ក្រុមជនរងគ្រោះចាញ់បោកអតីតឧកញ៉ា ឡេង ចាន់ណា បានប្រមូលផ្តុំគ្នានៅមុខក្រសួងយុត្តិធម៌ ដើម្បីទាមទារឱ្យពន្លឿនយុត្តិធម៌ពួកគេជាង ៥ពាន់គ្រួសារ បានសំណងដោះសា្រយវិបត្តិបំណុល ដោយថាវិបត្តិនេះកំពុងគំរាមជីវិតពួកគេ មានអ្នកខ្លះបែកបាក់គ្រួសារ ខ្លះទៀតឈឺធ្ងន់ និងកូនៗបោះបង់ការសិក្សា ជាដើម។
បើតាមក្រុមជនរងគ្រោះ ឱ្យដឹងថា សកម្មភាពជួបជុំគ្នានេះ ធ្វើឡើងរយៈពេល២ថ្ងៃ គឺចាប់ពីថ្ងៃទី២៦ ដល់ថ្ងៃទី២៧ ខែឧសភានេះ និងបានដាក់លិខិតឱ្យរដ្ឋមន្រ្តីក្រសួងយុត្តិធម៌ លោក កើត រិទ្ធិ អន្តរាគមន៍រឿងក្តីពួកគេបន្ទាន់ផងដែរ។
ក្នុងលិខិតនោះ បញ្ជាក់ថា ពួកគេជាជនរងគ្រោះដោយសារក្រុមហ៊ុនប្រ៊ីលានស៊ីធីវើលដ៍ ចំនួន៥០៨០គ្រួសារ បច្ចុប្បន្នមានការលំបាកធ្ងន់ធ្ងរ ដោយសារពុំមានលទ្ធភាពបង់ប្រាក់ទៅឱ្យធនាគារតទៅទៀតទេ ក្រោយក្រុមហ៊ុននេះមិនបានទូទាត់ការប្រាក់រយៈពេល២៥ខែហើយ។
ក្នុងលិខិតនោះ សរសរក្នុងន័យដើមថា៖ «បញ្ហានេះហើយដែលធ្វើឱ្យយើងខ្ញុំទាំងអស់គ្នា ឈឺចាប់ជាពន់ពេករកអ្វីប្រៀបផ្ទឹមពុំបាន ដែលធ្វើឱ្យយើងខ្ញុំបែកបាក់គ្រួសារប្តីប្រពន្ធកូនចៅ ខ្លះឈឺស្លាប់ ខ្លះឈឺធ្ងន់ កូនចៅពុំបានរៀនសូត្រដោយសារតែវិបត្តិបំណុល ដោយសារក្រុមហ៊ុន ប៊ីលានស៊ីធីវើលដ៍ ឯ.ក នេះ»។
ជនរងគ្រោះម្នាក់ លោក អៀ សុផល ដែលចាញ់បោកលុយជិត២ម៉ឺនដុល្លារ ជាលុយខ្ចីធនាគារ ប្រាប់VODបន្ថែមថា បច្ចុប្បន្នលោកបានចំណាកស្រុកទៅប្រទេសថៃ ដើម្បីបានលុយដោះស្រាយវិបត្តិបំណុល និងទាមទារឱ្យក្រសួងជួយអន្តរាគមន៍រឿងក្តីនេះបន្ទាន់ផងដែរ។
