គណបក្សកម្លាំងជាតិ ជំរុញឱ្យមេដឹកនាំកម្ពុជា ផ្តល់សច្ចាប័នលើច្បាប់សមុទ្រ UNCLOS ដើម្បីបុព្វហេតុទឹកដី និងទប់ស្កាត់មហិច្ឆតា លេបត្របាក់ទឹកដីពីប្រទេសជិតខាង។
ការជំរុញនេះ ចំពេលមានចរន្តខ្មែរនៅក្រៅប្រទេស ជំរុញឱ្យរដ្ឋាភិបាលប្តឹងភាគីថៃ ទៅតុលាការយុត្តិធម៌អន្តរជាតិ (ICJ) ដើម្បីទាមទារកោះគុត ដែលថៃកំពុងគ្រប់គ្រង និងដែនសមុទ្រផ្សេងទៀត រួមទាំងកោះត្រល់ ដែលវៀតណាមគ្រប់គ្រងផងដែរ។
គណបក្សកម្លាំងជាតិ និយាយក្នុងលិខិតចំហមួយ ចុះថ្ងៃទី១៩ ខែឧសភា ឆ្នាំ២០២៥នេះថា ការជំរុញនេះ ដោយខ្លួនមើលឃើញថា ប្រទេសកម្ពុជា កំពុងមានបញ្ហាមិនឯកភាពគ្នា ចំពោះដែនដីកោះ និងព្រំដែនសមុទ្រជាមួយប្រទេសជិតខាង ដែលអាចប្រឈមនឹងជម្លោះការទូត ឬហិង្សាជាមួយប្រទេសទាំងនោះជាយថាហេតុ។
ក្នុងន័យនេះ គណបក្សកម្លាំងជាតិ ស្នើឲ្យរាជរដ្ឋាភិបាលដាក់បញ្ជូលអនុសញ្ញាអង្គការសហប្រជាជាតិ ស្តីពីច្បាប់សមុទ្រ (UNCLOS) ជូនរដ្ឋសភាជាតិនៃព្រះរាជាណាចក្រកម្ពុជា ដើម្បីផ្តល់សច្ចាប័ន។
សម្រាប់គណបក្សក្រៅរដ្ឋាភិបាលមួយនេះ ច្បាប់អន្តរជាតិនេះ ជាមូលដ្ឋានដ៏រឹងមាំសម្រាប់ការពារបូរណភាពព្រំដែនសមុទ្រ ព្រមទាំងជាបទដ្ឋានគតិយុត្តិអន្តរជាតិ ក្នុងការដោះស្រាយបញ្ហាជម្លោះព្រំដែនសមុទ្រដោយសន្តិវិធី និងយុត្តិធម៌តាមគោលការណ៍ជាមួយប្រទេសជិតខាងទៀតផង។
ជាងនេះទៅទៀត ចៅក្រមអន្តរជាតិដែនសមុទ្រ លោក ហឺរីនូស៊ី អតីតឯកអគ្គរាជទូតជប៉ុនប្រចាំកម្ពុជា និងលោក ហ្សក់ ប៉ីឡេ ឯកអគ្គរដ្ឋទូតបារាំងប្រចាំកម្ពុជា ក៏បានជំរុញឲ្យកម្ពុជាផ្តល់សច្ចាប័ន (UNCLOS) នេះឲ្យបានឆាប់ផងដែរ។
ប្រភពដដែល បញ្ជាក់ថា ដើម្បីរក្សាបាននូវអធិបតេយ្យភាព បូរណភាពទឹកដីកម្ពុជា និងចំណងមិត្តភាព ស្មើភាពជាមួយប្រទេសជិតខាង គណបក្សកម្លាំងជាតិ ស្នើសុំមេដឹកនាំកម្ពុជា ពន្លឿនបញ្ជូនអនុសញ្ញាអង្គការសហប្រជាជាតិស្តីពីច្បាប់សមុទ្រ (UNCLOS) ទៅរដ្ឋសភាជាតិ ដើម្បីផ្តល់សច្ចាប័នឲ្យបានឆាប់រហ័ស។
