សាលាឧទ្ធរណ៍ភ្នំពេញ បានតម្កល់សេចក្តីសម្រេចរបស់សាលាដំបូងរាជធានីភ្នំពេញ ដែលផ្តន្ទាទោស លោក នី ណាក់ ដាក់ពន្ធនាគារចំនួន២ឆ្នាំ ពាក់ព័ន្ធនឹងបទ ញុះញង់ និងបរិហាកេរ្តិ៍ ប៉ុន្តែតុលាការមិនបានសំអាងពីមូលហេតុនៅអំឡុងពេលប្រកាសសាលដីកានោះទេ។
នៅថ្ងៃទី២៧ ខែឧសភា ឆ្នាំ២០២៥ សាលាឧទ្ធរណ៍ភ្នំពេញ បានបើកសវនាការជំនុំជម្រះលើបណ្តឹងសារទុក្ខរបស់ លោក នី ណាក់ សកម្មជនតស៊ូមតិហ៊ានរិះគន់រឿងរ៉ាវសង្គម ដែលបានប្តឹងជំទាស់ទៅនឹងសាលក្រមរបស់សាលាដំបូងរាជធានីភ្នំពេញ។
សាលាដំបូងរាជធានីភ្នំពេញ កាលពីថ្ងៃទី២១ ខែវិច្ឆិកា ឆ្នាំ២០២៤ បានសម្រេចផ្តន្ទាទោស លោក នី ណាក់ ពីបទ «ញុះញង់ឱ្យមានការរើសអើង» និងបទ «បរិហារកេរ្តិ៍ជាសាធារណៈ ដោយកំណត់ទោសដាក់ពន្ធនាគារចំនួន ២ឆ្នាំ ចំពោះការបញេ្ចញមតិ ដែលត្រូវបានធ្វើឡើងលើបណ្តាញសង្គមហ្វេសប៊ុក អំពីការដែលរដ្ឋាភិបាលផ្តល់ដីនៅក្នុងខេត្តកំពត ទៅឱ្យបុរសម្នាក់ ឈ្មោះ ហេង សួរ ដែលមានឈ្មោះដូចទៅនឹងលោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីរៈ ដែលជាដើមបណ្តឹង។
លោក ជូង ជូងី មេធាវីការពារក្តីឱ្យ លោក នី ណាក់ មានប្រសាសន៍ថា ក្រោយបើកសវនាការសួរដេញដោលលើសំណុំរឿងនេះរួច ប្រធានក្រុមប្រឹក្សាជំនុំជម្រះនៃសាលាឧទ្ធរណ៍ភ្នំពេញលោក អ៊ិត សុធា បានប្រកាសសាលដីកាភ្លាមៗ ដោយសម្រេចតម្កល់សេចក្តីសម្រេចរបស់តុលាការជាន់ទាបទុកជាបានការ។
តែយ៉ាងណា លោកថា ដោយសារពេលវេលាខ្លីពេក ប្រធានក្រុមប្រឹក្សារូបនេះ មិនបានបញ្ជាក់ពីមូលហេតុនៃការសម្រេចបែបនេះទេ។
លោកមេធាវី ថ្លែងថា៖ «ចំពោះករណីរបស់លោក នី ណាក់ គឺសាលាឧទ្ធរណ៍សម្រេចតម្កល់សាលក្រមរបស់សាលាដំបូងរាជធានីភ្នំពេញដដែល។ ដោយសារតែពេលវេលាខ្លី សាលាឧទ្ធរណ៍អត់បានប្រកាសសំអាងហេតុ មូលហេតុទេ»។
ជាមួយគ្នានោះ លោក ជូង ជូងី បង្ហាញការសោកស្តាយចំពោះសាលដីការបស់សាលាឧទ្ធរណ៍ ដោយលោកថា ជារឿងអយុត្តិធម៌សម្រាប់កូនក្តីរបស់ខ្លួន ដែលមិនបានប្រព្រឹត្តកំហុសដូចការចោទប្រកាន់។
លោកថា៖ «គឺមិនបានផ្តល់យុត្តិធម៌ដល់គាត់[លោក នី ណាក់] ពីព្រោះគាត់អត់មានចេតនាប្រព្រឹត្តអំពើដែលបំពានច្បាប់ហ្នឹងទេ ហើយអ្វីជាហេតុផល ខ្ញុំបាននិយាយច្រើនណាស់ជូនក្រុមប្រឹក្សាជំនុំជម្រះ ប៉ុន្តែអ្វីដែលខ្ញុំស្តាយគឺក្រុមប្រឹក្សា អត់បានពិចារណាហេតុផលដែលខ្ញុំលើកទៅ»។
