លោក សម រង្ស៊ី បន្តវាយប្រហារ លោក ហ៊ុន សែន ដោយចោទថា ពុករលួយប្រទាក់ប្រឡាគ្នាជាប្រព័ន្ធទាំងឪពុក កូន និងម្តាយ ដែលជាការគំរាមគំហែងដល់វិស័យវិនិយោគ ខណៈលោក ហ៊ុន សែន បន្តបិទខ្ទប់ជីវិតនយោបាយរបស់លោកជិត១០ឆ្នាំទៅនេះ តាមរយៈអំណាចតុលាការ។
ប្រធានចលនាជាតិតស៊ូ លោក សម រង្ស៊ី បង្ហោះសារលើហ្វេសប៊ុកកាលពីថ្ងៃទី២៨ ខែមេសានេះ ដោយនិយាយថា ប្រជាជនខ្មែរកំពុងប្រឈមមុខនឹងការលំបាកគ្រប់សព្វបែបយ៉ាង ពីបញ្ហាអំពើពុករលួយ បំណុល ចំណាកស្រុក អស្ថិរភាពសង្គម ម៉ាហ្វីយ៉ា។ ទាំងនេះបណ្តាលមកពីអ្នកដឹកនាំ អសមត្ថភាព។
លោកលើកជាឧទាហរណ៍ថា៖ «ដើម្បីធ្វើអាជីវកម្ម និងវិនិយោគនៅស្រុកខ្មែរ គេត្រូវសូកឪផង សូកកូនផង ពេលខ្លះសូកដល់ទាំងម៉ែទៀត» ។
លោកថា បើយ៉ាងៗហ្នឹង ចង់ឱ្យគេមកវិនិយោគនៅស្រុកខ្មែរយ៉ាងម៉េចកើត?
VODមិនអាចសុំការបញ្ជាក់ពីលោក សម រង្ស៊ី ដើម្បីចង់ដឹងថាតើមានភស្តុតាងអ្វីខ្លះ ដែលជាមូលដ្ឋាន ធ្វើឱ្យលោកហ៊ានចោទប្រកាន់លើក្រុមគ្រួសារមេដឹកនាំមួយនេះ។
យ៉ាងណា សមាជិកក្រុមប្រឹក្សាជាតិតស៊ូរបស់លោក សម រង្ស៊ី គឺលោក អ៊ុំ សំអាន ឱ្យVODដឹងថា ភស្តុតាងដែលគ្រួសារហ៊ុនប្រព្រឹត្តិអំពើពុករលួយ គឺការក្តោបអំណាចផ្តាច់ការ លើកបន្តុបគ្រួសារខ្លួនឱ្យកាន់តំណែងកំពូលៗជាដើម។
លោកថា ការដឹកនាំផ្តាច់ការគ្រួសារហ៊ុនច្រើនទសវត្សរ៍មកនេះ ចាក់ស្រេះ ដោយអំពើពុករលួយច្រើនឆ្នាំទៅនេះ វាបានបន្សល់ទុកនូវជនរងគ្រោះរាប់លាននាក់ ក្នុងនោះមានទាំងរងគ្រោះដោយក្រុមឧកញ៉ាឆបោក ដែលយុត្តិធម៌ជនរងគ្រោះត្រូវបានគ្រួសារនេះកប់ចោល។
លោក សំអាន ហាក់ស្តីបន្ទោសថា មេដឹកនាំផ្តាច់ការគ្រួសារហ៊ុន កំពុងនាំនាវាកម្ពុជាឆ្ពោះទៅរករណ្តៅមរណៈនៃវិបត្តិសេដ្ឋកិច្ចធ្ងន់ធ្ងរ បង្កគ្រោះថ្នាក់វិស័យវិនិយោគ និងជីវភាពពលរដ្ឋច្រើនលាននាក់។
