វិធានការចាប់ខ្លួនអតីតអ្នកឧកញ៉ា ហេង សិទ្ធី ដាក់ពន្ធនាគារនៅប្រទេសរុស្ស៊ី ហាក់ស្ថិតក្នុងភាពអាថ៌កំបាំងនៅឡើយច្រើនខែទៅនេះ បើទោះជាគេធ្លាប់ដឹងថា គាត់ជាបុគ្គលមួយរូប ត្រូវបានព្រះមហាក្សត្រ ផ្តល់គោរមងារជាឧកញ៉ា នៅក្នុងរបបដឹកនាំរបស់គ្រួសារហ៊ុនក៏ដោយ។
ក្នុងតំណែងជាឧកញ៉ានេះ គេក៏ប្រទះឃើញ ឧកញ៉ាវ័យក្មេងរូបនេះ បង្ហាញខ្លួនស្និទ្ធនឹងមេដឹកនាំបក្សកាន់អំណាចមួយចំនួន រួមទំាងមានចេញជាព័ត៌មានខ្លះ ពីការដែលគាត់ជួយលុយទៅរដ្ឋាភិបាលក្រោមរូបភាពមនុស្សធម៌ខ្លះៗផងដែរ។
ប៉ុន្តែក្រោយមកក៏ឮថា គោរពងារនៅត្រូវបានដកយកវិញ ក្រោមបទចោទផ្សេងៗ ដែលទម្លាយដោយសារព័ត៌មានស្និទ្ធនឹងរដ្ឋាភិបាល។
ក្រោមហេតុផលនេះ គេមកក៏មានសំឡេងគួរឱ្យភ្ញាក់ផ្អើលដែលលោក ហេង សិទ្ធី ទម្លាយពីរឿងអាស្រូវរបស់ លោក ហ៊ុន តូ និងមន្ត្រីជាន់ខ្ពស់មួយចំនួនទៀតក្នុងជួររដ្ឋាភិបាលថា ពាក់ព័ន្ធនឹងឧក្រិដ្ឋជនឆបោកតាមអនឡាញ និងគ្រឿងញៀន ដែលលោក ហ៊ុន តូ មានងារជាអ្នកឧកញ៉ា សែស្រឡាយហ៊ុន ត្រូវជាក្មួយលោក ហ៊ុន សែន ។
ក្រោយមកទើបលេចឮថា លោក ហេង សិទ្ធី ត្រូវបានចាប់ខ្លួននៅប្រទេសរុស្ស៊ី ក្រោយក្រសួងការបរទេសកម្ពុជា ប្រកាសលុបសុពលភាពលិខិតឆ្លងដែនគាត់។
ផ្តើមចេញពីមូលដ្ឋានវិភាគ អតីតអ្នកឧកញ៉ា ហេង សិទ្ធី ដែលធ្លាប់ជួយលុយរាប់លានដុល្លារដល់រដ្ឋាភិបាលគ្រួសារហ៊ុននោះ ត្រូវបានឃុំខ្លូនក្នុងពន្ធនាគារប្រទេសរុស្សី ក្រោមការស្នើសុំពីរដ្ឋាភិបាលគ្រួសារហ៊ុន ក្រោយទម្លាយរឿងអាស្រូវបទឧក្រិដ្ឋឧកញ៉ា ហ៊ុន តូ ក្មួយលោក ហ៊ុន សែន។
មនុស្សសិទ្ធិ លោក ហេង សិទ្ធី ទម្លាយឱ្យVODដឹងថា លោក សិទ្ធី ត្រូវឃាត់ខ្លួនកាលពីខែមករា ឆ្នាំ២០២៥ នៅប្រទេសរុស្សី ក្រោមការស្នើសុំពីស្ថាប័នធំៗចំនួន៤ មាន រដ្ឋាភិបាលកម្ពុជា ក្រសួងមហាផ្ទៃ ក្រសួងយុត្តិធម៌ ក្រសួងការបរទេស រួមទាំងប៉ូលិសអន្តរជាតិ Interpol មួយទៀតផងដែរ។
