ភ្នាក់ងារយកព័ត៌មាន២នាក់ មកពីបណ្ដាញសារព័ត៌មាន នគរអច្ឆរិយៈ ត្រូវបានខ្មាន់កាំភ្លើង ពួនលបបាញ់ប្រហារ ប៉ុនប៉ងមនុស្សឃាត កាលពីយប់ថ្ងៃទី៥ ខែមិថុនា ឆ្នាំ២០២៥ ក្នុងពេលដែលពួកគេកំពុងធ្វើដំណើរត្រឡប់មកពីយកព័ត៌មាន ពាក់ព័ន្ធនឹងបទល្មើសព្រៃឈើ ស្ថិតនៅតំបន់ព្រៃឡង់ ឃុំចំការលើ ស្រុកថាឡាបរិវ៉ាត់ ខេត្តស្ទឹងត្រែង។
ជនរងគ្រោះទាំងពីរនាក់នោះ រួមមាន លោក ថ្លាង តៅ និងលោក ហង្ស ចិន្តា ដែលជាអ្នករាយការណ៍ព័ត៌មានប្រចាំខេត្តស្ទឹងត្រែង។ យ៉ាងណាហេតុការណ៍នេះ ពុំបានបង្ករបួសស្នាមគ្រោះថ្នាក់ដល់អាយុជីវិតអ្នកសារព័ត៌មានទាំងពីរឡើយ។
ជនរងគ្រោះ គឺលោក ថ្លាង តៅ ប្រាប់សារព័ត៌មានក្នុងស្រុកឲ្យដឹងថា លោកបានទៅយកព័ត៌មាននៅតំបន់ព្រៃឡង់ តាមការរាយការណ៍របស់ប្រជាពលរដ្ឋ ថាមានបទល្មើសដឹកជញ្ជូនឈើយ៉ាងសកម្ម។
លោកបន្តថា ក្រោយចុះទៅដល់ទីតាំង លោកក៏បានប្រទះឃើញមានបទល្មើសពិតប្រាកដមែន និងបានរាយការណ៍បន្តទៅសមត្ថកិច្ចជំនាញ ហើយមានការចុះទៅបង្ក្រាបភ្លាមៗ ហើយលោកនិងក្រុមការងារក៏បានចាកចេញពីទីនោះ។
ក្នុងពេលលោកនិងក្រុមការងារ កំពុងជិះម៉ូតូដល់ចំណុចផ្លូវបំបែក ត្រង់ទួលស្រែល្បើក ស្ថិតក្នុងភូមិរុន ឃុំចំការលើ ក៏បានជួបនឹងខ្មាន់កាំភ្លើងដែលពួនសម្ងំស្ទាក់បាញ់ប្រហារ ទៅលើរូបលោកទាំង២ ដោយប្រើកាំភ្លើងកែច្នៃខ្យល់ ចំនួន៣គ្រាប់។
ក្រោយកើតហេតុ សមត្ថកិច្ចបានចុះទៅអន្តរាគមន៍សង្គ្រោះអ្នកសារព័ត៌មានទាំងពីរនាក់ ទាន់ពេលវេលា និងបានស្រាវជ្រាវរកជនសង្ស័យ ដោយរកឃើញឧបករណ៍មួយចំនួន ទាក់ទិននឹងករណីប៉ុនប៉ងឃាតកម្មនេះ។
ក្រោយពីឡោមព័ទ្ធផ្ទះ ជនសង្ស័យអស់មួយយប់នៅថ្ងៃទី៦ ខែមិថុនា សមត្ថកិច្ចបានឆែកឆេរនិងឈានដល់ឃាត់ខ្លួនជនសង្ស័យដែលជាខ្មាន់កាំភ្លើងចំនួន២រូប យកទៅសួរនាំនៅអធិការដ្ឋាននគរបាលស្រុកថាឡាបរិវ៉ាត់ និងបញ្ជូនបន្តទៅស្នងការនគរបាលខេត្តស្ទឹងត្រែង ដើម្បីធ្វើកំណត់ហេតុ និងបន្តស្រាវជ្រាវរកអ្នកពាក់ព័ន្ធបន្ថែម។
វត្ថុតាងដែលសមត្ថកិច្ចរកឃើញ រួមមាន ម៉ូតូមួយគ្រឿង ម្សៅដែលជាជាតិរំសេវ និងគ្រាប់បាដាងកង់ ហៅគ្រាប់”ឃ្លី” ជាឧបករណ៍សម្រាប់ធ្វើគ្រាប់កាំភ្លើង។
