ពលរដ្ឋនៅព្រំដែនថា លោក ហ៊ុន ម៉ាណែត បិទ​បាំង​រឿង​វៀតណាម​​រំលោភ​យក​ដី​ខ្មែរ

ប្រជា​ពលរដ្ឋ​ខ្មែរ​រស់​នៅ​​ជាប់​​ព្រំដែន​​កម្ពុជា​ វៀត​ណាម ​​ដែល​​​បាន​​បាត់​​បង់​​​ដី​ស្រែ​ដី​ចម្ការ​​ទៅ​​វៀត​​ណាម​ កាល​ពី​អំឡុង​​ឆ្នាំ​​១៩៩៤ និង​​ពេល​​បន្ត​បន្ទាប់​​ក្រោយ​​មក​​ទៀត​ បាន​​ចាត់​​ទុក​ការ​​លើក​ឡើង​​របស់​​លោក​នាយក​រដ្ឋមន្ត្រី​​ ហ៊ុន ម៉ាណែត ដែល​​​ថា​ ទំហំ​​ផ្ទៃ​ដី​កម្ពុជា​​​បច្ចុប្បន្ន​ មាន​​លើស​ពី ​១៨១ ០៣៥​គីឡូ​ម៉ែត្រ​​ការ៉េ​​នោះ​​ថា ជាការ​​បិទ​បាំង​ការ​​បាត់​​បង់​​ទឹក​ដី​ខ្មែរ​​​នៅ​តាម​​ព្រំ​ដែន​​ទៅ​​ប្រទេស​​​វៀត​​ណាម ​​ក្រោម​ការ​​ដឹក​នាំ​រ​បស់​​គ្រួសារ​​ហ៊ុន​។

ប្រតិកម្ម​របស់​ប្រជាពលរដ្ឋ​នៅក្នុង​ឃុំ​ដូង ​ស្រុក​រមាសហែក ​ខេត្ត​​ស្វាយ​​រៀង និង​​ពល​រដ្ឋ​រស់​នៅ​ជាប់​​ព្រំដែន​ក្នុង​​ស្រុក​ពញា​ក្រែក ​ខេត្ត​ត្បូង​ឃ្មុំ​នេះ​ កើត​មាន​ឡើង​​​នៅពេ​ល​​ដែល​​លោក​​នាយក​​រដ្ឋ​មន្ត្រី​ ​ហ៊ុន ម៉ាណែត​​ បាន​​បន្ត​អះ​អាង​​​ជា​បន្ត​បន្ទាប់​​​នៅ​នា​​​ប៉ុន្មាន​ថ្ងៃ​កន្លង​​មក​នេះថា ផ្ទៃ​​ដី​​ប្រទេស​​កម្ពុជា​​បច្ចុប្បន្ន គឺ​មាន​​ទំហំ​​ដល់ទៅ​​ ​​១៨១ ៤៣៦​គីឡូ​ម៉ែត្រ​ការ៉េ មិន​​មែន​​មាន​​ត្រឹម ​​១៨១ ០៣៥គីឡូម៉ែត្រ​​ការ៉េ ដូច​ដែល​​កូន​ខ្មែរ​​គ្រប់​​រូប​​រួម​ទាំង​​រូប​​លោក​ធ្លាប់​​ទន្ទេញ​​​​ចាំមាត់​​តាំង​​​តែ​​ពី​នៅ​​រៀន​នោះ​ទេ​។

ក្នុង​ពិធី​ជួប​ជុំ​អ្នកកាសែត​រាប់​ពាន់​​នាក់ នៅក្នុង​ទិវាសេរីភាពសារព័ត៌មាន​ពិភព​លោក ​​កាលពី​ថ្ងៃទី៣ ​ខែ​​ឧសភា​​នេះ លោក​ ហ៊ុន ម៉ាណែត បាន​បក​ស្រាយ​បញ្ហា​នេះឡើ​ង​វិញ ខណៈ​មាន​ការ​រិះ​គន់​ថា ក្រោម​ការ​ដឹកនាំ​របស់​ឳពុក​លោក ច្រើន​ទសវត្សរ៍​ទៅ​នេះ​ ​ធ្វើ​ឱ្យ​ទឹក​ដី​កម្ពុជា​របូត​ទៅ​ប្រទេស​ជិត​ខាង។