បើតាមប្រភពដដែល លោក សិទ្ធី ត្រូវចោទពីបទគំរាមទារប្រាក់ ២លានដុល្លារអាមេរិក ពីជនជាតិសិង្ហបុរី ឬភាសាអង់គ្លេស ហៅថា «Blackmail» ហើយក្រសួងមហាផ្ទៃបានដាក់បញ្ចូលនៅក្នុងនិវេទក្រហមរបស់អាំងទែប៉ូលថា ទោសរបស់លោកអាចជាប់គុកអស់មួយជីវិត។
ដោយឡែក អ្នកស្រី Daria Rudenko មេធាវីអន្តរជាតិការពារក្តីឱ្យ លោក ហេង សិទ្ធី ត្រូវបានសារព័ត៌មាន ឌឹ ខេមបូឌា ដេលី ដកស្រង់សម្តីចុះផ្សាយថា បក្សកាន់អំណាចស្នើសុំឲ្យរុស្ស៊ីចាប់កូនក្ដីរបស់ខ្លួន ក្រោយដឹងពីផែនការបង្កើតបក្សនយោបាយមួយក្នុងឆ្នាំ២០២៥ យកគំរូតាមប្រទេសមហាអំណាចធំៗ ដើម្បីប្រឆាំងរដ្ឋាភិបាលគ្រួសារហ៊ុន។
ជ្រុងមួយទៀតនៃមូលដ្ឋានវិភាគនេះ គឺអ្នកឧកញ៉ា ហេង សិទ្ធី គឺជាអគ្គនាយកក្រុមហ៊ុន ម៉ារីថាមឌីវេឡុបម៉ិនគ្រុប ដែលជាសេដ្ឋីមួយរូបនៅកម្ពុជា ធ្លាប់ជួយលុយរាប់លានដុល្លារដល់រដ្ឋាភិបាលគ្រួសារហ៊ុន រួមទាំងកាកបាទក្រហមកម្ពុជាដែលមាន លោកស្រី ប៊ុន រ៉ានី ភរិយាលោក ហ៊ុន សែន ជាប្រធានផងដែរ។
ជាក់ស្តែងលោកបានឱ្យលុយ ១លានដុល្លារដល់រដ្ឋាភិបាលលោក ហ៊ុន សែន អំឡុងពេលកម្ពុជាផ្ទុះជំងឺកូវីដ-១៩ជាដើម។
បុត្រសម្ព័ន្ធរបស់ក្រុមហ៊ុនម៉ារីថាមឌីវេឡុបម៉ិនគ្រុប ដែលជាជំនួញធំៗក្នុងដៃរបស់លោក ហេង សីទ្ធី រួមមានដូចជា រីស៊តលំដាប់ផ្កាយ នៅខេត្តព្រះសីហនុ រកស៊ីវិស័យធនាគារ វិស័យសំណង់ និងអគារពាណិជ្ជកម្មកម្ពស់២៤ជាន់ នៅក្រុងភ្នំពេញ ជាដើម។
លោក សិទ្ធី ត្រូវបានព្រះមហាក្សត្រកម្ពុជា ផ្តល់គោរមងារជាអ្នកឧកញ៉ា កាលពីថ្ងៃទី២១ ខែមករា ឆ្នាំ២០២១ ប៉ុន្តែដកគោរមងារនេះវិញ កាលពីខែធ្នូ ឆ្នាំ២០២៤។
ការដកនេះតាមសំណើរបស់លោកនាយករដ្ឋមន្ត្រី ហ៊ុន ម៉ាណែត ក្រោយជនជាតិសិង្ហបុរីម្នាក់ឈ្មោះ Phua GekSeng បានដាក់ពាក្យប្ដឹងទៅកាន់ស្នងការដ្ឋាននគរបាលរាជធានីភ្នំពេញ កាលពីខែវិច្ឆិកា ឆ្នាំ២០២៤ ដោយចោទប្រកាន់លោក ហេង សិទ្ធី ពីបទបរិហារកេរ្តិ៍ និងគំរាមទារប្រាក់២លានដុល្លារ។