ចំណែកជនសង្ស័យទាំងពីររូប មានទីលំនៅក្នុងភូមិរំដេង ឃុំចំការលើ ស្រុកថាឡាបរិវ៉ាត់ ខេត្តស្ទឹងត្រែង។
វីអូឌី មិនអាចទាក់ទងអ្នកនាំពាក្យសាលាដំបូងខេត្តស្ទឹងត្រែង លោក ឈុំ ស៊ាងហាក់ ដើម្បីសុំការធ្វើបច្ចុប្បន្នភាពពីករណីនេះបាននៅឡើយទេ នៅថ្ងៃពុធនេះ។
ប៉ុន្តែកាលពីថ្ងៃទី៩ ខែមិថុនា លោក ឈុំ ស៊ាងហាក់ បានប្រាប់សារព័ត៌មានក្នុងស្រុកថា តុលាការបានចេញដីកាឃុំខ្លួនបណ្តោះអាសន្ន ជនសង្ស័យ២នាក់ ក្រោមបទចោទ «ប៉ុនប៉ងមនុស្សឃាត និងកាន់កាប់អាវុធដោយគ្មានការអនុញ្ញាត» តាមមាត្រា២៧ មាត្រា១៩៩ និងមាត្រា៤៩០ នៃក្រមព្រហ្មទណ្ឌ។
ទាក់ទិនរឿងនេះ ប្រធានសមាគមសម្ព័ន្ធអ្នកសារព័ត៌មានកម្ពុជា លោក ណុប វី កត់សម្គាល់ឃើញអ្នកសារព័ត៌មានរាយការណ៍បរិស្ថាន បានក្លាយជាសត្រូវរបស់ជនល្មើសបំផ្លាញធនធានធម្មជាតិ ខណៈទំនាក់ទំនងជនល្មើសជាមួយអ្នកមានអំណាច និងអាជ្ញាធរបានធ្វើឱ្យយន្តការការពារអ្នកសារព័ត៌មានចន្លោះប្រហោង។
លោកណែនាំឱ្យអ្នកសារព័ត៌មានបង្កើនការប្រុងប្រយ័ត្ន ខណៈអាជ្ញាធររដ្ឋត្រូវតែអនុវត្តច្បាប់ឱ្យដល់ឬសគល់នៃបញ្ហា ជាជាងការអន្តរាគមន៍តែនៅពេលដែលបទល្មើសបានកើតឡើង។
លោកថា៖ «អ៊ីចឹងដើម្បីដោះស្រាយបញ្ហាហ្នឹងបាន គឺការអនុវត្តច្បាប់ គឺជារឿងមួយដែលចាំបាច់។ ក្នុងករណីជនល្មើសចាប់ខ្លួនបាន គឺត្រូវតែផ្ដន្ទាទោសជនល្មើសហ្នឹងឱ្យបានតឹងរ៉ឹង ដើម្បីធានាថាពួកគេរាងចាល ឬក៏ធានាថាអ្នកផ្សេងទៀតដែលកំពុងប្រព្រឹត្តបទល្មើស ការប៉ុនប៉ងលើអ្នកសារព័ត៌មានហ្នឹង គឺថារាងចាល»។
ការយាយីមកលើជីវិត និងទ្រព្យសម្បត្តិអ្នកសារព័ត៌មានរាយការណ៍បទល្មើសបរិស្ថាន និងព្រៃឈើកើតឡើងជាបន្តបន្ទាប់ក្នុងរយៈពេលចុងក្រោយនេះ។
ជាក់ស្ដែងករណីបាញ់សម្លាប់អ្នកសារព័ត៌មានឱ្យគេហទំព័រកម្ពុជាអភិវឌ្ឍន៍ នៅខេត្តសៀមរាប លោក ឈឿង ឈឹង វ័យ ក្រោយពេលលោកទៅស៊ើបអង្កេតបទល្មើសកាប់ទន្ទ្រានដីព្រៃអភិរក្សមួយកន្លែង នៅស្រុកជីក្រែង។
ករណីមួយទៀត គឺការចាប់ខ្លួនអ្នកសារព័ត៌មានបរិស្ថាននៅខេត្តស្ទឹងត្រែង គឺលោក អ៊ុក ម៉ៅ ដាក់ពន្ធនាគារ ខណៈជនល្មើសបានកម្ទេចទូរស័ព្ទដៃ និងលួចដុតផ្ទះអ្នកសារព័ត៌មានក្រីក្ររូបនេះចោលទៀតផង។
