Social Issues, ព័ត៌មានជាតិ, សង្គម

អ្នកចាញ់បោកអតីតឧកញ៉ា ហ៊ី គឹមហុង ស្លាប់កើនដល់២៦នាក់ក្រោមវិបត្តិបំណុល

លោក សែន សច្ចៈ
| ១៣ ឧសភា ២០២៥
ម៉ោង ២០:២៦

ក្រុមជនរងគ្រោះ អះអាងថា អ្នកចាញ់បោកក្រុមហ៊ុនពិភពដីមាសម្នាក់ទៀត បានស្លាប់ ដោយសារវិបត្តិបំណុល ធ្វើឱ្យចំនួនអ្នកស្លាប់ កើនដល់២៦នាក់ ដែលនេះក្លាយជាក្តីបារម្ភពីចរន្តងើបតវ៉ាទ្រង់ទ្រាយធំ ដើម្បីទាមទារយុត្តិធម៌ បើរដ្ឋាភិបាលមិនពន្លឿនយន្តការដោះស្រាយឱ្យបានទាន់ពេលទេនោះ។

ជនរងគ្រោះម្នាក់ អ្នកស្រី ដោក ហើន ប្រាប់VODនៅថ្ងៃទី១៣ ខែឧសភានេះថា គាត់ចាញ់បោកក្រុមហ៊ុនពិភពដីមាសជិត ២ម៉ឺនដុល្លារ ដែលជាលុយខ្ចីធនាគារធ្វើឱ្យប្រឈមវិបត្តិបំណុលវ័ណ្ឌក។

បើតាមអ្នកស្រី ដោក ហើន ក្រោយចាញ់បោកក្រុមហ៊ុននេះ ប្តីគាត់បានធ្លាក់ខ្លួនឈឺធ្ងន់ធ្ងរប្រឈមនឹងសេចក្តីស្លាប់ ដោយសារគ្មានលុយព្យាបាលជំងឺ ដែលគាត់ទាមទារឱ្យរដ្ឋាភិបាលជួយរកយុត្តិធម៌ ដើម្បីបានសំណងមកវិញ។

អ្នកស្រីថា៖ «ជាប់បំណុលគេរហូតមក លោកគ្រូ!គាត់បាក់ទឹកចិត្តម៉ងលោកគ្រូ! គាត់បាក់ទឹកចិត្តអាណិតណាស់។ ខ្ញុំថា គាត់កុំពិបាកចិត្តអីណា គាត់ណា! គាត់អើយ! គាត់ឯងគិតជីវិតគាត់ឯងចុះ! អត់អីទេណាគាត់ណា។ គាត់បាក់ទឹកចិត្តតាំងពីហ្នឹងមក លោកគ្រូ! ខ្ញុំចេះតែថា គាត់អើយឱ្យជាទៅ ដើរទៅលេងកំពង់សោម ចេះតែនិយាយលួងទឹកចិត្ត។ គាត់ថា គាត់មិនដែលជំពាក់គេដល់ថ្នាក់ហ្នឹង វាដល់រាប់ម៉ឺន! គាត់និយាយអ៊ីចឹងណា! មិនដែលបានលុយ ១ម៉ឺនកាន់ផង រួចយកលុយទៅឱ្យគេ គាត់នឹកតែខ្លួនឯងអ៊ឺចឹងណា មិនដែលស្គាល់លុយរាប់ម៉ឺនផង បែរយកលុយមកអត់បានចាយ បែរជាយកលុយឱ្យគេ»។

ជនរងគ្រោះម្នាក់ទៀត លោក ប៊ុន ធឿន ប្រាប់ថា មកទល់ពេលនេះមានអ្នកស្លាប់កើនដល់ ២៦នាក់ហើយ ក្នុងនោះមានខ្លះធ្វើអត្តឃាត និងស្លាប់ដោយសារគ្មានលុយទៅពិនិត្យជំងឺនៅមន្ទីរពេទ្យ។

