Political Issues, នយោបាយ, ព័ត៌មានជាតិ

កម្ពុជាឱ្យថៃសហការចាប់សកម្មជននយោបាយប្រឆាំង៤នាក់ទៀតចោទថាផលិតព័ត៌មានក្លែងក្លាយ

លោក ប៉ុល សម្បត្តិ
| ២៣ ឧសភា ២០២៥
ម៉ោង ២១:៤៧

រដ្ឋាភិបាលកម្ពុជា តាមរយៈនគរបាលជាតិ បានចេញប្រកាសតាមចាប់សកម្មជននយោបាយបក្សប្រឆាំងចំនួន៤នាក់ទៀត ដែលកំពុងភៀសខ្លួនទៅប្រទេសថៃ ដោយចោទថា ពួកគេបង្កើតព័ត៌មានក្លែងក្លាយ ខណៈបទឧក្រិដ្ឋជាច្រើនពាក់ព័ន្ធនឹងគ្រួសារហ៊ុន ត្រូវបានផ្អឹបចោលមិនចាត់ការ។

អ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន ប្រាប់VODនៅថ្ងៃទី២៣ ខែឧសភានេះថា ស្នងការនគរបាលជាតិ កំពុងដំណើរនិតីវិធីតាមចាប់ម្ចាស់គណនីហ្វេសប៊ុកចំនួន៤ រួមមាន ស្ត្រី Overseas ស្ទឹងសម្ងាត់, ម៉ៅ បង និង Chhin Chou (ជូ ឈីន) ជាដើម។

លោកបញ្ជាក់ថា ពួកគេទាំងនេះ បានបំភ្លៃព័ត៌មានមិនពិត ដោយកាត់តសំឡេងរដ្ឋមន្រ្តីក្រសួងពាណិជ្ជកម្ម អ្នកស្រី ចម និម្មល ពាក់ព័ន្ធកិច្ចចរចាពន្ធរវាងអាមេរិកនិងកម្ពុជាថា ជាភាពបរាជ័យធំរបស់រដ្ឋាភិបាល។

ម្យ៉ាងវិញទៀត លោកថា បុគ្គលឈ្មោះ ស្ត្រី Overseas និងឈ្មោះ ជូ ឈីន ធ្លាប់មានដីកាតុលាការចាប់ខ្លួន ពីតុលាការខេត្តបាត់ដំបងតាំងពីឆ្នាំ២០២៤ ដែលលោកថា គឺជាមុខសញ្ញា ដែលរដ្ឋាភិបាលត្រូវចាប់ខ្លួនពួកគេ ពីបទរួមគំនិតក្បត់។

លោកថា៖ «ស្ត្រី Overseas ហ្នឹង កិច្ចសម្ភាសន៍របស់លោកជំទាវ ចម និម្មល គាត់និយាយរឿងផ្សេង ហើយគាត់កាត់បន្តបញ្ចូលសំឡេង និយាយរឿងផ្សេង អានេះទី១គាត់ចង់និយាយថាគាត់ជាជនល្មើសពាក់ព័ន្ធនឹងបច្ចេកវិទ្យា បទល្មើសបច្ចេកវិទ្យាហើយ ទី២គាត់និយាយរឿងមិនពិតធ្វើឲ្យសង្គមគេមានការភាន់ច្រឡំ តើគាត់មានចេតនាធ្វើអី ហើយបុគ្គលនេះកំពុងតែស្ថិតនៅក្នុងរឿងយើងតាមរកចាប់ខ្លួន ព្រោះយើងមានដីការបស់តុលាការកាលពីខែវិច្ឆិកា ឆ្នាំ២០២៤ ពាក់ព័ន្ធនឹងការរួមគំនិតក្បត់»។

ប៉ុន្តែ អ្នកនាំពាក្យរូបនេះ មិនឆ្លើយនឹងសំណួរ VOD ដែលសួរថា តើករណី លី រតនរស្មី និងពេជ្រ គីមស្រ៊ិន ពាក់ព័ន្ធនឹងសំណុំរឿងឃាតកម្មបាញ់សម្លាប់តំណាងរាស្រ្ត លោក លិម គិមយ៉ា លើទឹកដីថៃនោះ ជិត៥ខែទៅនេះ ដំណើរដល់ណាហើយនោះទេ។

