ប៉ុន្មានឆ្នាំចុងក្រោយនេះ បើទោះបីមានការរកឃើញថា បន្ទាត់នយោបាយបក្សកាន់អំណាច រំលោភសិទ្ធិមនុស្សជាប្រព័ន្ធ អំពើពុករលួយខ្ពស់ បែបប្រទាក់ក្រឡាគ្នា ពីសំណាក់អ្នកមានអំណាចកំពូលៗក្តី ប៉ុន្តែមន្ត្រីដែលត្រូវបានគេពង្រាយនៅតាមក្រសួងសំខាន់ៗ បានបញ្ចេញប្រតិកម្មបដិសេធ។
ការបដិសេធរបស់ពួកគេហាក់មានខ្លឹមសារដូចៗគ្នា ដោយវាយបកថា ការរកឃើញទាំងនោះ ជាព័ត៌មានមិនពិត មួលបង្កាច់ មានចរិតនយោបាយ បម្រើឱ្យក្រុមឧទ្ទាមមួយក្តាប់តូច បង្ខូចកេរ្តិ៍ ចង់ផ្តួលរំលំរដ្ឋាភិបាលស្របច្បាប់ ដែលប្រឹងប្រែងការពារសន្តិភាព ជាដើម។
ការបដិសេធ និងចោទប្រកាន់ត្រឡប់ទៅវិញនេះ បានធ្វើឡើងតាំងពីការចេញរបាយការណ៍ របស់ក្រុមអង្គការសង្កមស៊ីវិលដែលសកម្មនៅក្នុងស្រុក រហូតដល់ការចង្អុលបង្ហាញរបស់អ្នកជំនាញសិទ្ធិមនុស្សអង្គការសហប្រជាជាតិ ដែលពិភពលោកផ្តល់តម្លៃថា ជាបុគ្គលឯករាជ្យក្តី ក៏មន្ត្រីរដ្ឋាភិបាលចាត់ទុកថា ជារបាយការណ៍បែបប្រឌិតដែរ។
ប៉ុន្តែ បើគេសង្កេតជាក់ស្តែងវិញ វិបត្តិកសិករបានកើតឡើងជិតមួយទសវត្សរ៍ឬជិត១០ឆ្នាំ ពលរដ្ឋជាង៥លាននាក់ត្រូវគេរកឃើញថា រស់នៅក្នុងសម្ពាធបំណុល ចំណាកស្រុកយ៉ាងគំហុក ភាគច្រើនប្រថុយនឹងគ្រោះថ្នាក់។
លើសពីនេះ បទឧក្រិដ្ឋឆ្លងដែនច្រើនទម្រង់ ដូចជា អំពើឆបោកតាមអនឡាញ បទឧក្រិដ្ឋលាងលុយកខ្វក់ ឬលុយខុសច្បាប់ ពាក់ព័ន្ធយ៉ាងជ្រៅជាមួយខ្សែបណ្តាញមេដឹកនាំកំពូលជាដើម ប្រព័ន្ធច្បាប់មិនកម្រើក ដើម្បីបង្ហាញឆន្ទៈ ក្នុងការវែកមុខចាប់មេខ្លោង នៅពីក្រោយបណ្តាញឧក្រិដ្ឋជនទាំងនោះទេ ដូចជា ការពាក់ព័ន្ធនឹង លោក ហ៊ុន តូ បងប្អូនជីដូនមួយរបស់នាយករដ្ឋមន្ត្រីកម្ពុជា លោក ហ៊ុន ម៉ាណែត ជាដើម។
ទាំងអស់នេះជាជ្រុងមួយដែលគេមើលឃើញថា វប្បធម៌ហៃអើ កំពុងរុញកម្ពុជាធ្លាក់ជ្រោះនៃបណ្តាញឧក្រិដ្ឋកម្ម បង្កការគំរាមដល់ជីវភាពពលរដ្ឋទូទាំងប្រទេស និងតំបន់។
ជ្រុងមួយនេះបញ្ហានេះ លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិតសភាកម្ពុជាដែលគាំទ្ររដ្ឋាភិបាល បានលើកឡើងលើហ្វេសប៊ុករបស់លោកថា «ការលើកតម្កើងបញ្ចើចបញ្ចើថ្នាក់ដឹកនាំជ្រុលហួសហេតុពេកធ្វើឱ្យស្លកពណ៌គុណវុឌ្ឍិជាក់ស្តែងរបស់ថ្នាក់ដឹកនាំទៅវិញទេ»។
