ប្រជាសហគមន៍ព្រៃឈើ ស្រុកកំពង់សីលា ខេត្តព្រះសីហនុ បានអះអាងមកថា ពួកគេមានកង្វល់ខ្លាំងពីវិបត្តិជីវភាពលើមនុស្សជាង ១០០០នាក់ រួមទាំងវិនាសសកម្មព្រៃឈើ នាពេលអនាគត ក្រោយឡើងមកសុំកិច្ចអន្តរាគមន៍ពីថ្នាក់ដឹកនាំកំពូល នៅតែមិនអាចទប់ស្កាត់គ្រឿងចក្រក្រុមហ៊ុនចិនបាន។
ប្រធានសហគមន៍ព្រៃឈើអ្នកតាថ្មព្រង់ លោក ឃុត ស៊ីនឿន បានប្រាប់VODនៅថ្ងៃទី១០ ខែមិថុនានេះថា បន្ទាប់ពីដាក់ញត្តិជូនថ្នាក់ដឹកនាំ អស់រយៈពេលជិតកន្លះខែទៅនេះ មិនទាន់មានដំណោះស្រាយណាមួយកើតឡើងនោះទេ។
តែលោកថា ផ្ទុយទៅវិញ គ្រឿងចក្រក្រុមហ៊ុនចិន នៅតែបន្តឈូសឆាយដីព្រៃសហគមន៍ដែលនេះជាក្តីបារម្ភធំ ពីផលប៉ះពាល់ជីវិតប្រជាសហគមន៍និងបរិស្ថាន។
បុរសរូបនោះ គូសបញ្ជាក់ថា ប្រសិនបើបញ្ហានេះនៅតែបន្ត ខណៈការដោះស្រាយក៏ស្ងាត់ដំណឹងផងនោះ នឹងបង្កផលប៉ះពាល់ជីវភាពពួកគាត់ រួមទាំងព្រៃសហគមន៍ដែលខំថែរក្សាជាង២០ឆ្នាំមកនេះ។
លោកថា៖ «បារម្ភការបាត់បង់ដី ហើយគេនៅតែបន្តការឈូសឆាយនៅក្នុងសហគមន៍ប្រជាពលរដ្ឋ ក៏កំពុងតែស្វះស្វែងទៅខាងលើផង សួរទៅគណៈកម្មការ ព្រោះមិនទាន់មានដំណោះស្រាយណាមួយដល់សហគមន៍ ប៉ះពាល់ដល់ប្រជាពលរដ្ឋដែលរកអាស្រ័យផលលើដីហ្នឹង ហើយមួយរដូវៗមានផ្សិតនៅក្នុងកន្លែងដែលកាយធ្វើជាទីលានចាក់សំរាមហ្នឹង ជារៀងរាល់ឆ្នាំ អ៊ីចឹងមួយរដូវៗ គាត់ទទួលផលបានហើយច្រើនគ្រួសារដែលរស់អាស្រ័យផលលើដីហ្នឹង ហើយទឹកដែលហូរចូលមកហ្នឹង គឺវាហូរចូលដល់តំបន់ដែលយើងឆ្លងកាត់ហ្នឹងតែម្ដង អាហ្នឹងវាជាផលប៉ះពាល់និងផលវិបាក ហើយទឹកហ្នឹងវាហូរមក ហើយតំបន់ហ្នឹងគឺទឹកលិច ចឹងតំបន់ហ្នឹងពីមុនមកទឹកលិចត្រឹមក លិចក្បាលទឹកហូរកាត់តំបន់ហ្នឹង ដែលយើងឆ្លងកាត់ប៉ះពាល់ខ្លាំងមែនទែន ក្នុងសហគមន៍របស់យើង»។
ប្រជាសហគមន៍ម្នាក់ទៀត អ្នកស្រី សន ស្រី បានរៀបរាប់ប្រាប់VODថា ក្រោយពីពួកគាត់ជាង៦០នាក់បានឡើងទៅដាក់ញត្តិជូនថ្នាក់ដឹកនាំ កាលចុងខែឧសភារួចមក ពោលគឺមកទល់បច្ចុប្បន្ននេះ នៅមិនទាន់ទទួលបានដំណោះស្រាយណាមួយឡើយពីអាជ្ញាធរពាក់ព័ន្ធ។
