ពលរដ្ឋកម្ពុជាអាចនឹងបន្តរស់នៅក្រោមការគំរាមគំហែងពីបទឧក្រិដ្ឋច្រើនទម្រង់ បើគ្រួសារហ៊ុននៅតែបន្តយកទឹកដីកម្ពុជា ធ្វើជាកន្លែងទាញយកប្រយោជន៍ពីពួកឧក្រិដ្ឋជន ដើម្បីចិញ្ចឹមអំណាចនោះ នេះបើតាមការលើកឡើងរបស់ក្រុមអ្នកឃ្លាំមើល ការវិវត្តនយោបាយនៅកម្ពុជា។
ក្តីបារម្ភនេះ ក្រោយពីស្ថាប័នអន្តរជាតិបានរកឃើញថា បទឧក្រិដ្ឋនៅកម្ពុជា ដែលដឹកនាំដោយគ្រួសារហ៊ុន កាន់តែរីកធំក្លាយជាកង្វល់របស់ពិភពលោក ជាប់ពាក់ព័ន្ធនឹងមន្ត្រីធំៗ រួមទាំងសែស្រឡាយគ្រួសារហ៊ុន គឺ លោក ហ៊ុន តូ ក្នុងទំហំទឹកប្រាក់ ប្រមាណជា៥ពាន់លានដុល្លារក្នុង១ឆ្នាំ បានពីការការពារ និងស៊ុំគ្រលំជាមួយគ្រួសារអ្នកដឹកនាំ។
ជុំវិញបញ្ហានេះ ទូរទស្សន៍ABC របស់ប្រទេសអូស្ត្រាលី បានចុះផ្សាយកាលពីថ្ងៃទី១៩ ខែឧសភាថា «រដ្ឋាភិបាលកម្ពុជា មានសកម្មភាពនៅក្នុងបណ្តាញឧក្រិដ្ឋកម្មដ៏មានឥទ្ធិពលបំផុតមួយរបស់ពិភពលោក»។
ប្រភពបន្តថា របាយការណ៍ដ៏សំខាន់មួយរកឃើញថា គណបក្សកាន់អំណាចកម្ពុជា កំពុងដំណើរការយ៉ាងសកម្មនូវអ្វីដែលអាចជាបណ្តាញឧក្រិដ្ឋកម្មដ៏មានឥទ្ធិពលបំផុតរបស់ពិភពលោក ដែលជំរុញឱ្យឧស្សាហកម្មបោកប្រាស់តាមអ៊ីនធឺណិត មានតម្លៃរាប់ពាន់លានដុល្លារ ដែលបង្កើតឡើងលើការជួញដូរមនុស្ស និងការពារដោយរដ្ឋ។
ប្រភពបញ្ជាក់ថា ការសិក្សាដែលផ្តល់មូលនិធិដោយរដ្ឋាភិបាលសហរដ្ឋអាមេរិក បានព្រមានថា «សេដ្ឋកិច្ចការបោកប្រាស់របស់អាស៊ីអាគ្នេយ៍» ដែលផ្តោតលើប្រទេសកម្ពុជា ឥឡូវនេះកំពុងប្រកួតប្រជែងជាមួយនឹងទំហំសេដ្ឋកិច្ចជាតិទាំងមូល។
របាយការណ៍នេះ បានដាក់ឈ្មោះមន្ត្រីជាន់ខ្ពស់កម្ពុជា រួមទាំងសាច់ញាតិនាយករដ្ឋមន្ត្រីកម្ពុជា មានលោក ហ៊ុន តូ ជាតួអង្គកណ្តាលនៅក្នុងសហគ្រាសឆបោកឆ្លងដែនដ៏ធំ បង្កការគំរាមកំហែងកាន់តែខ្លាំងឡើងដល់សន្តិសុខពិភពលោក និងស្ថិរភាពក្នុងតំបន់។
