រដ្ឋាភិបាលកម្ពុជា តាមរយៈក្រសួងការពារជាតិ បានប្រកាសច្រានចោលព័ត៌មានដែលថា ថៃនឹងលបវាយឆ្មក់មកលើកម្ពុជានៅវេលាយប់នេះ ដោយចាត់ទុកថា ការផ្សព្វផ្សាយនោះជាព័ត៌មានមិនពិត និងអំពាវនាវឱ្យពលរដ្ឋកម្ពុជារក្សាភាពស្ងៀមស្ងាត់ ទទួលយកតែប្រភពព័ត៌មានផ្លូវការរបស់រដ្ឋាភិបាល។
ក្រសួងការពារជាតិកម្ពុជា និយាយលើគេហទំព័ររបស់ខ្លួននៅថ្ងៃទី១៦ ខែមិថុនានេះថា ក្រសួងសូមបដិសេធព័ត៌មានដែលបានលើកឡើងថា ថៃត្រៀមឈ្លានពានកម្ពុជានៅថ្ងៃនេះជារឿងមិនពិត។
ក្រសួងការពារជាតិ បញ្ជាក់ក្នុងន័យដើមថា៖ «សូមបងប្អូនប្រជាពលរដ្ឋមេត្តារក្សាភាពស្ងៀមស្ងាត់ និងទទួលយកព័ត៌មានតែពីប្រភពផ្លូវការ»។
ការច្រានចោលរបស់ក្រសួងការពារជាតិនេះ ក្រោយគេហទំព័រហ្វេសប៊ុកមួយឈ្មោះ រមណីយដ្ឋានសង្គ្រាម The War Resort បានផ្សព្វផ្សាយថា៖ «បើយោងតាមចារកម្មខ្មែរនៅថៃ បានជូនដំណឹងថា ថៃត្រៀមឈ្លានពាននៅម៉ោង ២ថ្ងៃនេះ ឬលួចវាយឆ្មក់នៅយប់នេះ សូមប្រុងប្រយ័ត្ន!»។
ជម្លោះព្រំដែនកម្ពុជា ថៃ បានកក្រើកឡើងវិញជាថ្មីទៀត ចាប់ពីថ្ងៃទី២៨ ខែឧសភា ឆ្នាំ២០២៥ ខណៈដែលទាហានថៃ បានបើកការបាញ់ប្រហារទៅលើលេណដ្ឋានកងទ័ពកម្ពុជា នៅព្រំដែនជួរមុខ ក្នុងតំបន់មុំ៣ ស្រុកជំាក្សាន្ត ខេត្តព្រះវិហារ បណ្តាលឱ្យទាហានខ្មែរម្នាក់ស្លាប់ គឺព្រិន្ធបាលឯក សួន រ៉ោន។
បញ្ហានេះ កាលពីថ្ងៃទី១៥ ខែមិថុនានេះ កម្ពុជាប្តឹងថៃជាផ្លូវការទៅតុលាការយុត្តិធម៌អន្តរជាតិ(ICJ) ក្នុងសំណុំរឿងព្រំដែន លើទីតាំងចំនួន៤ចំនុច មានប្រាសាទតាមាន់តូច ប្រាសាទតាមាន់ធំ ប្រាសាទតាក្របី និងតំបន់មុំ៣ នៃព្រំប្រទល់ឡាវ ថៃ និងកម្ពុជា។
យ៉ាងណា ភាគីថៃវិញ បានប្រកាសដាច់ខាតមិនទទួលស្គាល់អំណាចយុត្តាធិការតុលាការយុត្តិធម៌អន្តរជាតិ(ICJ)មួយនេះទេ ដោយទាមទារឱ្យកម្ពុជាបន្តប្រើយន្តការទ្វេភាគី ដើម្បីដោះស្រាយបញ្ហានេះ៕
