Social Issues, ព័ត៌មានជាតិ, សង្គម

របរដឹកភ្ញៀវទេសចរតាមរទេះសេះកំពុងផ្ដល់ចំណូលបន្ថែមដល់ពលរដ្ឋនៅជើងភ្នំកំពង់ត្រាច

កញ្ញា កែវ មរកត
| ១៦ ឧសភា ២០២៥
ម៉ោង ២៣:០៧

ស្របពេលកម្លាំងអូសទាញដោយសត្វសេះលែងសូវពេញនិយមក្នុងការរស់នៅប្រចាំថ្ងៃ ប្រជាពលរដ្ឋនៅជើងភ្នំកំពង់ត្រាច បានប្រែក្លាយសត្វចតុប្បាទមួយនេះ ឱ្យក្លាយជាអ្នកបម្រើសេវាកម្មក្នុងវិស័យទេសចរណ៍វិញម្ដង។

សេះមាឌមាំល្មម អមដោយរទេះមានក្បាច់លម្អចម្រុះពណ៌ និងកន្លែងអង្គុយដែលអាចផ្ទុកមនុស្សក្រោម១០នាក់ ភ្ញៀវទេសចរអាចចំណាយប្រាក់ក្នុងម្នាក់ ៨ពាន់រៀល ដើម្បីសាកល្បងបទពិសោធន៍ថ្មីនៃការជិះរទេះសេះ គយគន់ទេសភាពមួយជុំនៅជើងភ្នំកំពង់ត្រាច។

អ្នកបររទេះសេះ លោក កែវ ធីន ប្រាប់VODថា របរនេះសម្រួលដល់ភ្ញៀវទេសចរធ្វើដំណើរមួយជុំភ្នំ ដោយមិនបាច់ចំណាយកម្លាំងដើរច្រើន និងអាចឈាងចូលលេងតាមល្អាងផ្សេងៗ នៅតាមជើងភ្នំនោះបានផងដែរ។ យ៉ាងណា លោកថា របរនេះរកបានតែនៅថ្ងៃចុងសប្ដាហ៍ និងថ្ងៃបុណ្យទានតែប៉ុណ្ណោះ ដោយជាមធ្យម លោកអាចរកចំណូលបានពី២ ទៅ៣ម៉ឺនរៀលក្នុងមួយថ្ងៃ។

លោកថា៖ «មួយជុំមួយជើងហ្នឹង ខ្លះណាភ្ញៀវមកបាន៣ម៉ឺនមួយរទេះ តែយើងបានតែថ្ងៃសៅរ៍ថ្ងៃអាទិត្យ រួចពីហ្នឹងអត់បានដែរ។ ចុះបើឃើញភ្ញៀវមកលេង ចេះតែដាក់សេះឱ្យរត់ទៅ ក្រែងលោមានភ្ញៀវជិះ យើងបានកម្រៃខ្លះគ្រាន់តែចិញ្ចឹមប្រពន្ធកូន។ យើងដឹកឱ្យភ្ញៀវមើលជុំវិញភ្នំ ដើរលេងអ៊ីចឹងទៅ បើថាភ្ញៀវឈឺចង្កេះឈឺខ្នងរាងពិបាកបន្តិច» ។

កាលពីអតីតកាលសត្វសេះ ត្រូវបានគេប្រើសម្រាប់ការធ្វើដំណើរផ្លូវឆ្ងាយ និងអូសទាញរទេះដឹកទំនិញផ្សេងៗ។ ប៉ុន្តែក្រោយពីការងារគ្រប់យ៉ាងត្រូវជំនួសដោយកម្លាំងម៉ាស៊ីន សត្វចតុប្បាទស្រុកមួយក៏លែងសូវមានអ្នកចិញ្ចឹម ដោយយូរៗម្ដងទើបគេឃើញសត្វនេះនៅតាមតំបន់ខ្លះ។

ភាពកម្រនេះហើយ ទើបធ្វើឱ្យវាមានភាពទាក់ទាញ ដោយក្មេងៗតែងចង់ឃើញចង់ប៉ះ ចំណែកចាស់ៗ ចង់រំឭកអនុស្សាវរីយ៍ដែលធ្លាប់ជិះកាលពីក្មេង។ បច្ចុប្បន្ន នៅភ្នំកំពង់ត្រាចមានរទេះសេះចំនួន៧ កំពុងដាក់បម្រើសេវាកម្មដឹកភ្ញៀវ ដោយមានបេនចាំទទួលភ្ញៀវនៅក្បែរវត្តគិរីសិលា ឬវត្តភ្នំកំពង់ត្រាច។