ជុំវិញបញ្ហានេះ ប្រធានក្រុមអ្នកតស៊ូមតិកម្ពុជា លោក ហុង លីម ប្រាប់VODនៅថ្ងៃទី២០ ខែឧសភានេះថានេះមិនមែនលើកទី១ទេ ដែលអន្តរជាតិរកឃើញទង្វើទុច្ចរិតមេដឹកនាំគ្រួសារហ៊ុនដែលយកទឹកដីកម្ពុជាធ្វើជាជម្រកចិញ្ចឹមពួកឧក្រិដ្ឋឆបោក ចាប់ជំរិត និងជួញដូរមនុស្ស។
លោកបន្តថា ករណីទាំងអស់នេះ ឆ្លុះបញ្ចាំងកាន់តែច្បាស់ថា មេដឹកនាំគ្រួសារហ៊ុនកំពុងបំផ្លាញប្រជាជាតិកម្ពុជា ធ្វើឱ្យកម្ពុជាស្អុយឈ្មោះលើឆាកអន្តរជាតិ ហើយពលរដ្ឋខ្មែរនឹងបន្តរងគ្រោះតជំនាន់។
លោកថា៖ «ការបោកបញ្ឆោត ការក្លែងបន្លំវាក្លាយទៅជារឿងដែលលាតយ៉ាងខ្លាំង និងមានឥទ្ធិពលខ្លាំងក្នុងការចូលដៃចូលជើង និងមានការគាំពារដោយក្រុមគ្រួសារត្រកូលហ៊ុន ដែលកាសែតអន្តរជាតិគេនិយាយពី លោក ហ៊ុន តូ យ៉ាងច្បាស់។ យើងឃើញថាស្រុកយើងវាធ្លាក់ខ្លួនយ៉ាងជ្រៅក្នុងអំពើទាំងអស់ហ្នឹង ឆបោក ចាប់ជំរិត អ្វីជាដើមហ្នឹង ដោយសារតែគ្រួសារហ៊ុន បានយកទឹកដីកម្ពុជាយើង ឱ្យក្លាយជាប្រទេសអាក្រក់ សាហាវ ធ្វើឱ្យក្លាយជាក្តីបារម្ភរបស់អន្តរជាតិជាដើម»។
សម្រាប់ លោក ហុង លីម អះអាងថា ក្រោមការដឹកនាំផ្តាច់ការគ្រួសារហ៊ុន អំពើឆបោក ចាប់ជំរិត និងការជួញមនុស្សនៅកម្ពុជាបន្តរីករាលដាលខ្លាំង ហើយក្លាយជាក្តីបារម្ភធំសម្រាប់អន្តរជាតិផងដែរ។
លោកហាក់ស្តីបន្ទោសថា គ្រួសារហ៊ុន បានយកទឹកដីកម្ពុជាទាំងមូលធ្វើជាកម្មសិទ្ធិផ្តាច់ការរបស់គ្រួសារគាត់ គឺធ្វើអ្វីតាមទំនើងចិត្ត ដូចជាកាត់ដីឱ្យបរទេស ប្រព្រឹត្តិអំពើពុករលួយ យកឧក្រិដ្ឋជនចិនធ្វើជាទីប្រឹក្សា ដោយមិនខ្វល់ពីសុខទុក្ខពលរដ្ឋខ្មែរម្ចាស់ប្រទេសនោះទេ។
លោកថា៖ «ស្រុកខ្មែរហ្នឹងគឺថា ហ៊ុន សែន គាត់គិតតែក្រាញអំណាច អូសលោងកម្ពុជាយើងរហូតដល់អវិចី គឺអាក្រក់ ដែលយើងឃើញថា គ្រួសារហ៊ុនកេងប្រវ័ញ្ញ និងបក្ខពួកគាត់កេងប្រវ័ញ្ញញើសឈាមបានពីអារបបហ្នឹង គឺមិនខ្វល់ពី មិនឈឺក្បាល គិតតែធ្វើយ៉ាងណាដើម្បីបានលុយផ្គត់ផ្គង់អំណាចគ្រួសារគាត់ លែងខ្វល់ពីសុខទុក្ខរាស្រ្ត ឬទឹកដីអីអស់ហើយ»។