លោកថា៖ «កត្តាដែលធ្វើឲ្យកម្ពុជាយើងមានអំពើពុករលួយខ្ពស់ ដោយសារការកាន់អំណាចផ្ដាច់ការ ដោយសារបក្ខពួកនិយមគ្រួសារនិយមហ្នឹង ក៏មានអំពើពុករលួយដែរ កាលណាដឹកនាំបន្តពូជអ៊ីចឹង ឧបមាថា ឪពុកជានាយករដ្ឋមន្ត្រី កូនជារដ្ឋមន្ត្រី អ៊ីចឹងបើកូនធ្វើខុសប្រព្រឹត្តអំពីអំពើពុករលួយ ឪម៉េចហ៊ានកាត់ទោសកូន ដូចសព្វថ្ងៃហ្នឹង លោក ហ៊ុន ម៉ាណែត កំពុងកាន់អំណាចផ្ដាច់ការតពូជហ្នឹង»។
ជុំវិញការចោទប្រកាន់នេះ VODមិនទាន់អាចសុំការបញ្ជាក់ពីអ្នកនាំពាក្យរដ្ឋាភិបាល លោក ប៉ែន បូណា បានទេ គិតត្រឹមម៉ោងផ្សាយនេះ។
ប៉ុន្តែ អ្នកនាំពាក្យគណបក្សប្រជាជនកម្ពុជា លោក សុខ ឥសាន ធ្លាប់ប្រាប់VODថា មេដឹកនាំបក្សកាន់អំណាច មិនខ្វល់នឹងសម្តីរបស់អតីតមេដឹកនាំបក្សប្រឆាំងរូបនេះទេ។
លោកថា៖ «ខ្ញុំអត់ឆ្លើយជាមួយក្រុមខុសច្បាប់ ព្រោះក្រុមចលនាជាតិតស៊ូ វាជាក្រុមជ្រុលនិយមខុសច្បាប់នៅក្រៅប្រទេស បើឆ្លើយទៅក៏អត់បានការអ្វីដែរ។ ពួកហ្នឹងធ្វើនយោយបាយសម្លាប់ខ្លួនឯង តាំងពីដើមមក មេដឹកនាំរបស់គេគឺទណ្ឌិត សម រង្ស៊ី ក្បត់ជាតិ វាគ្មានអ្វីប្លែកនោះទេ»។
យ៉ាងណា អ្នកតាមដានកិច្ចការសង្គម នយោបាយ និងសេដ្ឋកិច្ចកម្ពុជា លោក ឌី គន្ធា និយាយថា អំពើពុករលួយចាក់ស្រេះ ភាគច្រើនកើតឡើងនៅក្នុងរបបដឹកនាំមួយ ខ្វះសុចរិតភាព ក្បាលម៉ាស៊ីនដឹកនាំ ខ្វះប្រព័ន្ធត្រួតពិនិត្យអំណាចគ្នា ដែលគេហៅថាអំណាចគ្រួសារនិយម។
លោកថា ប្រព័ន្ធបែបនេះ កំណើនសេដ្ឋកិច្ចស្ទើរទាំងអស់ ហូរចូលទៅក្រុមគ្រួសារអ្នកមានអំណាច រីឯពលរដ្ឋក្លាយជាជនរងគ្រោះពីអំពើពុករលួយ។
លោកថា៖ «ជាការពិតហើយ អំពើពុករលួយវាមិនត្រឹមតែបង្កឲ្យមានផលប៉ះពាល់ទៅដល់អសន្ដិសុខស្បៀងឬក៏ដោយភាពស្រេកឃ្លាន ឬក៏បំណុលចំពោះប្រជាពលរដ្ឋប៉ុណ្ណោះទេ មានន័យថាវានឹងបង្កឱ្យមានផលប៉ះពាល់ដល់សំណុំសេដ្ឋកិច្ចសង្គមជាតិទាំងមូល ឬយើងអាចនិយាយថាវាអាចបង្កើតឲ្យទៅជាមហាគ្រោះមហន្តរាយសេដ្ឋកិច្ច និងហិរញ្ញវត្ថុក្នុងប្រទេសតែម្តង»។