លោកបញ្ជាក់ថា៖ «ការបង្កើតភាពអច្ឆរិយៈហួសពីការពិត នាំឱ្យការពិតត្រូវបានគេសង្ស័យ»។
សំណេររបស់លោកបណ្ឌិត គិន ភា នេះបានធ្វើឱ្យអ្នកប្រើប្រាស់បណ្តាញសង្គមជាច្រើន ចូលទៅបញ្ចេញមតិព្រោងព្រាតថា ការដែលមន្ត្រីចូលចិត្តនិយាយលើកសរសើរលើកតម្កើងមេដឹកនាំ រហូតហួសក្បាលដាក់លើហ៊ឹង ផុតដៃផុតជើង ប្រាសចាកពីការពិតដូចពេលបច្ចុប្បន្ននេះ ក៏ព្រោះតែថ្នាក់ដឹកនាំជោរដែរ ចូលចិត្តតែពាក្យបញ្ចើចបញ្ចើរ បញ្ជោរ ហើយតែងតែផ្តល់លាភយស ដល់មន្ត្រីដែលតែងតែបញ្ជោរលើកជើងទាំងនោះ។ មេដឹកនាំស៊ីជោរ ប្រាកដជាពោរពេញដោយបរិវារអែបអប។
ក្នុងចំណោមនោះហ្វេសប៊ុកឈ្មោះ ThavyDY បានបញ្ចេញមតិថា «ថ្នាក់ដឹកនាំខ្លះស៊ីជោរ អ្នកដែលខំនិយាយប្រាប់ត្រង់ៗ មិនសូវជឿទេ ជឿតែអ្នកលើកជើង ដើម្បីតែផលប្រយោជន៍ផ្ទាល់ខ្លួន ធ្វើឱ្យជាតិប្រឈមនឹងគ្រោះថ្នាក់» ។
ជាមួយគ្នានេះ ហ្វេសប៊ុកឈ្មោះ គីម អរុណ បានចាត់ទុកការលើកឡើងរបស់លោកបណ្ឌិត គិន ភា ថា ជាពាក្យដែលមនុស្សរាប់លាននាក់ ចង់និយាយ តែមិនហ៊ាននិយាយ បានត្រឹមតែលាក់ទុកក្នុងពោះ។
ប៉ុន្តែយ៉ាងណាក្តី លោក ប៉ែន បូណា ប្រធានអង្គភាពអ្នកនាំពាក្យរដ្ឋាភិបាល ដែលត្រូវបានគេមើលឃើញថា គឺជាអ្នកដែលនិយាយលើកជើង មេដឹកនាំគ្រួសារហ៊ុនខ្ពស់លើសព្រះទៅទៀតនោះ មិនយល់ស្របទៅនឹងការលើកឡើងរបស់លោកបណ្ឌិត គិន ភា នេះឡើយ។
លោក ប៉ែន បូណា បានចូលទៅបញ្ចេញមតិនៅខាងក្រោមសាររបស់លោកបណ្ឌិត គិន ភា ថា៖ «ខ្ញុំគិតថា មេដឹកនាំរបស់យើងត្រូវទទួលការផ្តល់តម្លៃយ៉ាងខ្ពស់ ឱ្យសមស្របនឹងគុណសម្បត្តិរបស់លោក ដែលបានលះបង់សម្រាប់ប្រទេសជាតិ និងប្រជាជន»។
សម្រាប់លោក បែន បូណា ការមិនហ៊ាននិយាយការពិត ហើយទុកឱ្យគេវាយប្រហារ ជេរប្រមាថ មាក់ងាយ ជាន់ឈ្លីមេដឹកនាំ តាមអំពើចិត្ត គឺជាភាពអន់ខ្សោយរបស់យើងទៅវិញទេ។ លោកថា ពេលដែលយើងស៊ាំត្រចៀកនឹងការជេរប្រមាថ យើងអាចចាត់ទុកការនិយាយការពិត ដើម្បីការពារមេដឹកនាំយើងថា ជាការលើកតម្កើងជ្រុលក៏ថាបាន។ តែសូមកុំភ្លេចថា បើនិយាយពីគុណសម្បត្តិរបស់មេដឹកនាំយើង ទោះបីនិយាយ ១០០០ មួយយប់ក៏មិនអស់ផង។