លោក​គូស​បញ្ជាក់​ថា លោក​​បាន​​ឆែក​​ជាមួយ​​អ្នក​​បច្ចេក​ទេស​កិច្ច​ការ​​ព្រំដែន​ ​បាន​​ឱ្យ​ដឹង​ថា កាល​ពី​​​​ជាង​១០០​​ឆ្នាំ​​មុន ​ក្រុមភូមិសាស្ត្រ​បារាំង​បាន​សន្និដ្ឋាន​យក​តួលេខ​១៨១ ០៣៥​​នេះ ​បន្ទាប់​ពី​​បាន​​គូសវាស​លើ​ក្រដាស​ ​និង​​ជិះ​សេះ​​ជិះដំ​រី​​​ចុះ​​វាស់​​​ចោះៗ​​នៅ​តាម​ភូមិស្រុក​មួយ​ចំនួន។

លោកថា៖ «អីចឹង​បងប្អូនអ្នកសារព័ត៌មាន​ឆ្ងល់​ ចុះ​អា ១៨១ ៤៣៦គីឡូម៉ែត្រ​ការ៉េ​ហ្នឹង​ បាន​​មក​​ពីណា? គឺ​នៅ​​ឆ្នាំ​២០១២ ក្រុម​​បច្ចេក​ទេសរ​បស់អ​តីត​​អាជ្ញាធរ​ជាតិ​​របស់​យើង​ បាន​​យក​កម្ម​វិធី​​របស់​​ក្រុម​​ហ៊ុន​​អាមេរិក​មួយ គឺ​​យក​​មក​​វាស់​​ចុច​ព្រំប្រទល់​​កម្ពុជា វៀត​ណាម ដែល​​យើ​ង​​ប្រើ​​ទិន្នន័យ​​ខ្សែ​​ព្រំដែន​​​ដែល​​ឯកភាព​គ្នា​​នៅកន្លែង​ដែល​​ឯកភាព​​គ្នា​។ ទី២​ ខ្សែព្រំដែន​កម្ពុជា​ ឡាវ​ ដែល​បាន​ឯកភាពគ្នានោះ​ ហើយ​​ប្រើ​ប្រាស់​ទិន្ន​ន័យ១​លើ​១០​ពាន់​ ហើយ​​កម្ពុជា​​ថៃ​យើង​​​ប្រើ​​ទិន្នន័យ​១​លើ​២០​ពាន់​។ ​អ៊ីចឹង​​ប្រើតាម​​បច្ចេក​វិទ្យា​GPS​ទាំង​អស់ អ៊ីចឹង​កាល់​កាឡេ​មក​ដល់​​នេះ​ឃើញ​​ ១៨១ ៤៣៦គីឡូម៉ែត្រការ៉េ។​ នេះ​គឺជា​លម្អៀង អ៊ីចឹង​​សំណួរ​​សួរ​វិញថា តើបា​រាំង​​​ជិះ​​ដំ​រីវា​ស់​​សុក្រឹត្យ​​ជាង​យើង​​វាស់​ដោយ​GPSដែរ​ឬទេ? អាហ្នឹងសំណួរ​ទុកឱ្យបច្ចេកទេសឆ្លើយ​ចុះ»។

បើតាម​លោក ​ហ៊ុន ម៉ាណែត ផ្ទៃដីទំហំ ​១៨១ ៤៣៦គីឡូម៉ែត្រការ៉េនេះ​ គឺ​មិន​ទាន់​បូក​បញ្ចូល​​ដីកោះ​​នៅ​ដែន​​សមុទ្រ​ ដែល​​កម្ពុជា​មាន​​​​កោះ​ទាំង​​តូច​​ទាំង​​​ធំចំ​នួន​ ​៧១កោះ​ទៀត​នៅ​ឡើយ​​ទេ​។

