Political Issues, នយោបាយ, ព័ត៌មានជាតិ

លោក ហ៊ុន សែន បដិសេធជួយសង្គ្រោះអំណាចនាយករដ្ឋមន្ត្រីថៃគ្រួសារថាក់ស៊ីន

លោក ប៉ុល សម្បត្តិ
| ១៨ មិថុនា ២០២៥
ម៉ោង ២០:០៣

អតីតនាយករដ្ឋមន្រ្តីកម្ពុជា លោក ហ៊ុន សែន បានបដិសេធជួយសង្គ្រោះអំណាចគ្រួសារថាក់ស៊ីន ក្នុងតំណែងនាយករដ្ឋមន្ត្រីថៃ ដែលកំពុងរងការគំរាមពីផ្ទៃក្នុង ជុំវិញកម្តៅព្រំដែន ដែលបានផ្តើមចេញពីភាគីយោធាថៃក្នុងចំណុចមុំ៣ ស្រុកជាំក្សាន្ត ខេត្តព្រះវិហារ។

នេះបើតាមសារសំឡេងសន្ទនារយៈពេលជាង១៧នាទី រវាងអតីតនាយករដ្ឋមន្ត្រីកម្ពុជា លោក ហ៊ុន សែន និងនាយករដ្ឋមន្ត្រីថៃ អ្នកស្រី ផែថងថាន ឈិនណាវ៉ាត្រ។

បើតាមសារសំឡេងនោះ អ្នកស្រី ផែថងថាន បានទទូចឱ្យ លោក ហ៊ុន សែន ជាឪពុកធម៌ ឱ្យជួយការពារអំណាចខ្លួន ដើម្បីប្រឆាំងនឹងពួកយោធាថៃ ដែលថា មានចេតនាញុះញង់រឿងជម្លោះព្រំដែន។

អ្នកស្រី ផែថងថាន និយាយថា មេទ័ពភូមិភាគទី២ ជាក្រុមប្រឆាំងនឹងរដ្ឋាភិបាលអ្នកស្រី ហើយថា មានចេតនាញុះញង់បង្កឱ្យមានជម្លោះព្រំដែនជាមួយកម្ពុជា ដើម្បីចង់បង្ហាញឥទ្ធិពលថា ពួកយោធាស្រឡាញ់ទឹកដី។

អ្នកស្រីបន្តថា ករណីនេះ សូមឱ្យពុកធម៌ ហ៊ុន សែន ជួយក្មួយស្រីផង ពួកយោធាថៃនិងគណបក្សប្រឆាំងថៃមួយចំនួន កំពុងរកវិធីសាស្រ្តបណ្តេញក្មួយចេញពីប្រទេស ហើយចោទក្មួយថាជានាយករដ្ឋមន្រ្តីខ្មែរ។

អ្នកស្រីថា៖ «សូមឱ្យសម្តេច ហ៊ុន សែន យល់ដល់ចិត្តក្មួយស្រីផង ឥឡូវនេះប្រជាជនពលរដ្ឋថៃ គេមិនពេញចិត្ត ចង់បណ្តេញក្មួយចេញពីប្រទេស ដោយពួកគេថាជានាយករដ្ឋមន្រ្តីខ្មែរ ជួយក្មួយផង បើសម្តេចចង់អ្វីអាចប្រាប់ក្មួយបាន ក្មួយនឹងជួយ»។

យ៉ាងណាក្តី លោក ហ៊ុន សែន បានបដិសេធការទទូចរកការជួយសង្គ្រោះអំណាចនេះ ដោយអះអាងថា កម្ពុជា នឹងមិនបោះដៃទៅចរចាជាមួយក្រុមយោធាថៃ ឬសម្របសម្រួលអ្វីទេ ដោយសំអាងថាបញ្ហាព្រំដែនបានកើតឡើង ភាគីថៃជាអ្នកបង្កហេតុមុន ដូច្នេះភាគីថៃគួរដោះស្រាយគ្នាឯង កម្ពុជានឹងមិនពាក់ព័ន្ធទេ។

លោកថា៖ «អត់ទេ ខាងនេះអត់ចរចាទេ ដោយខាងនោះអ្នកផ្ដើម គឺអ្នកបង្កើតបញ្ហា ហើយមកចង់លើកមុខមាត់ខ្លួនឯង ហើយដើម្បីធ្លាក់មកខាងនេះ អត់បានទេ អត់ចរចាទេរឿងហ្នឹង គឺខាងនោះត្រូវធ្វើមុនតែម្តង គឺខាងនេះអត់ចរចាទេ ប៉ុន្តែខាងនេះសន្យាថា បើខាងនោះអនុវត្តដកបទបញ្ជាឱ្យបើកច្រក ខាងនេះក៏បើកដែរ»។