លើសពីនេះ សំណួរដែលសួរថា តើនគរបាលជាតិមានគម្រោងស៊ើបអង្កេត ដើម្បីចាប់បណ្តាឧក្រិដ្ឋជន នៅកម្ពុជាដែលវិទ្យាស្ថាន Humanity Research Consultancy រកឃើញថា បណ្តាញឧក្រិដ្ឋកម្មទាំងនោះ គាំពារដោយគ្រួសារហ៊ុន កំពុងគំរាមកំហែងសន្តិភាពពិភពលោកនោះដែរ។

លើសពីនេះ នៅថ្ងៃទី២៣ ខែឧសភានេះដែរ អគ្គស្នងការដ្ឋាននគរបាលជាតិ ក៏បានបញ្ចេញសេចក្តីប្រកាសមួយដែរ ពីវិធានចាប់ម្ចាស់ហ្វេសប៊ុកឈ្មោះ ស្ត្រី Overseas នេះដែរ។

ប្រភពអះអាងថា សារសំឡេងវីដេអូក្នុងទំព័រហ្វេសប៊ុកឈ្មោះ ស្ត្រី Overseas ពុំមែនជាសារសំឡេង របស់រដ្ឋមន្ត្រីក្រសួងពាណិជ្ជកម្ម អ្នកស្រី ចម និម្មល នោះទេ។ សារសំឡេងនោះ គឺជាការប្រើ បច្ចេកទេសកាត់តរូបភាពវីដេអូ ដោយបញ្ចូលសំឡេងស្ត្រីម្នាក់ធ្វើអត្ថាធិប្បាយ ក្នុងចេតនាធ្វើវិទ្ធង្សនា បំពុលសង្គម ញុះញង់ និងបំភ្លៃការពិត ក្នុងគោលបំណងធ្វើឱ្យសាធារណជនភាន់ច្រឡំ ក្នុងកិច្ចការចរចាលើការអនុគ្រោះពន្ធជុំទី១ ជាមួយសហរដ្ឋអាមេរិក។

ប្រភពរដ្ឋាភិបាល អះអាងទៀតថា អំឡុងពេលសម្ងំលាក់ខ្លួននៅប្រទេសថៃ ស្ត្រីរូបនេះ បានប្រើប្រាស់បណ្តាញសង្គមហ្វេសប៊ុកមួយចំនួន ដូចជា គណនីឈ្មោះ ស្ត្រី Overseas, គណនីឈ្មោះ ស្ទឹង សម្ងាត់, Chhin Chou, និងគណនីឈ្មោះ ម៉ៅ បង ធ្វើជាមធ្យោបាយ ដើម្បីបម្រើឧបាយកលក្បត់ជាតិ។

ដែលការណ៍នេះ អគ្គស្នងការដ្ឋាននគរបាលជាតិ កំពុងកសាងសំណុំរឿងតាមនីតិវិធី និងសហការជាមួយអាជ្ញាធរមានសមត្ថកិច្ចរបស់ប្រទេសថៃ ធ្វើការស្វែងរកចាប់ខ្លួន និងបញ្ជូនស្ត្រីឈ្មោះ ជូ ឈីន មកកាន់ប្រទេសកម្ពុជា ដើម្បីផ្តន្ទាទោសតាមផ្លូវច្បាប់។

អ្នកកាន់ផេក ស្ត្រី Overseas គឺអ្នកស្រី ជូ ឈីន ប្រាប់VODនៅថ្ងៃទី២៣ ខែឧសភានេះថា អ្វីដែលអ្នកស្រីធ្វើ គឺដើម្បីចង់ឱ្យមានការផ្លាស់ប្តូររបបដឹកនាំផ្តាច់ការនៅកម្ពុជា ដែលបំផ្លាញប្រទេសជាតិ និងធ្វើបាបពលរដ្ឋខ្មែរ។