យ៉ាងណាក្តី ​ស្ត្រីវ័យ​​៦៥​ឆ្នាំ​​ម្នាក់ ​រ​ស់នៅក្នុង​​ភូមិ​ដូង ឃុំដូង ​ស្រុករមាសហែក ​ខេត្ត​​ស្វាយ​​រៀង​ ដែល​​បដិ​សេធ​ប្រាប់​​ឈ្មោះ​​និង​​មិន​ឱ្យថត​សំឡេង​​ ដោយ​​សារ​​តែ​កន្លង​មក​​ធ្លាប់​ត្រូវ​បាន​​នគរ​បាល​​ឃុំ​ដូង ​ហៅ​​​ទៅ​​ព្រមាន​ ដោយ​​សារ​​តែ​​អ្នក​​ស្រី​​បាន​​និយាយ​​ពី​បញ្ហា​​បាត់​​បង់​ដី​ស្រែ​ខ្មែរ​ នៅ​​តាម​​ព្រំដែន​ ​ប្រាប់​​អ្នក​​កាសែត​ ​បាន​​ថ្លែង​ថា អ្នក​​ស្រី​​​បាន​​បាត់​បង់​ដីស្រែ​កេរដូនតា​ ប្រមាណ​៥​ហិក​​តា​​ទៅ​វៀតណាម​កាលពីឆ្នាំ​១៩៩៤ ។

គាត់បញ្ជាក់ថា នៅពេលនោះ ​កង​ទ័ព​វៀតណាម ​និង​អាជ្ញាធរ​វៀត​ណាម ​បាន​​​ប្រើគ្រឿងចក្រ​ចូលឈូស​រំលំ​ដីព្រៃ​ឈើ​ខ្មែរ​ និង​វាល​ស្រែខ្មែរ​​នៅ​តាមបណ្តោយ​​ព្រំដែន គ្មាន​ការទប់ស្កាត់ពីអាជ្ញាធរខ្មែរនោះទេ ។

គាត់និយាយក្នុងសម្តីដើមថា៖ «ខ្ញុំមិន​ដឹងថា លោក ​ហ៊ុន ម៉ាណែត ​គាត់​​យក​​​ដី​ពី​​កន្លែង​​ណាម​ក​បូក​បន្ថែម ​ធ្វើ​ឱ្យ​​ផ្ទៃ​ដី​ប្រទេស​កម្ពុជា​កើន​ឡើង​​​នោះ​ទេ ពីព្រោះនៅឃុំដូង​យើង​នេះ​ យួន​វាទ​យក​​ដីនៅ​តាម​ព្រំដែន​អស់​ច្រើនណាស់លោក​គ្រូ​ រាប់គីឡូ​មិន​មែន​មួយ​មិល្លិម៉ែត្រ​ ឬមួយ​ចំអាមនោះទេ​។​ កាលពីមុន​នៅ​តាម​ព្រំដែនសុទ្ធ​​តែព្រៃ​​ល្វឹងល្វើយ​ មាន​ដើម​​ឈើធំៗ ដូចជាព្រៃបត់ឈ្ងោក ព្រៃ​ត្រពាំង​ប្រាសាទ ព្រៃ​ត្រាចគុយ​អីជាដើម​​ ហើយ​ក៏​មាន​​ព្រៃឫស្សី​​សម្រាប់​អ្នកស្រុកយើង​ ចូលទៅ​ចាក់ទំពាំង​ និង​ដកផ្សិត​ ​លក់ដូរ​ផ្គត់ផ្គង់​ជីវ​ភាព​គ្រួសារ​​បាន​ផងដែរ។​ ដីស្រែខ្ញុំ និង​ដីពលរដ្ឋ​ខ្មែរ​យើង​ដទៃ​ទៀត​ នៅ​ចន្លោះ​ព្រៃទាំង​នោះ​ ត្រូវ​បាន​វៀតណាម​មាន​​ទាំង​កម្លាំងទ័ព​ប្រដាប់​អាវុធ​ និងស៊ីវិល​ ជាមួយ​នឹងគ្រឿង​ចក្រ​​ បាន​លើកគ្នា​ចូលមក​ឈូសឆាយ​វាទយក​អស់​កាលពីអំឡុងឆ្នាំ១៩៩៤»។