ក្រោយបែកធ្លាយកិច្ចសន្ទនាតាមទូរសព្ទនេះ លោក ហ៊ុន សែន បានបង្ហោះសារលើហ្វេសប៊ុករបស់លោក នៅថ្ងៃទី១៨ ខែមិថុនានេះ ដោយទទួលស្គាល់ថា កាលពីល្ងាចថ្ងៃទី១៥ ខែមិថុនា ឆ្នាំ២០២៥ លោកពិតជាបានសន្ទនាតាមទូរស័ព្ទជាមួយនាយករដ្ឋមន្រ្តីថៃ រយៈពេល១៧៖០៦នាទី ដោយមានលោក ឃ្លាំង ហួត ជាអ្នកបកប្រែ។

លោកបញ្ជាក់ថា ជាទម្លាប់ ដើម្បីកិច្ចការទាំងឡាយមិនបានគេបំភាន់ ឬបន្លំ ចាំបាច់ត្រូវការថតសំឡេង និងដើម្បីតម្លាភាពជាមួយផ្ទៃក្នុងរបស់កម្ពុជាផងដែរ។

ប្រភពអះអាងថា៖ «សំឡេងសន្ទនារវាងខ្ញុំ និងនាយករដ្ឋមន្រ្តីថៃ ខ្ញុំបានផ្ញើទៅគណៈអចិន្រ្តៃយ៍គណបក្ស ក្រុមការងារព្រឹទ្ធសភា ក្រុមការងារសភា ជាដើម គឺប្រហាក់ប្រហែលសរុប៨០នាក់ប៉ុណ្ណោះ»។

សម្រាប់លោក ហ៊ុន សែន យល់ថា សារបែកធ្លាយនេះ ប្រហែលអាចមាននរណាម្នាក់ មិនពេញចិត្តនឹងនាយករដ្ឋមន្រ្តីថៃ ព្រោះក្រោយនិយាយគ្នាជាមួយលោកបានប៉ុន្មានម៉ោង បែរជាមេដឹកនាំថៃចេញមក ចោទមេដឹកនាំកម្ពុជាថា ធ្វើនយោបាយអត់វិជ្ជាជីវៈ ធ្វើនយោបាយតាម Facebook ដែលនេះបង្ហាញពីទង្វើ និយាយផ្សេង ធ្វើផ្សឹង។

ជុំវិញបញ្ហានេះ តំណាងរាស្រ្តបក្សសង្គ្រោះជាតិ លោក អ៊ុំ សំអាន ប្រាប់VODនៅថ្ងៃទី១៨ ខែមិថុនានេះថា លោកគាំទ្រចំពោះជំហរលោក ហ៊ុន សែន ដែលគិតគូរពីបញ្ហាសង្គមជាតិ ជាពិសេសបញ្ហាព្រំដែននេះ។

លើសពីនេះ លោកថា កម្ពុជាត្រូវរក្សាជំហររឹងម៉ាំក្នុងការការពារបូរណភាពទឹកដី ទាំងជាមួយថៃ និងជាមួយវៀតណាម កុំឱ្យសត្រូវបន្តគឃ្លើនរំលោភឈ្លានពានទឹកដីខ្មែរ។

លោកសង្កត់ធ្ងន់ថា រឿងបញ្ហាផ្ទៃក្នុងរបស់ថៃ ព្រោះអាចជាយុទ្ធសាស្រ្តរបស់ថៃ ធ្វើឈ្លោះគ្នាដើម្បីឈ្លានពានទឹកដីកម្ពុជា។

លោកថា៖ «វៀតណាមក៏ឈ្លានពានទឹកដីខ្មែរយើងច្រើនជាងថៃដែរ ដូច្នេះបើហ៊ានការពារទឹកដីជាមួយថៃអ៊ីចឹងមានគំនិតជាតិនិយមការពារទឹកដីជាមួយថៃ ក៏គួរតែក្លាហានជាមួយវៀតណាមការពារទឹកដីជាមួយវៀតណាមដែរ អាហ្នឹងកុំឲ្យទឹកដីយើងការពារតែម្ខាង ម្ខាងទៀតអត់ការពារវាធ្វើឲ្យបាត់បង់ទៅ ខាងវៀតណាមកាន់តែច្រើន ព្រោះវៀតណាមឈ្លានពានទឹកដីយើងច្រើន»។

ចំណែក ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត យល់ថា សារលួងលោមរបស់អ្នកស្រី ផែថងថាន ទៅលោក ហ៊ុន សែន ជាអាចល្បិចចង់បានទឹកដីកម្ពុជា និងចង់រក្សាអំណាចរបស់ខ្លួនប៉ុណ្ណោះ។

