អ្នកសារព័ត៌មានអនឡាញម្នាក់ នៅថ្ងៃពុធនេះ បានចូលទៅបំភ្លឺនៅសាលាដំបូងខេត្តស្វាយរៀង ក្រោយរដ្ឋបាលខេត្តមួយនេះ បានប្តឹងរូបគាត់ ពាក់ព័ន្ធនឹងការចោទពីបទ ញុះញង់ បរិហារកេរ្តិ៍ និងជេរប្រមាថជាសាធារណៈ ក្រោយពីអ្នកសារព័ត៌មានរូបនោះ រាយការណ៍ថាមានភាពមិនប្រក្រតីក្នុងគម្រោងដេញថ្លៃជួសជុលផ្លូវនៅឃុំច្រេស។
យោងតាមដីកាកោះរបស់តំណាងអយ្យការអមសាលាដំបូងខេត្តស្វាយរៀង ជូរ៉ា អង្គប្រទាន ចុះថ្ងៃទី១៣ ខែឧសភា ឆ្នាំ២០២៥ បានកោះហៅលោក ផាត់ ហ៊ន ជាអ្នកសារព័ត៌មាន ចូលទៅបំភ្លឺនៅថ្ងៃទី២៨ ខែឧសភា ជុំវិញដំណើររឿង បរិហាកេរ្តិ៍ជាសាធារណៈ ជេរប្រមាថជាសាធារណៈ ញុះញង់ឱ្យប្រព្រឹត្តបទឧក្រិដ្ឋជាអាទិ៍ និងញុះញង់ឱ្យមានការរើសអើង ប្រព្រឹត្តនៅខេត្តស្វាយរៀង តាមរយៈការផ្សព្វផ្សាយជាសាធារណៈ តាមបណ្តាញទំនាក់ទំនងសង្គមហ្វេសប៊ុក ដោយមានគណនីសារព័ត៌មានឈ្មោះ KH Plus News កាលពីថ្ងៃទី២៩ ខែមេសា ឆ្នាំ២០២៥ តាមបណ្តឹងរបស់មេធាវីឈ្មោះ ជី កុសល។
លោក ផាត់ ហ៊ន ជាអ្នកសារព័ត៌មានអនឡាញ KH Plus News បានថ្លែងនៅមុខសាលាដំបូងខេត្តស្វាយរៀងបន្ទាប់ពីចូលបំភ្លឺរួចថា ដើមបណ្តឹងដែលប្តឹងរូបលោកនោះ គឺរដ្ឋបាលខេត្តស្វាយរៀង ដែលការប្តឹងនោះបានធ្វើឡើងបន្ទាប់ពីលោកបានផ្សព្វផ្សាយរឿងភាពមិនប្រក្រតីក្នុងការដេញថ្លៃធ្វើផ្លូវនៅឃុំច្រេស ដែលមានការចែកលុយចែកកាក់គ្នាក្រោយការដេញថ្លៃធ្វើផ្លូវ។
លោកបន្តថា ក្នុងអំឡុងពេលសាកសួរនោះ តំណាងអយ្យការបានសួរដេញដោលជុំវិញការផ្សព្វផ្សាយព័ត៌មានរបស់លោក នៅលើគណនីហ្វេសប៊ុកសារព័ត៌មាន KH Plus News នោះ ដែលលោកថា លោកបានទទួលព័ត៌មានពីប្រជាពលរដ្ឋ ហើយក៏បានធ្វើសេចក្តីរាយការណ៍រឿងនេះ ដើម្បីឱ្យថ្នាក់ដឹកនាំខេត្តឬស្ថាប័នពាក់ព័ន្ធ ពិនិត្យនិងដោះស្រាយជូនពលរដ្ឋក្នុងមូលដ្ឋាន។
លោកនិយាយថា៖ «ប្រសិនបើខ្ញុំ[ផ្សាយ]ខុស ប្រាប់ខ្ញុំទៅ ខុសកន្លែងណា ពេលខ្លះខ្ញុំកូនគាត់ ខ្ញុំម៉េចដឹងកូនខុស ពេលខុសកន្លែងណា ប្រាប់ខ្ញុំមក ខ្ញុំសុំទោស ដើម្បីបញ្ចប់រឿង ដើម្បីធ្វើការទាំងអស់គ្នា[…] រឿងមិនមែនធំដុំណា រឿងលុយឃុំ រឿងយើងការពារទាំងអស់គ្នាតើ ប្រជាពលរដ្ឋមានសិទ្ធិតាមដាន និងការពារដែរ រឿងដេញថ្លៃ[ធ្វើផ្លូវ] គេប្រកាសជាសាធារណៈដើម្បីដេញថ្លៃជាសាធារណៈ ចឹងប្រជាពលរដ្ឋមានសិទ្ធិតាមដាន មានសិទ្ធិថត ថតហើយគាត់មិនហ៊ានផ្សាយ ឱ្យអ្នកកាសែតផ្សាយទៅ គាត់តាមដានហើយការពារលុយរបស់គាត់តើ លុយឃុំរបស់គាត់ លុយការអភិវឌ្ឍរបស់គាត់តើ គាត់មិនចង់បានខែវស្សា[ផ្លូវ]ប៉ប៉ិចប៉ប៉ាច់ ខែប្រាំងហ៊ុយជុក គាត់មិនចង់បានអញ្ចេះទេ»។