ស្ត្រី​ដែល​ប្រាប់​ថា បច្ចុប្បន្ន​អ្នក​ស្រីនៅ​សល់​ដីស្រែតែកន្លះ​ហិកតា​ នៅក្បែរ​ប៉ុស្តិ៍​ព្រំដែន​ខ្មែរ​ វត្ត​​ភូមិ​​ដូង​ចាស់ ​បាន​​អះ​អាង​ទៀតថា បើរាប់​ពីប៉ុស្តិ៍​ព្រំដែនខ្មែរ​នៅវត្តភូមិដូង​ចាស់​​បច្ចុប្បន្ន ​​ទៅ​​ដល់​​ផ្សារ​​ចេក​​មាស​ ​នៅ​ក្នុង​ទឹក​ដី​វៀតណាម ដែល​កាល​ពីក្រោយ​ឆ្នាំ​​១៩៧៩​ ក៏ជាទឹក​ដី​ខ្មែរ​​​​ដែរនោះ ​គឺវៀតណាម​បាន​រំលោភ​យក​​ទឹកដី​ខ្មែរ​​​មាន​ជម្រៅ​ប្រមាណ​ជាង ​៣គីឡូម៉ែត្រ​​​ឯណោះ ត្រង់​ចំណុច​វត្តភូមិ​ដូង​ចាស់នេះ។

ពលរដ្ឋ​រូបនេះថា លោក ហ៊ុន ម៉ាណែត ​បង្កើន​តួលេខពីទំហំផ្ទៃដីប្រទេសកម្ពុជា​​នៅពេល​នេះ អាច​ដើម្បី​​បង្វែរ​​​កុំ​ឱ្យ​មាន​​ការ​​ចាប់​អារម្មរណ៍ ​​ពី​​ការ​បាត់​​បង់​​ទឹកដីខ្មែរ​ជាក់​ស្តែង​​នៅ​តាម​ព្រំដែន​ទៅ​វៀតណាម។

ចំណែក​ បុរស​អ្នកភូមិដូង​វ័យ​៧២​ឆ្នាំម្នាក់​ទៀត ​ដែល​បដិសេធប្រាប់ឈ្មោះ​ដែរនោះ ក៏បាន​ប្រាប់​វីអូឌី​តាម​ទូរសព្ទដែរថា ប្រទេស​កម្ពុជា​ត្រូវបាន​រៀតណាម ​រំលោភ​យក​ទឹក​ដីនៅ​តាម​ព្រំដែន​ជា​បន្តបន្ទាប់ ​​ជាពិសេស​នៅ​ក្រោយ​​ឆ្នាំ​១៩៧៩។ លោកថា ​វៀតណាម ​​បាន​រំលោភ​យក​ដីស្រែ​ដែល​ជាដីកេរ​តាំងពីដូនតា​របស់​ឪពុក​ម្តាយ​​លោក​អស់​ប្រមាណ​៦ហិកតា។