យ៉ាងណា មេដឹកនាំគ្រួសារហ៊ុន ធ្លាប់អះអាងថា បញ្ហាព្រំដែនកម្ពុជារក្សាជំហរចរចាធ្វើភាគី ដើម្បីដោះស្រាយបញ្ហានេះ នឹងបានចោទវិញថា ការបើកកកាយបញ្ហាព្រំដែន ជាការជំរុញឱ្យមានសង្គ្រាមផ្ទុះឡើងជាមួយប្រទេសជិតខាង។
ប៉ុន្តែសម្រាប់ អ្នកឃ្លាំមើលបញ្ហាព្រំដែនដែលមិនចំណុះឱ្យរដ្ឋាភិបាលអះអាងផ្ទុយពីនេះ ដោយថា មានតែជម្រើសប្តឹងទៅតុលាការយុត្តិធម៌អន្តរជាតិទេ ទើបកម្ពុជាអាចការពារបូរណភាពទឹកដីបាន ដោយមិនចាំបាច់ប្រឈមមុខគ្នាដោយអាវុធ ដោយលើកឧទាហរណ៍ ដូចកម្ពុជាឈ្នះក្តីថៃ ករណីប្រាសាទព្រះវិហារ។
លើសពីនេះ តំណាងរាស្ត្រគណបក្សសង្គ្រោះជាតិ ដែលមានបទពិសោធន៍កិច្ចការព្រំដែន លោក អ៊ុំ សំអាន ធ្លាប់អះអាងថា គិតត្រឹមខែតុលា ឆ្នាំ២០២៤ មាន ១៧០ភាគី បានផ្តល់សច្ចាប័នលើ UNCLOS ក្នុងនោះ១៦៦ប្រទេស ជាសមាជិកនៃអង្គការសហប្រជាជាតិ ១៤ប្រទេសជាសមាជិកអង្គការសហប្រជាជាតិបានចុះហត្ថលេខា ប៉ុន្តែមិនទាន់ផ្តល់សច្ចាប័ន ដែលក្នុងនោះមានកម្ពុជា ហើយ១៦ប្រទេសផ្សេងទៀតមិនបានចុះហត្ថលេខា ឬផ្តល់សច្ចាប័ន។
លោកដាក់ការសង្ស័យថា មេដឹកនាំកម្ពុជា លោក ហ៊ុន សែន ដឹកនាំប្រទេសជាង៤០ឆ្នាំកន្លងមកនេះ មិនព្រមធ្វើសច្ចាប័នលើច្បាប់សមុទ្រ (UNCLOS) នេះទេ។
លោកថា មូលហេតុនេះ អាចថាច្បាប់សមុទ្រ (UNCLOS) ធ្វើឱ្យប៉ះពាល់ដល់សន្ធិសញ្ញាស្តីពីតំបន់ទឹកប្រវត្តិសាស្រ្តឆ្នាំ១៩៨២ ដែលលោក ហ៊ុន សែន បានស៊ីញ៉េព្រមព្រៀងជាមួយវៀតណាម ធ្វើឱ្យកម្ពុជាបាត់កោះនឹងដែនសមុទ្រ។
សម្រាប់ លោក អ៊ុំ សំអាន ការប្រើប្រាស់ច្បាប់សមុទ្រ (UNCLOS) នឹងនាំឱ្យប៉ះពាល់ដល់កោះត្រល់ និងកោះក្រចកសេះរបស់ខ្មែរ ដែលវៀតណាមកំពុងកាន់កាប់ តាមសន្ធិសញ្ញាដែល លោក ហ៊ុន សែន បានធ្វើ។
ហេតុផលនេះ បានលោក ហ៊ុន សែន គ្មានឆន្ទៈក្នុងការប្តឹងថៃ ដើម្បីទាមទារកោះគុត និងវៀតណាមទៅតុលាការអន្តរជាតិនោះទេ ទើបគាត់មិនព្រមធ្វើសច្ចាប័នលើច្បាប់សមុទ្រ (UNCLOS)៕
