តំណាងគណបក្សដើម្បីកម្ពុជា នៅតែមើលឃើញថា សំណុំរឿងព្រហ្មទណ្ឌ ដែលខ្លួនបានប្តឹងចូលទៅស្ថាប័នអយ្យការអមសាលាដំបូងខេត្តព្រៃវែង នៅតែកប់បាត់ដំណឹងនៅឡើយ ខណៈក្រសួងយុត្តិធម៌បានសម្រេចរួចហើយដោយកំណត់ឱ្យមន្រ្តីតុលាការដែលកំពុងបម្រើការនៅក្នុងស្ថាប័នអយ្យការអមនេះ ត្រូវជំរុញនីតិវិធីឱ្យបានលឿន។
ថ្លែងប្រាប់វីអូឌីនៅថ្ងៃទី២៣ ខែឧសភានេះ លោក ឯម សុខសុវណ្ណ ប្រធានគណបក្សដើម្បីកម្ពុជា និយាយថា ចំពោះកិច្ចអន្តរាគមន៍ ដែលចេញដោយក្រសួងយុត្តិធម៌នេះ វាជានីតិវិធីមួយដែលល្អហើយ ប៉ុន្តែអ្វីដែលនៅតែស្មុគស្មាញចំពោះរឿងនេះ គឺនៅត្រង់ថា ភាពល្អឥតខ្ចោះនេះ ខ្លាចក្រែងវាបានតែលើសន្លឹកសៀវភៅ។ លើសពីនេះទៅទៀត អ្វីដែលធ្វើឱ្យលោកក្នុងនាមជាម្ចាស់បណ្តឹងខកចិត្តនោះ គឺម្តងជាពីរដងរួចមកហើយ ដែលស្ថាប័នអយ្យការ ផ្អិបរឿងនេះទុកឥតចាត់ការ។
លោកថា៖ «ចំពោះការឆ្លើយតបពីក្រសួងដែលខ្ញុំស្នើសុំអន្តរាគមន៍ឲ្យជួយពន្លឿនហ្នឹង វាល្អហើយបងរាងលឿនបន្ដិចហើយ ប៉ុន្តែអ្វីដែលសំខាន់ហ្នឹងកុំឲ្យការពន្លឿនហ្នឹងវាលើតែក្រដាស ធ្វើម៉េចឲ្យវាការពិតជាក់ស្ដែងតែម្ដង បើថាធ្វើអាហ្នឹងធ្វើឲ្យវាច្បាស់លាស់តែម្ដង បើថាធ្វើតែលើក្រដាសឲ្យតែល្អមើលទេ ហ្នឹងវាមិនមែនជាយុត្តិធម៌មួយសម្រាប់ខ្ញុំ ហើយសម្រាប់បងប្អូនប្រជាពលរដ្ឋទូទៅទេ»។
ប្រតិកម្មរបស់ប្រធានគណបក្សដើម្បីកម្ពុជា នៅពេលនេះ ធ្វើឡើងនៅក្រោយពេលដែលក្រសួងយុត្តិធម៌ កាលពីថ្ងៃទី២០ ខែឧសភា ឆ្នាំ២០២៥ បានចេញលិខិតផ្លូវការមួយច្បាប់ឱ្យ លោក គុជ គឹមឡុង ព្រះរាជអាជ្ញាអមសាលាដំបូងខេត្តព្រៃវែង ពិនិត្យ និងសម្រេចឱ្យបានឆាប់នូវបណ្តឹងមួយករណីដែលម្ចាស់បណ្តឹង គឺជាប្រធានគណបក្សដើម្បីកម្ពុជា។
លោក កើត រិទ្ធិ រដ្ឋមន្រ្តីក្រសួងយុត្តិធម៌ លើកឡើងនៅក្នុងលិខិតនេះបន្ថែមទៀតថា លោក គុជ គឹមឡុង ត្រូវពន្លឿនរឿងក្តីនេះឱ្យបានឆាប់រហ័ស និងអនុវត្តឱ្យបានត្រឹមត្រូវតាមនីតិវិធីច្បាប់ជាធរមាន។ ជាងនេះទៀត ក្នុងករណីអនុវត្តនីតិវិធីទៅ ត្រូវជួបឧបសគ្គ ឬមានបញ្ហាលើចំណាត់ការនៃសំណុំរឿងនេះ ត្រូវផ្តល់ព័ត៌មានជាបន្ទាន់មកគណៈបញ្ជាការដឹកនាំយុទ្ធនាការ ដើម្បីមានមូលដ្ឋានចាត់ការបន្ត។