អ្នកសិក្សាបញ្ហាសង្គម និងនយោបាយ លោក ប៉ោ មករា មើលឃើញថា អ្វីដែលកើតឡើងចំពោះលោក ហេង សិទ្ធី គឺជាទំនាស់ក្នុងទីលានជំនួញធ្វើឱ្យភាគីជម្លោះទាំងសងខាង ចង់ឈ្នះចាញ់នឹងគ្នាទើបរាលដាលទៅបង្កើតរឿងនយោបាយជាដើម។
លោកថា ដើម្បីបញ្ចៀសរឿងពាលស៊ីពាលក្នុងពិភពជំនូញនេះ ទាមទារឱ្យមានប្រព័ន្ធនីតិរដ្ឋរឹងមាំដើម្បីកាត់ក្តីដោយលម្អៀង តែថា សម្រាប់ប្រព័ន្ធនីតិរដ្ឋកម្ពុជាវិញនៅទន់ខ្សោយ បង្កើតបានជាអំពើពុករលួយជាប្រព័ន្ធ ប៉ះពាល់គ្រប់វិស័យ រួមទាំងការធ្វើជំនួញនេះជាដើម។
លោកថា៖ «បញ្ហាទំនាស់របស់ឧកញ៉ា ហេង សិទ្ធី ហ្នឹង! ខ្ញុំមើលឃើញផ្ដើមចេញអំពីគេហៅថាពិភពជំនួញ។ អ៊ីចឹងទំនាស់ផលប្រយោជន៍ហ្នឹង គឺធំណាស់ តែត្រូវការប្រព័ន្ធតុលាការមួយឯករាជ្យពិតប្រាកដ! ត្រូវការប្រព័ន្ធតុលាការមួយប្រព័ន្ធច្បាប់មួយដែលមាននីតិរដ្ឋ ដូច្នេះទើបអាចដោះស្រាយបញ្ហានេះបាន ប្រកបដោយប្រសិទ្ធភាព និងមិនមានអ្នកដែលដេករងភាពអយុត្តិធម៌។ យើងដឹងហើយថាបញ្ហាពាក់ព័ន្ធទៅនឹងនីតិរដ្ឋរបស់កម្ពុជា មានបញ្ហាទន់ខ្សោយ ដោយយោងទៅលើរបាយការណ៍ភីស៊ីអាយហ្នឹង គឺមានពិន្ទុទាបមែនទែន ដូច្នេះប្រព័ន្ធនីតិរដ្ឋខ្សោយវាធ្វើឲ្យមានបញ្ហាអំពើពុករលួយ វាធ្វើឲ្យមានជម្លោះគ្រប់ប្រភពទាំងអស់ មានទាំងក្នុងពិភពជំនួញនៅក្នុងពិភពសង្គមផ្សេងៗ»។
ជាការកត់សម្គាល់ ចាប់តាំងពីអំឡុងខែវិច្ឆិកា ឆ្នាំ២០២៤ មក លោក ហេង សិទ្ធី បានប្រើប្រាស់ហ្វេសប៊ុកផ្ទាល់ខ្លួន លាតត្រដាងពីការរួមដៃគ្នារវាងមន្ត្រីរដ្ឋាភិបាលជាមួយឧក្រិដ្ឋជន បើកល្បែងអនឡាញខុសច្បាប់ ការជួញដូរមនុស្ស ការបោកប្រាស់តាមអនឡាញ និងការលាងលុយកខ្វក់ ជាដើម។
មន្ត្រីជាន់ខ្ពស់របស់រដ្ឋាភិបាលដែលពាក់ព័ន្ធនឹងបទឧក្រិដ្ឋទាំងនោះ មានដូចជា លោក គួច ចំរើន លោក សរ ថេត លោក កើត រិទ្ធ និងឧកញ៉ា ហ៊ុន តូ បងប្អូនជីដូនមួយលោក ហ៊ុន ម៉ាណែត គឺជាជនឧក្រិដ្ឋឆបោក ការចាប់ជំរិត និងជាមេខ្លោងគ្រឿងញៀន ដែលមានការគាំទ្រពីមន្ត្រីរដ្ឋាភិបាល រួមទាំងប៉ូលិសអន្តោប្រវេសន៍ផងដែរ។
