ទីបំផុតទៅ តុលាការខេត្តសៀមរាប បានសម្រេចឃុំខ្លួនមន្ត្រីនគរបាលផ្កាយ១ លោក សម្បត្តិ កុសល នៅពន្ធនាគារជាបណ្តោះអាសន្ន ពាក់ព័ន្ធនឹងបទល្មើសចំនួន៣ ក្រោយមានភ្លើងខៀវពីអង្គភាពប្រឆាំងអំពើពុករលួយ ក្រោយរងការរិះគន់នៅជុំដំបូង ដែលបានកាត់ក្តីឱ្យមន្ត្រីរូបនេះ ឈ្នះក្តីម្ចាស់បំណុល។
យោងតាមដីកាបង្គាប់ឱ្យឃុំខ្លួនបណ្តោះអាសន្ន របស់សាលាដំបូងខេត្តសៀមរាប ចុះថ្ងៃទី១០ ខែឧសភា ឆ្នាំ២០២៥ តុលាការខេត្តសៀមរាប បានសម្រេចឃុំខ្លួនជាបណ្តោះអាសន្ននូវ ឈ្មោះ សម្បតិ្ត កុសល អាយុ ៤១ឆ្នាំ មុខរបរជាមន្ត្រីនគរបាលនៃនាយកដ្ឋានវិទ្យុទាក់ទងនៃអគ្គស្នងការដ្ឋាននគរបាលជាតិ ពាក់ព័ន្ធនឹងបទល្មើសចំនួន៣។
ប្រភពដដែលបន្តថា បទល្មើសទាំង៣នោះ រួមមាន ពីបទ ប៉ុនប៉ងសូកប៉ាន់ ប្រព្រឹត្តនៅខេត្តបន្ទាយមានជ័យ កាលពីអំឡុងឆ្នាំ២០២៣ ដែលបទល្មើសមានចែងក្នុងមាត្រា៣២ នៃច្បាប់ស្តីពីការប្រឆាំងអំពើពុករលួយ និងមាត្រា២៧ និងមាត្រា ៦០៥ នៃក្រមព្រហ្មទណ្ឌ។
បទ ប្តឹងបរិហារដោយភូតកុហក ប្រព្រឹត្តនៅខេត្តសៀមរាប កាលពីថ្ងៃទី២៣ ខែធ្នូ ឆ្នាំ២០២៤ តាមមាត្រា៤១ នៃច្បាប់ស្តីពីការប្រឆាំងអំពើពុករលួយ និងពីបទ សូកប៉ាន់ ប្រព្រឹត្តនៅរាជធានីភ្នំពេញ កាលពីថ្ងៃទី២៣ ខែមេសា ឆ្នាំ២០២៥ តាមមាត្រា៣២ នៃច្បាប់ស្តីពីការប្រឆាំអំពើពុករលួយ និងមាត្រា៦០៥ នៃក្រមព្រហ្មទណ្ឌ។
ដីការបស់សាលាដំបូងខេត្ត បានគូសបញ្ជាក់ថា៖ «បង្គាប់ឱ្យប្រធានពន្ធនាគារខេត្តសៀមរាប ឃុំខ្លួនជនត្រូវចោទជាបណ្តោះអាសន្នឱ្យបានសម្រេចតាមដីកាបង្គាប់នេះ»។
លោក សម្បត្តិ កុសល ជាអតីតស្នងការរងនគរបាលខេត្តបន្ទាយមានជ័យ ត្រូវបានក្រសួងមហាផ្ទៃ ផ្ទេរតួនាទីទៅនាយកដ្ឋានវិទ្យុទាក់ទងវិញ កាលពីអំឡុងខែមេសា ឆ្នាំ២០២៥ បន្ទាប់ពីមានការរិះគន់ថា ភរិយាលោកផ្កាយ១រូបនោះ ខ្ចីលុយមិនសង ហើយប្តឹងម្ចាស់បំណុលរហូតជាប់គុកទៀត។
បើតាមប្រវត្តិរឿង អ្នកស្រី ចិន ស្រីដា បានឱ្យលុយភរិយា លោក សម្បត្តិ កុសល ខ្ចី ចំនួន ២ម៉ឺនដុល្លារ ប៉ុន្តែនៅពេលម្ចាស់លុយទារលុយវិញ បែរជាឈ្មោះ សម្បត្តិ កុសល ប្តឹងម្ចាស់លុយទៅតុលាការខេត្តសៀមរាប ចោទពីបទបរិហាហែកកេរ្តិ៍ រហូតតុលាការខេត្តនេះ កាត់ឱ្យលោក សម្បត្តិ កុសល ឈ្នះក្តី និងបង្គាប់ឱ្យឃុំខ្លួន អ្នកស្រី ចិន ស្រីដា ដាក់ពន្ធនាគារ និងបង្គាប់ឱ្យសងជំងឺចិត្ត លោក សម្បត្តិ កុសល ចំនួន៤លានរៀល ខណៈដែលលុយ២ម៉ឺនដុល្លារ ដែលភរិយាលោកបានខ្ចី មិនទាន់សង។