លោកថា៖ «ពួកខ្ញុំផ្ទាល់ស្នើទៅកាន់ ទៅកាន់រដ្ឋាភិបាលដើម្បីគាត់ហ្នឹងជួយដោះស្រាយរឿងគម្រោងឧកញ៉ា ឡេង ចាន់ណា ដែលជនរងគ្រោះឥលូវហ្នឹង គឺមានទុក្ខលំបាកខ្លាំងមែនទែនរាល់ថ្ងៃនេះ។ ខ្លះទៀតក៏បែកបាក់គ្រួសារប្រពន្ធកូនចៅ មានអ្នកខ្លះទៀតក៏លក់ដីស្រែចម្ការ ឡាន ម៉ូតូ ផ្ទះសម្បែងអស់ហើយ! ប្រសិនបើរដ្ឋាភិបាលមិនជួយដោះស្រាយទេ ពួកខ្ញុំជាជនរងគ្រោះទាំងអស់គ្នាហ្នឹង គឺអស់ទីលំនៅហើយ»។
VOD មិនអាចសុំការឆ្លើយតបពីអ្នកនាំពាក្យក្រសួងយុត្តិធម៌ លោក សេង ឌីណា បាននៅឡើយទេ គិតត្រឹមថ្ងៃទី២៧ ខែឧសភានេះ។
ជុំវិញរឿងនេះ នាយកទទួកបន្ទុកកិច្ចការទូទៅនៃអង្គការសិទ្ធិមនុស្សលីកាដូ លោក អំ សំអាត យល់ថា អ្នកចាញ់បោកអតីតឧកញ៉ា ឡេង ចាន់ណា ហាក់អស់ការអត់ធ្មត់ក្នុងការរងចាំយុត្តិធម៌ជាច្រើនឆ្នាំទៅនេះ ទើបសម្រេចចិត្តប្រមូលផ្តុំគ្នាបែបនេះ ហើយថាពួកគេក្រៅពីរងគ្រោះដោយសារចាញ់បោកហើយ ក៏កំពុងរងគ្រោះបន្ថែមក្រោមវិបត្តិបំណុលធ្ងន់ធ្ងរផងដែរ។
លោកថា៖ «ប្រសិនជាការអូសបន្លាយកាន់តែយូរទៅ ពលរដ្ឋដែលចាញ់បោកហើយរងគ្រោះ នឹងកាន់តែរងគ្រោះបន្តទៀត អាចឈានទៅដល់បាត់បង់ទ្រព្យសម្បត្តិដីធ្លី ឬក៏អាចនឹងត្រូវបានលក់ ដើម្បីសងទៅធនាគារ ឬក៏មីក្រូហិរញ្ញវត្ថុ ឬក៏ឯកជន។ ហើយបើសិនជាមិនមានលទ្ធភាពទៀត ពួកគាត់អាចក្លាយទៅជាអ្នកចំណាកស្រុក! ឬក៏វិបត្តិគ្រួសារដែលអាចកើតឡើងជាបន្តបន្ទាប់ផងដែរ ដូច្នេះករណីនេះ ខ្ញុំយល់ឃើញថា តុលាការគួរតែពន្លឿននីតិវិធីដើម្បីដោះស្រាយសម្រាប់ពួកគាត់»។
អតីតឧកញ៉ា ឡេង ចាន់ណា ធ្លាប់ប្រាប់ពលរដ្ឋមុនពេលជាប់ពន្ធនាគារថា ក្រុមហ៊ុនខ្លួនមាននាយករដ្ឋមន្រ្តីកម្ពុជា លោក ហ៊ុន ម៉ាណែត ជាខ្នងបង្អែក។
អ្នកស្រីថា៖ «និយាយពាក្យបង្ខូចបង្កាច់សមាគម បង្ខូចបង្កាច់ពួកខ្ញុំ។ សូមពុកម៉ែបងប្អូនថតរូបបុគ្គលរូបនោះឱ្យបានឱ្យខ្ញុំ ឱ្យពួកខ្ញុំយល់ទេ ទាំងអស់គ្នា។ ខ្ញុំឱ្យអ្នកទាំងអស់គ្នាហ៊ាននិយាយ ព្រោះពួកខ្ញុំទាំងអស់ក៏មានសិទ្ធិការពារនៅកេរ្តិ៍ឈ្មោះរបស់ពួកខ្ញុំដែរ ជាពិសេសសមាគមដែលបង្កើតឡើងដោយឯកឧត្ដម ហ៊ុន ម៉ាណែត ទៀត»។
