តុលាការកំពូល បានបង្គាប់ឱ្យសាលាឧទ្ធរណ៍ព្រះសីហនុ ធ្វើការជំនុំជម្រះឡើងវិញ ជុំវិញសំណុំរឿងប្រឆាំងនឹងសកម្មជនសិទ្ធិដីធ្លីចំនួន ២រូប នៅស្រុកស្រែអំបិល ខេត្តកោះកុង ដែលត្រូវបានចោទពីបទ បរិហាកេរ្តិ៍ និងញុះញង់។
កាលពីថ្ងៃទី២៨ ខែឧសភា ឆ្នាំ២០២៥នេះ តុលាការកំពូល បានបើកសវនការករណីសកម្មជនសិទ្ធិដីធ្លីនៅស្រុកស្រែអំបិល ខេត្តកោះកុង អ្នកស្រី ផាវ ញ៉ើង និងអ្នកស្រី សេង លីន ដែលត្រូវបានចោទប្រកាន់ពីបទ «បរិហារកេរ្តិ៍ជាសាធារណៈ និងញុះញង់ឱ្យប្រព្រឹត្ដអំពើបង្កឱ្យមានភាពវឹកវរធ្ងន់ធ្ងរដល់សន្ដិសុខសង្គម»។
អ្នកស្រី ផាវ ញ៉ើង សកម្មជនដីធ្លីនៅស្រុកស្រែអំបិល ខេត្តកោះកុង បានឱ្យដឹងថា នៅព្រឹកថ្ងៃទី១៧ ខែមិថុនានេះ ដែលជាថ្ងៃប្រកាសសាលដីកា តុលាការកំពូល បានសម្រេចបង្វិលសំណុំរឿងរបស់អ្នកស្រី និងអ្នកស្រី សេង លីន ត្រឡប់ទៅឱ្យសាលាឧទ្ធរណ៍ព្រះសីហនុ ធ្វើការជំនុំជម្រះឡើងវិញ។
អ្នកស្រីបន្តថា ការសម្រេចនេះ ប្រហែលជាតុលាការកំពូល រកឃើញនូវភាពមិនប្រក្រតីណាមួយរបស់សាលាឧទ្ធរណ៍ព្រះសីហនុហើយ បានជាបង្វិលឱ្យសាលាឧទ្ធរណ៍មួយនេះ ជំនុំជម្រះឡើងវិញ។
អ្នកស្រី ផាវ ញ៉ើង បាននិយាយថា៖ «ស្នើសុំឱ្យតុលាការសាលាឧទ្ធរណ៍ ធ្វើការពិចារណា និងវិនិច្ឆ័យកាត់ក្តីឱ្យពួកខ្ញុំ ទម្លាក់បទចោទឱ្យពួកនាងខ្ញុំទាំងអស់គ្នា ទាំងបង សេង លីន ទាំងខ្ញុំ ឱ្យបានរួចផុតទោស ពីព្រោះ ឆាយ វី [ដើមបណ្តឹង]គាត់ពិតជាបានលក់ដីរដ្ឋ ប្រជាពលរដ្ឋដឹងស្ទើរតែមួយស្រុកស្រែអំបិល ស្ទើរតែទាំងអស់គ្នាហ្នឹង ហេតុអីអាជ្ញាធរថាអត់ដឹង នេះបាន គឺជាការសមគំនិតមួយ ដែលខ្ញុំយល់ឃើញថា មានភាពមិនប្រក្រតីក្នុងការកាត់សេចក្តីឱ្យអ្នកណាឈ្នះអ្នកណាចាញ់។ អ្នកបានលុយនៅតែបន្តការសមគំនិតគប់គិតគ្នានិងអ្នកមានអំណាច លក់ដីរដ្ឋបានតាមអំពើចិត្ត ចំពោះអ្នកការពារដីរដ្ឋ បែរទៅជាមានទោសទៅវិញ»។
វីអូឌី មិនអាចសុំការអត្ថាធិប្បាយជុំវិញករណីនេះ ពីអ្នកនាំពាក្យតុលាការកំពូល លោកស្រី ម៉ៅ ធីតា បានទេ នៅរសៀលថ្ងៃអង្គារនេះ។