លើសពីនេះនៅក្នុងសំណេរមួយកាលពីថ្ងៃទី៩ ខែឧសភា ឆ្នាំ២០២៥ ក្នុងពេលលោក ហ៊ុន សែន ទៅបំពេញទស្សនកិច្ចនៅប្រទេសឥណ្ឌូនេស៊ី និងទីម័រឡេស្តេ លោក ប៉ែន បូណា បានលើកតម្កើង លោក ហ៊ុន សែន ក្នុងអត្ថបទមួយថា កេរ្តិ៍ឈ្មោះនិងឥទ្ធិពលរបស់ លោក ហ៊ុន សែន មិនត្រឹមតែទទួលបានការផ្តល់តម្លៃពីសំណាក់ប្រជាពលរដ្ឋខ្មែរប៉ុណ្ណោះទេ តែបានហៀរចេញពីព្រំដែនកម្ពុជា ជ្រាបចូលទៅក្នុងតំបន់ និងក្នុងពិភពលោក តាមរយៈការចូលរួមចំណែកយ៉ាងសំខាន់របស់លោក ក្នុងការកសាងសន្តិភាពសម្រាប់មនុស្សជាតិនៅលើភពផែនដី។
លោកថា ស្នាដៃនិងគុណតម្លៃរបស់មេដឹកនាំ ដែលជាធនធានមិនចេះរីងស្ងួត សម្រាប់មនុស្សជាតិ ពិតជាស័ក្តិសមណាស់ក្នុងការទទួលបាននូវមហាកិត្តិយស ដែលផ្តល់ជូនដោយប្រជាពលរដ្ឋខ្មែរ និងថ្នាក់ដឹកនាំក្នុងតំបន់ និងពិភពលោក។
លើសពីនេះ លោក ប៉ែន បូណា ធ្លាប់បានលើកតម្កើង លោក ហ៊ុន សែន ថាបានកសាងស្នាដៃធំធេងដល់កម្ពុជាជាងសម័យណាៗទាំងអស់ ក្នុងរយៈពេល៥០០ឆ្នាំចុងក្រោយនេះ។
ចំពោះលោកនាយករដ្ឋមន្ត្រី ហ៊ុន ម៉ាណែត វិញ លោក ប៉ែន បូណា តែងតែលើកតម្កើងថា ជាមេដឹកនាំជំនាន់ថ្មីមួយរូបដែលមានចំណេះដឹងខ្ពង់ខ្ពស់ ជាអ្នកយុទ្ធសាស្ត្រដែលមានទស្សនវិស័យវែងឆ្ងាយ និងពេញទៅដោយភាពប្រាកដប្រជាជាដើម។
តែអ្នកតាមដានសង្គមវិញ មើលឃើញផ្ទុយពី លោក ប៉ែន បូណា ដាច់ស្រលៈ។ ពួកគេបាននិយយាយថា ក្រោមការដឹកនាំរបស់គ្រួសារហ៊ុន ជាង៤០ឆ្នាំទៅនេះ ធ្វើឱ្យសម្បត្តិជាតិ ក្លាយជាកម្មសិទ្ធិគ្រួសារ អ្នកមានអំណាច កម្ពុជាបាត់បង់ទឹកដីទៅប្រទេសជិតខាង និងបន្សល់ទុកជនរងគ្រោះរាប់លាននាក់ ពីប្រព័ន្ធយុត្តិធម៌ និងពុករលួយជាដើម។
ផ្តើមចេញពី លោក មាជ សុវណ្ណារ៉ា ប្រធានគណបក្សជំនាន់ថ្មី ថ្លែងថា ការនិយាយលើកតម្កើងមេដឹកនាំហួសពីការពិត ឬការរាយការណ៍ព័ត៌មានមិនពិត បំប៉ោងបំភ្លើស ប្រាប់មេដឹកនាំអាចធ្វើឱ្យមេដឹកនាំយល់ខុស និងក៏រៀបចំផែនការអភិវឌ្ឍជាតិខុសផងដែរ។