លោក ផាត់ ហ៊ន បានស្នើដល់សាលាដំបូងខេត្តស្វាយរៀង ទម្លាក់ចោទបណ្តឹងនេះ កុំចាត់ការ និងស្នើដល់រដ្ឋបាលខេត្តស្វាយរៀង បន្ទន់ឥរិយាបទដោយដកពាក្យបណ្តឹងដែលប្តឹងរូបលោកនេះវិញផងដែរ។
វីអូឌី មិនអាចសុំការអត្ថាធិប្បាយជុំវិញករណីនេះ ពីអភិបាលខេត្តស្វាយរៀង លោក ប៉េង ពោធិ៍សា និងមេធាវីដើមបណ្តឹង លោក ជី កុសល បានទេនៅថ្ងៃពុធនេះ។
កាលពីអំឡុងចុងខែមេសា ឆ្នាំ២០២៥នេះ គណនីហ្វេសប៊ុក KH Plus News ព័ត៌មានសង្គម បានបង្ហោះសារជុំវិញការដេញថ្លៃធ្វើផ្លូវនៅឃុំច្រេសថា ក្នុងន័យដើមថា៖ «តើជាកំហុសអ្នកណា ខាងឃុំទទួលស្គាល់ថា ខាងក្រុមហ៊ុនឃុបឃិតគ្នាធ្វើស៊ីលុយបដិភាពឃុំសង្កាត់ ប្តឹងទៅខេត្ត ដើម្បីសុំដេញថ្លៃសារជាថ្មី បែរជាមន្ត្រីមួយចំនួននៅសាលាខេត្តកាន់ជើងខាងក្រុមហ៊ុនទៅវិញ តើមូលហេតុអ្វីបញ្ជាក់ខ្ញុំនឹងតាមដានរឿងនេះ»។
បើតាមលិខិតបំភ្លឺរបស់រដ្ឋបាលឃុំច្រស ចុះថ្ងៃទី២៨ ខែមេសា ឆ្នាំ២០២៥ បានលើកឡើងថា ការដេញថ្លៃគម្រោងមូលនិធិឃុំ ជួសជុលផ្លូវដីក្រាលថ្មបំបែក ប្រវែង ២៣០០ម៉ែត្រ ដែលមានតម្លៃប៉ាន់ស្មានចំនួនជាង ៣០៨លានរៀល (៣០៨ ៨៨០ ៣៨៦រៀល)នេះ នៅភូមិត្រពាំងធ្លក ឃុំច្រេស ស្រុកចន្ទ្រា ខេត្តស្វាយរៀង មានក្រុមហ៊ុនចំនួន ៣ដាក់សំណើរ ហើយជាលទ្ធផលបានទៅក្រុមហ៊ុន ប៊ុន ថាន សំណង់កូនខ្មែរឯ.ក ដេញថ្លៃបាន។ ការដេញថ្លៃនោះធ្លាប់បានរៀបចំម្តងរួចមកហើយនៅដើមខែមេសា នៅសាលាស្រុកចន្ទ្រា ប៉ុន្តែមានតែ២ក្រុមហ៊ុនដែលដាក់ដេញថ្លៃ មិនគ្រប់កូរ៉ុម ទើបមានការដេញថ្លៃជាថ្មីនៅឃុំច្រេស កាលពីថ្ងៃទី២៥ ខែមេសា ឆ្នាំ២០២៥នេះ។
រដ្ឋបាលឃុំច្រេស បដិសេធទាំងស្រុងចំពោះការផ្សាយព័ត៌មានមិនពិតដែលថា ការដេញថ្លៃជួសជុលផ្លូវនោះ មានការរៀបចំទុកជាមុន និងគប់គិតជាលក្ខណៈប្រព័ន្ធ និងមានការសូកប៉ាន់ជាមួយក្រុមហ៊ុន។
បើតាមអ្នកសារព័ត៌មានអនឡាញ លោក ផាត់ ហ៊ន នេះមិនមែនជាលើកទី១ទេ ដែលរដ្ឋបាលខេត្តស្វាយរៀង បានប្តឹងរូបលោកទៅតុលាការ គឺមានបណ្តឹងពីរបីរួចមកហើយ៕