ស្ត្រីរូបនោះបន្តទៀតថា ស្របពេលដំណោះស្រាយនៅមិនទាន់មានសម្រាប់ប្រជាសហគមន៍ បច្ចុប្បន្នបែរជាខាងក្រុមហ៊ុនបានបង្កើនដៃ ធ្វើសកម្មភាពឈូសកាន់តែខ្លាំង ដែលពួកគាត់មានក្ដីបារម្ភជាខ្លាំង។
អ្នកស្រីថា៖ «ប្រជាពលរដ្ឋគ្មានបានទៅធ្វើការរកស៊ីទេ នៅបារម្ភពីដីសហគមន៍ហ្នឹង ដូចខ្ញុំជាប្រជាសហគមន៍ ចឹងប្រាក់ចំណូលក៏គ្មាន ប្រាក់ខែក៏គ្មាន ហើយនៅចាំតែការដោះស្រាយឃើញគេទៅឈូសឆាយពេលណាពិបាកចិត្ត ពេលនោះគណៈកម្មការសហគមន៍នាំគ្នាឆ្ងល់ហេតុអីបានស្ងាត់ឈឹង អត់មានឃើញដំណោះស្រាយសោះ ការទន្ទ្រាននៅតែដដែល ហើយប្រជាពលរដ្ឋគាត់លំបាកចិត្តខ្លាំងណាស់ ណាមួយជីវភាពខ្វះខាត ខ្ញុំវិញរកអង្ករច្រកឆ្នាំងមិនចង់មានផង ហើយខំលះបង់កម្លាំងកាយចិត្ត ដើម្បីការពារព្រៃឈើ ការពារសហគមន៍ឲ្យបានគង់វង្សទៅថ្ងៃអនាគត»។
ជុំវិញបញ្ហានេះ VOD មិនអាចសុំការបញ្ជាក់ពីអ្នកនាំពាក្យរដ្ឋាភិបាល លោក ប៉ែន បូណា ជុំវិញការឆ្លើយតបទៅនឹងការទាមទាររបស់ប្រជាសហគមន៍បានទេ គិតត្រឹមម៉ោងផ្សាយនេះ។
សម្រាប់ អ្នកនាំពាក្យសមាគមការពារសិទ្ធិមនុស្សអាដហុក លោក យិន ម៉េងលី យល់ថា ការអូសបន្លាយពេលដោះស្រាយនេះ ធ្វើឱ្យប៉ះពាល់ដល់ជីវភាពពលរដ្ឋ រួមទាំងព្រៃសហគមន៍ផងដែរ ខណៈពលរដ្ឋមានសិទ្ធគ្រប់គ្រាន់ក្នុងការការពារព្រៃសហគមន៍ ស្របច្បាប់តាមគោលនយោបាយរដ្ឋាភិបាល។
លោកបន្តថា រដ្ឋាភិបាល រួមទាំងក្រសួងពាក់ព័ន្ធ ត្រូវពន្លឿនពិនិត្យលើញត្តិ ពលរដ្ឋដាក់ស្នើសុំកិច្ចអន្តរាគមន៍ជុំវិញរឿងអាជ្ញាធរខេត្តផ្ដល់ដីឱ្យក្រុមហ៊ុនធ្វើទីលានចាក់សម្រាម ខណៈមិនទាន់ទទួលបានការអនុញ្ញាតត្រឹមត្រូវពីរដ្ឋាភិបាលផ្ទាល់។
