អង្គការអន្តរជាតិ UNFPA Cambodia បានឱ្យដឹងថា អត្រាអាពាហ៍ពិពាហ៍កុមារនៅខេត្តមណ្ឌលគិរី ដែលជាខេត្តសម្បូរទៅដោយជនជាតិដើមភាគតិចនោះ គឺមានដល់ទៅជាង ៣០ភាគរយនៃចំនួនប្រជាជនសរុបប្រមាណ ១០ម៉ឺននាក់ ដែលកត្តានេះនឹងធ្វើឱ្យក្មេងស្រី និងស្ត្រីទាំងនោះប្រឈមនឹងហានិភ័យនៃការមានផ្ទៃពោះទាំងវ័យក្មេង និងរស់នៅកាន់តែចាកឆ្ងាយពីសង្គម។
ទំព័រហ្វេសប៊ុករបស់អង្គការ UNFPA Cambodia បានផ្សព្វផ្សាយកាលពីថ្ងៃទី០៩ ខែមិថុនា ឆ្នាំ២០២៥នេះថា នៅខេត្តមណ្ឌលគិរី មានអត្រាអាពាហ៍ពិពាហ៍កុមារដល់ទៅ ៣៣,៤ភាគរយ ក្នុងចំនួនប្រជាជនសរុបចំនួនប្រមាណ ១០ម៉ឺននាក់។
ប្រភពដដែលបន្តថា ម្តាយវ័យក្មេងនៅតំបន់ដាច់ស្រយាលនេះ អាចប្រឈមនឹងការមិនទទួលបាននូវព័ត៌មាន សេវាកម្ម និងជំនួយដែលពួកគេត្រូវការ ខណៈអាពាហ៍ពិពាហ៍កុមារ ក៏អាចធ្វើឱ្យស្ត្រី និងក្មេងស្រី រស់នៅកាន់តែដាច់ឆ្ងាយពីសង្គមកាន់តែខ្លាំង។
អង្គការ UNFPA បានគូសបញ្ជាក់ថា៖ «ប្រសិនបើពួកគេមិនទទួលបានសេវា និងការអប់រំ នោះពួកគេនឹងប្រឈមមុខទៅនឹងហានិភ័យនៃការមានផ្ទៃពោះ និងការក្លាយទៅជាម្តាយនៅវ័យក្មេង ដោយមិនទទួលបានព័ត៌មាន ការថែទាំ និងជំនួយដែលពួកគេត្រូវការ»។
ជាការឆ្លើយតបនឹងបញ្ហានេះ UNFPA រួមជាមួយនឹងដៃគូនានា រួមមាន UNICEF និងក្រសួងអប់រំ យុវជន និងកីឡា បាននិងកំពុងគាំទ្រកម្មវិធី VMC ដោយបានរៀបចំវគ្គបណ្តុះបណ្តាលរយៈពេលពីរថ្ងៃ សម្រាប់អនុវិទ្យាល័យ និងវិទ្យាល័យចំនួន៧ ក្នុងខេត្តមណ្ឌលគិរី ដោយផ្តោតលើការកែលម្អចំណេះដឹងអំពីសុខភាពបន្តពូជ សុខភាពផ្លូវភេទ អំពើហិង្សាទាក់ទងនឹងយេនឌ័រ និងការបង្កើតគម្រោងប្រកបដោយភាពច្នៃប្រឌិត ដើម្បីទប់ស្កាត់ការបោះបង់ការសិក្សា ដោយសារការរៀបការនៅវ័យកុមារ និងការមានផ្ទៃពោះនៅវ័យក្មេង។
អ្នកស្រី ស ស៊ីណែត អ្នកនាំពាក្យក្រសួងកិច្ចការនារី នៅថ្ងៃទី១១ ខែមិថុនានេះ បានទទួលស្គាល់ថា តាមការស្រាវជ្រាវ ខេត្តមណ្ឌលគិរី ជាខេត្តលំដាប់ទី២ បន្ទាប់ពីខេត្តរតនគិរី ដែលមានតួលេខអ្នករៀបការវ័យក្មេងច្រើនជាងគេ ខណៈខេត្តទាំងពីរនេះ មានជនជាតិដើមភាគតិចច្រើន។