លោក​និយាយ​ក្នុង​សម្តីដើមថា៖ «ដូច្នេះ​ខ្លាចតែទឹក​ដីបច្ចុប្បន្ននៅ​សល់​មិន​ដល់​ ១៨១ ០៣៥​គីឡូម៉ែត្រ​ការ៉េ​ផង​​ទេ កុំ​​ថាឡើយ​ដល់​ទៅ​នៅសល់លើសនេះ​។ ក្មួយគិត​មើល​បើ​រាប់​ពីវត្ត​ភូមិ​ដូង​​ចាស់ ​​ទៅ​ប៉ែក​ខាង​កើត​ឈៀង​​ខាង​​ជើង​​ មាន​ប្រាសាទបុរាណខ្មែរ​​បាក់​បែក​មួយ​នៅ​កណ្តាល​​ព្រៃ ហើយ​ទៅ​ហួស​ព្រៃប្រាសាទនោះ​មាន​​បឹង​មួយ​ធំល្វឹងល្វើយ​គេហៅថាបឹង​ជប់​ មាន​ទឹក​ខួប​ប្រាំង​ខួប​វស្សា​ ហើយ​កាលពី​មុន​នៅ​រដូវប្រាំង​ខ្មែរ​យើង​​​នៅតាម​ព្រំ​ដែន​តែង​តែទៅ​រក​ត្រីនិង​ច្រូត​ស្បូវកក់​នៅបឹង​នោះ។ ប៉ុន្តែកាលពីឆ្នាំ១៩៩៤ យួន​បាន​​ឈូស​ឆាយ​​ព្រៃ​​ឈូស​​រម្លើង​​ប្រាសាទ​​ ឈូសដី​លុប​ផ្នែកខ្លះនៃបឹង​បំបាត់ដានអស់​។ បច្ចុប្បន្ន​តំបន់​នោះក្លាយ​ទៅ​​ជាដី​ចម្ការ​កៅស៊ូ ចម្ការ​អំពៅ និង​ចម្ការដំឡូង​របស់​វៀតណាមអស់​ទៅ​ហើយ សួរ​ថា តើ​យើងកើន​ដី​មក​ពីណា​ខ្ញុំឆ្ងល់ណាស់​ កុំអាង​ខ្លួន​ជាមេដឹកនាំ​​ចេះ​តែនិយាយ​ពេក?»។

បុរស ស្ត្រី​វ័យ​ចំណាស់​ទាំង​២នាក់​នេះ​ បាន​ឱ្យដឹង​ទៀត​ថា តាម​ពិត​វៀតណាម ​មិន​អាច​រំលោភ​បំពាន​យក​ដីស្រែ​កេរដូនតា​របស់​ពួកគាត់​នៅ​តាម​ព្រំដែន​បាន​ទេ ប្រើសិនបើស្ថាប័នពាក់ព័ន្ធរបស់ខ្មែរឈរនៅខាងប្រជាពលរដ្ឋ ហើយ​ជួយ​ទប់​ស្កាត់។

ប៉ុន្តែផ្ទុយទៅវិញ ពួកគាត់ថា ​អាជ្ញា​ធរខ្មែរ​ និង​​មន្ត្រីគណៈ​កម្មាការ​ព្រំដែន មិន​​ត្រឹម​​តែ​មិន​​ជួយ​​ការ​​ពារ​​ប្រជាពលរដ្ឋ​​ខ្មែរ​ខ្លួន​​ឯង​​ប៉ុណ្ណោះ​ទេ​ ថែម​ទាំង​ដាក់​សម្ពាធ និង​បង្ខំ​​ឱ្យប្រជាពលរដ្ឋ​ឈប់​តវ៉ា​ ដោយ​ប្រាប់​ថា ដីស្រែ​​ទាំងនោះស្ថិត​នៅ​តំបន់​ស​​(តំបន់​ដែលមានការប្រទាញ​ប្រទង់គ្នា)​ ទុក​​​​​ឱ្យ​​រដ្ឋាភិបាល​​កម្ពុជា​​ធ្វើ​ការ​ចរចា​​ដោះ​ស្រាយ​​ជាមួយ​​រដ្ឋាភិ​បាល​​​វៀត​ណាម​ ដោយ​សំអាង​ថា ដី​វា​មិន​​បាត់​​ទៅ​ណា​​ទេ​។

លើសពីនេះ គាត់ថា ការសំអាងរបស់អាជ្ញាធរនេះ ​ ធ្វើឱ្យដី​ស្រែ​ចម្ការ​របស់​ពួក​គាត់​នៅតែ​​​ព្រំដែន​មួយ​ចំនួន​បាន​​ក្លាយ​​​ទៅ​​​ជា​ដីចម្ការ​កៅស៊ូ និង​ចម្ការ​អំពៅ​របស់​វៀតណាម​ រហូតបច្ចុប្បន្ន។