បើតាមក្រុមអង្គការសិទ្ធិមនុស្ស សាលាដំបូងខេត្តកោះកុង បានផ្តន្ទាទោសស្រ្តីទាំងពីររូបនេះ ពីបទញុះញង់ និងបទបរិហារកេរ្តិ៍ កាលពីខែសីហា ឆ្នាំ២០២៣ ដោយដាក់ឱ្យស្ថិតក្រោមការត្រួតពិនិត្យតាមផ្លូវតុលាការ។ ក្រោយមក នៅក្នុងខែធ្នូ ឆ្នាំ២០២៣ សាលាឧទ្ធរណ៍ព្រះសីហនុ បានសម្រេចឱ្យរួចផុតពីបទចោទ ញុះញង់ ប៉ុន្តែសាលាឧទ្ធរណ៍ នៅតែសម្រេចតម្កល់ផ្តន្ទាទោសពីបទចោទ បរិហារកេរ្ត៍ និងបានកាត់បន្ថយសំណងជំងឺចិត្ត។
សកម្មជនទាំងពីររូបនេះ ត្រូវបានសាលាឧទ្ធរណ៍ព្រះសីហនុ សម្រេចពិន័យជាប្រាក់ក្នុងម្នាក់ ៤ លានរៀល (ប្រហែល ១.០០០ ដុល្លារ) និងបង្គាប់ឱ្យសងជំងឺចិត្តអ្នកស្រី ឆាយ វី ដែលជាដើមបណ្តឹង ចំនួន ១០ លានរៀល (ប្រហែល ២.៥០០ ដុល្លារ) ។
ការចោទប្រកាន់នេះ ត្រូវបានធ្វើឡើងក្រោយពីអ្នកទាំងពីរ បានចូលរួមការប្រមូលផ្ដុំ និងផ្ដល់បទសម្ភាសន៍ជាមួយអ្នកសារព័ត៌មាន នៅមុខក្រសួងរៀបចំដែនដី នគរូបនីយកម្ម និងសំណង់ កាលពីខែវិច្ឆិកា ឆ្នាំ២០១៩ ក្នុងគោលបំណងស្វែងរកដំណោះស្រាយសមស្របមួយ ជុំវិញរឿងជម្លោះដីធ្លីដ៏រ៉ាំរ៉ៃរបស់ពួកគេ។
មន្ត្រីជាន់ខ្ពស់ផ្នែកឃ្លាមើលសិទ្ធិមនុស្សនៃសមាគមអាដហុក លោក យី សុខសាន្ត ដែលតាមដានសវនាការលើសំណុំរឿងនេះ មានប្រសាសន៍ថា ក្នុងសវនាការ សកម្មជនដីធ្លីទាំងពីររូបនេះ បានអះអាងពីករណីអតីតតំណាងសហគមន៍ និងអាជ្ញាធរមូលដ្ឋាន បានគប់គិតគ្នាយកដីរដ្ឋដែលសល់ពីការចែកឱ្យពលរដ្ឋដែលរងគ្រោះក្នុងជម្លោះដីធ្លីនោះ ទៅចែកគ្នា។
លោកយល់ថា នៅពេលដែលអ្នកទាំងពីរនិយាយពីភាពមិនប្រក្រតីនៃការបែងចែកដីរដ្ឋនេះ ក្រសួងនិងស្ថាប័នពាក់ព័ន្ធ គួរចុះទៅពិនិត្យ និងស្រាវជ្រាវរកការពិត ជាជាងប្តឹងពួកគាត់ទៅតុលាការ។
លោកថ្លែងថា៖ «បើសិនជា ការប្តឹងផ្តល់ថាជារឿងបរិហារកេរ្តិ៍ ឬមួយជាការញុះញង់ អាជ្ញាធរគួរតែទៅសិក្សាទៅស្រាវជ្រាវមើលថាតើវាមានរឿងចឹងមែនអត់ ហើយអ្វីដែលពួកគាត់និយាយហ្នឹង មិនមែនជាប្រយោជន៍សម្រាប់ពួកគាត់ទេ វាជាដីសាធារណៈរបស់រដ្ឋ ដែលត្រូវតែរក្សាទុកជូនប្រជាពលរដ្ឋ ឬមួយក៏រក្សាទុកជាដីរបស់រដ្ឋ វាល្អជាជាងដែលប្តឹងពួកគាត់។ ហើយការកត់សម្គាល់មួយទៀត ការដែលបង្វិលសំណុំរឿងទៅសាលាឧទ្ធរណ៍ ឱ្យកាត់ក្តីឡើងវិញនេះ វាជាការល្អដែរ វាគួរតែទម្លាក់ចោលការចោទប្រកាន់ វាល្អជាងការបង្វិលឱ្យកាត់ក្តីឡើងវិញ»៕
