ប្រធានព្រឹទ្ធសភា លោក ហ៊ុន សែន ប្រកាសទុករយៈពេល២៤ម៉ោង ឱ្យភាគីថៃដើម្បីធ្វើឱ្យស្ថានភាពតាមច្រកព្រំដែនវិលត្រឡប់ទៅស្ថានភាពដើមវិញ បើមិនដូច្នោះទេ កម្ពុជានឹងបិទការនាំចូលបន្លែ និងផ្លែឈើថៃនៅគ្រប់ច្រកព្រំដែនទាំងអស់។
នេះបើតាមការថ្លែងរបស់លោក ហ៊ុន សែន ក្នុងកិច្ចប្រជុំគណៈកម្មាធិការអចិន្ត្រៃយ៍ព្រឹទ្ធសភានៅព្រឹកថ្ងៃទី១៦ ខែមិថុនា ឆ្នាំ២០២៥នេះ។
ពាក់ព័ន្ធនឹងបញ្ហាបិទព្រំដែន ប្រធានព្រឹទ្ធសភា លោក ហ៊ុន សែន បានប្រាប់ទៅប្រជាពលរដ្ឋថៃថា កុំបន្ទោសរដ្ឋាភិបាលកម្ពុជា តែត្រូវតែទៅតវ៉ាជាមួយទាហានថៃខ្លួនឯង ព្រោះទាហានថៃជាអ្នកបិទព្រំដែនដោយឯកតោភាគី មិនមែនកម្ពុជាបិទមុននោះទេ ហើយថា នេះជាលទ្ធផលនៃការបំពានច្បាប់ដោយយោធាថៃ។
លើសពីនេះ លោកថា កុំតែមានការសន្ទនារវាងនាយករដ្ឋមន្រ្តីកម្ពុជា លោក ហ៊ុន ម៉ាណែត ជាមួយនាយករដ្ឋមន្ត្រីថៃ លោកស្រី ផែថនថាន ទេកុំអីថ្ងៃនេះកម្ពុជាបិទច្រកព្រំដែនទៅលើការនាំចូលបន្លែ និងផ្លែឈើចូលកម្ពុជារួចហើយ។
ក្នុងន័យនេះ លោកថា កម្ពុជាបានសម្រេចពន្យាពេល២៤ម៉ោង ហើយបើភាគីថៃមិនព្រមបើកច្រកព្រំដែនឱ្យដូចដើមវិញទេ កម្ពុជានឹងបិទការនាំចូលបន្លែ ផ្លែឈើពីថៃគ្រប់ច្រកព្រំដែន ចាប់ពីថ្ងៃទី១៧ ខែមិថុនាតទៅ។
វិវាទព្រំដែនកម្ពុជា-ថៃ បានចាប់ផ្ដើមកើនកម្ដៅ បន្ទាប់ពីទ័ពថៃឆ្មក់ចូលមកបាញ់សម្លាប់ទាហានខ្មែរម្នាក់ នៅតំបន់មុំបី ស្រុកជាំក្សាន្ត ខេត្តព្រះវិហារ នៅថ្ងៃទី២៨ ខែឧសភា។
បន្ទាប់មក បញ្ហានេះត្រូវបានអ្នកនយោបាយថៃ អូសរឿងប្រាសាទតាមាន់ធំ ប្រាសាទតាមាន់តូច និងប្រាសាទតាក្របីមកពាក់ព័ន្ធផងដែរ។
ជាការឆ្លើយតប កម្ពុជាបានប្តឹងថៃទៅតុលាការយុត្តិធម៌អន្តរជាតិ (ICJ) ក្នុងសំណុំរឿងព្រំដែនពាក់ព័ន្ធថៃរំលោភបំពានប្រាសាទទាំងបី នៅខេត្តឧត្តរមានជ័យ និងតំបន់មុំ៣ ស្រុកជាំក្សាន្ត ក្នុងខេត្តព្រះវិហារ។
ប៉ុន្តែភាគីថៃ ប្រកាសមិនទទួលស្គាល់អំណាចយុត្តាធិការរបស់តុលាការយុត្តិធម៌អន្តរជាតិ (ICJ) ហើយងាកមកដាក់សម្ពាធកម្ពុជាតាមគ្រប់មធ្យោបាយ មានទាំងការចល័តទ័ព រថក្រោះ សព្វាវុធទំនើបៗមកកាន់ព្រំដែន ព្រមានកាត់ផ្តាច់អគ្គីសនី សេវាអ៊ីនធើណែត និងបិទច្រកព្រំដែនដោយឯកតោភាគីជាដើម៕