ចំណែក​ ពលរដ្ឋ​ម្នាក់ទៀត​រស់​នៅជាប់​ព្រំដែន​វៀតណាម ក្នុង​ស្រុកពញាក្រែក ​ខេត្ត​ត្បូងឃ្មុំ ​ ក៏បាន​ប្រាប់​វីអូឌី​ផង​ដែរ​ថា រដ្ឋាភិបាល​កម្ពុជា ​តែង​តែបំបិទ​មាត់​ពលរដ្ឋ​មិន​ឱ្យនិយាយ​ការ​ពិត ​ពីការ​រំលោភ​បំពាន​យក​ទឹកដី​ខ្មែរ​​នៅ​តាម​​ព្រំដែន​ ពីសំណាក់​អាជ្ញាធរ​វៀតណាម។

បុរសវ័យ​៧៥ឆ្នាំ​រូបនេះ បាន​និយាយ​ក្នុងសំដីដើមថា៖ «យួនគេ​រំលោភ​យកដីស្រែដីចម្ការ​កេរ​ដូនតាខ្មែរ​យើ​ង​ ហើយ​អាជ្ញាធរ​ខ្មែរ ​យើ​ង​បែរជា​បំបិត​មាត់​​មិន​​ឱ្យ​និយាយ​​ពីទុ​ក្ខ​​លំបាក​​​រប​ស់​​យើង​​​ទៀត​»។

ប្រភពនោះអះអាងទៀតថា​​ អ្នក​ភូមិ​ធ្លាប់​និយាយ​រឿង​នេះ ​ប្រាប់​ លោក រ៉ុង ឈុន ដែលធ្លាប់បានចុះទៅតំបន់នោះ ប៉ុន្តែថាមកដល់ពេលនេះ ដីទាំងនៅវៀតណាមគ្រប់គ្រង​ទាំង​ស្រុង ការណ៍នេះ លោ​ក​ថា មាន​ការ​ភ្ញាក់ផ្អើល​ពេល​ឮ​នាយក​រដ្ឋ​មន្ត្រី​កម្ពុជា ​និយាយ​​​ថា ​ផ្ទៃដីប្រទេស​កម្ពុជា​បច្ចុប្បន្ន ធំជាង​មុន​ទៅ​វិញ។

ផ្ទុយពីការអះអាងរបស់លោក ហ៊ុន ម៉ាណែត ​លោក ​លោក អ៊ុំ សំអាន ​តំណាង​រាស្ត្រ​គណបក្ស​សង្គ្រោះជាតិ​​ និង​​ជា​​អ្នក​មានបទពិសោធន៍​កិច្ច​ការ​ព្រំដែន​ និយាយ​ថា កម្ពុជា ​ក្រោម​​ការ​ដឹកនាំដោយ​​គ្រួសារ​​ហ៊ុ​ន​ ដែល​​​វៀត​​ណាម​​បាន​​លើក​​បន្តុប​​ជាង​៤០​​ឆ្នាំ​មក​​នេះ បាន​​​ធ្វើ​ឱ្យ​កម្ពុជា​​បាត់​​បង់​ទឹក​ដី​ជាច្រើន​​​ទៅ​​វៀត​ណាម។

លោកសង្កត់ធ្ងន់ថា កាលដែល​លោក​ ហ៊ុន សែន ​នៅកាន់តំណែងជា​នាយក​រដ្ឋមន្ត្រី​ បាន​​កាត់​ដែន​សមុទ្រ​ខ្មែរ​ឱ្យ​វៀតណាម​ចំនួន​៣ម៉ឺន​គីឡូម៉ែត្រការ៉េ ​តាម​​រយៈ​សន្ធិសញ្ញា​តំបន់​ទឹក​ប្រវត្តិ​សាស្ត្រ​ឆ្នាំ១៩៨២​ និង​ធ្វើឱ្យ​បាត់​បង់​កោះ​ត្រល់​ និង​ចង្កោមកោះ​ក្រចកសេះ និង​ថែម​ទាំង​បាន​ដាក់​ដែន​សមុទ្រ​ខ្មែរ​រួម​​ជាមួយ​វៀតណាម​​ចំនួន១ម៉ឺនគីឡូ​ម៉ែត្រ​​ការ៉េថែមទៀត។