អំឡុងខែធ្នូ ឆ្នាំ២០២៤ ក្រសួងមហាផ្ទៃ ប្រកាសមោឃភាពលិខិតឆ្លងដែនរបស់ លោក ហេង សិទ្ធី បន្ទាប់ពីសាលាដំបូងរាជធានីភ្នំពេញ បានចេញដីកាបង្គាប់ឱ្យចាប់ខ្លួនអតីតឧកញ៉ារូបនេះកាលពីដើមខែធ្នូ ឆ្នាំ២០២៤ ពីបទគំរាមកំហែងហែកកេរ្តិ៍មានស្ថានទម្ងន់ទោស។
យ៉ាងណា អ្នកស្រី Daria Rudenko មេធាវីអន្តរជាតិការពារក្តីឱ្យ លោក ហេង សិទ្ធី ត្រូវបានសារព័ត៌មាន ឌឹ ខេមបូឌា ដេលី ស្រង់សម្តីចុះផ្សាយថា នេះជារឿងនយោបាយសុទ្ធសាត ដែលមានចេតនាមិនឱ្យ លោក ហេង សិទ្ធី បង្កើតបក្សនយោបាយប្រឆាំងគ្រួសារហ៊ុន។
អ្នកស្រី Daria Rudenko អះអាងថា មូលហេតុដែលធ្វើឲ្យគណបក្សកាន់អំណាចដឹងអំពីផែនការបង្កើតគណបក្សនយោបាយរបស់ លោក ហេង សិទ្ធី ដោយសារពួកគេបានប្រើប្រាស់ប្រព័ន្ធបច្ចេកវិទ្យាតាមចាប់សំឡេង។
អ្នកស្រីមេធាវី Daria Rudenko អះអាងថា នៅពេលនេះ ក្រុមមេធាវីកំពុងធ្វើការលើករណីនេះដោយយកចិត្តទុកដាក់បំផុត ហើយក្រុមមេធាវីបានដាក់បណ្តឹងឧទ្ធរណ៍ ដែលនឹងត្រូវពិចារណាដោយតុលាការក្នុងប្រទេសរុស្សី។
ជាងនេះទៀត តាមរយៈលិខិតសេរសេរដោយដៃរបស់ លោក ហេង សីទ្ធី ផ្ញើចេញពីពន្ធនាគារប្រទេសរុស្សី ដែលVODទទួលបាន គឺលោក ហេង សិទ្ធី បានអំពាវនាវឲ្យយុវជនអាយុចាប់ពី ១៥ឆ្នាំ ងើបឡើងទាំងអស់គ្នាជាមួយលោក ដើម្បីជំរុញឲ្យមានការផ្លាស់ប្ដូររបបដឹកនាំដែលកំពុងតែធ្វើដំណើរឆ្ពោះទៅរកគ្រោះថ្នាក់បំផុតក្នុងរយៈពេលដ៏ខ្លីខាងមុខ។
លោកថា ដូច្នេះត្រូវតែបង្កើតចលនារួមមួយដែលមានឈ្មោះថា «ចលនា១៨លាន» ដើម្បីបង្វែរទិសដៅនៃការដឹកនាំ និងរបបនយោបាយនាពេលបច្ចុប្បន្ន ឲ្យក្លាយទៅជារបបនយោបាយប្រជាធិបតេយ្យបែបសង្គមនិយម។
លោកបន្តថា រដ្ឋាភិបាលគ្រួសារហ៊ុន បានឆ្លៀតឱកាសស្នើសុំឲ្យចាប់ខ្លួនលោក ក្នុងពេលដែលលោកកំពុងធ្វើទស្សនកិច្ច ក្នុងន័យទំនាក់ទំនងការទូត ជាមួយបណ្តាប្រទេសមហាអំណាចនានា ដូចជា អាមេរិក ចិន រុស្ស៊ី ជប៉ុន ជាដើម។