យ៉ាងណាក្តី អ្នកស្រីអះអាងថា អ្នកស្រីមិនខ្លាចការពិតនោះទេ គឺអ្នកស្រីហ៊ានទទួលខុសត្រូវគ្រប់យ៉ាងចំពោះមុខច្បាប់ ប្រសិនបើរដ្ឋាភិបាលកម្ពុជា ចាប់ខ្លួនអ្នកស្រីត្រឡប់ទៅកម្ពុជាវិញមែននោះ។

អ្នកស្រីថា៖ «សម្រាប់ខ្ញុំទោះបីជាគេចាប់ខ្ញុំបាន អាហ្នឹងក៏ខ្ញុំទទួលយកទៅ ព្រោះអីធម្មតានៅពេលដែលយើងប្រឆាំងគេ យើងតែងតែមានបញ្ហាស្លាប់ឬរស់ គឺវានៅលើផ្លូវតែមួយហើយ អ៊ីចឹងទោះបីជាចាប់ខ្ញុំទៅដាក់គុកឬក៏សម្លាប់ខ្ញុំ អាហ្នឹងខ្ញុំអត់ខ្លាចទេ ពីព្រោះអ្វីដែលខ្ញុំធ្វើគឺខ្ញុំចង់បានមេដឹកនាំថ្មី ខ្ញុំចង់ឲ្យប្រទេសរបស់ខ្លួនឯងហ្នឹងរស់នៅប្រជាពលរដ្ឋរស់នៅមានសេរីភាព មានភាពជឿនលឿន សេដ្ឋកិច្ចលូតលាស់ហើយរស់នៅដោយមានសិទ្ធិសេរីភាពពេញលេញ»។

តំណាងរាស្រ្តបក្សសង្រ្គោះជាតិ លោក អ៊ុំ សំអាន ហាក់អស់សំណើចថា រឿងអយុត្តិធម៌សង្គមជាតិចាក់ស្រេះពេញនគរ ដូចជា ករណីឧក្រិដ្ឋកម្មឆបោក ចាប់ជំរិត រំលោភសម្លាប់ អំពើពុករលួយ គ្រួសារនិយម វិបត្តិបំណុលពលរដ្ឋ វិបត្តិដីធ្លី បញ្ហាគ្រឿងញៀន ការបាត់បង់ទឹកដី បែរជាមិនដោះស្រាយ គឺមកធ្វើទុក្ខបុកម្នេញតែខ្មែរគ្នា ឯណាពាក្យដែលលោក ហ៊ុន ម៉ាណែត និយាយថា«ខ្មែរស្រឡាញ់ខ្មែរ»។

លោកថា៖ «ជារឿងមួយគួរអស់សំណើចណាស់ បើសិនជានៅប្រទេសសេរី គេឮអ៊ីចឹងគឺគេសើចងាប់ហើយ ទៅចាប់ប្រជាពលរដ្ឋខ្លួនឯងនៅក្រៅប្រទេស គ្រាន់សម្ដែងមតិ ដល់ពួកឧក្រិដ្ឋជនធំៗនៅស្រុកខ្មែរដូចជា ពេជ្រ គឹមស្រ៊ិន លី រតនរស្មី ដូចជាមន្ត្រីជាន់ខ្ពស់រដ្ឋាភិបាលត្រកូលហ៊ុន មានលោក ហ៊ុន តូ ឧកញ៉ា លី យ៉ុងផាត់ ឧកញ៉ាទ្រី ភាព ឧកញ៉ាកុក អាន ជាដើម ដែលពាក់ព័ន្ធទៅនឹងបទឧក្រិដ្ឋធំៗនៅស្រុកខ្មែរមិនចាប់ខ្លួន បែរទៅតាមចាប់ប្រជាពលរដ្ឋស្លូតត្រង់ទៅវិញ»។