លោកបន្តថា រឿងផ្ទៃក្នុងថៃ រវាងពួកយោធានិងនាយករដ្ឋមន្រ្តី អ្នកស្រី ផែថងថាន កម្ពុជាមិនគួរលូកដៃនោះទេ គឺកម្ពុជាប្រកាន់ជំហរតែមួយគត់ គឺការពារទឹកដី និងប្តឹងថៃទៅអន្តរជាតិ ជុំវិញជម្លោះព្រំដែននេះ។

លោកថា៖ «រឿងបញ្ហាជម្លោះផ្ទៃក្នុងថៃ កម្ពុជាកុំលូកលាន់ឱ្យសោះ កាលណាកម្ពុជាលូកលាន់ឲ្យពួករដ្ឋាភិបាលផ្ទៃក្នុងគេត្រូវរ៉ូវគ្នា គេប្រើពេលវេលាហ្នឹង មកឈ្លានពានទឹកដីយើងបានសម្រេច អ៊ីចឹងយើងអត់ចង់ឲ្យកម្ពុជាទៅលូកលាន់កិច្ចការផ្ទៃក្នុងរបស់រដ្ឋាភិបាលថៃទេ ជជែកនិយាយគេ គេសុំអីក៏សុំទៅគេ គេចង់បានអីបានទៅ យើងគ្រាន់តែសុំឱ្យ លោក ហ៊ុន សែន ឬរដ្ឋាភិបាលកម្ពុជាត្រូវរក្សាជំហរហ្នឹងន៎ ក្នុងក្របខ័ណ្ឌរដ្ឋធម្មនុញ្ញនៃព្រះរាជាណាចក្រកម្ពុជា ហើយនិងស្មារតីប្រជាពលរដ្ឋខ្មែរ ក្នុងការការពារបូរណភាពទឹកដីជាតិ»។

កម្តៅព្រំដែនកម្ពុជា-ថៃ បានកក្រើកឡើងវិញ ចាប់ពីថ្ងៃទី២៨ ខែឧសភា ឆ្នាំ២០២៥ ខណៈទាហានខ្មែរម្នាក់ ដែលឈរជើងនៅព្រំដែនជួរមុខ ក្នុងតំបន់មុំ៣ ស្រុកជាំក្សាន្ត ខេត្តព្រះវិហារ លោកព្រិន្ធបាលឯក សួន រ៉ោន បានស្លាប់ ដោយសារទាហានភូមិភាគ២ថៃ បើកការបាញ់ប្រហារទៅលើលេណដ្ឋានឈរជើងរបស់កម្ពុជា។

បញ្ហានេះ ជំរុញឱ្យកម្ពុជាសម្រេចប្តឹងថៃទៅតុលាការអន្តរជាតិ(ICJ)ក្នុងសំណុំរឿងព្រំដែន ពាក់ព័ន្ធទៅនឹងប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំ៣។

មកដល់ពេលនេះ ភាគីកម្ពុជា និងថៃមិនទាន់ស្រុះស្រួលគ្នាពីការធ្វើឱ្យការដឹកទំនិញឆ្លងកាត់ព្រំដែន មានភាពប្រក្រតីឡើងវិញនៅឡើយទេ ចំណែកភាគីកម្ពុជាបានសម្រេចចាត់វិធានបិទការនាំចូលបន្លែ និងផ្លែឈើពីថៃ។

រីឯកម្លាំងប្រដាប់អាវុធទាំងពីរភាគី កំពុងប្រឈមមុខដាក់គ្នានៅព្រំដែនជួរមុខ រួមទាំងចល័តទ័ព និងរថក្រោះជាតិជាដើម ដែលការណ៍ជាក្តីបារម្ភពីការផ្ទុះអាវុធដាក់គ្នា ធ្វើឱ្យមេដឹកនាំធ្វើយុទ្ធការជាតិនិយម ដើម្បីលើកទឹកចិត្តដល់កងទ័ពដែលនៅខ្សែត្រៀមជួរមុខ។

លើសពីនេះ លោក ហ៊ុន សែន ធ្លាប់គូសបញ្ជាក់ថា ការដោះស្រាយតាមផ្លូវតុលាការមិនមែនជាការបង្កហេតុបង្កសង្រ្គាមនោះឡើយ តែជាការដោះស្រាយដោយសន្តិវិធីតាមផ្លូវច្បាប់ បញ្ជៀសការបង្ហូរឈាមនាពេលអនាគត ហើយថា ការគេចវេសណាមួយមិនហ៊ានចូលតាមផ្លូវតុលាការ វាមានន័យស្មើជាមួយការប្រព្រឹត្តបទល្មើស និងការមិនគោរពច្បាប់ ក្នុងសណ្តាប់ធ្នាប់ពិភពលោកមួយដែលគោរពច្បាប់ ខណៈថៃប្រកាសមិនទទួលស្គាល់អំណាចយុត្តាធិការតុលាការអន្តរជាតិ(ICJ)៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។