ជនរងគ្រោះចាញ់បោកអតីតឧកញ៉ា ហ៊ី គឹមហុង ជំរុញឱ្យតុលាការពន្លឿនចាត់វិធាន ដើម្បីឱ្យពួកគេប្រមាណ ៨ពាន់គ្រួសារ បានលុយដោះស្រាយវិបត្តិបំណុល តាមការជំរុញរបស់ក្រសួងយុត្តិធម៌ ខណៈបញ្ហានេះ បានអូសបន្លាយប្រមាណជា២ឆ្នាំ ធ្វើឱ្យមានអ្នកស្លាប់កើនដល់ជិត៣០នាក់។
បញ្ហានេះ អ្នកឃ្លាំមើលព្រមានថា ប្រព័ន្ធយុត្តិធម៌គ្រួសារហ៊ុននឹងបន្សល់ទុកជនរងគ្រោះច្រើនម៉ឺននាក់ទៀត បើគ្មានចរន្តផ្លាស់ប្តូរទេនោះ។
រដ្ឋមន្រ្តីក្រសួងយុត្តិធម៌ លោក កើត រិទ្ធិ តាមរយៈលិខិតមួយច្បាប់ កាលពីថ្ងៃទី២០ ខែឧសភា ឆ្នាំ២០២៥ បានជំរុញឱ្យតុលាការពន្លឿនដោះស្រាយរឿងក្តីជនរងគ្រោះចាញ់បោកអតីតឧកញ៉ា ហ៊ី គឹមហុង ដែលជាប់គាំងជិត២ឆ្នាំទៅនេះ ខណៈជនរងគ្រោះផ្ទុះការតវ៉ាជាបន្តបន្ទាប់នៅតែគ្មានដំណោះស្រាយធ្វើឱ្យមានអ្នកស្លាប់កើនជិត៣០នាក់ ក្រោមវិបត្តិបំណុល។
ជនរងគ្រោះម្នាក់ អ្នកស្រី នូច មុំ ប្រាប់ថា មិនទាន់ទទួលបានដំណឹងពីតុលាការជុំវិញការពន្លឿនយុត្តិធម៌ តបតាមលិខិតរបស់ក្រសួងយុត្តិធម៌នៅឡើយទេជិត១ខែទៅនេះ។
អ្នកស្រីបារម្ភពីវិបត្តិជីវភាពកាន់តែធ្ងន់ធ្ងរ បើតុលាការមិនចាប់ខ្លួនមេឆបោក ខណៈប្តីរបស់អ្នកស្រីបានស្លាប់កាលពីជិត១ឆ្នាំមុន ដោយសារគ្មានលុយព្យាបាលជំងឺ ក្រោយចាញ់បោកអតីតឧកញ៉ា ហ៊ី គឹមហុង ចំនួន ១៦០០០ដុល្លារ ជាលុយខ្ចីធនាគារ។
អ្នកស្រីថា៖ «ខ្ញុំចង់ឱ្យក្រសួងយុត្តិធម៌ ពន្លឿនការដោះស្រាយយកលុយមកសងឱ្យធនាគារវិញ ឱ្យរួចទុក្ខរួចទោស។ ពិបាកខ្លាំង ចៅរៀនក៏អត់លុយ យើងរកលុយមកបានបន្តិចបន្តួច គ្រាន់តែយកទៅផ្គត់ផ្គង់ធនាគារហ្នឹង មានអីហូប។ បានបង់គេ ផេតផុតៗ។ បើតុលាការមិនដោះស្រាយ ខ្ញុំក៏អត់មានអីបង់ទៀត។ មានអីសង្ឃឹមទេ! ខ្ញុំសង្ឃឹមតែផ្លូវច្បាប់ បើផ្លូវច្បាប់អត់ដោះស្រាយឲ្យបានងាយបានលឿន! ខ្ញុំមានអីសង្ឃឹមទៀត»។
ជនរងគ្រោះម្នាក់ទៀត លោក ប៊ុន ធឿន រស់នៅខេត្តកំពត ប្រាប់វីអូឌីថា មានជនរងគ្រោះស្លាប់កើនឡើងដល់២៧នាក់ហើយ ក្រោយគ្មានលុយព្យាបាលជំងឺ និងខ្លះធ្វើអត្តឃាត ដោយសារការចាញ់បោកអតីតឧកញ៉ា ហ៊ី គឹមហុង។
ជនរងគ្រោះចាញ់បោកក្រុមហ៊ុនពិភពដីមាសចំនួន ២ម៉ឺនដុល្លារ រូបនេះ ជំរុញឱ្យតុលាការពន្លឿនវិធានការលើមេឧក្រិដ្ឋជនឆបោក ដើម្បីបានលុយដោះស្រាយវិបត្តិបំណុល។