សម្រាប់អ្នកនយោបាយបក្សប្រឆាំងរូបនេះ យល់ថា ទាំងនេះគ្រាន់តែល្បិចកលរបស់មេដឹកនាំគ្រួសារហ៊ុន ចង់បង្វែរស្ថានការណ៍រឿងរបាយការណ៍អន្តរជាតិ រកឃើញពីឧក្រិដ្ឋកម្មឆបោកខ្នាតអន្តរជាតិដែលជាប់ពាក់ព័ន្ធគ្រួសារហ៊ុន និងសាច់ញាតិ បក្ខពួករបស់គាត់ប៉ុណ្ណោះ។

ម្យ៉ាងវិញទៀត លោកយល់ថា ទាំងនេះ ក៏ជាចេតនាមេដឹកនាំគ្រួសារហ៊ុន ចង់បំបាក់ស្មារតីនិងបំបិទសិទ្ធិពលរដ្ឋខ្មែរស្នេហាជាតិ កុំឱ្យហ៊ាននិយាយរិះគន់ពីការដឹកនាំផ្តាច់ការ សម្លាប់ប្រជាធិបតេយ្យ រំលោភសិទ្ធិមនុស្សរបស់គ្រួសារគាត់ប៉ុណ្ណោះ។

លោកថា៖ «ចង់ផ្តាំផ្ញើទៅអ្នកនាំពាក្យហ្នឹងធ្វើម៉េចព្យាយាមចាប់ខ្លួន ពេជ្រ គឹមស្រ៊ិន លី រតនរស្មី ទៅឲ្យតុលាការថៃទៅ ព្រោះអ្នកទាំងអស់ហ្នឹងគឺពាក់ព័ន្ធទៅនឹងការឃុបឃិតធ្វើឃាត លោក លិម គិមយ៉ា ហើយព្យាយាមចាប់ខ្លួនពួកឧក្រិដ្ឋជនធំៗនៅស្រុកខ្មែរ ដូចជា លោក ហ៊ុន តូ លី យ៉ុងផាត់ អីហ្នឹងដែលពាក់ព័ន្ធទៅនឹងបទឧក្រិដ្ឋបង្ខាំងមនុស្ស ឆបោកតាមអនឡាញ ការលាងលុយអីហ្នឹង ពាក់ព័ន្ធទៅនឹងបទឧក្រិដ្ឋដទៃទៀត ដូចជា ការចាប់ជំរិត និងការបង្ខាំងមនុស្សឱ្យឆបោកតាមអនឡាញជាដើម»។

ដោយឡែក ប្រធានសមាគមការពារសិទ្ធិមនុស្សអាដហុក លោក នី សុខា លើកឡើងថា បើការអះអាងរបស់អគ្គស្នងការដ្ឋាននគរបាលជាតិ ជារឿងពិត លោកក៏មិនគាំទ្រចំពោះការកាត់តសំឡេងណាមួយដែលធ្វើឱ្យប៉ះពាល់ដល់សង្គមដែរ។

ប៉ុន្តែលោកថា រដ្ឋាភិបាល ក៏គួរបើកលំហរសេរីភាពបញ្ចេញមតិ សេរីភាពសារព័ត៌មាន ដូចមានចែងក្នុងរដ្ឋធម្មនុញ្ញផងដែរ ដើម្បីឱ្យពលរដ្ឋគ្រប់និន្នាការអាចចូលរួមរិះគន់ដើម្បីស្ថាបនា ទើបជាតិរីកចម្រើន។

លោកថា៖ «ប្រសិនបើការបញ្ចេញព័ត៌មានរបស់គាត់ មិនមានលក្ខណៈសុចរិតមិនត្រឹមត្រូវ ខ្ញុំផ្ទាល់ក៏មិនលើកទឹកចិត្ដទេ ជារួម។ ប៉ុន្តែយើងក៏គួរតែគិតអំពីលំហនៃសេរីភាព លំហនៃប្រទេសមួយដែលអនុវត្តនូវលទ្ធិប្រជាធិបតេយ្យដែរ ថាតើព័ត៌មានឬក៏អ្វីដែលការលើកឡើងទាំងអស់ហ្នឹង វាមានការជះឥទ្ធិពលប៉ះពាល់ទៅដល់សុវត្ថិភាពទៅដល់ផលប្រយោជន៍ ដល់អសន្តិសុខសង្គមហ្នឹងកម្រិតប៉ុណ្ណា»។