លើសពីនេះ លោក ហុង លីម បានសរសេរនៅលើហ្វេសប៊ុករបស់លោកថា «ទូរទស្សន៍ABC នៃប្រទេសអូស្ត្រាលី ទើបសម្ភាសន៍លោកសាស្ត្រាចារ្យ Jacob Sims នៃសាកលវិទ្យាល័យHavard ដែលទើបតែធ្វើសេចក្ដីរាយការណ៍ ដែលកម្ពុជាបានក្លាយជាមជ្ឈមណ្ឌលធំបំផុតក្នុងលោក ជួញដូរឧក្រិដ្ឋកម្មតាមអនឡាញ មិនតិចជាង ៥០០០លានដុល្លារ ក្នុងមួយឆ្នាំ ដោយសារការការពារ និងស៊ុំគ្រលំរបស់គ្រួសារអ្នកដឹកនាំ»។
តំណាងរាស្រ្តបក្សសង្គ្រោះជាតិ លោក សួន សូរីដា និយាយថា រដ្ឋាភិបាលកម្ពុជាកំពុងលក់មុខកម្ពុជាកាន់តែខ្លាំងលើឆាកអន្តរជាតិ ពីអំពើឆបោក ចាប់ជំរិត លាងលុយកង្វក់ និងការជួញដូរមនុស្សជាដើម។
លោកថា ការរកឃើញជាបន្តបន្ទាប់របស់អន្តរជាតិ ពីអំពើឆបោក ចាប់ជំរិត និងការបង្ខាំងមនុស្ស ឬការជួញដូរមនុស្សនេះ ឆ្លុះបញ្ចាំងថា មេដឹកនាំកម្ពុជា កំពុងក្បត់ឆន្ទៈរាស្រ្តម្ចាស់ប្រទេស និងបំផ្លាញនគរ។
លោកអះអាងថា ការដឹកនាំបែបនេះនឹងបង្កគ្រោះថ្នាក់ដល់ប្រជាជាតិ គឺពលរដ្ឋរស់នៅទាំងភាពភ័យខ្លាច គ្មានសុវត្ថិភាព ខណៈអំពើឆបោក និងការចាប់ជំរិតទាំងនោះមានជាប់ពាក់ព័ន្ធនឹងអ្នកមានលុយ មានអំណាច។
លោកថា៖ «វាធ្វើឲ្យកេរ្តិ៍ឈ្មោះប្រទេសកម្ពុជាលើឆាកអន្តរជាតិស្អុយគុកមែនទែន ហើយកាលណាស្អុយគគ្រុក ទី១ គឺវាធ្វើឲ្យភ្ញៀវទេសចរអន្តរជាតិគេភ័យខ្លាច និងការមកលេងនៅកម្ពុជា និយាយឲ្យខ្លីគឺភ្ញៀវទេសចរមិនហ៊ាននឹងចូលលេងប្រទេសកម្ពុជាទៀត ហើយកាលណាទេសចរអត់មាន អាហ្នឹងវិស័យសេដ្ឋកិច្ចក៏វាធ្លាក់ចុះដែរ ព្រោះសេដ្ឋកិច្ចនៅស្រុកខ្មែរដុនដាបផង ហើយថែមទាំងលេចព័ត៌មានបែបនេះទៅទៀត អាហ្នឹងយើងឃើញថាធ្វើឲ្យវិស័យទេសចរណ៍នៅកម្ពុជានឹងកាន់តែធ្ងន់ធ្ងរឡើងធ្ងន់ធ្ងរឡើង»។
លើសពីនេះ អតីតមេដឹកនាំគណបក្សប្រឆាំងលោក សម រង្ស៊ី ហៅការចុះផ្សាយរបស់វិទ្យុ ABC នៅប្រទេសអូស្ត្រាលីនេះថាជារបាយការណ៍ស្រាវជ្រាវថ្មីមួយ ដែលបញ្ជាក់ថា រដ្ឋាភិបាលកម្ពុជា និងសមាជិកគ្រួសារហ៊ុន សែន គឺជាឧក្រិដ្ឋជនដែលប្រតិបត្តិការបោកប្រាស់តាមអ៊ីនធឺណិត ចាប់ជំរិត លាងលុយកខ្វក់ និងកាស៊ីណូនៅកម្ពុជា។
