អតីតមេដឹកនាំគណបក្សប្រឆាំង លោក សម រង្ស៊ី នៅថ្ងៃសុក្រនេះ បានចែករំលែកសារនៅលើក្រដាសប្រាក់រៀលដែលមានសរសេរសាររិះគន់គ្រួសារហ៊ុន ក្នុងន័យថា ការបន្តដឹកនាំរបស់គ្រួសារនេះ និងធ្វើឱ្យខ្មែររងគ្រោះតជំនាន់ ខណៈបទឧក្រិដ្ឋច្រើនទម្រង់កំពុងរីករាលស្ទើរពេញផ្ទៃប្រទេស។
លោក សម រង្ស៊ី បាននិយាយនៅលើហ្វេសប៊ុករបស់លោក នៅថ្ងៃទី២ ខែឧសភានេះថា គេប្រទះឃើញក្រដាសប្រាក់រៀលជាច្រើនសន្លឹកដែលមានសរសេរអក្សរ «អំណាចហ៊ុន តត្រកូល ខ្មែរថ្ងូរតជំនាន់» ត្រូវបានចែកចាយទៅតាមបណ្តាខេត្ត ស្រុក និងឃុំមួយចំនួន ក្នុងប្រទេសកម្ពុជា។
លោកបន្តថា ក្រដាស់ប្រាក់រៀលខ្លះទៀត ក៏មានសរសេរអក្សរ «ត្រូវរឹបអូសផ្ទះនិងទ្រព្យសម្បត្តិរបស់ឧកញ៉ាបោកប្រាស់មកសងលុយពលរដ្ឋវិញ» «សងដីនិងផ្ទះខ្ញុំមក» «បង្រ្កាបបទល្មើសបង្ខាំងមនុស្សឱ្យឆបោកតាមអនឡាញ» «តែងតាំងក្រុមគ្រួសាររបស់អ្នកធំគ្រប់ក្រសួង ស្ថាប័ន» «បក្សពួកនិយម គ្រួសារនិយម ពុករលួយដុះស្លែ» «ផលិតផលកសិកម្មថោក គ្មានទីផ្សារ»។
លើសពីនេះ ក៏មានសារលើកឡើងពីការ «បំផ្លិចបំផ្លាញធនធានធម្មជាតិនិងព្រៃឈើ ទឹកដីខាងលិចក៏បាត់ ខាងកើតក៏បង់ សៀមយកកោះគុត ប្រាសាទតាមាន់តូច ប្រាសាទតាមាន់ធំ ប្រាសាទតាក្របី ឯយួនយកកោះត្រល់និងទឹកដីតាមព្រំដែន តុលាការតេឡេ តុលាការពុករលួយ ពលករខ្មែរចំណាកស្រុកគ្រប់ប្រទេស» ជាដើម។
សម្រាប់ លោក សម រង្ស៊ី យុទ្ធនាការនេះផុសចេញពីឆន្ទៈពលរដ្ឋខ្មែរ ដែលរងភាពអយុត្តិធម៌ ក្រោមការដឹកនាំរបស់ត្រកូលហ៊ុន ហើយថាយុទ្ធនាការនេះមិនមែនរៀបចំឡើងដោយក្រុមបក្សប្រឆាំងណាមួយនោះទេ។
លើសពីនេះ ក៏មានហ្វេសប៊ុកជាច្រើនទៀត បានបង្ហោះសារដូចគ្នានេះ ចែកចាយលើបណ្តាញសង្គមផងដែរ ដូចជាហ្វេសប៊ុកឈ្មោះ ខេមរាជាតិ និងហ្វេសប៊ុកឈ្មោះ ដើម្បីយុត្តិធម៌ជាដើម។
ហ្វេសប៊ុកទាំងនោះ បានបង្ហោះរូបភាពក្រដាសប្រាក់រៀល ដូចជា ៥០០រៀល ១០០០រៀល និង៥០០០រៀល មានសរសេរសារថា «អំណាចហ៊ុន តត្រកូល ខ្មែរថ្ងូរតជំនាន់»នេះដូចគ្នា។
ក្រៅពីបង្ហោះរូបភាពប្រាក់រៀលមានសរសេរសារនេះ ខេមរាជាតិ បានបញ្ចេញយោបល់ បែបខឹងគ្រួសារហ៊ុនក្នុងន័យដើមថា៖ «លុយត្រកូលហ៊ុនចែកដល់រាស្ត្រ ជាលុយដែលជញ្ជក់ឈាម ត្រកូលហ៊ុនកាន់អំណាច ៤០ឆ្នាំ រាស្រ្តរងទឹកភ្នែករហូត»។
ជាការកត់សម្គាល់ ក្នុងសប្តាហ៍នេះ ប្រជាពលរដ្ឋមួយចំនួន នៅភ្នំពេញ និងនៅខេត្តកំពង់ចាម បានអះអាងប្រាប់VODថា ពួកគេមានការភ្ញាក់ផ្អើលពេលឃើញក្រដាស់ប្រាក់រៀលមានសរសេរសារបែបនេះ ដែលមិនធ្លាប់មាន។
យ៉ាងណា អ្នកនាំពាក្យគណបក្សប្រជាជនកម្ពុជា លោក សុខ ឥសាន អះអាងថា បក្សកាន់អំណាច គ្មានការព្រួយបារម្ភពីការធ្វើយុទ្ធនាការនេះទេ ដោយសំអាងថាពលរដ្ឋជាច្រើនបានបោះឆ្នោតគាំទ្រគណបក្សប្រជាជនកម្ពុជាច្រើនអាណត្តិទៅនេះ ។
យ៉ាងនេះក្តី អ្នកឃ្លាំមើលបង្ហាញក្តីបារម្ភថា យុទ្ធនាការលើក្រដាស់ប្រាក់រៀលមិនធ្លាប់មាននេះ ជារលកជនរងគ្រោះ ទាមទារយុត្តិធម៌ពីគ្រួសារហ៊ុន ដែលរដ្ឋាភិបាល ចាំបាច់ត្រូវស្តារយុត្តិធម៌ជនរងគ្រោះឡើងវិញ និងវិលទៅស្តារប្រជាធិបតេយ្យ ដើម្បីបញ្ចៀសគ្រោះថ្នាក់អំណាច ដូចមេដឹកនាំផ្តាច់ការមួយចំនួន លើពិភពលោក ដែលមហាជនកាត់ទោស ដោយសារតែអំពើជិះជាន់ និងកេញប្រវ័ញ្ញ រំលោភសិទ្ធិមនុស្សធ្ងន់ធ្ងរ៕
