Social Issues, ព័ត៌មានជាតិ, សង្គម

ស្នងការខេត្តកំពតថារឿងស្ត្រីបំពុលកូនស្លាប់២នាក់ក្រោមវិបត្តិបំណុលកើតតាំងពី១០ឆ្នាំមុន

លោក សែន សច្ចៈ
| ១៦ ឧសភា ២០២៥
ម៉ោង ២៣:១៦

ស្នងការនគរបាលខេត្តកំពត ចាត់ទុកថា ព័ត៌មានស្រ្តីម្នាក់ដាក់ថ្នាំបំពុលកូន២នាក់ស្លាប់ ក្រោមសម្ពាធបំណុលធ្ងន់ធ្ងរនោះ ជារឿងកើតឡើងតាំងពី១០ឆ្នាំមុន តែឃាតកម្មនេះ ត្រូវគេមើលឃើញថា ហាក់ឆ្លុះបញ្ចាំងពីវិបត្តិបំណុលពលរដ្ឋនាពេលបច្ចុប្បន្ន ដែលគំរាមដល់អំណាចមេដឹកនាំ បើមិនពន្លឿនដោះស្រាយ។

ការច្រានចោលនេះ ក្រោយអ្នកប្រើប្រាស់បណ្តាញសង្គម បានចែកចាយតៗគ្នានូវរូបភាពស្រ្តីម្នាក់នៅខេត្តកំពត ដាក់ថ្នាំពុលក្នុងបាយរបស់កូនតូចៗ២នាក់ពុលស្លាប់ ខណៈស្រ្តីជាម្តាយទទួលទានតាមក្រោយ តែត្រូវបានប្ដីមកទាន់ដឹកទៅសង្គ្រោះទាន់ពេល។

ក្នុងនោះស្រ្តីជាម្តាយឈ្មោះ ប៉ាក សុហេង អាយុ២៤ឆ្នាំ កូនឈ្មោះ ហ៊ាល សុវណ្ណាមិ ភេទប្រុស អាយុ១០ឆ្នាំ ស្លាប់ និងឈ្មោះ ហ៊ាល ក្តាន់ ភេទប្រុស អាយុ៦ឆ្នាំ ស្លាប់។

អ្នកលេងបណ្តាញសង្គម ព្រមទាំងសារព័ត៌មានអនឡាញក្នុងស្រុកជាច្រើន បានផ្សព្វផ្សាយដូចៗគ្នានេះថា ករណីនេះស្ថិតក្នុងភូមិត្រពាំងខ្វា ឃុំភ្នំកុង ស្រុកអង្គរជ័យ ខេត្តកំពត នៅថ្ងៃទី១៥ ខែឧសភា ឆ្នាំ២០២៥ ហើយមូលហេតុដោយសារអស់សមត្ថភាពបង់ធនាគារ។

យ៉ាងណា នៅថ្ងៃទី១៦ ខែឧសភានេះ ស្នងការនគរបាលខេត្តកំពត តាមរយៈទំព័រហ្វេសប៊ុកផ្លូវការរបស់ខ្លួន បានបំភ្លឺថា ករណីនេះ កើតឡើងតាំងពី១០ឆ្នាំមុន និងប្រាប់កុំឱ្យពលរដ្ឋមានការភ័ន្តច្រលំ។

បន្ថែមលើនេះ ស្នងការខេត្តកំពត បានព្រមានឱ្យហ្វេសប៊ុកមួយឈ្មោះថា EN Chhen លុបព័ត៌មាននេះចេញជាបន្ទាន់ផងដែរ។

ជុំវិញរឿងនេះ តំណាងរាស្រ្តគណបក្សសង្រ្គោះជាតិ លោក ម៉ែន សុថាវរិន្រ្ទ យល់ថា ទោះបីជារឿងចាស់ដូចការបំភ្លឺរបស់មន្រ្តីក្តី តែវាបានឆ្លុះបញ្ចាំងពីវិបត្តិបំណុលពលរដ្ឋ នាពេលបច្ចុប្បន្នដែលមានទំហំធំគួរឱ្យព្រួយបារម្ភ។

