ក្រសួងសុខាភិបាល បានជំរុញដល់មន្ទីរសុខាភិបាលគ្រប់រាជធានី-ខេត្ត រំលឹកដល់ប្រជាពលរដ្ឋដែលមានអាយុចាប់ពី ១២ឆ្នាំឡើងទៅ ទៅចាក់វ៉ាក់សាំងកូវីដ-១៩ ដើម្បីធានាភាពស៊ាំសហគមន៍ និងទប់ស្កាត់ការរីករាលដាលនៃជំងឺនេះ។
លិខិតរបស់រដ្ឋមន្ត្រីស្តីទីក្រសួងសុខាភិបាល លោក ម៉ី សំបូរ ជម្រាបជូនទៅអគ្គនាយកមន្ទីរពេទ្យកាល់ម៉ែត្រ នាយកមន្ទីរពេទ្យជាតិ និងប្រធានមន្ទីរសុខាភិបាលរាជធានី-ខេត្ត បានលើកឡើងថា ដោយរកឃើញមានការឆ្លងដោយកន្លែងនៃជំងឺកូវីដ-១៩ ប្រភេទថ្មី (JN.1 Iineages) (Covid-19 Omicron) កន្លងមក និងដើម្បីបង្ការជាមុនសំដៅធានាភាពស៊ាំសហគមន៍ និងទប់ស្កាត់ការរីករាលដាលនៃជំងឺនេះ ក្រសួងណែនាំឱ្យរំលឹកដល់ប្រជាពលរដ្ឋដែលមានអាយុចាប់ពី១២ឆ្នាំឡើងទៅ ចាក់វ៉ាក់សាំងការពារជំងឺនេះរៀងរាល់៦ខែម្តង ទៅតាមយុទ្ធសាស្ត្រនៃការចាក់រំលឹកវ៉ាក់សាំងកូវីដ-១៩។
ក្រសួងបន្តថា សម្រាប់ជនវ័យចាស់ ជនចាស់ជរា អ្នកមានជំងឺរ៉ាំរ៉ៃ និងមានភាពស៊ាំថយចុះជាដើម ត្រូវផ្តល់វ៉ាក់សាំងកូវីដ-១៩ ជាប្រចាំនៅគ្រប់មូលដ្ឋានសុខាភិបាលសាធារណៈ រួមមានមន្ទីរពេទ្យជាតិ និងមណ្ឌលសុខភាព ហើយការផ្តល់វ៉ាក់សាំងត្រូវរួមបញ្ចូលជាមួយសកម្មភាពចុះផ្តល់សេវាសុខភាពមូលដ្ឋានផងដែរ។
លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល បានលើកឡើងក្នុងទំព័រហ្វេសប៊ុកថា ដោយសារស្ថានភាពកើតមានការឆ្លងឡើងវិញនូវវីរុសកូវីដ-១៩ បំប្លែងថ្មី ពិសេសពួក ជេអ៊ីន.១ (JN.1) ដែលកំពុងតែចរាចរនៅតាមបណ្តាប្រទេសជិតខាងកម្ពុជា និងនៅតាមតំបន់នៅលើពិភពលោក ក្រសួងក្រើនរំលឹកដល់ប្រជាពលរដ្ឋទាំងអស់ បង្កើនការយកចិត្តទុកដាក់ និងប្រុងប្រយ័ត្នខ្ពស់ និងការពារខ្លួនពីការឆ្លង ជាពិសេសជនដែលងាយរងគ្រោះ ដូចជា ជនវ័យចាស់ ចាស់ជរា អ្នកដែលមានជំងឺរ៉ាំរ៉ៃ និងអ្នកដែលមានកងការពារខ្សោយនៅក្នុងខ្លួនជាដើម។
លោកស្រីបន្តថា កម្ពុជាបច្ចុប្បន្នមិនទាន់មានស្ថានភាពឆ្លងឡើងវិញនូវវីរុសកូវីដ-១៩ នៅឡើយទេ ប៉ុន្តែការ “ការពារប្រសើរជាងព្យាបាល” ជាជម្រើសដ៏ល្អប្រសើរបំផុត ហើយជាពិសេសកុំភ្លេចវិធានការ “៣ការពារ និង៣កុំ” រួមជាមួយនឹងការចាក់វ៉ាក់សាំងកូវីដ-១៩ ទើបអាចជួយកាត់បន្ថយជាអតិប្បរិមា នូវភាពធ្ងន់ធ្ងរនៃជំងឺ ការចូលសម្រាកពេទ្យ និងការស្លាប់។
បើតាមរបាយការណ៍ប្រចាំថ្ងៃរបស់ក្រសួងសុខាភិបាល គិតត្រឹមថ្ងៃទី១៩ ខែឧសភានេះ កម្ពុជាមានអ្នកឆ្លងជំងឺកូវីដ-១៩ សរុបចំនួន ១៣៦ ២៨៦នាក់ និងមានករណីស្លាប់ ៣ ០៥៦នាក់។
បើតាមប្រភពដដែល នៅថ្ងៃម្សិលមិញនេះ ពុំមានករណីឆ្លងជំងឺកូវីដ-១៩ថ្មីនោះទេ ប៉ុន្តែមានអ្នកជាសះស្បើយម្នាក់។ តែយ៉ាងណា ក្នុងរយៈពេលប៉ុន្មានថ្ងៃមុននេះ មានថ្ងៃខ្លះក្រសួងបានរកឃើញករណីឆ្លងថ្មីចំនួន ៦នាក់ និងថ្ងៃខ្លះ ៥នាក់ ខណៈថ្ងៃខ្លះមិនមានករណីឆ្លង៕