បន្ថែមពីនេះ បើសិនជាមេដឹកនាំត្រូវការការបញ្ចើចបញ្ចើ លើកសរសើរ លើកតម្កើងហួសពីការពិត វាក៏ជារឿងគ្រោះថ្នាក់ដែលនឹងធ្វើឱ្យប្រទេសជាតិជួបនូវហានីភ័យ ធ្វើឱ្យការដឹកនាំមិនគោរពនីតិរដ្ឋ ងាយធ្លាក់ចូលទៅក្នុងភាពអាណាធិបតេយ្យ កើតមានអំពើពុករលួយ បក្ខពួកនិយមគ្រួសារនិយមកាន់តែខ្លាំង ដែលនឹងធ្វើឱ្យប្រទេសជាតិអន់ថយ ប្រជាពលរដ្ឋរស់នៅមិនបានសុខរងទុក្ខ។
លោកថា៖ «ការទទួលបាននូវព័ត៌មានកុហក់ ព័ត៌មានលើកតម្កើងបញ្ចើចបញ្ចើរ ភូតភរនឹងហើយ ដែលជាការរងគ្រោះ ហើយនៅទីបំផុត អ្នកដឹកនាំអាចគ្រប់គ្រងស្ថានការណ៍នយោបាយឱ្យមានសណ្តាប់ធ្នាប់ ឱ្យមានការគោរពច្បាប់ គឺវាហួសពេល ដោយសារតែអ្នកដឹកនាំអត់បានស្វែងរកការពិត ហើយអត់បានកម្ទេចនូវអំពើភូតភរកុហក់អំពើបោកប្រាសណាដែលមិនមែនជាការពិត ហើយការពិតនេះហើយ ការមិនពិតនេះហើយ វាអត់មានទៅជាតម្លាភាព ទៅជាសុចរិតភាព គណនេយ្យភាព ក្នុងការដឹកនាំប្រទេសទៅតាមការគោរពនីតិរដ្ឋនៃសង្គមប្រជាធិបតេយ្យ ការគោរពសិទ្ធិមនុស្សអីហ្នឹងគឺថា វាជួបនូវភាពខ្មៅងងឹត ភាពអយុត្តិធម៌អំពើអបាយមុខកើតឡើង ដោយសារយើងបាត់នូវភាពស្មោះត្រង់នូវសច្ចៈខន្តីកត្តញូ សម្រាប់ការដឹកនាំក្នុងភាពជាអ្នកដឹកនាំ»។
សម្រាប់ លោក គឹម សុខ អ្នកនាំពាក្យក្រុមប្រឹក្សាជាតិតស៊ូ បានលើកឡើងថា លោក ហ៊ុន សែន និងគ្រួសារហ៊ុន គឺជាត្រកូលក្បត់ជាតិដែលដឹកនាំកម្ពុជា ដើម្បីបម្រើផលប្រយោជន៍ឱ្យវៀតណាម។
លោកបន្តថា រដ្ឋាភិបាលក្រោមការដឹកនាំដោយគ្រួសារហ៊ុន បានបន្តធ្វើទុក្ខបុកម្នេញដល់ប្រជាពលរដ្ឋខ្មែរ តាមរយៈការបំផ្លាញធនធានធម្មជាតិ ការរំលោភបំពានយកដីធ្លីពីប្រជាពលរដ្ឋ ការធ្វើឱ្យទីផ្សារកសិផលរបស់កសិករចុះថោក និងការបង្កើតក្រុមហ៊ុនឆបោកគ្រប់ទម្រង់ជាដើម ដែលទីបំផុតធ្វើឱ្យប្រជាពលរដ្ឋកាន់តែធ្លាក់ខ្លួនក្រីក្រជំពាក់បំណុលគេវ័ណ្ឌក ហើយធ្វើចំណាកស្រុកឡើងស្ងាត់ស្រុក ហើយជនជាតិវៀតណាមក៏បន្តសម្រុកចូលមករស់នៅស្រុកខ្មែរ ដែលនេះជាយុទ្ធសាស្ត្រលេបទឹកដីតាមវិធីត្រជាក់។