បើតាមជនរងគ្រោះចាញ់បោកចំនួន ២ម៉ឺនដុល្លាររូបនេះ បញ្ជាក់ថា ការជឿជាក់យកលុយទៅវិនិយោគក្នុងក្រុមហ៊ុនពិភពដីមាសនេះ ដោយសារតែឃើញក្រុមហ៊ុនទទួលស្គាល់ពីស្ថាប័នរដ្ឋ តែលោកថាពេលមានអំពើឆបោក បែរជារដ្ឋាភិបាលមិនអើពើរកយុត្តិធម៌ទៅវិញ។

លោកថា៖ «អ្នកស្លាប់ខ្ទង់ ចូល២៦នាក់ហើយ! ដោយសារបញ្ហាទី១សំខាន់ ឈឺអត់មានលុយមើល បញ្ហារឿងជាប់គាំងតែរឿងលុយហ្នឹងទេ។ បើសិនមានលុយមើលខ្លួនជាហើយ ប៉ុន្តែវាអត់មានលុយ។ អ្នកខ្លះទៀតគាត់ធ្វើអត្តឃាតចងកសម្លាប់ខ្លួន ធ្វើសកម្មភាពផ្សេងៗ គាត់ទាល់ គាត់អត់! ធនាគារមកទារដាក់សម្ពាធ គាត់ភ័យជួនកាលគាំងបេះដូងស្លាប់ក៏មាន។ បើច្បាប់មិនដោះស្រាយឲ្យ អ្នកស្លាប់បន្ដ។ អ្នកឈឺ នឹងស្លាប់ទាល់តែអស់ ១ពាន់នាក់ជាង ស្លាប់ទាំងអស់ហ្នឹង។មិនមែនស្លាប់សោយសារឈឺរ៉ាំរ៉ៃ ដោយសារជំងឺទេ អ្នកខ្លះឈឺបាក់ទឹកចិត្តអត់លុយអ្នកខ្លះឈឺ អត់មានលុយកាក់មើលជីវភាពហូបចុកក៏បាត់បង់ច្រើន ងាប់តែទាំងអស់ហ្នឹង»។

ជុំវិញរឿងនេះ តំណាងរាស្រ្តគណបក្សសង្រ្គោះជាតិ លោក អ៊ុំ សំអាន មើលឃើញថា បើរដ្ឋាភិបាលនៅតែស្ងៀមស្ងាត់មិនរកដំណោះស្រាយឱ្យជនរងគ្រោះ ដែលកំពុងជួបវិបត្តិបំណុលធ្ងន់ធ្ងរបានទេ នោះរលកតវ៉ាទ្រង់ទ្រាយធំនឹងកើតមានក្នុងពេលណាមួយមិនខាន។

លោកថា៖ «អាចប្រជាពលរដ្ឋអត់ទ្រាំមិនបាន ហើយក្រពះគាត់អត់ដើរ អាហ្នឹងមនុស្សយើងលែងខ្លាចស្លាប់ អាចគាត់ងើបឡើងស្រុះគ្នាធ្វើបាតុកម្មផ្អើលទីក្រុងភ្នំពេញហ្នឹង ហើយអាចឈានទៅដល់បាតុកម្មទម្លាក់មេដឹកនាំប្រទេស ពីការកាន់អំណាចផងដែរ ដោយសារតែមេដឹកនាំប្រទេសហ្នឹង គប់គិតជាមួយឧកញ៉ាហ្នឹង មិនព្រមឲ្យតុលាការហ្នឹង ចាត់ការទៅលើឧកញ៉ា និងរឹបអូសទ្រព្យសម្បត្តិរបស់ឧកញ៉ាហ្នឹង យកមកសងប្រជារាស្ត្រ ដូច្នេះប្រជាពលរដ្ឋនៅពេលទឹកដល់ច្រមុះហើយ គាត់ប្រាកដជាលែងខ្លាចស្លាប់ អាចនឹងចេញតវ៉ាទ្រង់ទ្រាយធំនៅទូទាំងប្រទេសហើយ»។