យ៉ាងណា បន្ទាត់នយោបាយគ្រួសារហ៊ុន ប៉ុន្មានឆ្នាំចុងក្រោយនេះ ត្រូវបានគេមើលឃើញថា បានធ្វើឱ្យកម្ពុជាក្លាយជាសំបុកពួកឧក្រិដ្ឋជន បន្សល់ទុកជនរងគ្រោះច្រើនលាននាក់ ពីប្រព័ន្ធយុត្តិធម៌។

ពិសេសថ្មីៗនេះ របាយការណ៍ស្រាវជ្រាវជាង ៧០ទំព័រ របស់វិទ្យាស្ថាន Humanity Research Consultancy (HRC) ចេញផ្សាយថ្ងៃទី១៩ ខែឧសភានេះ បង្ហាញថា ប្រទេសកម្ពុជា នៅក្រោមអំណាចរដ្ឋាភិបាលគណបក្សប្រជាជនកម្ពុជា នៃគ្រួសារហ៊ុន គឺជាទីតាំងស្នូលនៃការប្រព្រឹត្តិឧក្រិដ្ឋកម្មឆ្លងដែន ជាពិសេស ឧក្រិដ្ឋកម្មអនឡាញ ។

របាយការណ៍នេះ ចង្អុលបញ្ជាក់ថា គណបក្សប្រជាជនកម្ពុជា ដើរតួនាទីជាអ្នកការពារពួកអ្នកមានអំណាច ឲ្យគប់គិតជាមួយបណ្តាញឧក្រិដ្ឋកម្មបរទេស ដើម្បីប្រមូលប្រាក់យកទៅចិញ្ចឹមគណបក្សកាន់អំណាច ដោយពួកគេអាចរកចំណូលបានពីឧក្រិដ្ឋកម្មអនឡាញ ប្រមាណពី ១២,៥ពាន់លាន ទៅ ១៩ពាន់លានដុល្លារ នៅក្នុង១ឆ្នាំ ។

វិទ្យាស្ថាន Humanity Research Consultancy (HRC) រកឃើញថា មន្ត្រីជាន់ខ្ពស់ក្នុងជួររដ្ឋាភិបាលលោក ហ៊ុន ម៉ាណែត និងឧកញ៉ាគ្រាក់ៗ ចំនួន ២៨នាក់ ក្នុងនោះក៏មានឈ្មោះឧកញ៉ាជំនិតរបស់គ្រួសារហ៊ុន លោក លី យ៉ុងផាត់ និងលោក ទ្រី ភាព ដែរ គឺជាមេបណ្តាញឧក្រិដ្ឋកម្មឆ្លងដែននៅកម្ពុជា ហើយមានអ្នកបម្រើការងារក្នុងឧក្រិដ្ឋកម្មអនឡាញនេះ រហូតដល់ជាង ១៥ម៉ឺននាក់ ។

មុខរបរសំខាន់ៗរបស់ពួកគេ ដែលកាងការពារដោយគណបក្សប្រជាជនកម្ពុជា នៃលោក ហ៊ុន សែន រួមមានការលាងលុយកខ្វក់ ការបោកប្រាស់តាមអនឡាញ ល្បែងអនឡាញ និងការជួញដូរមនុស្សឆ្លងដែន ជាដើម។

ទាំងអស់នេះត្រូវបាន គេចាត់ទុកថា មេដឹកនាំកម្ពុជាជាមេបណ្តាញឧក្រិដ្ឋកម្ម គំរាមកំហែងដល់សន្តិសុខពិភពលោក ដែលធ្វើឱ្យពលរដ្ឋខ្មែរទូទាំងប្រទេស រស់នៅក្នុងស្ថានភាពប្រកាសអាសន្ន បើគ្មានចរន្តផ្លាស់ប្តូរទេនោះ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។