ករណីនេះ អ្នកស្រីថា ក្រសួងបានសហការជាមួយក្រសួងពាក់ព័ន្ធ និងអង្គការដៃគូនានា រៀបចំផែនការសកម្មភាពជាតិ ស្តីពីការទប់ស្កាត់អាពាហ៍ពិពាហ៍នៅវ័យក្មេង និងការមានផ្ទៃពោះនៅវ័យជំទង់ រួមទាំងសកម្មភាពជាច្រើនទៀត ដើម្បីទប់ស្កាត់ និងឆ្លើយតបទៅនឹងការរៀបការវ័យក្មេងនេះ។
អ្នកស្រីបានផ្ញើសារដែរថា៖ «សុំឱ្យយុវជនទាំងអស់ មានន័យថា ខិតខំប្រឹងប្រែងរៀនសូត្រ ដើម្បីបន្តឱកាសយើងទៅមុខទៀត ដើម្បីទី១ ជៀសផុតពីរឿងអាពាហ៍ពិពាហ៍វ័យក្មេង ទី២ទាក់ទងជាមួយនឹងមិនចង់ឱ្យមានផលប៉ះពាល់ដូចជាហិង្សា ទាក់ទងនឹងសុខភាពផ្លូវកាយអីផ្សេងៗ»។
បើតាមអ្នកនាំពាក្យក្រសួងកិច្ចការនារីរូបនេះ នៅពេលដែលក្មេងស្រីវ័យជំទង់រៀបការនៅក្រោមអាយុ១៨ឆ្នាំ នឹងធ្វើឱ្យមានប៉ះពាល់ទៅដល់សុខភាពបន្តពូជ សុខភាពផ្លូវកាយ សុខភាពផ្លូវចិត្ត សេដ្ឋកិច្ចគ្រួសារ និងប្រឈមនឹងអំពើហិង្សាក្នុងគ្រួសារជាដើម។ ក្រៅពីនោះ បើសិនជាពួកគេរៀបការ ហើយមានផ្ទៃពោះទាំងវ័យក្មេងទៀតនោះ ពួកគាត់នឹងប្រឈមផ្នែកសុខភាពកាន់តែច្រើន ដោយសារតែពួកគាត់នៅវ័យក្មេងមិនបានដឹងពីការថែទាំសុខភាពអំឡុងពេលមានផ្ទៃពោះ និងពេលសម្រាល។
ស្របពេលគ្នានេះដែរ អ្នកប្រើប្រាស់បណ្តាញសង្គម ឈ្មោះ ផែ ស្រីនិត (Phe SreyNith) ដែលមានស្រុកកំណើតនៅខេត្តមណ្ឌលគិរីដែរនោះ បានលើកជាយោបល់ថា ការស់នៅតំបន់ជនបទដាច់ឆ្ងាយពីសង្គម បង្កឱ្យមានផលលំបាកក្នុងការស្វែងយល់ឱ្យបានស៊ីជម្រៅអំពីការរើសគូស្រករ និងការសិក្សារៀនសូត្រ។
កញ្ញាថា កង្វះការអប់រំដែលនៅតែបន្តមានយ៉ាងច្រើន ចំពោះតំបន់ដាច់ស្រយាលនៅក្នុងខេត្តនេះ ក៏បណ្ដាលឱ្យទាំងឪពុកម្ដាយ ទាំងកុមារ ទទួលរងនៅបញ្ហាប្រឈម ដោយសារតែពួកគាត់មិនមានការយល់ដឹង និងការរៀបចំអាពាហ៍ពិពាហ៍សម្រាប់កូនៗឱ្យបានត្រឹមត្រូវ ហើយអាចឈានទៅដល់ការបង្ខិតបង្ខំឱ្យរៀបការទៅលើកុមារថែមទៀត។
យ៉ាងណាមិញ កញ្ញា ស្រីនិត បានអំពាវនាវដល់អាជ្ញាធរមូលដ្ឋាន និងគ្រប់ភាគីពាក់ព័ន្ធ បង្កើនការអប់រំទៅដល់ប្រជាពលរដ្ឋឱ្យបានដិតដល់ និងឱ្យពួកគាត់បានយល់ពីហានិភ័យនៃការរៀបការវ័យក្មេង ព្រមរឹតបន្តឹងទៅលើបញ្ហានេះ។
ចំណែក កញ្ញា Lyzaa Mit ដែលជាអ្នកប្រើប្រាស់បណ្តាញសង្គមមួយរូបទៀត បានជំរុញឱ្យក្រសួងពាក់ព័ន្ធ មានវិធានការទប់ស្កាត់ឱ្យមានប្រសិទ្ធភាព ព្រោះបើពួកគេរៀបការវ័យក្មេងពេក ឬរៀបការក្រោមអាយុ ១៨ឆ្នាំ ហើយមានផ្ទៃពោះទៀតនោះ នឹងធ្វើឱ្យប៉ះពាល់ដល់សង្គមជាតិផងដែរ។
