ពលរដ្ឋបានអះអាងថា ក្រដាសប្រាក់ប្រភេទ ៥០០រៀល និង១០០០រៀល មានសរសេរអក្សរថា «អំណាចហ៊ុន តត្រកូល ខ្មែរថ្ងូរតជំនាន់» រាប់សិបសន្លឹក ត្រូវអ្នកភូមិជម្ពូវ័ន សង្កាត់ចោមចៅ ជាយរាជធានីភ្នំពេញ រើសបាន នាថ្ងៃទី១៣ខែឧសភានេះ។
ប្រភពសុំមិនបញ្ចេញឈ្មោះ បានប្រាប់VODថា ពលរដ្ឋនៅជម្ពូវ័នមួយចំនួន ទទួលបានក្រដាសប្រាក់ដែលមានសរសេរអក្សរថា អំណាចហ៊ុន តត្រកូល ខ្មែរថ្ងូរតជំនាន់ នេះ ប៉ុន្តែថាពួកគេមិនបានដឹងថាក្រដាសប្រាក់ដែលមានសរសេរសារនេះ ចេញពីប្រភពណាពិតប្រាកដទេ។
ជិត១ខែទៅនេះ គេសង្កេតឃើញមានចរន្តធ្វើយុទ្ធការក្រដាសប្រាក់រៀល ដែលមានសរសេរអក្សរបែបនេះ ត្រូវពលរដ្ឋអះអាងថា បានប្រទះឃើញនៅភ្នំពេញ ខេត្តកំពង់ចាម និងខេត្តកំពង់ធំ។
លើសពីនេះ អតីតមេដឹកនាំគណបក្សប្រឆាំង លោក សម រង្ស៊ី ក៏បានបង្ហាញក្រដាសប្រាក់ដែលមានសរសេរសាររំលេចអត្ថន័យពីគ្រោះថ្នាក់នៃការដឹកនាំគ្រួសារហ៊ុននេះដែរ។
បើតាម លោក សម រង្ស៊ី និយាយលើហ្វេសប៊ុករបស់លោក កាលពីថ្ងៃទី១ខែឧសភា ក្នុងន័យដើមថា គេប្រទះឃើញក្រដាសប្រាក់រៀលជាច្រើនសន្លឹក ដែលមានសរសេរអក្សរ «អំណាចហ៊ុនតត្រកូល ខ្មែរថ្ងូរតជំនាន់» បានចែកចាយទៅតាមខេត្តមួយចំនួន និងតាមស្រុកឃុំមួយចំនួនក្នុងប្រទេសកម្ពុជា។
លោកថា ក្រដាសប្រាក់រៀលខ្លះទៀត ក៏មានសរសេរអក្សរ ត្រូវរឹបអូសផ្ទះនិងទ្រព្យសម្បត្តិរបស់ឧកញ៉ាបោកប្រាស់មកសងលុយពលរដ្ឋវិញ។ ផលិតផលកសិកម្មថោក គ្មានទីផ្សារ សៀមយកកោះគុត ប្រាសាទតាមាន់តូច ប្រាសាទតាមាន់ធំ ប្រាសាទតាក្របី ឯយួនយកកោះត្រល់និងទឹកដីតាមព្រំដែន ជាដើម។
សម្រាប់ លោក សម រង្ស៊ី យុទ្ធនាការនេះ ផុសចេញពីឆន្ទៈរបស់ពលរដ្ឋខ្មែរ ដែលរងភាពអយុត្តិធម៌ក្រោមការដឹកនាំរបស់ត្រកូលហ៊ុន។
យ៉ាងណា អ្នកនាំពាក្យគណបក្សប្រជាជនកម្ពុជា លោក សុខ ឥសាន ធ្លាប់អះអាងថា បក្សកាន់អំណាចមិនបារម្ភពីការធ្វើយុទ្ធនាការលើក្រដាសប្រាក់រៀល ដែលមានសរសេរអក្សរថា អំណាចហ៊ុន តត្រកូលខ្មែរថ្ងូរ តជំនាន់នេះទេ៕