អ្នកសម្របសម្រួលនៃសមាគមការពារសិទ្ធិមនុស្សអាដហុកខេត្តស្ទឹងត្រែង លោក ស៊ុន ឡង់ឌី សោកស្ដាយ និងព្រួយបារម្ភចំពោះការប៉ុនប៉ងអាយុជីវិតអ្នកសារព័ត៌មានបរិស្ថានជាបន្តបន្ទាប់។
លោកបន្តថា ការប៉ុនប៉ងមនុស្សឃាត គឺជាបទឧក្រិដ្ឋដែលមានចែងក្នុងច្បាប់ ដោយស្ថាប័នតុលាការត្រូវតែអនុវត្តនីតិវិធីឱ្យបានតឹងរ៉ឹង។
លោកថា៖ «យើងក៏ស្នើសុំឱ្យអាជ្ញាធរយកចិត្តទុកដាក់បន្ថែមទៀត ទៅលើសុខសុវត្ថិភាពរបស់អ្នកសារព័ត៌មាន ព្រោះថាអ្នកសារព័ត៌មានក៏ជាចំណែកមួយចូលរួម ក្នុងការទប់ស្កាត់បទល្មើសព្រៃឈើផងដែរ»។
យោងតាមរបាយការណ៍ស្ដីពីស្ថានភាពសារព័ត៌មាននៅកម្ពុជា ចេញផ្សាយដោយសមាគមសម្ព័ន្ធអ្នកសារព័ត៌មានកម្ពុជា (ខេមបូចា) បានកត់ត្រាពីករណីយាយីអ្នកសារព័ត៌មាន ក្នុងឆ្នាំ២០២៤ មានការកើនឡើងដល់ចំនួន ៤១ករណី ប៉ះពាល់ដល់អ្នកសារព័ត៌មានចំនួន ៦៤នាក់ បើធៀបនឹងឆ្នាំ២០២៣ ដែលមានត្រឹមតែចំនួន ៣២ករណី សរុបអ្នកសារព័ត៌មានដែលប៉ះពាល់មានចំនួន ៥៩នាក់ប៉ុណ្ណោះ។
ក្នុងជំនួបទ្វេភាគីនៅទីក្រុងនីស (Nice) ប្រទេសបារាំង នៅថ្ងៃទី១០ ខែមិថុនា ប្រធានក្រុមប្រឹក្សាអឺរ៉ុប លោក អាន់តូនីអូ ខូស្តា (Antonio Costa) បានលើកឡើងចំពោះមុខនាយករដ្ឋមន្ត្រីកម្ពុជា លោក ហ៊ុន ម៉ាណែត ពីការគោរពសិទ្ធិមនុស្ស និងសេរីភាពកាន់តែច្រើនសម្រាប់សង្គមស៊ីវិល និងប្រព័ន្ធផ្សព្វផ្សាយឯករាជ្យផងដែរ។
របាយការណ៍របស់អង្គការអ្នកសារព័ត៌មានគ្មានព្រំដែន ហៅកាត់ RSF ចេញផ្សាយកាលពីថ្ងៃទី២ ខែឧសភា ឆ្នាំ២០២៥នេះ បានទម្លាក់ចំណាត់ថ្នាក់សេរីភាពសារព័ត៌មានរបស់កម្ពុជា ចំនួន១០លេខ ពោលធ្លាក់ពីចំណាត់ថ្នាក់ទី១៥១ នៅឆ្នាំ២០២៤ មកទី១៦១ នៅឆ្នាំ២០២៥។
មូលហេតុដែលអង្គការនេះ ទម្លាក់ចំណាត់ថ្នាក់សេរីភាពសារព័ត៌មានរបស់កម្ពុជា គឺដោយយោងលើចំណុចសំខាន់ៗមួយចំនួន ដូចជា បរិយាកាសនៃប្រព័ន្ធផ្សព្វផ្សាយ បរិបទនយោបាយ ក្របខណ្ឌច្បាប់ បរិបទសេដ្ឋកិច្ច បរិបទសង្គម វប្បធម៌ និងបញ្ហាសុវត្ថិភាព៕