លោកថា៖ «ក្រុមប្រឹក្សាជាតិតស៊ូមើលឃើញថា ប្រទេសកម្ពុជាកំពុងស្ថិតនៅក្នុងស្ថានភាពប្រកាសអាសន្ន។ នៅឯវេទិកាអន្តរជាតិក្នុងប្រទេសឥណ្ឌូនេស៊ីថ្មីៗនេះ លោក ហ៊ុន សែន បានរំលឹកពីការពេញចិត្តរបស់គាត់ទាំងស្រុង លើចលនាឈ្លានពានរបស់កងទ័ពវៀតណាមជិត២០ម៉ឺននាក់ ដែលបានជោគជ័យក្នុងការគ្រប់គ្រងប្រទេសកម្ពុជាកាលពីថ្ងៃទី៧ ខែមករា ឆ្នាំ១៩៧៩។ ការប្រកាសរបស់ លោក ហ៊ុន សែន គាំទ្រការឈ្លានពានរបស់កងទ័ពវៀតណាមលើប្រទេសកម្ពុជា៧មករា១៩៧៩ នៅឯវេទិកាអន្តរជាតិបែបនេះ មានន័យថា អ្នកកាន់អំណាចក្រុមគ្រួសារហ៊ុន ក៏ប្រកាសបំផ្លាញចោលទាំងស្រុងនូវកិច្ចព្រមព្រៀងសន្តិភាពទីក្រុងប៉ារិស២៣តុលា១៩៩១ នៅឯវេទិកាអន្តរជាតិដែរ»។
លោក គឹម សុខ បានលើកឡើងថា មូលហេតុចំបងនៃការជំរុញឱ្យមានកិច្ចព្រមព្រៀងសន្តិភាពទីក្រុងប៉ារីស គឺដើម្បីឱ្យដកកងទ័ពវៀតណាម ដែលឈ្លានពានប្រទេសកម្ពុជាចេញពីទឹកដីកម្ពុជា និងស្តារប្រទេសកម្ពុជាឡើងវិញ ធានាឱ្យកម្ពុជាមានសន្តិភាព មានអធិបតេយ្យភាព ឯករាជ្យបូរណភាពទឹកដី និងភាពមិនអាចរំលោភបាននៃដែនដីអព្យាក្រឹតភាព ការបង្រួបបង្រួមជាតិកម្ពុជា និងធានាឱ្យប្រជាពលរដ្ឋខ្មែរ មានសិទ្ធិស្វ័យសម្រេចលើជោគវាសនាជាតិ តាមរយៈការបោះឆ្នោតដោយសេរីនិងត្រឹមត្រូវ។
ប៉ុន្តែគ្រួសារហ៊ុន បាននិងកំពុងបន្តបំផ្លាញកិច្ចព្រមព្រៀងសន្តិភាពទីក្រុងប៉ារីស ក្នុងផែនការដើម្បីដាក់ឱ្យកម្ពុជាស្ថិតនៅក្រោមការគ្រប់គ្រងរបស់វៀតណាម។
បន្ថែមពីនេះ នៅក្នុងសេចក្តីថ្លែងការណ៍មួយផ្សេងទៀត របស់ក្រុមប្រឹក្សាជាតិតស៊ូ កាលពីថ្ងៃទី២០ ខែឧសភា ឆ្នាំ ២០២៥ ក្រុមប្រឹក្សានេះបានអំពាវនាវដល់ប្រជាពលរដ្ឋខ្មែរទាំងក្នុង និងក្រៅប្រទេស ត្រៀមខ្លួន ដើម្បីដណ្ដើមយកប្រទេសកម្ពុជា ពីរដ្ឋាភិបាលគ្រួសារហ៊ុន និងគណបក្សប្រជាជនកម្ពុជា។
ក្រុមប្រឹក្សាជាតិតស៊ូ បន្តថា មិនអាចបន្តបណ្ដោយឲ្យក្រុមមនុស្ស នៃគណបក្សប្រជាជនកម្ពុជា ពីគ្រួសារលោក ហ៊ុន សែន បន្តកាន់អំណាចយូរទៀតឡើយ ពីព្រោះពួកគេគឺជាមេខ្លោងឧក្រិដ្ឋជនម៉ាហ្វីយ៉ាឆ្លងដែន ។