ក្នុងន័យនេះ លោកថា ពលរដ្ឋកម្ពុជាចាប់ផ្តើមអត់ទ្រាំលែងបាន ទើបចែកចាយតៗគ្នាពីបញ្ហានេះព្រោងព្រាត ដែលជាសារពញ្ញាក់អារម្មណ៍ឱ្យរដ្ឋាភិបាលដោះស្រាយបន្ទាន់ ដើម្បីកុំមានចរន្តបះបោរណាកើតឡើងគំរាមដល់អំណាចគ្រួសារហ៊ុន។

លោកថា៖ «កុំនិយាយលេងសើច រដ្ឋាភិបាលកុំឱ្យមើលស្រាល គាត់បារម្ភហើយ គាត់ក៏កំពុងតែភ័យដែរ ប៉ុន្តែគាត់ធ្វើជាស្រែក។ ខ្ញុំគ្រាន់តែថាប្រយ័ត្ន អារឿង ចរន្ត រឿងសេដ្ឋកិច្ចហ្នឹងគឺខ្លាំងមែនទែន។ ហើយយើងត្រូវតែទៅនិយាយជាមួយធនាគារថាប្រជាពលរដ្ឋគេនឹងសង អ្នកជំពាក់បំណុលគេនឹងសង ប៉ុន្តែដោយការអត់មានការងារធ្វើគេទុកមួយរយៈសិនចាំតែគេមានការងារធ្វើគេ សងវិញអ៊ីចឹងរដ្ឋទៅជួយគិតគូររឿងហ្នឹងផង ជួយគិតគូរប្រជាពលរដ្ឋផង ព្រោះម្នាក់ៗគេចង់រស់ដូចគ្នា មិនមែនរស់តែគ្រួសារឯងហ្នឹងទេ»។

សម្រាប់ លោក សុថាវរិន្ទ មានតែរដ្ឋាភិបាលងាកទៅដឹកនាំប្រទេសបែបប្រជាធិបតេយ្យ ដោះលែងអ្នកនយោបាយប្រឆាំង បញ្ឈប់ការរំលោភសិទ្ធិមនុស្ស និងរៀបចំការបោះឆ្នោតដោយសេរី ត្រឹមត្រូវ និងយុត្តិធម៌ ទើបអាចស្តារជីវភាពពលរដ្ឋខ្មែរឡើងវិញបាន។

ជាមួយគ្នានេះ នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ លោក អំ សំអាត យល់ថា អាជ្ញាធរគួរបង្ហាញភស្តុតាងបន្ថែមទៀត ដើម្បីឱ្យពលរដ្ឋទុកចិត្តថារឿងស្រ្តីបំពុលកូនដោយសារវិបត្តិបំណុលនេះ ជារឿងចាស់ពិតមែន ជាជាងបិទព័ត៌មានចោលបន្យល់ទុកការសង្ស័យពីមហាជន។

មួយវិញទៀត លោកថា សម្រាប់កម្ពុជា វិបត្តិបំណុលជារឿងដែលគួរឱ្យបារម្ភខ្លាំងក្នុងពេលបច្ចុប្បន្ន ជាពិសេសពលរដ្ឋដែលចាញ់បោកក្រុមឧកញ៉ាឆបោកលក់ដី និងផ្ទះខ្យល់ ដែលធ្វើឱ្យជនរងគ្រោះជួបវិបត្តិបំណុលធ្ងន់ធ្ងរ។

លោកថា៖ «អាហ្នឹងគឺជាវិបត្តិមួយធ្ងន់ធ្ងរ សម្រាប់សេដ្ឋកិច្ចគ្រួសាររបស់ពួកគាត់។ បើមិនមានការជួយអន្តរាគមន៍ទេ! វិបត្តិបំណុលហើយនិងបញ្ហាចាញ់បោកគេ ហើយជំពាក់បំណុលហ្នឹង វាកាន់តែធ្ងន់ធ្ងរទៅៗ ធ្វើឲ្យប៉ះពាល់ដល់ផ្លូវចិត្តធ្ងន់ធ្ងរអាចនឹងមានរឿងមិនប្រក្រតី កើតឡើងដូចករណីមួយចំនួនដែលបានកើតឡើង»។