សំឡេងប្រជាធិបតេយ្យ វីអូឌី មិនអាចស្វែងរកការបំភ្លឺជុំវិញរឿងនេះ ពីលោក គុជ គឹមឡុង ព្រះរាជអាជ្ញាអមតុលាការខេត្តព្រៃវែង ដែលទទួលបន្ទុកនៅក្នុងសំណុំរឿងព្រហ្មទណ្ឌនេះបាននៅឡើយទេ ខណៈលោក ហូ ស៊ីឃ័រ ក្រឡាបញ្ជីដែលកាន់រឿងក្តីនេះ មិនអាចសុំការអត្ថាធិប្បាយបាន ដោយលោកអះអាងថា មានការរំខាន និងស្តាប់មិនបានក្នុងពេលសន្ទនា។
បើទោះជាបែបណា តាមរយៈសារឆ្លើយឆ្លងគ្នាតាមទូរស័ព្ទ ដែលត្រូវបាន លោក ឯម សុខសុវណ្ណ ម្ចាស់បណ្តឹងនៅក្នុងរឿងក្តីនេះ បានផ្សព្វផ្សាយនៅលើបណ្តាញសង្គមហ្វេសប៊ុករបស់ខ្លួន ជាមួយលោក ហូ ស៊ីឃ័រ ដែលជាក្រឡាបញ្ជី ឱ្យដឹងថា លោកស្នើឱ្យម្ចាស់បណ្តឹង ជួបជាថ្មីទៀតជាតំណាងអយ្យការ លោក គុជ គឹមឡុង។ ប៉ុន្តែករណីនេះ ត្រូវបានលោក ឯម សុខសុវណ្ណ បដិសេធដោយអះអាងថា បើទោះជាត្រូវជួបជាថ្មីទៀត ក៏គ្មានបានផលអ្វីដែរ។ ហេតុនេះ លោកស្នើឱ្យតុលាការអនុវត្តតាមអ្វីដែលក្រសួងយុត្តិធម៌ចេញបញ្ជា គឺគ្រប់គ្រាន់ហើយ។
លោកថា៖ «(Aលោក ហូ ស៊ីឃ័រ)ឥឡូវអ៊ីចេះទៅៗ ខ្ញុំសុំបងថ្ងៃអង្គារបងអាចទំនេរទេ អញ្ជើញមកជួបមេបានទេ (Bលោក ឯ សុខសុវណ្ណ)អត់បានទៅទេបងរវល់ពេកជួបទូតផងអីផង បងធ្វើចំណាត់ការតាមតែហ្នឹងទៅតាមនីតិវិធីរបស់ឯកឧត្តមឧបនាយករដ្ឋមន្ត្រី កាញារិទ្ធ ទៅបង (A) ចឹងក៏បានដែរបង (B) ធ្វើតាមហ្នឹងទៅបង បើទៅជួបថ្ងៃមុននិយាយចុះឡើង អត់ពិតផងខ្ញុំមិនចេះនិយាយចឹងទេ ធ្វើតាមហ្នឹងទៅបង ធ្វើតាមឯកឧត្តមឧបនាយករដ្ឋមន្ត្រីកាញារិទ្ធទៅបង (A)ចឹងថ្ងៃអង្គារបងមកអត់កើត (B)អត់ទៅជូនទេបងទៅជួបអីទៀត បើទៅជួបហើយជួនកាលនិយាយអត់ច្បាស់ផង ធ្វើខ្ញុំជួបម្ដងពីរដងហើយហ្នឹងធ្វើតាមហ្នឹងទៅបង មានរឿងអីទាក់ទងទៅមេធាវីខ្ញុំទៅ»។
