មន្រ្តីជាន់ខ្ពស់ក្រសួងរ៉ែ និងថាមពល បានអះអាងថា មកដល់ម៉ោងនេះ កម្ពុជាមានលទ្ធភាពគ្រប់គ្រាន់ក្នុងការផ្តល់អគ្គិសនីមិនថាទីក្រុង ឬជនបទនោះទេ បើទោះជាភាគីថៃបានព្រមានពីការផ្តាច់ភ្លើងឈប់ផ្គត់ផ្គង់ឱ្យកម្ពុជា ព្រោះតែជម្លោះព្រំដែននេះក្តី។
តាមរយៈវីដេអូឃ្លីបជិត៤នាទី របស់លោក កែវ រតនៈ រដ្ឋមន្រ្តីក្រសួងរ៉ែ និងថាមពល ដែលត្រូវបានគេផ្សព្វផ្សាយជាសាធារណៈ ហើយសំឡេងប្រជាធិបតេយ្យ វីអូឌី ទើបទទួលបាននៅថ្ងៃទី១២ ខែមិថុនានេះ ឱ្យដឹងថា បើទោះជានៅពេលនេះ ភាគីថៃផ្តាច់អគ្គិសនី ដូចដែលមាននៅក្នុងកិច្ចសន្យាយ៉ាងណាក្តី ក៏កម្ពុជានឹងមិនប្រឈមមុខចំពោះការខ្វះថាមពលអគ្គិសនីប្រើប្រាស់នៅក្នុងស្រុកដែរ។
ថ្លែងពីខេត្តពោធិ៍សាត់ លោកទទួលស្គាល់ថា កម្ពុជា និងថៃ ពិតជាបានចុះកិច្ចព្រមព្រៀងពាណិជ្ជកម្ម ទិញលក់ថាមពលអគ្គិសនីជាមួយគ្នាមែន ប៉ុន្តែថាមពលដែលកម្ពុជា ទិញមកផ្គត់ផ្គង់នេះ គឺដើម្បីត្រៀមបម្រុងទុកក្នុងករណីត្រូវការចាំបាច់។ តែចំពោះមុខ លោកថា កម្ពុជាកំពុងប្រើប្រាស់ថាមពលអគ្គិសនី ដែលមានស្រាប់ពីប្រភពផ្សេងទៀតនៅឡើយប៉ុណ្ណោះ។ ចំណែកថាមពលអគ្គិសនីដែលបញ្ជាទិញពីថៃ គឺនៅមិនទាន់បានប្រើប្រាស់នៅឡើយទេ។
បើតាមលោក កែវ រតនៈ ប្រសិនបើភាគីថៃផ្តាច់មែន គឺមានតែបីតំបន់ទេ ដែលទទួលផលប៉ះពាល់ ក្នុងនោះមានដូចជាតំបន់អូរស្មាច់ជាដើម ដែលទីតាំងទាំងនោះគឺនៅកៀកនឹងព្រំដែនថៃស្រាប់។ បើទោះជាបែបណា កម្ពុជាក៏មានថាមពលអគ្គិសនី បម្រុងទុកក្នុងគ្រាអាសន្ននេះកើតឡើងរួចហើយដែរ។
ប្រតិកម្មនេះ កើតឡើង ក្រោយពី លោក ម៉ារីត ស្យាមពង្សសា (Marit Sangiampongsa) អ្នកនាំពាក្យក្រសួងការបរទេសថៃ ត្រូវកាសែតក្នុងស្រុករបស់ថៃ ស្រង់សំដីមកចុះផ្សាយកាលពីថ្ងៃទី១០ ខែមិថុនានេះដោយព្រមានថា រដ្ឋាភិបាលថៃបានជូនដំណឹងរួចហើយពីការកាត់ផ្តាច់ការផ្គត់ផ្គង់អគ្គិសនី និងអ៊ីនធឺណេត ដែលបម្រើទៅដល់កាស៊ីណូ និងមជ្ឈមណ្ឌលបោកប្រាស់តាមអនឡាញ ដែលប្រតិបត្តិការនៅព្រំដែនកម្ពុជា-ថៃ ប្រសិនបើជម្លោះព្រំដែនកាន់តែអាក្រក់ទៅៗ។
ចំណែកឯរបាយការណ៍ស្តីពីការនាំចូលអគ្គិសនីសរុប ដែលចេញដោយក្រសួងរ៉ែ និងថាមពល នៅឆ្នាំ២០២៤ បង្ហាញថា ថាមពលអគ្គិសនីដែលកំពុងប្រើប្រាស់ តាមរយៈការនាំចូលពីប្រទេសជិតខាង កម្ពុជាមានជាង ៣លាន៤៨ម៉ឺនមេហ្គាវ៉ាត់ម៉ោង។ ក្នុងចំណោមប្រទេស ដែលកម្ពុជាបានបញ្ជាទិញ គឺថាមពលអគ្គិសនីមកពីថៃ តិចជាងប្រទេសឡាវ និងវៀតណាម ក្នុងបរិមាណជិត ២០ម៉ឺនមេហ្គាវ៉ាត់ម៉ោង ក្នុងពេលដែលតម្រូវការពីឡាវមានជាង ២លាន៥៩ម៉ឺនមេហ្គាវ៉ាត់ម៉ោង។ រីឯការនាំចូលថាមពលអគ្គិសនី ពីវៀតណាមវិញ ក្នុងទំហំជិត ៧០ម៉ឺន មេហ្គាវ៉ាត់ម៉ោង៕