លោកថា៖ «មិនដឹងថ្ងៃណាទេលោកគ្រូ! ឥលូវហ្នឹងនៅតែថ្ងៃជំនុំជម្រះថ្ងៃកាត់ក្តីទេ។ អត់ទាន់ដឹងថ្ងៃណា ចាំមើលថ្ងៃកាត់ក្ដីហ្នឹង បើសិនជាថ្ងៃកាត់ក្ដីជំនុំជម្រះហ្នឹង បើសិនជា ហ៊ី គឹមហុង មិនចូលខ្លួនដោះស្រាយ មានផែនការទៀតហើយ។ ព្រោះអីស្នើហើយ ស្នើឱ្យខាងតុលាការខាងច្បាប់រឹបអូសទ្រព្យសម្បត្តិលក់សងប្រជាពលរដ្ឋវិញ ចង់ឲ្យតុលាការពន្លឿននិងការដោះហ្នឹង ចង់ឱ្យលឿនមាំណាស់ ប៉ុន្តែហើយវាអត់បានដូចចិត្ត»។
កាលពីថ្ងៃទី១៩ ខែឧសភា ក្រុមជនរងគ្រោះបានប្រមូលផ្តុំគ្នានៅមុខក្រសួងយុត្តិធម៌ ទាមទារឱ្យរដ្ឋាភិបាលចាប់បង្ខំឱ្យមេឆបោកសងលុយពួកគេវិញ ខណៈវិបត្តិបំណុលពួកគេបានស្លាប់កើនដល់២៧នាក់ ក្នុងចំណោមអ្នកចាញ់បោកប្រមាណជា៨ពាន់គ្រួសារ។
១ថ្ងៃក្រោយមក ពោលគឺនៅកាលពីថ្ងៃទី២០ ខែឧសភា រដ្ឋមន្រ្តីក្រសួងយុត្តិធម៌ លោក កើត រិទ្ធិ ចេញលិខិតប្រាប់សាលាដំបូងរាជធានីភ្នំពេញ ឱ្យពន្លឿនចំណាត់ការរឿងព្រហ្មទណ្ឌ កាលពីថ្ងៃទី៨ ខែសីហា ឆ្នាំ២០២៣ ដោយថា បច្ចុប្បន្នស្ថិតក្នុងដំណាក់កាលស៊ើបសួរ។
VOD មិនអាចសុំការឆ្លើយតបពី លោក ប្លង់ សុផល អ្នកនាំពាក្យតំណាងអយ្យការអមសាលាដំបូងរាជធានីភ្នំពេញបានទេ ដោយគ្មានអ្នកទទួលទូរសព្ទ។
តំណាងរាស្រ្តគណបក្សសង្រ្គោះជាតិ លោក សួន សូរីដា យល់ថា ប្រព័ន្ធតុលាការកម្ពុជានៅក្រោមឥទ្ធិពលទឹកលុយ និងអ្នកមានអំណាច ជាទម្រង់ការអនុវត្តច្បាប់បែបស្តង់ដារ២ ទើបធ្វើឱ្យរឿងក្តីដែលមានពាក់ព័ន្ធនឹងអ្នកមានអំណាច ត្រូវបានតុលាការកប់ចោល។
ប្រធានអង្គការប្រជាធិបតេយ្យខ្មែរប្រចាំប្រទេសអូស្រ្តាលី លោក ស៊ឹង សែនករុណា និយាយថា ជាគោលការណ៍យុត្តិធម៌ ការអនុវត្តច្បាប់ត្រូវធ្វើឡើងដោយស្មើភាពគ្នា តែលោកថាមន្រ្តីអនុវត្តច្បាប់នៅកម្ពុជាភាគច្រើនជាសមាជិកបក្សកាន់អំណាច នៅក្រោមសម្ពាធអ្នកមានអំណាច ជាហេតុធ្វើឱ្យប្រព័ន្ធច្បាប់មិនឯករាជ្យ រួមរឹតដោយអំពើពុករលួយជាប្រព័ន្ធ ធ្វើឱ្យពលរដ្ឋទន់ខ្សោយរងគ្រោះកាន់តែធ្ងន់ធ្ងរ។