សម្រាប់ លោក សម រង្ស៊ី ឯកសារភ្ជាប់ជាមួយការសិក្សាស្រាវជ្រាវមាន ៧៣ទំព័រ ត្រូវបានគេចេញផ្សាយ ទាក់ទងនឹងសមាជិកគ្រួសារហ៊ុន និងមន្ត្រីរដ្ឋាភិបាលជាន់ខ្ពស់ ដែលការពារបណ្តាញឧក្រិដ្ឋជនទាំងនោះ ជួយពួកឧក្រិដ្ឋជនចិនប្រតិបត្តិការ នៅតាមខេត្តជាច្រើនក្នុងប្រទេសកម្ពុជានេះ «គឺជាប្រព័ន្ធដឹកនាំរដ្ឋ ដ៏សែនស្មោកគ្រោកបំផុតក្នុងប្រវត្តិសាស្ត្រកម្ពុជា»។
យ៉ាងណាក្តី អ្នកនាំពាក្យគណបក្សប្រជាជនកម្ពុជា លោក សុខ ឥសាន ចាត់ទុកការចុះផ្សាយ របស់កាសែតABCអូស្ត្រាលីនេះ ថាជារឿងមិនពិត និងវាយបកវិញថា មានចេតនាអាក្រក់ចោទប្រកាន់រដ្ឋាភិបាលកម្ពុជា និងឧកញ៉ា ហ៊ុន តូ។
ប៉ុន្តែយ៉ាងណា លោក សុខ ឥសាន ទទួលស្គាល់ថា អំពើឆបោកអនឡាញ ការចាប់ជំរិត ឬការបង្ខាំងមនុស្សខុសច្បាប់នៅកម្ពុជា ពិតជាមានមែន និងជាក្តីបារម្ភខ្លាំងរបស់រដ្ឋាភិបាលផងដែរ។
លោកថា៖ «វាយើងយល់ថាវាមាន ករណីទាំងអស់ហ្នឹង វាមិនមែនអត់ទេ តែវាមានហ្នឹងវាមកពីឧក្រិដ្ឋជនបរទេសចូលមកស្រុកខ្មែរប្រព្រឹត្តអំពើឆបោកតាមអនឡាញចឹងទេ បានរដ្ឋាភិបាលលោកចាត់វិធានការបង្រ្កាប ជាពិសេសបង្កើតគណៈកម្មាធិការពិសេសមួយ ដែលមាននាយករដ្ឋមន្រ្តីជាប្រធានហ្នឹង ដើម្បីចាត់វិធានការបង្ក្រាបដល់ពួកឧក្រិដ្ឋជនទាំងនោះ»។
ករណីនេះ កន្លងទៅ អតីតឧកញ៉ា ហេង សិទ្ធី ដែលអាជ្ញាធរកម្ពុជាចាប់ខ្លួនលើទឹកដីរុស្សី ធ្លាប់បានទម្លាយថា លោកឧកញ៉ា ហ៊ុន តូ ជាប់ពាក់ព័ន្ធយ៉ាងជ្រៅជាមួយមន្រ្តីរដ្ឋាភិបាល ក្នុងការបើកល្បែងអនឡាញខុសច្បាប់ និងឆបោកតាមអនឡាញ។
ជុំវិញរឿងនេះ VOD ធ្លាប់រកឃើញថា កាស៊ីណូWM ស្ថិតនៅក្បែររង្វង់មូលតោពីរ ក្នុងក្រុងព្រះសីហនុ បានប្រតិបត្តិការល្បែងអនឡាញខុសច្បាប់ច្រើនឆ្នាំមកហើយ ដោយលួចលាក់បំពានបម្រាមដែលរដ្ឋាភិបាលកម្ពុជា។