របាយការណ៍ស្រាវជ្រាវជាង ៧០ទំព័រ របស់វិទ្យាស្ថាន Humanity Research Consultancy (HRC) ចេញផ្សាយថ្ងៃទី១៩ ខែឧសភា បង្ហាញថា ប្រទេសកម្ពុជា នៅក្រោមអំណាចរដ្ឋាភិបាលគ្រួសារហ៊ុន គឺជាទីតាំងស្នូលនៃការប្រព្រឹត្តិឧក្រិដ្ឋកម្មឆ្លងដែន ជាពិសេស ឧក្រិដ្ឋកម្មអនឡាញ។ គ្រួសារហ៊ុន ដើរតួនាទីជាអ្នកការពារពួកអ្នកមានអំណាច ឱ្យគប់គិតជាមួយបណ្តាញឧក្រិដ្ឋកម្មបរទេសដើម្បីប្រមូលប្រាក់ យកទៅចិញ្ចឹមគណបក្សកាន់អំណាច ដោយពួកគេអាចរកចំណូលបានពីឧក្រិដ្ឋកម្មអនឡាញប្រមាណពី ១២,៥ពាន់លាន ទៅ ១៩ពាន់លានដុល្លារនៅក្នុង១ឆ្នាំ។នេះបើតាមក្រុមប្រឹក្សាជាតិតស៊ូ។
សម្រាប់លោក សម រង្ស៊ី អតីតមេដឹកនាំគណបក្សង្គ្រោះជាតិ និងបញ្ញវន្តខ្មែរជាច្រើន លោកហ៊ុន សែនក្រៅពីធ្វើឱ្យកម្ពុជាបាត់បង់ទឹកដីនិងកោះត្រល់ទៅប្រទេសវៀតណាមព្រមទាំងបើកដៃឱ្យមានការបំផ្លិចបំផ្លាញធនធានធម្មជាតិខ្មែរស្ទើតែវិនាសអន្តរាយទាំងស្រុង។
លើសពីនេះលោកថា ប្រធានគណបក្សប្រជាជនកម្ពុជា ដែលលើកបន្តុបដោយវៀតណាមរូបនេះ ក៏ជាមេដឹកនាំដែលនៅពីក្រោយអំពើឧកិ្រដ្ឋកម្មព្រៃផ្សៃសម្លាប់អ្នកស្នេហាជាតិខ្មែរជាច្រើនផងដែរ តាមរយៈការធ្វើរដ្ឋប្រហារ ទម្លាក់សម្តេចក្រុមព្រះនរោត្តម រាណាឫទ្ធិពីអំណាចកាលពីថ្ងៃទី៥-៦ខែកក្កដាឆ្នាំ១៩៩៧ ដោយបានសម្លាប់មន្ត្រីនិងមេទ័ពគណបក្សហ្វ៊ិនស៊ិនប៉ិចរាប់ស៊ឹបនាក់ សម្លាប់តារាភាពយន្តល្បីឈ្មោះពិសិដ្ឋ ពិលីការ មេដឹកនាំសហជីពលោកជា វិជ្ជា សកម្មជនព្រៃឈើលោកឈុត វុទ្ធី អ្នកវិភាគនយោបាយលោកបណ្ឌិត កែម ឡី និងសម្លាប់អ្នកនយោបាយនិងអ្នកកាសែតប្រឆាំងរាប់ស៊ឹបនាក់ចាប់តាំងពីក្រោយការបោះឆ្នោតឆ្នាំ១៩៩៣មក។
ទាំងនេះ សម្រាប់អ្នកឃ្លាំមើលការវិវឌ្ឍនយោបាយនៅកម្ពុជា ដែលមិនចំណុះឱ្យរដ្ឋាភិបាល ចាត់ទុកពេលនេះកម្ពុជាត្រូវបានគេមើលឃើញថា ជាទីតាំងបណ្តាញឧក្រិដ្ឋកម្មអន្តរជាតិ គំរាមកំហែងពិភពលោកទាំងមូល ធ្វើឱ្យកម្ពុជាស្អុយឈ្មោះជាតិសម័យណាទាំងអស់ ក្រោមការដឹមនាំរបស់គ្រួសារហ៊ុន ។
មួយវិញទៀត ពួកគេថា វប្បធម៌ហៃអើនេះ កំពុងរុញកម្ពុជាក្លាយជាដែនដីឧក្រិដ្ឋកម្មឆ្លងដែនខ្នាតអន្តរជាតិ ដែលជាការគំរាមកំហែងពលរដ្ឋកម្ពុជា ទូទាំងប្រទេស ក្រោមវិធានការឆ្លើយតបរបស់អន្តរជាតិ ជុំវិញវិធានតាមបោសសម្អាតក្រុមឧក្រិដ្ឋកម្មឆ្លងដែនទាំងនោះ៕