លោកថា៖ «បើសិនជាជនក្រីក្រជាប្រជាពលរដ្ឋរងគ្រោះទាំងអយុត្តិធម៌ ទាំងមើលឃើញនឹងភ្នែកហ្នឹងហើយ ក៏នៅព្រងើយកន្តើយដែរ បើសិនជាប៉ះពាល់ជាមួយនឹងអ្នកដែលមានឥទ្ធិពលមានអំណាចមានលុយអីទាំងអស់ហ្នឹង ចឹងពលរដ្ឋនៅតែរស់រងទុក្ខនូវភាពអយុត្តិធម៌។ អ៊ីចឹងគោលការណ៍យុត្តិធម៌គេអត់ប្រកាន់ទេ អត់ប្រកាន់ថា អ្នកណា មាន អ្នកណាក្រដែលទេឲ្យតែអ្នកហ្នឹងរងនូវភាពអយុត្តិធម៌ អ្នកដែលទទួលខុសត្រូវក្នុងការអនុវត្តច្បាប់ ត្រូវផ្តល់យុត្តិធម៌ដល់ភាគីទាំងអស់ហ្នឹងឯង»។
ដោយឡែក សាស្ត្រាចារ្យវិទ្យាសាស្ត្រនយោបាយ លោក ឯម សុវណ្ណរ៉ា ធ្លាប់ប្រាប់វីអូឌីកាលពីថ្ងៃទី៩ខែមិថុនានេះថា ប្រព័ន្ធយុត្តិធម៌ខ្សោយ ជាដើមហេតុមិនអាចទប់ស្កាត់អំពើពុករលួយបាន ដែលទីបំផុតវានឹងគំរាមកំហែងជីវភាពពលរដ្ឋ និងវិនិយោគិន ដែលជាប្រភពឆ្នាំងបាយពលរដ្ឋទូទាំងប្រទេស។
លោកថា៖ «ឯករណីមួយទៀតគួរតែកែប្រែគោលការណ៍ច្បាប់មួយចំនួននៅកម្ពុជា ដែលខ្វះខាតដូចជាច្បាប់ប្រកួតប្រជែងដោយសេរី យន្តការតម្លាភាព ដូចជាការអំពើពុកលួយហ្នឹង គួររឹតត្បិតកាត់បន្ថយឱ្យច្រើនមែនទែន ហើយអាហ្គេមអនឡាញដែលល្បីល្បាញ ចាប់ជំរិត គួរលុបបំបាត់ ដើម្បីកុំឱ្យអ្នកវិនិយោគិនគេខ្លាចរអាមកកម្ពុជា ហើយប្រព័ន្ធយុត្តិធម៌កម្ពុជាគួរពង្រឹងឲ្យមានយុត្តិធម៌ពិតប្រាកដដែលជាទីពឹងរបស់អ្នកវិនិយោគិន»។
អគ្គនាយកក្រុមហ៊ុនពិភពដីមាស គឺអតីតឧកញ៉ា ហ៊ី គឹមហុង ត្រូវបានចាប់ខ្លួនកាលពីខែសីហា ឆ្នាំ២០២៣ ពីបទ ឆបោកពលរដ្ឋ តែប្រមាណ ៤ខែក្រោយមក ពោលគឺនៅខែវិច្ឆិកា ឆ្នាំ២០២៣ តុលាការដោះលែងវិញ ក្រោយសន្យារកលុយសងជនរងគ្រោះវិញ តែពេលបាននៅក្រៅឃុំ លោកបានគេចវេសមិនគោរពសន្យានោះទេ។
ចំពេលយុត្តិធម៌ត្រូវជាប់គាំងជិត២ឆ្នាំទៅនេះ ជនរងគ្រោះក៏បានទម្លាយលិខិត២ច្បាប់ បង្ហាញថា គណៈអចិន្ត្រៃយ៍គណៈកម្មាធិការគណបក្សប្រជាជនកម្ពុជារាជធានីភ្នំពេញ ដែលមាន លោក ឃួង ស្រេង ជាប្រធានបានបង្កើតសាខាបក្សនៅក្រុមហ៊ុនពិភពដីមាស ក្នុងរាជធានីភ្នំពេញ នៅឆ្នាំ២០២៣ ជ្រើសតាំង លោក ហ៊ី គឺមហុង ជាមេដឹកនាំ។
តំណែងអតីតឧកញ៉ា ហ៊ី គឹមហុង ជាក្បាលម៉ាស៊ីនដឹកនាំដ៏សំខាន់របស់គណបក្សប្រជាជនកម្ពុជាប្រចាំនៅរាជធានីភ្នំពេញនេះហើយ ដែលជនរងគ្រោះចោទថា ធ្វើឱ្យពួកគេស្លាប់ជាបន្តបន្ទាប់ជិត៣០នាក់ ដោយសារប្រព័ន្ធច្បាប់មិនហ៊ានកាត់ទោសមេឆបោករូបនេះ៕