យ៉ាងណា ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត គិតថា បើមើលពីប្រជាប្រិយភាព លោក ហេង សិទ្ធី បច្ចុប្បន្នហាក់គ្មានអ្វីធ្វើឱ្យបក្សកាន់អំណាចខ្លាចបិទខ្ទប់ មិនឱ្យបង្កើតបក្សប្រកួតប្រជែងជាមួយ លោក ហ៊ុន សែន នោះទេ។ ដែលខុសពីលោក សម រង្ស៊ី លោក កឹម សុខា និងអ្នកនយោបាយជើងចាស់ផ្សេងទៀត ដែលមានប្រជាប្រិយភាពជាងនេះ។
លោកថា ផែនការទៅបង្កើតបក្សនេះ ហាក់គ្រាន់តែជាការទាញយកប្រជាប្រិយពីមហាជនពេល លោក ហេង សិទ្ធី កំពុងរងគ្រោះដោយដៃ លោក ហ៊ុន តូ ក្នុងសង្រ្គាមជំនួញតែប៉ុណ្ណោះ។
លោកថា៖ «ខ្ញុំមើលទៅមិនឃើញថា ដោយសារគាត់គ្រោងបង្កើតបក្សនាំឱ្យគេ ចាប់ខ្លួនទេ ព្រោះគាត់មិនមែនជាមនុស្សដែលមានសក្ដានុពលទេ ទោះបីបង្កើតបក្សក៏គាត់ទៅប្រជែងជាមួយនឹងពួកកាន់អំណាច មិនឈ្នះគេដែរ។ តែបើសិនជារឿងទំនាស់ត្រូវច្រើនជាងរឿងទំនាស់ក្នុងអាជីវកម្ម។ លោក ហេង សិទ្ធី ក៏ចិត្តក្ដៅ ហើយ លោក ហ៊ុន តូ ក៏ចិត្តក្ដៅ ហើយពួកអ្នកដែលរកស៊ីជាមួយគ្នា ក្នុងរបរពាណិជ្ជកម្មស្រុកខ្មែរនោះ ប្រហែលជារឿងហ្នឹងច្រើនជាង។ ការដែលគាត់និយាយពីការបង្កើតបក្សនេះ វាគ្រាន់តែក៏ជាហេតុផលមួយ ដើម្បីទាក់ទាញការចាប់អារម្មណ៍របស់មតិមហាជនថា គាត់មានស្មារតីស្នេហាជាតិដូចដែលអ្នកដទៃៗអ៊ីចឹង»។
បន្ថែមលើនេះសម្រាប់ លោក ម៉ែន ណាតមើលឃើញថា ឧកញ៉ានៅស្រុកខ្មែរសុទ្ធតែការពារដោយគ្រួសារហ៊ុន ដែលគ្រួសារនេះបានចែកដែនដីគ្នាឱ្យរកស៊ី ដើម្បីបានលុយមួយផ្នែកជួយទ្រទ្រង់អំណាចរបស់បក្សកាន់អំណាច។
យ៉ាងណា លោកមិនបដិសេដទេថា លោក សិទ្ធី ជាជនរងគ្រោះក្រោមការធ្វើទុក្ខបុកម្នេញរបស់ សែស្រឡាយគ្រួសារហ៊ុន ដែលកើតចេញពីប្រព័ន្ធដឹកនាំបែបគ្រួសារនិយមនេះ ហើយថា អ្នកមិនរើបម្រះនឹងមានវាសនាដូចលោក ហេង សិទ្ធី ដូចគ្នាដែរ គ្រាន់តែមិនទាន់ដល់វេនប៉ុណ្ណោះ។