វីអូឌី មិនអាចសុំការបញ្ជាក់ជុំវិញករណីនេះ ពី លោក ឃុន លាងម៉េង អនុប្រធានសាលាឧទ្ធរណ៍ភ្នំពេញ និងជាអ្នកនាំពាក្យ បានទេនៅថ្ងៃអង្គារនេះ។
លោក នី ណាក់ អ្នកអធិប្បាយបញ្ហាសង្គមដោយឥតសំចៃមាត់វ័យ ៤៤ឆ្នាំ ត្រូវបានឃុំខ្លួនជាបណ្តោះអាសន្ន តាំងពីថ្ងៃទី៦ ខែមករា ឆ្នាំ២០២៤ ក្រោយពីលោកបានបង្ហោះសារនៅលើបណ្តាញសង្គមហ្វេសប៊ុក ដោយបានសួរទៅកាន់រដ្ឋាភិបាល ដែលបានសម្រេចផ្តល់ដី ៩១ហិកតា ឱ្យទៅលោក ហេង សួរ ដែលលោក ណាក់ បានបញ្ជាក់ថា ជារដ្ឋមន្រ្តីក្រសួងការងារបច្ចុប្បន្ននេះ។
រដ្ឋមន្រ្តីក្រសួងការងារ លោក ហេង សួរ ជាដើមបណ្តឹងក្នុងករណីនេះ បានដាក់ពាក្យបណ្តឹង និងបានអះអាងថា លោកមិនមែនជា លោក ហេង សួរ ដែលត្រូវទទួលបានដី ៩១ហិកតា ដូចការលើកឡើងនោះឡើយ។ បន្ថែមពីលើទោសដាក់ពន្ធនាគារ លោក ណាក់ ក៏ត្រូវបានបង្គាប់ឱ្យសងសំណង ៣លានរៀល (ប្រហែល ៧៥០ដុល្លារ) ទៅកាន់តុលាការ និងទៅដើមបណ្តឹងដែលជារដ្ឋមន្ត្រី ចំនួន ២០០លានរៀល (ប្រហែល ៥០ ០០០ដុល្លារ)ផងដែរ។ នេះបើតាមការឱ្យដឹងពីអង្គការសិទ្ធិមនុស្សលីកាដូ។
លោក ណាក់ ធ្លាប់ត្រូវបានផ្តន្ទាទោស និងដាក់ពន្ធនាគារចំនួន ១៨ខែ រួចមកហើយ ពីបទ ញុះញង់ឱ្យមានការរើងអើង និងបទជេរប្រមាថជាសាធារណៈ កាលពីអំឡុងឆ្នាំ២០២០ ចំពោះការបង្ហោះវីដេអូនៅបណ្តាញសង្គមហ្វេសប៊ុកបែបលេងសើច ពីការដាក់មាន់ក្នុងទ្រុងរបស់លោកក្នុងស្ថានភាពអាសន្ន នៅក្នុងអំឡុងពេលរីករាលដាលនៃជំងឺកូវីដ-១៩ ដោយលោកបានកែប្រែពាក្យពេចន៍របស់លោក ហ៊ុន សែន អតីតនាយករដ្ឋមន្ត្រី និងជាបច្ចុប្បន្នជាប្រធានព្រឹទ្ធសភា។ ក្រោយមកលោកត្រូវបានដោះលែង ហើយលោកនៅតែបន្តអធិប្បាយតាមបណ្តាញសង្គម និងនៅក្នុងខែកញ្ញា ឆ្នាំ២០២៣ លោក ណាក់ ត្រូវបានវាយយ៉ាងកំរោលដោយក្រុមបុរស ៤នាក់ ក្នុងឯកសណ្ឋានពណ៌ខ្មៅ និងពាក់មួកសុវត្ថិភាព ដែលនេះជាករណីបទល្មើសព្រហ្មទណ្ឌ តែមិនទាន់មានដំណោះស្រាយនៅឡើយ។
ការវាយប្រហារទៅលើលោក នី ណាក់ នាពេលនោះ ត្រូវបានអង្គការសង្គមស៊ីវិលផ្នែកសិទ្ធិមនុស្ស ចាត់ទុកសកម្មភាពនេះថាជាការធ្វើទុក្ខបុកម្នេញ និងជាការបិទសិទ្ធិសេរីភាពក្នុងការបញ្ចេញមតិដែលមានចែងក្នុងច្បាប់ និងស្នើឱ្យរដ្ឋាភិបាលពិនិត្យមើលឡើងវិញ លើលំហរសិទ្ធិសេរីភាពរបស់ លោក នី ណាក់ ដើម្បីធានាបានថា កម្ពុជាជាប្រទេសគោរពសិទ្ធិមនុស្សតាមរដ្ឋធម្មនុញ្ញ៕