កាស៊ីណូនេះ គ្រប់គ្រងដោយក្រុមហ៊ុន Lixin ដែលមានបណ្តាញនឹងឧកញ៉ា ហ៊ុន តូ ក្មួយប្រុសរបស់លោក ហ៊ុន សែន ប្រធានព្រឹទ្ធសភា និងជាបងប្អូនជីដូនមួយ របស់លោកនាយករដ្ឋមន្រ្តី ហ៊ុន ម៉ាណែត។ ចំណែកកាស៊ីណូក្រោន (Crown) ដែលគ្រប់គ្រងដោយ លោក កុក អាន និងមានទីតាំងនៅក្នុងក្រុងបាវិត ខេត្តស្វាយរៀង ក៏នៅបន្តល្បែងអនឡាញខុសច្បាប់ដូចគ្នា។
លោក ចេន ហ្ស៊ី ប្រធានសម្ព័ន្ធក្រុមហ៊ុនព្រីនស៍ គ្រុប (Prince Group) ដែលតុលាការប្រទេសចិនតាមរកចាប់ខ្លួន ជាប់ពាក់ព័ន្ធនឹងប្រតិបត្តិការបនល្បែងអនឡាញខុសច្បាប់ ត្រូវបានតែងតាំងជាទីប្រឹក្សា មេដឹកនាំកម្ពុជាលោក ហ៊ុន សែន ។
លើសពីនេះ កាលពីថ្ងៃទី២១ ខែមេសា ឆ្នាំ២០២៥ អង្គការសហប្រជាជាតិទទួលបន្ទុកប្រឆាំងគ្រឿងញៀន និងបទឧក្រិដ្ឋកម្ម ហៅកាត់(UNODC) ចេញផ្សាយរបាយការណ៍ថ្មីមួយ រកឃើញថា កម្ពុជា ជាមជ្ឈមណ្ឌលឆបោកអនឡាញធំជាងគេនៅតំបន់អាស៊ាន ប្រព្រឹត្តិបទឧក្រិដ្ឋជួញដូរមនុស្ស និងលាងលុយ បង្កការគំរាមកំហែងដល់ប្រទេសក្នុងតំបន់ និងពិភពលោក។
ប្រភពនោះ បញ្ជាក់ថា មជ្ឈមណ្ឌលឆបោកទាំងនោះ ត្រូវបានរកឃើញនៅខេត្តព្រះសីហនុ រាជធានីភ្នំពេញ បាវិត ប៉ោយប៉ែត កោះកុង និងខេត្តពោធិ៍សាត់ ហើយពួកឧក្រិដ្ឋជនធ្វើសកម្មភាពឆ្លងដែនទៅប្រទេសឡាវ ភូមា និងហ្វីលីពីន ជាដើម។
តំណាងស្តីទី UNODC ប្រចាំតំបន់អាស៊ីអាគ្នេយ៍ និងប៉ាស៊ីហ្វិក លោក ប៊ែននេឌីក ហូហ្វមែន និយាយក្នុងរបាយការណ៍ក្នុងសម្តីដើមថា៖ «យើងមើលឃើញនូវការពង្រីកជាសកលរបស់ក្រុមឧក្រិដ្ឋកម្មដែលត្រូវបានរៀបចំនៅអាស៊ីបូព៌ា និងអាស៊ីអាគ្នេយ៍»។
លោកសង្កត់ធ្ងន់ថា៖ «រឿងនេះឆ្លុះបញ្ចាំងទាំងយុទ្ធសាស្ត្រប្រតិបត្តិការ ខណៈដែលសកម្មភាពរបស់ក្រុមឧក្រិដ្ឋកាន់តែរីកចម្រើន ហើយនិងស្វែងរកមធ្យោបាយ ព្រមទាំងទីកន្លែងថ្មីៗដើម្បីប្រព្រឹត្តបទល្មើស ប៉ុន្តែយ៉ាងណាយុទ្ធសាស្ត្រការពារហានិភ័យនាពេលអនាគត គួរតែបន្តនិងកាន់តែខ្លាំងក្លាផងដែរនៅក្នុងតំបន់»៕