ដំណើរកម្សាន្តលើរទេះសេះនេះ មានរយៈពេលប្រហែល៣០នាទី លើផ្លូវចម្ងាយជាង៤គីឡូម៉ែត្រ ដោយចាប់ផ្ដើមពីផ្លូវលំកាត់វាលស្មៅធម្មជាតិខៀវស្រងាត់រហូតដល់ផ្លូវបេតុង និងបញ្ចប់នៅក្នុងបរិវេណវត្តគិរីសាគរ។ ក្រោយជិះរទេះសេះ ភ្ញៀវទេសចរក៏អាចអង្គុយលើខ្នងសេះ ថតរូបទុកជាអនុស្សាវរីយ៍បានផងដែរ។

ក្រៅពីទេសភាពជើងភ្នំ ភ្ញៀវទេសចរអាចពើបប្រទះនឹងទិដ្ឋភាពថ្មីប្លែកមួយទៀត ក្នុងអំឡុងពេលជិះរទេះសេះ គឺរថភ្លើងដឹកអ្នកដំណើរឆ្លងកាត់ជាប់ជើងភ្នំ នៅម៉ោងជិត១១ថ្ងៃត្រង់។

អ្នកបររទេះសេះម្នាក់ទៀត គឺលោក ពូ ធី ឱ្យដឹងដែរថា លោកប្រកបរបរនេះរយៈពេលពីរឆ្នាំមកហើយ ដោយក្នុងថ្ងៃខ្លះលោកអាចរកប្រាក់ចំណូលបាន១០ម៉ឺនរៀលក៏មាន។

ទោះយ៉ាងណា លោកថានៅទីនេះមិនទាន់មានកន្លែងកម្សាន្តសម្បូរបែបនៅឡើយ ដោយលោកអំពាវនាវឱ្យអាជ្ញាធរទេសចរណ៍ បង្កើតកន្លែងកម្សាន្តបន្ថែមទៀត ដើម្បីទាក់ទាញឱ្យភ្ញៀវមកកម្សាន្តតំបន់នេះកាន់តែច្រើន។

លោកថា៖ «ចង់ឱ្យរៀបចំឱ្យបានល្អទៅ ភ្ញៀវមកលេងច្រើន។ តែឥឡូវភ្ញៀវមកវាអត់សូវមានប្លុកកន្លែងលេងច្រើន វាសុទ្ធតែព្រៃ អត់ទាន់មានកន្លែងដើរលេងប្លែកៗ»។

បើទោះបីថ្ងៃខ្លះមានភ្ញៀវច្រើនត្រូវការជិះរទេះសេះ តែអ្នកបររទេះមិនប្រើសត្វនេះឱ្យលើសកម្លាំងឡើយ ដោយពួកវាអាចសម្រាក ១០នាទី ក្រោយដឹកភ្ញៀវមួយជើង និងរត់ពី៤ ទៅ៥ជើងប៉ុណ្ណោះក្នុងមួយថ្ងៃ។ ថ្ងៃខ្លះម្ចាស់សេះ បានឱ្យពួកវាផឹកភេសជ្ជៈប៉ូវកម្លាំង ដែលជាទិដ្ឋភាពមួយប្លែកបន្ថែមទៀត សម្រាប់ភ្ញៀវទេសចរ។

ភ្នំកំពង់ត្រាច គឺជាមរណីយដ្ឋានធម្មជាតិ ដែលភ្ញៀវទេសចរភាគច្រើនមិនដែលរំលងពេលទៅកម្សាន្តក្នុងខេត្តកំពត។

ភ្នំកំបោរមួយនេះ ស្ថិតនៅបណ្តោយផ្លូវជាតិលេខ៣៦ ក្នុងឃុំដំណាក់កន្ទួតខាងត្បូង ស្រុកកំពង់ត្រាច មានចម្ងាយ៣៨គីឡូម៉ែត្រ ប៉ែកខាងកើតខេត្តកំពត។

រមណីយដ្ឋានភ្នំកំពង់ត្រាច ឬភ្នំបាក់ មានកម្ពស់ពី ១៥០ ទៅ ២០០ម៉ែត្រ មានល្អាងតូចធំ និងរូងភ្នំ លាក់ទុកនូវរឿងរ៉ាវចម្លែកៗផ្សេងៗដែលអ្នកស្រុកមានជំនឿ និងនិទានតៗគ្នាប្រាប់កូនចៅជាច្រើនឆ្នាំមកនេះ ខណៈសេវាជិះរទេះសេះ កំពុងបន្ថែមភាពរស់រវើកឱ្យភ្នំនេះបន្ថែមទៀត៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។