ប្រជាពលរដ្ឋដែលប្រើប្រាស់បណ្ណបេឡាជាតិរបបសន្តិសុខសង្គម (បសស) ជំរុញដល់ក្រសួងសុខាភិបាល ឬខាងមន្ទីរពេទ្យរដ្ឋមួយចំនួន ពង្រីកកន្លែងបើកថ្នាំ ដើម្បីបង្កភាពងាយស្រួល និងកាត់បន្ថយបញ្ហាប្រឈមផ្សេងៗ អំឡុងពេលប្រជាពលរដ្ឋ ឬអ្នកជំងឺរងចាំយូរម៉ោង។
តាមរយៈការថតវីដេអូខ្លីមួយក្នុងបរិវេណមន្ទីរពេទ្យកាល់ម៉ែត្រ រាជធានីភ្នំពេញ នៅលើបណ្តាញសង្គមហ្វេសប៊ុករបស់ម្ចាស់អាខោនឈ្មោះ បង ឌី កាលពីថ្ងៃទី២១ ខែឧសភានេះ គេសង្កេតឃើញមានពលរដ្ឋជាច្រើន បាននាំឈរតម្រង់ជួររងចាំបើកថ្នាំ ដែលការតម្រង់ជួរនោះ ម្ចាស់អាខោនថាមានចម្ងាយប្រមាណ ៣០០ម៉ែត្រ។
បើតាមរយៈការបញ្ចេញមតិក្នុងវីដេអូនោះ ម្ចាស់អាខោនហ្វេសប៊ុករូបនេះ មានជំងឺឈឺសន្លាក់ និងចុកជើង ប៉ុន្តែគាត់ត្រូវឈរតម្រង់ជួររងចាំរយៈពេលជាងកន្លះថ្ងៃ ដើម្បីបានបើកថ្នាំ ខណៈដែលគាត់ប្រើប្រាស់បណ្ណបសស ក្នុងការព្យាបាល។
ចំណែក ម្ចាស់អាខោនហ្វេសប៊ុកឈ្មោះ Mao Samnang បានលើកឡើងដែរថា៖ «ខ្ញុំធ្លាប់ទៅកាល់ម៉ែត បើកថ្នាំទឹកនោមផ្អែម ៣ម៉ោង»។
ម្ចាស់អាខោនហ្វេសប៊ុកមួយរូបទៀត ឈ្មោះ Masterlife Mba បានបញ្ចេញមតិដែរថា នៅកន្លែងប្រើប្រាស់បណ្ណ បសស ក្នុងមន្ទីរពេទ្យកាល់ម៉ែត្រ ប្រជាពលរដ្ឋត្រូវឡើងតម្រង់ជួរតាំងពីម៉ោង ៣កន្លះព្រឹក ហើយទៅកន្លែងពិនិត្យរងចាំចន្លោះម៉ោង ៤ទៅម៉ោង ៦ព្រឹក។ នៅពេលទៅបើកថ្នាំពលរដ្ឋត្រូវឈរតម្រង់ជួរចន្លោះពី ៣ទៅ៤ម៉ោងបន្ថែមទៀត ដែលគិតទៅត្រូវប្រើប្រាស់ពេលវេលាពេញមួយថ្ងៃ។
ប្រភពដដែលនេះបន្តក្នុងសំណេរដើមថា៖ «នេះគេហៅថាការងារធ្វើយឺតដូចក្តាម។ បុគ្គលិកតិចអ្នកជំងឺច្រើន ហេតុអីមិនមានវិធានការ?»។
ម្ចាស់អាខោនហ្វេសប៊ុកមួយរូបទៀត ឈ្មោះ Srean Vannsinh ក៏បានលើកឡើងដែរថា ការរងចាំបើកថ្នាំយូរ នាំឱ្យខាតពេលវេលា ដែលការណ៍នេះ រូបគាត់បានជំរុញឱ្យខាងមន្ទីរពេទ្យរដ្ឋ ជួយសម្រួលឱ្យបានលឿនជាងនេះ។
វីអូឌី មិនអាចសុំការឆ្លើយតបបានភ្លាមៗពីអគ្គនាយកមន្ទីរពេទ្យកាល់ម៉ែត្រ លោក គង់ សន្យា និងអ្នកនាំពាក្យក្រសួងសុខាភិបាល លោក កុយ វ៉ាននី ជុំវិញករណីនេះបាននៅឡើយទេ នៅថ្ងៃទី២៣ ខែឧសភានេះ។
កាលពីអំឡុងខែកុម្ភៈ ឆ្នាំ២០២៥ អ្នកជំងឺប្រើប្រាស់ប័ណ្ណ បសស នៅមន្ទីរពេទ្យអង្គឌួង ក៏បានត្អូញត្អែរពីផលលំបាក និងភាពស្មុគស្មាញនៃការរកសេវានៅមន្ទីរពេទ្យរដ្ឋមួយនេះផងដែរ ដោយសារត្រូវអនុវត្តនីតិវិធីច្រើនពេក។
អ្នកជំងឺរូបនោះ បានប្រាប់វីអូឌីបន្តក្នុងលក្ខខណ្ឌមិនបញ្ចេញឈ្មោះថា ការធ្វើដូចនេះ នាំឱ្យអ្នកជំងឺកកស្ទះ និងបង្កផលលំបាក ដោយអ្នកជំងឺខ្លះ ត្រូវងើបតាំងពីម៉ោង ៣ ទៅម៉ោង៤ទៀបភ្លឺ ដើម្បីរង់ចាំបានលេខចូលពិនិត្យជំងឺ បើមិនដូច្នេះ គឺអ្នកជំងឺសម្រុកកក់កុញ មិនងាយបានពិនិត្យឡើយ។ មានអ្នកខ្លះទៀត ត្រូវរង់ចាំដល់ទៅ២ថ្ងៃក៏មានដែរ ទើបអាចមានឈ្មោះត្រូវជួបគ្រូពេទ្យ។ ការប្រើពេលដ៏យូរបែបនេះ នោះក៏ព្រោះតែអ្នកជំងឺដែលប្រើប្រាស់ប័ណ្ណ ប.ស.ស នេះមានចំនួនច្រើនពេក។
ភ្លាមៗក្នុងអំឡុងខែកុម្ភៈដែលនោះ មន្ទីរពេទ្យអង្គឌួងបានសេចក្តីជូនដំណឹងមួយឆ្លើយតបលើបញ្ហានេះថា ខាងមន្ទីរពេទ្យបានចាត់តាំង និងមានក្រុមការងាររបស់មន្ទីរពេទ្យនៅជាប់ជាប្រចាំ ចុះពិនិត្យ និងជួយសម្រួលដល់ប្រជាពលរដ្ឋ តាមគ្រប់ស្ថានភាពជាក់ស្តែង និងកាន់តែរកឱ្យឃើញអ្នកដែលមានអាទិភាពដើម្បីទទួលបានសេវានិងចូលពិនិត្យមុន ដែលករណីនេះខាងមន្ទីរពេទ្យសុំការយោគយល់ពីពលរដ្ឋផងដែរ។
យ៉ាងណាខាងមន្ទីរពេទ្យនេះថា ខ្លួននឹងបន្តខិតខំយកចិត្តទុកដាក់ និងទទួលយកនូវមតិយោបល់ចូលរួមស្ថាបនា ដើម្បីឱ្យការផ្តល់សេវាប្រកបដោយគុណភាព ភាពពេញចិត្តលើក្រមសីលធម៌ និងវិជ្ជាជីវៈ៕
