ហ្វេសប៊ុកឈ្មោះ ដើម្បីយុត្តិធម៌ បន្តអះអាងថា សារលើក្រដាសប្រាក់សរសេរថា «អំណាចហ៊ុន តត្រកូលខ្មែរថ្ងូរតជំនាន់» ត្រូវបានគេបន្តចែកចាយ នៅក្នុងស្រុកមួយចំនួន ក្នុងខេត្តចំនួន៣ គឺខេត្តកណ្តាល កំពង់ចាម និងកំពង់ធំ ដែលយុទ្ធនាការនេះ ត្រូវគេមើលឃើញថា ជាផ្នែកជំរុញឱ្យគ្រួសារហ៊ុនវិលទៅស្តារប្រជាធិបតេយ្យឈប់បំពានរដ្ឋធម្មនុញ្ញ។
បើតាមហ្វេសប៊ុក ដើម្បីយុត្តិធម៌ នៅថ្ងៃទី១៥ ខែឧសភានេះ ក្រដាសប្រាក់ប្រភេទ ៥០០ និង១០០០រៀល រាប់សិបសន្លឹក ដែលមានសរសេរសារថា អំណាចហ៊ុន តត្រកូល ខ្មែរថ្ងូរតជំនាន់ ត្រូវបានគេចែកជូនពលរដ្ឋតាមផ្លូវជាតិលេខ៦ ស្រុកមុខកំពូល ខេត្តកណ្តាល ខេត្តកំពង់ចាម ស្រុកតាំងគោក និងស្រុកសន្ទុក ខេត្តកំពង់ធំ។
ដូចគ្នានេះដែរ កាលពីថ្ងៃទី១៤ខែឧសភានេះ ពលរដ្ឋមួយចំនួន នៅជាយរាជធានីភ្នំពេញ សង្កាត់ចោមចៅ២ បានអះអាងមកថា ពួកគេប្រទះឃើញក្រដាសប្រាក់សរសេរសារដូចគ្នានេះដែរ។
ហ្វេសប៊ុកឈ្មោះ ដើម្បីយុត្តិធម៌ កាលពីថ្ងៃទី២៦ ខែមេសា ឆ្នាំ២០២៥ បានអំពាវនាវឱ្យប្រជាពលរដ្ឋរស់នៅក្នុងប្រទេស និងក្រៅប្រទេស ចូលរួមធ្វើយុទ្ធនាការចែកចាយក្រដាសប្រាក់រៀលផ្សេងៗ ដែលមានសរសេរអក្សរ «អំណាចហ៊ុន តត្រកូល ខ្មែរថ្ងូរ តជំនាន់» ដើម្បីបង្ហាញឆន្ទៈចង់បានប្រជាធិបតេយ្យ ប្រឆាំងការកាន់អំណាចផ្តាច់ការគ្រួសារហ៊ុន។
ចាប់ពីពេលនោះមក ពោលគឺជាងកន្លះខែទៅនេះ ក្រដាសប្រាក់រៀលមានសរសេរអក្សរក្នុងន័យប្រឆាំងការកាន់អំណាចផ្តាច់ការគ្រួសារហ៊ុននេះ ត្រូវពលរដ្ឋអះអាងជាបន្តបន្ទាប់នៅភ្នំពេញ ខេត្តកំពង់ចាម ខេត្តកំពង់ធំ ខេត្តពោធិ៍សាត់ និងថ្មីៗនេះ នៅជម្ពូវ័នជាយក្រុងភ្នំពេញ។
យុទ្ធនាការលើក្រដាសប្រាក់ បែបស្ងាត់ស្ងៀមនេះ គេប្រទះឃើញមានសរសេរនៅលើប្រាក់រៀលពីប្រភេទ៥០០រៀល រហូតដល់ក្រដាសប្រាក់ ៥ម៉ឺនរៀលផងដែរ។
លើសពីនេះ តំណាងរាស្ត្រគណបក្សសង្គ្រោះជាតិ លោក អ៊ុំ សំអាន ធ្លាប់បង្ហោះសារភ្ជាប់នឹងក្រដាសប្រាក់ អំណាចហ៊ុន តត្រកូល ខ្មែរថ្ងូរតជំនាន់នេះ កាលពីចុងខែមេសាថា យុទ្ធនាការនេះ នឹងធ្វើឡើងទូទាំងប្រទេស ដើម្បីបុព្វហេតុប្រជាធិបតេយ្យ។
ដូចគ្នានេះដែរ អតីតមេដឹកនាំគណបក្សប្រឆាំង លោក សម រង្ស៊ី ក៏ធ្លាប់បង្ហោះក្រដាសប្រាក់ដែលមានសរសេរសារប្រឆាំងនឹងអំណាចផ្តាច់ការគ្រួសារហ៊ុននេះដែរ ដោយអះអាងថា ជាចរន្តជនរងគ្រោះនៅក្នុងប្រទេសកម្ពុជា។
យ៉ាងណា អ្នកនាំពាក្យគណបក្សប្រជាជនកម្ពុជា លោក សុខ ឥសាន ក៏ធ្លាប់ប្រាប់VODថា គណបក្សប្រជាជនកម្ពុជា មិនព្រួយបារម្ភណាមួយលើយុទ្ធនាការក្រដាសប្រាក់សរសេរសារ អំណាចហ៊ុនតត្រកូលខ្មែរថ្នូរតជំនាន់នេះទេ៕