យ៉ាងណា នាយករដ្ឋមន្រ្តីកម្ពុជា លោក ហ៊ុន ម៉ាណែត តាមរយៈសេចក្តីបំភ្លឺព័ត៌មាននៅថ្ងៃទី២១ ខែកុម្ភៈ ឆ្នាំ២០២៤ បញ្ជាក់ថា ខ្លួនមិនបានពាក់ព័ន្ធជាមួយសកម្មភាពឆបោករបស់ឧកញ៉ា ឡេង ចាន់ណា ទេខណៈគ្មានស្ថាប័នជំនាញបើកការស៊ើបអង្កេតលើកូនប្រុស លោក ហ៊ុន សែន រូបនេះទេ ក្រៅពីការចេញលិខិតបំភ្លឺមួយច្បាប់នេះ។
ក្រោយមក លោក ហ៊ុន ម៉ាណែត ក៏បញ្ជាឱ្យ លោក គី តិច ប្រធានក្រុមមេធាវីរបស់រដ្ឋាភិបាល ជួយការពារក្តីដល់ជនរងគ្រោះ តែ១ឆ្នាំទៅនេះ ជនរងគ្រោះនៅតែមិនទទួលបានសំណងមកវិញទេ ខណៈពួកគេបានលក់ដីស្រែ ខ្លះចំណាកស្រុក និងខ្លះស្លាប់ដោយសារគ្មានលុយព្យាបាលជំងឺក្រោយជួបវិបត្តិបំណុលធ្ងន់ធ្ងរ។
ដោយឡែក កាលពីសប្តាហ៍មុន ពោលគឺកាលពីថ្ងៃទី១៩ ខែឧសភា ជនរងគ្រោះចាញ់បោកអតីតឧកញ៉ា ហ៊ី គឹមហុង វិញ ក៏បានប្រមូលផ្តុំគ្នានៅមុខក្រសួងយុត្តិធម៌ ទាមទារឱ្យរដ្ឋាភិបាលចាប់បង្ខំឱ្យមេឆបោកសងលុយពួកគេវិញ ខណៈវិបត្តិបំណុលធ្វើឱ្យពួកគេបានស្លាប់កើនដល់២៧នាក់ ដែលខ្លះធ្វើអត្តឃាត និងខ្លះទៀតស្លាប់ដោយសារគ្មានលុយព្យាបាលជំងឺ។
ជាការកត់សម្គាល់ ក្នុងអាណត្តិដឹកនាំរបស់ លោក ហ៊ុន មាណែត ជិត២ឆ្នាំទៅនេះ មានករណីបោកប្រាស់ធំៗជាច្រើនបានផ្ទុះឡើង ក្រោមដៃឧកញ៉ាខិលខូចស្និទ្ធិគ្រួសារហ៊ុន ធ្វើឱ្យជនរងគ្រោះជួបវិបត្តិបំណុលធ្ងន់ធ្ងរគ្មានការពារពីស្ថាប័នរដ្ឋ។
ក្នុងនោះមានពលរដ្ឋយ៉ាងហោចណាស់ ៣ម៉ឺននាក់ រងគ្រោះដោយសារគម្រោងអចលទ្រព្យ ដូចជាចាញ់បោកអតីតឧកញ៉ា ជា សារ៉ន ហ៊ី គឹមហុង ឡេង ចាន់ណា ឧកញ៉ា ឡេង ណាវ៉ាត្រា ក្រុមហ៊ុន CIC និងក្រុមហ៊ុនភូមិខ្មែរគ្រុបនៅខេត្តស្វាយរៀង ជាដើម ខណៈជនឆបោកទាំងនោះតែងតែបង្ហាញខ្លួនស្និទ្ធនឹងមេដឹកនាំ៕