លោកថា៖ «ប្រជាពលរដ្ឋខ្មែរ និងមន្ត្រីរាជការអីទាំងអស់ហ្នឹង កុំឲ្យចេះតែអរគុណសន្តិភាពរបស់ លោក ហ៊ុន សែនខ្លាំងពេក ពីព្រោះថាឲ្យតែប៉ះមុខមាត់ក្រុមគ្រួសារ លោក ហ៊ុន សែន គឺរងគ្រោះទាំងអស់គ្នាណាក៏ដោយក៏រងគ្រោះ។យើងមើលជាក់ស្តែង ដូចករណី លោក ហ៊ុន តូ នេះគឺល្បីល្បាញខ្លាំងណាស់ ខាងប្រព្រឹត្តបទឧក្រិដ្ឋជាអន្តរជាតិ តែមិនទាន់មាននរណាម្នាក់ហ៊ានចាត់ការ លោក ហ៊ុន តូ ទេ។ អ៊ីចឹងរឿងនេះសបញ្ជាក់ឲ្យឃើញថា ក្រៅពីគ្រួសារ លោក ហ៊ុនសែន ឱ្យតែប៉ះពាល់អំណាចគេប៉ះពាល់ផលប្រយោជន៍របស់គ្រួសារហ្នុង! នឹងទទួលនិងការដាក់ទណ្ឌកម្មពីក្រុមគ្រួសារ ហ៊ុន សែន ប្រជាពលរដ្ឋខ្មែររងគ្រោះខ្លាំងណាស់រឿងហ្នឹង»។
យ៉ាងណា ការលើកឡើងរបស់ លោក ហេង សិទ្ធី ដែលថា លោក ហ៊ុន ជា ពាក់ព័ន្ធជ្រៅជាមួយឧក្រិដ្ឋជនគ្រឿងញៀន និងឧក្រិដ្ឋឆបោកតាមអនឡាញ ហាក់ស៊ីគ្នាទៅនឹងការរកឃើញ របស់សហគមន៍អន្តរជាតិមួយចំនួន។
ភស្តុតាងមួយក្នុងចំណោមជាច្រើនទៀត ពោលគឺកាលពីថ្ងៃទី១ ខែឧសភា ឆ្នាំ២០២៥នេះ ក្រសួងរតនាគាជាតិអាមេរិក បានរកឃើញថា ក្រុមហ៊ុន ហួយវ័នគ្រុប របស់ឧកញ៉ា ហ៊ុន តូ ក្មូយប្រុស លោក ហ៊ុន សែន មានជាប់ពាក់ព័ន្ធបទឧក្រិដ្ឋកម្មលាងលុយ ហើយថា ក្រុមហ៊ុននេះ កំពុងជ្រៀតចូលក្នុងប្រព័ន្ធហិរញ្ញវត្ថុអាមេរិកផងដែរ។
បើតាមប្រភពដដែល ចាប់ពីខែសីហា ឆ្នាំ២០២១ ដល់ខែមករា ឆ្នាំ២០២៥ បុត្រសម្ព័ន្ធរបស់ក្រុមហ៊ុននេះ បានលាងលុយកខ្វក់ចំនួន ៤ពាន់លានដុល្លារ ឱ្យក្រុមឧក្រិដ្ឋជន។
រដ្ឋមន្ត្រីក្រសួងរតនាគារអាមេរិក លោក ស្កុត បេសេនត៍ បញ្ជាក់ក្នុងរបាយការណ៍ថា ក្រុមហ៊ុនហួយវ័នគ្រុបរបស់ លោក ហ៊ុ តូ ធ្វើអាជីវកម្មឱ្យពួកចោរបច្ចេកវិទ្យានៅកូរ៉េខាងជើង និងពួកឧក្រិដ្ឋជនផ្សេងទៀត ដែលលួចលុយពីពលរដ្ឋអាមេរិករាប់ពាន់លានដុល្លារជារៀងរាល់ថ្ងៃ។
បន្ថែមលើនេះ លោកថា ការដាក់វិធានការលើក្រុមហ៊ុនហួយវ័នគ្រុប មិនឱ្យចូលទៅក្នុងប្រព័ន្ធហិរញ្ញវត្ថុអាមេរិកនៅពេលនេះ ដើម្បីបិទច្រកកុំឱ្យឧក្រិដ្ឋជនធ្វើសកម្មភាពលាងលុយបានទៀត៕
