ក្រសួងសុខាភិបាល បានចេញប្រកាសមួយឱ្យការការពារខ្លួន ពីការឆ្លងបាក់តេរីម្យ៉ាង ដែលមានរោគសញ្ញាស្រដៀងនឹងជំងឺគ្រុនផ្តាសាយ ពិបាកដកដង្ហើម និងមានអាការៈឈឺទ្រូង អាចមានកកឈាមនៅក្នុងបេះដូង ជាដើម ដែលថា ជំងឺនេះកំពុងកើតនៅប្រទេសជិតខាង។
តាមរយៈលិខិតចុះថ្ងៃទី៦ខែឧសភានេះ ក្រសួងសុខាភិបាល បានឱ្យដឹងថា ថ្មីៗនេះមានការផ្ទុះឡើងនៅប្រទេសជិតខាងនិងបណ្តាប្រទេសមួយចំនួន នូវជំងឺអង់ត្រាក់ ឬហៅថា ពិសធ្យូង នៅលើមនុស្ស និងនៅលើសត្វហៅថាជំងឺអង់ត្រាក់ ឬជំងឺឈាមខ្មៅ បង្កឡើងដោយបាក់តេរីដែលបង្កើតស្ព័រ។
បើតាមក្រសួង ជំងឺអង់ត្រាក់ ឬពិសធ្យូង ជាជំងឺដ៏កម្រ ប៉ុន្តែធ្ងន់ធ្ងរ ដែលអាចកើតមានឡើងជាចម្បងលើសត្វពាហនៈ និងសត្វព្រៃ។
មនុស្សអាចឆ្លងមេរោគអង់ត្រាក់តាមរយៈការប៉ះពាល់ដោយផ្ទាល់ជាមួយសត្វឈឺ ការបរិភោគសាច់សត្វដែលមានមេរោគអង់ត្រាក់ ប្រើម្ជុលសឺរ៉ាំងរួមគ្នាជាមួយអ្នកមានជំងឺអង់ត្រាក់ និងមិនមានភស្តុតាងឆ្លងរាលដាលពីមនុស្សទៅមនុស្សនោះទេ ប៉ុន្តែដំបៅស្បែកលើអ្នកជំងឺ អង់ត្រាក់អាចឆ្លងខ្លាំង។
អ្នកឆ្លងជំងឺនេះ ដំបូងមានអាការៈ ដូចជា ពុលអាហារ ប៉ុន្តែអាចមានឈឺពោះ ក្អួត ចង្អោរ ក្អួតឈាម រាគធ្ងន់ធ្ងរ និងមានអាការៈឈឺទ្រូង ដែលអាចមានកកឈាមនៅក្នុងបេះដូង ហូរឈាមនៅសន្ទះខ័ណ្ឌចន្លោះសួត ហើយស្បែកប្រែពណ៌ស្វាយ។
ដើម្បីបង្ការ និងទប់ស្កាត់ការឆ្លងជំងឺនេះ ត្រូវចៀសវាងប៉ះពាល់ដោយផ្ទាល់ជាមួយសត្វដែលសង្ស័យថា មានជំងឺអង់ត្រាក់ ហាមបរិភោគសត្វដែលងាប់ដោយសារជំងឺអង់ត្រាក់ សាកសពសត្វដែលងាប់ត្រូវយកទៅកប់ ឬដុតកំទេចចោល និងត្រូវប្រញាប់បញ្ជូនអ្នកជំងឺ ដែលសង្ស័យទៅកាន់មន្ទីរពេទ្យជាបន្ទាន់ ដើម្បីទទួលការព្យាបាលឱ្យទាន់ពេលវេលា។
លើសពីនេះ ក្រសួងថា ខ្លួនបន្តពង្រឹងវិធានការសុខាភិបាល តាមច្រកព្រំដែន និងពង្រឹងកិច្ចសហការជាមួយក្រសួងពាក់ព័ន្ធ ក្នុងការទប់ស្កាត់ការនាំចូលជំងឺអង់ត្រាក់ និងជំងឺឆ្លងផ្សេងទៀតពីក្រៅប្រទេស៕