កសិករនៅខេត្តកំពង់ស្ពឺ អ្នកស្រី មុំ សុភី បាននិយាយថា ពួកគាគ់៣ភូមិចំនួន ១៤៧គ្រួសារបាត់បង់ដីទំហំ៤៨៣ហិកតា ត្រូវបានក្រុមហ៊ុនស្ករអំពៅរបស់ឧកញ៉ាលី យ៉ុងផាត់ រំលោភយកតាំងពីឆ្នាំ២០១១ ពោលគឺជាង១០ឆ្នាំទៅនេះ គ្មានស្ថាប័នរដ្ឋណាជួយទប់ស្កាត់យកដីឱ្យវិញទេ ទោះបានឡើងទៅភ្នំពេញ រកមេដឹកនាំឱ្យជួយដោះស្រាយក្តី ។
អ្នកស្រីថា៖«ពេលដែលខ្ញុំបាត់ដីធ្លី ខ្ញុំស្គាល់រាជធានីភ្នំពេញ។ ខ្ញុំល្ងង់ ពលរដ្ឋល្ងង់ណាស់រាល់ថ្ងៃនេះ ល្ងង់ដល់ថ្នាក់ពួកគាត់មិនដឹងជាធ្វើអ្វីឲ្យបានយុត្តិធម៌មកវិញ ចង់ចាញ់តម្រៃ ឃើញសង្គមមួយអនុវត្តច្បាប់ធូរលុងចំពោះអ្នកដែលរំលោភលើសិទ្ធិពលរដ្ឋរឹបអូសដីធ្លីហើយ បែរជាបណ្តឹងជនរងគ្រោះដែលត្រូវគេរឹបអូសដីធ្លីទៅវិញ អ៊ីចឹងខ្ញុំសំណូមពរទៅដល់រដ្ឋាភិបាល ក៏ដូចជាថ្នាក់ដឹកនាំគ្រប់ជាន់ថ្នាក់ទាំងអស់ កុំបន្តការឈឺចាប់និងដល់ពួកខ្ញុំទៀតអី សូមដោះស្រាយឲ្យពួកខ្ញុំមក បើមិនបានជួយឲ្យខ្ញុំកុំធ្វើបាបខ្ញុំទៀត ខ្ញុំសុំអង្វរក្នុងនាមខ្ញុំជាពលរដ្ឋរងគ្រោះម្នាក់ ខ្ញុំមានការឈឺចាប់ខ្លាំងណាស់ ខ្ញុំក៏ជាមនុស្សរស់នៅសង្គមមួយ ដែលចង់បានសង្គមដែលមានភាពយុត្តិធម៌ ហើយសិទ្ធិស្មើគ្នាចំពោះមុខច្បាប់រដ្ឋធម្មនុញ្ញ»។
អង្គការតម្លាភាពអន្តរជាតិ បានចេញរបាយការណ៍ថ្មីមួយ កាលពីថ្ងៃទី១១ ខែកុម្ភៈ ឆ្នាំ២០២៥នេះ រកឃើញថា អំពើពុករលួយនៅក្នុងប្រទេសកម្ពុជា ក្នុងឆ្នាំ២០២៤ មានស្ថានភាពអាក្រក់ជាងឆ្នាំមុន ដែលទាមទារឱ្យកម្ពុជាដោះស្រាយបញ្ហានេះជាប្រព័ន្ធ និងទ្រង់ទ្រាយធំ។
បើតាមរបាយការណ៍នោះ កម្ពុជា មានអំពើពុករលួយខ្ពស់ជាប់គ្នាជិត១ទសវត្សរ៍ បើធៀបនឹងប្រទេស ១៨០ ដែលអង្គការនោះបានសិក្សា។
បើតាមប្រភពនោះ ប្រទេសដែលមិនអាចរើខ្លួនពីអំពើពុករលួយញាំញីបាន បញ្ហាចម្បងមួយ គឺឥទ្ធិពលនយោបាយ ជ្រៀតជ្រែតប្រព័ន្ធយុត្តិធម៌៕