ជុំវិញរឿងនេះ កាលពីថ្ងៃទី៨ ខែឧសភា លោក ឯម សុខសុវណ្ណ ប្រធានគណបក្សដើម្បីកម្ពុជា បានដាក់បណ្តឹងសុំកិច្ចអន្តរាគមន៍ពីក្រសួងយុត្តិធម៌ ក្រោយតុលាការខេត្តព្រៃវែង បានផ្អិបរឿងក្តីរបស់ខ្លួនទុកឥតចាត់ការ។ នៅក្នុងរឿងក្តីនេះ ដើមបណ្តឹងបានប្តឹងមន្រ្តីពន្ធដារខេត្ត មន្រ្តីសាលាខេត្ត និងមន្រ្តីនគរបាលខេត្តចំនួន១០ ទៅតុលាការ។ ក៏ប៉ុន្តែក្រោយដាក់បណ្តឹង មានតែជនជាប់ចោទចំនួន ៣នាក់ទេ ដែលត្រូវបានតុលាការកោះហៅមកផ្តល់សក្ខីកម្ម រួមមាន មន្រ្តីសាលាខេត្តព្រៃវែង និងម្នាក់ទៀត ជានាយរងផ្នែកចរាចរណ៍ផ្លូវគោក ព្រមទាំងនាយការិយាល័យគីមីសាស្រ្ត។ ក្រៅពីនេះ ៧នាក់ផ្សេងទៀត នៅក្នុងរឿងក្តីនេះ ដែលសុទ្ធតែជាមន្រ្តីពន្ធដារខេត្ត គឺនៅមិនទាន់ត្រូវបានតុលាការកោះហៅមកសួរនាំនៅឡើយទេ។
ទាក់ទិនអង្គហេតុ នៃរឿងក្តីនេះ លោក ឯម សុខសុវណ្ណ ឱ្យដឹងថា ដំបូងឡើយ ពោលកាលពីឆ្នាំ២០២៣ លោកត្រូវគេរកឃើញថា បានជាប់ពន្ធលើមធ្យោបាយធ្វើដំណើរមិនទាន់បានទូទាត់។ ប៉ុន្តែនៅក្នុងឆ្នាំដដែល លោកត្រូវរង់ការចោទប្រកាន់ថានៅជាប់ពន្ធផ្លូវនេះដដែល ខណៈលោកបានទូទាត់ពន្ធទាំងចាស់ និងថ្មីរួចរាល់ហើយ ចំនួនសរុប ១លាន៦០ម៉ឺនរៀល។
ផ្ទុយទៅវិញ ក្នុងពេលដែលលោកបង់ពន្ធរថយន្ត ឬបង់ពន្ធលើមធ្យោបាយធ្វើដំណើរ សម្រាប់ឆ្នាំ២០២៤ ចប់សព្វគ្រប់ ស្រាប់តែឈ្មោះរបស់លោកត្រូវនៅជាប់ពន្ធឆ្នាំចាស់មិនទាន់ទូទាត់អស់នៅឡើយ ដែលមានចំនួនសរុបទាំង២ឆ្នាំ ២លាន ៤០ម៉ឺនរៀលទៅវិញ។
ក្រោយមានភាពមិនប្រក្រតីនេះកើតឡើង កាលពីថ្ងៃទី២៩ ខែវិច្ឆិកា និងថ្ងៃទី២ ខែធ្នូ ឆ្នាំ២០២៤ លោកបានដាក់បណ្តឹងប្រឆាំងមន្រ្តី១០នាក់ មកពីស្ថាប័នខុសៗគ្នា ក្រោមបទចោទ «កេងយកផលប្រយោជន៍ដោយខុសច្បាប់ រំលោភលើទំនុកចិត្ត ការជ្រៀតជ្រែកដោយខុសច្បាប់ ក្នុងការបំពេញមុខងារសាធារណៈ និងការក្លែងបន្លំ »។
លោក សេក សុជាតិ អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ ធ្លាប់លើកឡើងនៅក្នុងសំណុំរឿងនេះថា ការដែលម្ចាស់បណ្តឹងរុញរឿងនេះ ចូលទៅដល់ដៃតុលាការ វាគឺជាជម្រើសល្អមួយ បើទោះជាលទ្ធផលចុងក្រោយ ប្រែប្រួលបែបណា តែការព្យាយាមរកខុសត្រូវ តាមរយៈប្រព័ន្ធយុត្តិធម៌បែបនេះ វាប្រសើរជាជាងការរិះគន់ដែលគ្មានមូលដ្ឋាន។ ម្យ៉ាងវិញទៀត នេះគឺជាការប្រើប្រាស់សិទ្ធិដែលត្រឹមត្រូវ ដូចមានចែងនៅក្នុងច្បាប់ថែមទៀត៕
