អ្នកជំនាញផ្នែកប្រព័ន្ធផ្សព្វផ្សាយ ដាក់ក្តីបារម្ភទៅលើលំហសេរីភាព នៃបណ្តាញព័ត៌មានធំៗ នៅលើពិភពលោក និងក្នុងតំបន់ ដែលកំពុងទទួលរងការយាយី និងផ្តាច់ជំនួយ ក្នុងទិសដៅដើម្បីបង្អាក់ដំណើរការក្នុងការផលិតមាតិកាព័ត៌មាន ដែលជាការបម្រើឱ្យសេចក្តីត្រូវការជាសាធារណៈ តាមរយៈការផ្តល់ព័ត៌មានប្រចាំថ្ងៃ ដែលមានភាពចាំបាច់ និងសារៈសំខាន់។
អង្គការសង់ត្រាល់ បានផ្សាយបន្តផ្ទាល់នៅលើបណ្តាញសង្គម នៅចំថ្ងៃនៃទិវាសេរីភាពសារព័ត៌មានពិភពលោក នៅថ្ងៃនេះ។ តាមរយៈរបាយការណ៍សង្ខេបនានា នៅក្នុងវីដេអូឃ្លីប ដែលអង្គការសង់ត្រាល់ ចងក្រងឡើង គឺបង្ហាញពីភាពប្រឈមនៅក្នុងវិស័យសារព័ត៌មាន ដែលកំពុងបន្តធ្លាក់ចុះ និងទទួលរងការយាយី និងធ្វើទុក្ខបុកម្នេញ មិនថាស្ថាប័នព័ត៌មានអន្តរជាតិ ឬក្នុងស្រុកទេ។
តាមរយៈរបាយការណ៍ដែលចេញផ្សាយនៅថ្ងៃនេះ សង់ត្រាល់ ឱ្យដឹងតាមរយៈការលើកឡើងពីអ្នកជំនាញផ្នែកប្រព័ន្ធផ្សព្វផ្សាយថា ក្រោយពីរដ្ឋបាលលោក ដូណាល់ ត្រាំ ផ្តាច់ជំនួយពីកម្មវិធីផ្តល់ជំនួយរបស់ទីភ្នាក់ងារផ្តល់ជំនួយរបស់សហរដ្ឋអាមេរិក ដែលហៅកាត់ថា USAID មួយផ្នែកធំមក បានជំរុញឱ្យស្ថាប័នធំៗ រួមមាន វិទ្យុសំឡេងសហរដ្ឋអាមេរិក និងវិទ្យុអឺរ៉ុបសេរី ព្រមទាំងវិទ្យុអាស៊ីសេរី ជាដើម ត្រូវបិទទ្វារជាបន្តបន្ទាប់។
ក្រៅពីត្រូវប្រឈមមុខនឹងវិបត្តិហិរញ្ញវត្ថុ ដែលរារាំងទៅដល់ដំណើរនៃប្រតិបត្តិការទាំងមូលហើយ អ្នកកាសែត ក៏ត្រូវរងបណ្តឹង និងហិង្សាផ្នែករាងកាយទៀតដែរ នៅអំឡុងពេលនៃវិបត្តិសាកលនេះ។ តាមរយៈសារដ៏មុតស្រួច ដែលជាប្រធានបទដ៏រស៊ើប សម្រាប់ទិវាសេរីភាពសារព័ត៌មានសាកល នៅក្នុងឆ្នាំនេះ ដែលដាក់ថា «ការការពារប្រព័ន្ធផ្សព្វផ្សាយឯករាជ្យនៅកម្ពុជា» គឺជាស្មារតីនៃការលើកទឹកចិត្តឱ្យអ្នកដែលកំពុងបំពេញវិជ្ជាជីវៈ នៅក្នុងជំនាញនេះ ត្រូវបន្តនូវភាពក្លាហានរបស់ខ្លួន ហើយវេទិកានៅថ្ងៃនេះ ក៏នឹងពិភាក្សាដែរទៅលើអនាគត នៃសារព័ត៌មានឯករាជ្យនៅកម្ពុជា៕