កញ្ញាសរសេរក្នុងសំណេរដើមថា៖ «ក្រសួងត្រូវមានវិធានការខ្លះទើបបាន ព្រោះយុវជនខ្លះ [អាយុ]១៥-១៦ឆ្នាំ មានផ្ទៃពោះអស់ហើយ ទាំងមិនមានការងារធ្វើ សង្គមជាតិធ្លាក់ចុះណាស់»។
ថ្លែងក្នុងវីដេអូឃ្លីបរយៈពេល ៨នាទី កាលពីចុងឆ្នាំ២០២៤ លោកបណ្ឌិត ហោ ប៊ុនឡេង សាស្ត្រាចារ្យមហាបរិញ្ញា និងជាទីប្រឹក្សាបច្ចេកទេសនៃសាលាគ្រូរៀនយើង បានលើកឡើងថា ការរៀបការនៅវ័យក្មេងពេក ធ្វើឱ្យក្មេងស្រីនិងក្មេងប្រុស បាត់បង់ឱកាសជាច្រើន ដូចជា ការបាត់បង់ឱកាសសិក្សា ឬការអភិវឌ្ឍសមត្ថភាពដើម្បីចាប់យកអាជីពពិតប្រាកដមួយ កង្វះចំណេះដឹងទូទៅ គ្មានសមត្ថភាពរកប្រាក់ចំណូលចិញ្ចឹមគ្រួសារ ប្រឈមនឹងបញ្ហាសុខភាព និងការលែងលះគ្នាជាដើម។
សម្រាប់បញ្ហាប្រឈមទៅនឹងសុខភាពវិញ លោកបានលើកឡើងនូវការសិក្សានៅតាមបណ្តាប្រទេសនានា ដែលបង្ហាញថា ក្មេងស្រី ឬស្រី្តដែលរៀបការនៅវ័យក្មេងពេក នឹងប្រឈមនឹងបញ្ហាកូនស្លាប់ក្នុងផ្ទៃ បញ្ហារលូត និងសុខភាពខ្សោយជាដើម។
លោកថា៖ «គេបានរកឃើញថា គ្រោះថ្នាក់ដែលបណ្តាលមកពីសុខភាព ដែលបណ្តាលមកពីការរៀបការវ័យក្មេង ជាពិសេស គឺកូនស្លាប់ក្នុងពោះ ហើយនិងគ្រោះថ្នាក់ដល់ម្តាយហ្នឹង នៅពេលដែលមានផ្ទៃពោះហ្នឹង គឺជិត ៥០ភាគរយ ហើយបញ្ហារលូត បញ្ហារំលូតអីហ្នឹងក៏ច្រើនដែរ ដូច្នេះខ្ញុំចង់ជម្រាបជូនជារួមមកវិញៗថា ការរៀបអាពាហ៍ពិពាហ៍នៅវ័យក្មេង គឺបាត់បង់សឹងតែទាំងអស់ បាត់បង់ទី១គឺបាត់បង់សុខភាព ហ្នឹងគឺការសិក្សាស្រាវជ្រាវបានបង្ហាញ ទី២ បាត់បង់ឱកាសៗក្នុងការសិក្សារៀនសូត្រ ឱកាសក្នុងការចាប់យកអាជីពការងារ ដែលល្អៗ ហើយនិងបាត់បង់នូវឱកាសសម្រាប់ផ្លូវដែលយើងត្រូវបានដើរទៅអនាគតឱ្យបានវែងឆ្ងាយ»។
យោងតាមទិន្នន័យសិក្សាស្រាវជ្រាវរបស់ក្រសួងកិច្ចការនារី និងអង្គការដៃគូរ និងត្រូវបានផ្សព្វផ្សាយក្នុងសិក្ខាសាលាមួយក្នុងខេត្តកំពង់ធំ កាលពីថ្ងៃទី១០ ខែកុម្ភៈ ឆ្នាំ២០២៥ រកឃើញថា ក្នុងឆ្នាំ២០២៤ អត្រានៃការរៀបអាពាហ៍ពិពាហ៍ របស់ក្មេងស្រីមុនអាយុ ១៨ឆ្នាំ មានប្រមាណ ១៤.៤៤% ក្នុងនោះមានការរៀបអាពាហ៍ពិពាហ៍ជាផ្លូវការ និងការផ្សំផ្គុំមិនជាផ្លូវការទៅតាមបែបតំបន់ ឬតាមប្រពៃណី៕