អ្នកឯកទេសផ្នែកសង្គម គោលនយោបាយ និងសេដ្ឋកិច្ច លោក ឌី គន្ធា និយាយថា ការអូសបន្លាយពេលមិនដោះស្រាយទុក្ខលំបាកក្រុមជនរងគ្រោះ ដោយសារអំពើឆបោកពីក្រុមហ៊ុនឆបោក បង្ហាញថា កម្ពុជាជាប្រទេសដែលគ្មាននីតិរដ្ឋពិតប្រាកដនោះទេ។

លោកថា៖ «វាឆ្លុះបញ្ចាំងថា វាជាភាពចន្លោះប្រហោង និងភាពគេចវេស ឬក៏ភាពមិនទទួលខុសត្រូវដែលមើលឃើញបញ្ហាហើយ ហើយច្បាប់ជាតិផ្សេងៗមានស្រាប់ហើយ មិនបានយកច្បាប់ហ្នឹងយកទៅអនុវត្តឲ្យស្មើភាពគ្នា ដើម្បីស្វែងរកយុត្តិធម៌សង្គមជូនគ្រួសាររងគ្រោះជាអ្នកទិញ ជួលអចលនទ្រព្យហ្នឹង! វាស្មើនឹងប្រទេសមួយគឺគ្មាននីតិរដ្ឋទេ ឬគ្មានច្បាប់ពេញលេញបរិបូរណ៍ ឬប្រទេសមួយដែលគ្មានប្រព័ន្ធយុត្តិធម៌សង្គម»។

ជុំវិញរឿងនេះ VODមិនអាចសុំការឆ្លើយតបពី លោក សេង ឌីណា អ្នកនាំពាក្យក្រសួងយុត្តិធម៌បានទេនៅថ្ងៃនេះ ដោយគ្មានអ្នកទទួលទូរសព្ទ។

អតីតឧកញ៉ា ហ៊ី គឹមហុង ត្រូវបានចាប់ខ្លួនកាលពីខែសីហា ឆ្នាំ២០២៣ ពីបទឆបោកពលរដ្ឋ តែ៤ខែក្រោយមក ពោលគឺនៅខែវិច្ឆិកា ឆ្នាំ២០២៣ តុលាការដោះលែងវិញ ក្រោយជនឆបោករូបនេះ សន្យារកលុយសងជនរងគ្រោះវិញ តែពេលបាននៅក្រៅឃុំលោកមិនគោរពសន្យានោះទេ។

ជាការកត់សម្គាល់ ក្នុងអាណត្តិដឹកនាំរបស់ លោក ហ៊ុន មាណែត ជិត២ឆ្នាំទៅនេះ មានករណីបោកប្រាស់ធំៗជាច្រើនបានផ្ទុះឡើង ក្រោមដៃឧកញ៉ាខិលខូចធ្វើឱ្យជនរងគ្រោះជួបវិបត្តិបំណុលធ្ងន់ធ្ងរគ្មានការពារពីស្ថាប័នរដ្ឋ។

ក្នុងនោះមានពលរដ្ឋយ៉ាងហោចណាស់ ៣ម៉ឺននាក់ រងគ្រោះដោយសារគម្រោងអចលទ្រព្យ ដូចជា ចាញ់បោកអតីតឧកញ៉ា ជា សារ៉ន ហ៊ី គឹមហុង ឡេង ចាន់ណា ឧកញ៉ា ឡេង ណាវ៉ាត្រា និងក្រុមហ៊ុនភូមិខ្មែរគ្រុបនៅខេត្តស្វាយរៀង ជាដើម។

ជុំវិញអំពើឆបោកនេះដែរ តំណាងក្រុមជនរងគ្រោះចាញ់បោកក្រុមហ៊ុនឆបោកទាំងនោះ បានប្រាប់VODថា ពួកគេក៏កំពុងបោះដៃរកគ្នាតវ៉ាទ្រង់ទ្រាយធំក្នុងសំឡេងតែមួយ នៅរាជធានីភ្នំពេញ នាថ្ងៃណាមួយ បើរដ្ឋាភិបាលនៅតែមិនអាចដោះស្រាយទុក្ខលំបាករបស់ពួកគេបាន៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។