យ៉ាងណា ក្រោយបែកធ្លាយរឿងនេះ អ្នកប្រើប្រាស់បណ្តាញសង្គម បានបញ្ចេញប្រតិកម្ម រិះគន់ខ្លាំងៗលើបណ្តាញសង្គម ដោយចាត់ទុកថា សេចក្តីសម្រេចរបស់តុលាការខេត្តសៀមរាប ជារឿងអយុត្តិធម៌ធ្ងន់ធ្ងរ បំផុតសម្រាប់អ្នកស្រី ចិន ស្រីដា ដែលជាម្ចាស់បំណុល ។
ក្រោមសម្ពាធរិះគន់នេះ ប៉ុន្មានថ្ងៃក្រោយមក សាលាឧទ្ធរណ៍ខេត្តបាត់ដំបង បានបើកសវនាការបន្ទាន់មួយ ដោយសម្រេចឱ្យអ្នកស្រី ចិន ស្រីដា បាននៅក្រៅឃុំ កាលពីថ្ងៃទី១១ខែមេសា ឆ្នាំ២០២៥ ខណៈម្ចាស់បំណុលនេះជាជនជាប់ចោទ ជាប់ពន្ធនាគារប្រមាណជាងមួយខែ ។
តាមសាលក្រមចោទប្រកាន់ ចុះថ្ងៃទី១៨ ខែកុម្ភៈ ឆ្នាំ២០២៥ សាលាដំបូងខេត្តសៀមរាប ផ្តន្ទាទោសជនជាប់ចោទ ឈ្មោះ ចិន ស្រីដា ដាក់ពន្ធនាគារ ២ឆ្នាំ និងបង្គាប់ឱ្យសំណងជំងឺចិត្ត ទៅឱ្យដើមបណ្តឹង ឈ្មោះ សម្បតិ្ត កុសល ចំនួន ៤លានរៀល ក្រោមការចោទពីបទ គំរាមកំហែងហែកកេរ្តិ៍។ ។
បើតាមសាលក្រមដដែល អ្នកស្រី ចិន ស្រីដា អាយុ២៧ឆ្នាំ មានទីលំនៅ នៅភូមិសាលាកន្សែង សង្កាត់ស្វាយដង្គំ ក្រុងសៀមរាប ខេត្តសៀមរាប។
បញ្ហាដដែលនេះ តុលាការខេត្តសៀមរាប កាលពីថ្ងៃទី២១ ខែមេសា ឆ្នាំ២០២៥ បានផ្ទេរសំណុំរឿង លោក សម្បត្តិ កុសល ឱ្យទៅអង្គភាពប្រឆាំងអំពើពុករលួយចាត់ការជំនួយវិញ ដោយចាត់ទុកថា ពាក្យបណ្តឹងរបស់លោក សម្បត្តិ កុសល ពាក់ព័ន្ធនឹងរឿងពុករលួយ ។
ប្រមាណជា២០ថ្ងៃក្រោយមក លោក សម្បត្តិ កុសល ត្រូវបានអង្គភាពប្រឆាំងអំពើពុករលួយ ឃាត់ខ្លួននាំទៅសាកសួរ ពោលគឺកាលពីថ្ងៃទី១០ ខែឧសភា ឆ្នាំ២០២៥ បន្ទាប់មកក៏បានបញ្ជូន លោក សម្បត្តិ កុសល ទៅតុលាការខេត្តសៀមរាបវិញ។
បើតាមការរកឃើញរបស់អង្គភាពប្រឆាំងអំពើពុករលួយ លោក សម្បត្តិ កុសល មានជាប់ពាក់ព័ន្ធនឹងករណីពុករលួយ ដែលករណីនេះ តុលាការខេត្តសៀមរាប សម្រេចឃុំខ្លួន លោក សម្បតិ្ត កុសល នៅពន្ធនាគារ ក្រោមការចោទ ៣បទល្មើស រួមមាន «ប៉ុនប៉ងសូកប៉ាន់» «ប្តឹងបរិហារដោយភូតកុហក» និង«សូកប៉ាន់»៕