លោកថា៖ «គាត់​អត់បាន​បង្ហាញការ​​វា​ស់​វែង​​តាម​លក្ខណៈ​​បច្ចេក​ទេស​ តាម​លក្ខណៈ​​វិទ្យា​សាស្ត្រ​ណា​​មួយ​ដែល​​បញ្ជាក់​​​ថា​​​ផ្ទៃ​ក្រឡា​​ប្រទេស​កម្ពុជា​​យើ​ង​​មាន​ទំហំ​​លើស​ ​១៨១ ០៣៥គីឡូម៉ែត្រ​ការ៉េ ហើយ​កាល​ណា​ផ្ទៃ​ក្រឡា​យើង​​លើស​ទំហំ​នឹង​មាន​ន័យ​ថា ប្រទេស​​វៀ​ត​ណាម​​ ប្រទេសឡាវ ប្រទេស​ថៃ​ហ្នឹង​ បាត់​បង់​ទឹក​ដី​របស់​​គេ​ហើយ​ បាន​​ទឹក​ដី​យើង​​ឡើង​​កើន​ជាង​មុន ក៏​ប៉ុន្តែ​យើង​​ឃើ​ញ​ជាក់​​ស្តែង​​ប្រទេស​​វៀត​ណាម​ និង​ប្រទេស​ថៃ​​បាន​​លេប​​ត្របាក់​​ទឹក​ដី​យើង​​ហ្នឹង​ហី​ វៀត​​ណាម​​និង​ថៃ​អីហ្នឹង​​ គេ​មិន​​ល្ងង់​​កាត់​ដី​​របស់​គេ​ឱ្យ​យើងនោះ​ទេ»។

លោក ឡាំ ជា រដ្ឋមន្រ្ដីទទួលបន្ទុករដ្ឋលេខាធិការដ្ឋានកិច្ចការព្រំដែន របស់រដ្ឋាភិបាល មិន​អាច​​ទាក់​​ទង​​សុំ​​​ការ​​ពន្យល់​​​លើ​​បញ្ហា​​នេះ​បាន​​ទេ នៅថ្ងៃទី​៦​ខែឧសភានេះ។

សម្រាប់ ​​លោក ​សម រង្ស៊ី ប្រធានក្រុមប្រឹក្សា​ជាតិតស៊ូ​ បាន​សរសេរ​បង្ហោះ​នៅលើ​ហ្វេស​ប៊ុក​​របស់​​លោក ​កាល​ពីថ្ងៃ​​​ទី​​៤​ខែ​​​ឧសភា បាន​បង្ហោះ​សារ​ក្នុង​ន័យ​បែប​ចំអក​ថា កាល​​​ពីមុន​ត្រកូល​ហ៊ុន​​អួត​ថា ប្រទេស​​កម្ពុជា​ ក្លាយ​​​ជា​ប្រទេស​អ្នក​មាន ដល់​ឥឡូវ​អួត​ទៀត​ថា ដី​ប្រទេស​កម្ពុជា​​រី​ក​ធំ​ជាង​មុន។

សម្រាប់ លោក សម រង្ស៊ី ការនិយាយថា ទឹកដីកម្ពុជាធំជាងមុន ជាការបោក​បញ្ឆោត​​​សាធារណជន ដែលលោក​គិត​ថា ទាំងប្រជាពលរដ្ឋខ្មែរ និងអ្នកនៅក្នុងជួយគណបក្សកាន់អំណាច​ខ្លះ ទំនងជា​ដឹងពី​ល្បិច​បោកតជំនាន់ របស់គ្រួសារហ៊ុន ដែលលើកបន្ទប់ដោយវៀតណាមនេះ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