ការិយាល័យឥណទានកម្ពុជា(CBC) បានចេញផ្សាយរបាយការណ៍កាលពីពេលថ្មីៗនេះថា ក្នុងឆ្នាំ២០២៤ មានពលរដ្ឋខ្មែរជាង៥លាន៤ម៉ឺននាក់ កំពុងប្រើប្រាស់កម្ចីពីប្រព័ន្ធធនាគារក្នុងទំហំទឹកប្រាក់ជិត ៦០ពាន់លានដុល្លារអាមេរិក។

ចំនួននេះ មិនទាន់រាប់បញ្ចូលជនរងគ្រោះ រាប់ម៉ឺនគ្រួសារទៀត ដែលកំពុងរួមរឹតដោយវិបត្តិបំណុល ដោយសារពួកគេចាញ់បោកក្រុមឧកញ៉ាលក់អចលនទ្រព្យ ដែលស្និទ្ធនឹងមេដឹកនាំ មានឧកញ៉ា ឡេង ណាវ៉ាត្រា អតីតឧកញ៉ា ហ៊ី គឹមហុង និងអតីតឧកញ៉ា ឡេង ចាន់ណា ជាដើម។

ប្រធានចលនាជាតិតស៊ូ លោក សម រង្ស៊ី និងជាអ្នកជំនាញសេដ្ឋកិច្ច សរសេរលើហ្វេសបុកលោកថា ទាំងគណបក្សប្រឆាំង ទាំងគណបក្សប្រជាជន រាស្រ្តខ្មែរទាំងអស់គ្នា កំពុងប្រឈមមុខនឹងបញ្ហាលុយកាក់ បញ្ហាបំណុល បញ្ហាសេដ្ឋកិច្ច បញ្ហាលំនៅដ្ឋាន បញ្ហាការងារ បញ្ហាសុខភាព និងកំពុងប្រឈមមុខនឹងឧក្រិដ្ឋកម្មគ្រប់ប្រភេទ។

បើតាម លោក សម រង្ស៊ី កាស៊ីណូ បនល្បែងស៊ីសង គ្រឿងញៀន អំពើបោកប្រាស់ ចាប់ជំរិត បានកើនឡើងពាសពេញប្រទេស តែរដ្ឋាភិបាលកម្ពុជាមិនដែលខ្វល់ពីប្រជាពលរដ្ឋឡើយ ពួកគេបែរជារួមគ្នាប្រព្រឹត្តបទឧក្រិដ្ឋជាមួយក្រុមម៉ាហ្វីយ៉ា ហើយធ្វើឱ្យស្ថានការណ៍កាន់តែអាក្រក់ទៅៗជារៀងរាល់ថ្ងៃ។

លោកស្តីបន្ទោសថា មេដឹកនាំសព្វថ្ងៃនេះជាមនុស្សអសមត្ថភាព មិនចេះជួយ មិនចេះដោះស្រាយបញ្ហាសង្គម តែបែរជាបន្ទោសជនរងគ្រោះ បន្ទោសកសិករដែលខំប្រឹងប្រែងចិញ្ចឹមជីវិតចិញ្ចឹមគ្រួសារទៅវិញ។

លោកជំរុញឱ្យពលរដ្ឋខ្មែររួបរួមគ្នា រួបរួមជាមួយគណបក្សនយោបាយទាំងអស់ ផ្លាស់ប្តូររបបគ្រួសារហ៊ុនចេញដើម្បីអនាគត ដើម្បីជីវិតកាន់តែប្រសើរឡើងសម្រាប់កូនចៅខ្មែរទៅថ្ងៃមុខ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។