អ្នកចាញ់បោកក្រុមហ៊ុនពិភពដីមាសម្នាក់ទៀត រស់នៅខេត្តកំពង់ចាម បានស្លាប់ក្រោយគ្មានលុយព្យាបាលជំងឺធ្វើឱ្យចំនួនអ្នកស្លាប់កើនជិត៣០នាក់ ដែលវិបត្តិនេះជនរងគ្រោះទាមទារឱ្យរដ្ឋាភិបាលចាប់បង្ខំឱ្យមេឆបោកសងលុយពួកគេវិញ ដើម្បីកុំឱ្យចំនួនអ្នកស្លាប់បន្តកើនឡើង។
អ្នកចាញ់បោកក្រុមហ៊ុនពិភពដីមាសម្នាក់ លោក ប៊ុន ធឿន ប្រាប់VODនៅថ្ងៃទី១៩ ខែឧសភា នេះថា ជនរងគ្រោះដែលស្លាប់ឈ្មោះ ខេន សុខខាន់ ភេទប្រុស វ័យ៥៥ឆ្នំា រស់នៅភូមិត្រពាំងចា ឃុំក្រឡា ស្រុកកំពង់សៀម ខេត្តកំពង់ចាម។
លោកថា បើគិតទាំងករណីស្លាប់ចុងក្រោយនេះ ធ្វើឱ្យចំនួនអ្នកស្លាប់ដោយសារក្រុមហ៊ុនពិភពដីមាសកើនឡើងដល់ចំនួន ២៧នាក់ហើយ។
លោកថា៖ «អ្នកស្លាប់ក៏កាន់តែកើនឡើងច្រើនចឹងទៅ និយាយទៅស្រ្តេសអស់ លោកគ្រូម្នាក់ៗវិលឡើងល្វីងមុខអស់ហើយ ស្នើសុំឱ្យថ្នាក់ដឹកនាំឲ្យលោកជួយដោះស្រាយពន្លឿនការងារហ្នឹង ចង់ឲ្យសម្ដេចបវរធិបតេយ្យ ហ៊ុន ម៉ាណែត លោកជួយហើយនិងសម្ដេចពុកសម្ដេចម៉ែហ្នឹង ឲ្យគាត់ជួយដោះស្រាយរឿងហ្នឹងឆាប់ៗលោកគ្រូ កុំឱ្យទុកយូរ»។
បើតាមប្រភពដដែល ប្រាប់ថា លោក ខេន សុខខាន់ បានស្លាប់កាលពីថ្ងៃទី១៥ ខែឧសភា ឆ្នាំ២០២៥ ដោយសារគ្មានលុយព្យាបាលជំងឺ ក្រោយចាញ់បោកក្រុមហ៊ុនពិភពដីមាសចំនួន២៦ ៥០០ដុល្លារ ធ្វើឱ្យជួបវិបត្តិបំណុលវ័ណ្ឌក។
អគ្គនាយកក្រុមហ៊ុនពិភពដីមាស គឺអតីតឧកញ៉ា ហ៊ី គឹមហុង ត្រូវបានចាប់ខ្លួនកាលពីខែសីហា ឆ្នាំ២០២៣ ពីបទ ឆបោកពលរដ្ឋ តែប្រមាណ ៤ខែក្រោយមក ពោលគឺនៅខែវិច្ឆិកា ឆ្នាំ២០២៣ តុលាការដោះលែងវិញ ក្រោយសន្យារកលុយសងជនរងគ្រោះវិញ តែពេលបាននៅក្រៅឃុំ លោកបានគេចវេសមិនគោរពសន្យានោះទេ។
ចំពេលយុត្តិធម៌ជាប់ជិត២ឆ្នាំទៅនេះ ក្រុមជនរងគ្រោះក៏បានប្រាប់VODថា នៅថ្ងៃទី១៩ ខែឧសភានេះ ពួកគេបានមកប្រមូលផ្តុំគ្នានៅមុខក្រសួងយុត្តិធម៌ ដើម្បីពន្លឿនដំណោះស្រាយផងដែរ៕
