដរជាតិ និងការផ្ដល់សេចក្ដីទុកចិត្តពីសហគមន៍អន្ដរជាតិថាជាជនរងគ្រោះផ្នែកនយោបាយពិតប្រាកដ។
ករណីនេះ លោកចាត់ទុកថា ជាទម្រង់នៃអំពើពុករលួយផ្នែកនយោបាយធ្ងន់ធ្ងរ មិនស្មោះត្រង់នឹងប្រទេសដែលយល់ព្រមឱ្យស្នាក់នៅអចិន្ដ្រៃយ៍ ដោយផ្ដល់ព័ត៌មានក្លែងក្លាយ មិនត្រឹមត្រូវ និងប្រតិដ្ឋអង្គហេតុ ជាពិសេសអូស្ដ្រាលីជាប្រទេសមានទំនាក់ទំនងល្អជាមួយកម្ពុជា។
សម្រាប់ ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត និយាយថា ករណី លោក សេង សារី ជាការរំលោភលើកិច្ចសន្យាជនភៀសខ្លួននយោបាយ តាមរយៈអង្គការសហប្រជាជាតិ UNHCR។ លោកថា បញ្ហានេះ ប្រឈមការទទួលទោស ពីបទក្លែងបន្លំឯកសារ និងបទចារកម្ម គំរាមកំហែង ធ្វើឱ្យពលរដ្ឋខ្មែរនៅក្រៅប្រទេស មានការព្រួយបារម្ភពីសុវត្ថិភាព។
លោកថា៖ «នៅពេលដែលអាជ្ញាធររដ្ឋាភិបាលអូស្ត្រាលី ចាត់ការទៅលើជនដែលបំពានទាំងច្បាប់អន្តរជាតិ បំពានទាំងច្បាប់អូស្ត្រាលីហ្នឹង! នឹងប្រឈមមុខបាត់ហើយ។ ហើយជាការព្រមានទៅដល់ពួកចារកម្មទាំងពួកចារកម្មធ្វើការនៅទូតខ្មែរនៅប្រចាំអូស្ត្រាលី ឬប្រទេសផ្សេងៗរួមទាំងពួកប្រជាពលរដ្ឋខ្មែរដែលទទួលបាន សិទ្ធិជ្រកកោននយោបាយ ហើយទៅចុះចូលជាមួយ ហ៊ុន សែន នៅភ្នំពេញវិញ អាហ្នឹងត្រូវតែប្រជាពលរដ្ឋ ក្នុងសហគមន៍ហ្នឹង អាចរាយការណ៍ទៅអាជ្ញាធរដូចគ្នាហ្នឹង ដើម្បីឱ្យវាដឹងថាអ្នកហ្នឹង វាក៏បង្កការភ័យខ្លាចគំរាមកំហែងដល់សេចក្ដីសុខ សុវត្ថិភាពប្រជាពលរដ្ឋខ្មែរនៅក្នុងសហគមន៍របស់ប្រទេសខ្លួនរស់នៅហ្នឹង»។
VOD មិនទាន់អាចទាក់លោក សេង សារី បាននៅឡើយទេ គិតត្រឹមម៉ោងផ្សាយនេះ។
ប្រធានព្រឹទ្ធសភា លោក ហ៊ុន សែន ធ្លាប់បានទម្លាយថា ទំនាក់ទំនងរវាងលោក និងលោក សេង សារី មានប្រមាណ៤ឆ្នាំមកហើយ។
នៅពីក្រោយនៃការទំនាក់ទំនងក្នុងនាមជាឪពុក និងកូនធម៌នេះ លោក ហ៊ុន សែន ថា លោកផ្តល់លុយឱ្យ លោក សេង សារី ក្នុង១ខែស្មើ១ម៉ឺនដុល្លារអាមេរិក ក្នុងរយៈពេល១២ខែ ជាថ្នូរនឹងទទួលបានផែនការសម្ងាត់ ពីគណបក្សប្រឆាំងនៅទីក្រុងបាងកក ប្រទេសថៃ។ ក្រៅពីនេះទៀត លោក ហ៊ុន សែន ឱ្យដឹងថា លោកក៏បានជួយបង់ផ្តាច់ផ្ទះឱ្យ លោក សេង សារី មួយខ្នងទៀតនៅស្រុកខ្មែរដែរ។ បន្ថែមពីលើនេះ ក្នុងនាមជាឪពុកធម៌ លោកអះអាងថា បានជួយជ្រោមជ្រែង និងឧបត្ថម្ភទាំងផ្នែកបច្ចេកទេស និងថវិកាមួយចំនួនទៀត ក្នុងពេលអ្នកវិភាគរូបនេះ មានបំណងចង់បង្កើតបក្សនយោបាយមួយ។
ជុំវិញរឿងនេះ ក្រុមអ្នកតស៊ូមតិកម្ពុជា ហៅកាត់ថា (CAT) ធ្លាប់បានចេញសេចក្តីវិភាគកាលពីថ្ងៃទី១៧ ខែកុម្ភៈ រកឃើញថា សកម្មភាពចារកម្មប្រព្រឹត្តដោយលោក ហ៊ុន សែន និងបណ្ឌិត សេង សារី ជាអំពើល្មើសច្បាប់ ដែលអាចឈានទៅប្តឹងរំលាយបក្សប្រជាជនកម្ពុជាចេញពីបញ្ជីបក្សនយោបាយ រួមទាំងប្រឈមមុខចំពោះច្បាប់ជាតិ និងអន្តរជាតិ៕