លោកថា៖ «ថ្នាក់ជាតិគបី្បទទួលពាក្យបណ្តឹង ចុះទៅធ្វើការពិនិត្យឡើងវិញ ដើម្បីឲ្យប្រជាពលរដ្ឋមានជំនឿ ហើយចឹងទេប្រជាពលរដ្ឋលោកអស់សង្ឃឹមខិតខំការពារផលប្រយោជន៍សាធារណៈ ផលប្រយោជន៍សង្គម ហាក់បីដូចជាតែឯងអត់មានការគាំទ្រ គប្បីតែមានការគាំទ្រតាមផ្លូវច្បាប់មានការគាំទ្រពីស្ថាប័នដែលពាក់ព័ន្ធ ក្នុងការការពារគាំទ្រដល់ពួកគាត់ថែមទៀត នៅក្នុងការបំពេញតួនាទីរបស់ខ្លួនដែរ ហើយវាផ្ទុយពីរដ្ឋធម្មនុញ្ញដែលស្ថាប័នរដ្ឋ ត្រូវតែយកចិត្តទុកដាក់ចំពោះការទាមទារការតវ៉ារបស់ប្រជាពលរដ្ឋ និងកុំបណ្ដែតបណ្ដោយតទៅទៀត កាលណាបណ្ដែតបណ្ដោយតបទៀត ធ្វើឲ្យប៉ះពាល់បាត់បង់ព្រៃឈើ ប៉ះពាល់ដល់ជីវភាពប្រជាពលរដ្ឋ»។
យ៉ាងណា កាលពីថ្ងៃទី៣០ ខែឧសភា ឆ្នាំ២០២៥នេះ ប្រជាសហគមន៍ព្រៃឈើអ្នកតាថ្មព្រង់ បានឡើងមកដាក់ញត្តិសុំអន្តរាគមន៍ពីនាយករដ្ឋមន្ត្រីកម្ពុជា លោក ហ៊ុន ម៉ាណែត និងប្រធានព្រឹទ្ធសភា លោក ហ៊ុន សែន ក្រោយពួកគេប្រឈមជាប់គ្នាពីរថ្ងៃ ជំទាស់នឹងសកម្មភាពគ្រឿងចក្រដែលបានចូលទៅឈូសឆាយដីព្រៃសហគមន៍ ព្រៃឈើអ្នកតាថ្មព្រង់។
ញត្តិដែលប្រជាសហគមន៍បានដាក់ស្នើសុំឱ្យរដ្ឋាភិបាលដោះស្រាយនេះ មាន៣ចំនុចក្នុងនោះ ទី១ ស្នើសុំមោឃភាពប័ណ្ណកម្មសិទ្ធិខុសច្បាប់ចំនួន ៦ប័ណ្ណ លើដីព្រៃសហគមន៍ ទី២ បដិសេធលើការរៀបចំស្នើសុំដីរដ្ឋចំនួន ៩១ហិកតា លើដីព្រៃសហគមន៏ព្រៃឈើអ្នកតាថ្មព្រង់ ពីអាជ្ញាធរស្រុក សម្រាប់ជាកន្លែងចាក់សំរាមឲ្យក្រុមហ៊ុន មី នើ វ៉ា អ៊ិនវេសម៉ិន។
មួយវិញទៀត ស្នើសុំចុះបញ្ជីដីព្រៃសហគមន៍ទំហំ ៧៩៣ហិកតា នៅភូមិថ្មី ឃុំកំពង់សីលា ស្រុកកំពង់សីលា ខេត្តព្រះសីហនុ សម្រាប់ជាសម្បត្តិរដ្ឋដល់សហគមន៍។
យ៉ាងណាមិញ ជុំវិញការកក្រើកតវ៉ានេះ តំណាងសហគមន៍ ៤នាក់ ត្រូវបាននគរបាលស្រុកកំពង់សីលា កោះហៅឱ្យចូលបំភ្លឺ ចំនួន០២ដងរួមមកហើយ ដោយចោទពីបទ ហិង្សាលើអចលនទ្រព្យ។
មាត្រា៣៥ នៃរដ្ឋធម្មនុញ្ញកម្ពុជា ចែងថា «សេចក្តីស្នើទាំងឡាយរបស់ប្រជាពលរដ្ឋ ត្រូវបានទទួលការពិនិត្យ និងដោះស្រាយយ៉ាងហ្មត់ចត់ពីអង្គការរដ្ឋ»៕
