ក្រុមអង្គការសង្គមស៊ីវិលក្នុងស្រុក ធ្វើយុទ្ធនាការលើបណ្តាញសង្គម ទាមទារឱ្យទម្លាក់បទចោទ លើសកម្មជនបរិស្ថានចំនួន៥នាក់ ខណៈតុលាការកំពូលគ្រោងប្រកាសសំណុំរឿងសុំនៅក្រៅឃុំ នៅថ្ងៃពុធស្អែកនេះ ដោយសំអាងថា ភាពសកម្មការពារធនធានធម្មជាតិ មិនមែនជាបទល្មើស ។
ក្រុមអង្គការទាំងនោះ មានអង្គការការពារសិទ្ធិមនុស្សលីកាដូ សមាគមការពារសិទ្ធិមនុស្សអាដហុក និងមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ជាដើម។
ពួកគេ បានបង្ហោះរូបថតសកម្មជនទាំងនោះ រួមទាំងភ្ជាប់សាររំឭកថា គិតត្រឹមថ្ងៃទី២៨ ខែមេសានេះ គឺមានចំនួន៣០០ថ្ងៃហើយ ពោលគឺ១០ខែ ដែលសកម្មជនការពារបរិស្ថាន និងសិទ្ធិមនុស្សចំនួន៥នាក់ នៃក្រុមមាតាធម្មជាតិបានជាប់ឃុំ ។
ហេតុផលនេះ ពួកគេស្នើជាថ្មីម្ដងទៀត សូមឱ្យដោះលែងសកម្មជនទាំង៥នាក់ និងអ្នកការពារសិទ្ធិមនុស្សផ្សេងទៀត ឱ្យមានសេរីភាពវិញ និងឱ្យពួកគេរួចផុតពីបទចោទប្រកាន់។ ពួកគេថា សកម្មភាពការពារសិទ្ធិមនុស្ស និងបរិស្ថាន មិនមែនជាបទល្មើសទេ។
តុលាការកំពូល នឹងប្រកាសសំណុំរឿងសុំនៅក្រៅឃុំរបស់សកម្មជនបរិស្ថានទាំង៥រូបនេះ នៅថ្ងៃទី៣០ ខែមេសាស្អែកនេះ។ សកម្មជនបរិស្ថានមាតាធម្មជាតិទាំង៥នាក់នោះ មាន កញ្ញា ឡុង គន្ធា លោក លី ចាន់ដារ៉ាវុត កញ្ញា ភួន កែវរស្មី លោក ថុន រដ្ឋា និង លោក យីម លាងហ៊ី ។
ពួកគេត្រូវចាប់ខ្លួន កាលពីថ្ងៃទី២ ខែកក្កដា ឆ្នាំ២០២៤ ក្រោមអំណាចសាលក្រមសាលាដំបូងរាជធានីភ្នំពេញ ដែលបានចោទពីបទ “រួមគំនិតក្បត់” ដាក់ពន្ធនាគារ ពី ៦ឆ្នាំ ទៅ ៨ឆ្នាំ ជុំវិញភាពសកម្មការពារធនធានធម្មជាតិរបស់ពួកកេ។
យ៉ាងណា កាលពីថ្ងៃទី២៣ខែមេសា អំឡុងពេលសកម្មជនទាំងនោះ ចូលការពារក្តីនៅតុលាការកំពូលប្រឆាំងសាលក្រមចោទប្រកាន់របស់សាលាដំបូង ហើយសុំនៅក្រៅឃុំនោះ ក្រុមអ្នកឃ្លាំមើលបាននិយាយថា ការបន្តឃុំខ្លួនសកម្មជនបរិស្ថាន ជាការបើកដៃឱ្យមន្ត្រីខិលខូច បំផ្លិចបំផ្លាញធនធានធម្មជាតិ។
លើសពីនេះ ក្រោយការចាប់ខ្លួន អង្គការលីកាដូ ចាត់ទុកការចាប់ខ្លួន និងការចោទប្រកាន់ យុវជនមាតាធម្មជាតិទាំង៥រូបនេះ ជាភាពអាម៉ាសរបស់ប្រព័ន្ធយុត្តិធម៌ ដែលចាំបាច់ត្រូវស្តារឡើងវិញ ដើម្បីធានាយុត្តិធម៌សង្គម និងមុខមាត់កម្ពុជាលើឆាកអន្តរជាតិ ៕
