ការចាប់ខ្លួន លោក អ៊ុក ម៉ៅ ដែលជាអ្នកកាសែតរាយការណ៍ដ៏សកម្មពីបរិស្ថាន និងជាអ្នកនយោបាយកូតាមកពីគណបក្សក្រៅរដ្ឋាភិបាលផងនោះ មន្រ្តីកងរាជអាវុធហត្ថខេត្តស្ទឹងត្រែង បានក្លាយជាគោលដៅមួយបន្ថែមទៀតដែលគេសង្ស័យថា បានរួមចំណែកក្នុងការកាប់បំផ្លាញព្រៃឈើ ដែលធ្វើឱ្យធនធានធម្មជាតិ នៅតំបន់ភូមិភាគឦសាននេះ ត្រូវហិនហោច និងស្ទើរក្លាយទៅជាតំបន់វាលរហោស្ថាន។
អង្គការ-សមាគមជាង១០ស្ថានប័ន កាលពីថ្ងៃទី២២ ខែឧសភា រួមទាំងអង្គការអ្នកសារព័ត៌មានគ្មានព្រំដែន ក៏បានចេញសេចក្តីថ្លែងការណ៍ ដោយចាត់ទុកការចាប់ខ្លួន លោក អ៊ុក ម៉ៅ ថាជាការព្យាយាមបំបិទសំឡេងជំទាស់ ទាក់ទងការរាយការណ៍រឿងបរិស្ថាន។ មិនតែប៉ុណ្ណោះ អង្គភាពទាំងនោះ ហៅការចាប់ខ្លួននេះថា គឺជារូបភាពនៃការគំរាមកំហែងពីក្រុមឈ្មួញ និងមន្រ្តីខិលខូចដែលទទួលបានលាភសក្ការៈ ពីបទល្មើសព្រៃឈើនេះ។
ថ្លែងប្រាប់សំឡេងប្រជាធិបតេយ្យ វីអូឌី នៅថ្ងៃនេះ លោក អ៊ុក ម៉ៅ និយាយថា រូបលោកបានដាក់បណ្តឹងប្រឆាំងការចាប់ខ្លួននេះរួចហើយ ទៅរដ្ឋបាលខេត្តស្ទឹងត្រែង។ លោកបន្តថា ការប្រើប្រាស់ផ្លូវច្បាប់ ក្រោយពីលោកត្រូវឃុំខ្លួននៅក្នុងពន្ធនាគារខេត្តបណ្តោះអាសន្នកន្លងទៅនេះ គឺដើម្បីស្វែងរកយុត្តិធម៌ និងភាពស្អាតស្អំសម្រាប់ខ្លួនឯងឡើងវិញ។
លោកថា៖ «ខ្ញុំចង់បានភាពយុត្តិធម៌ដែលអ្នកទាំង៣នាក់ មកចាប់ខ្ញុំទាំងគ្មានដីកាចាប់ខ្លួន ខ្ញុំចង់បានយុត្តិធម៌»។
បើតាមលោក អ៊ុក ម៉ៅ អ្នកដែលចុះចាប់ខ្លួនលោក កាលពីថ្ងៃទី១៦ ខែឧសភា ឆ្នាំ២០២៥ គឺជាមន្រ្តីកងរាជអាវុធហត្ថខេត្តស្ទឹងត្រែង ក្នុងនោះមានឈ្មោះ ពយ និងឈ្មោះ ភា។ ចំណែកម្នាក់ទៀត ក្នុងចំណោមពួកគេ គឺលោកមិនស្គាល់អត្តសញ្ញាណទេ។
បន្ថែមពីលើនេះ តាមរយៈបណ្តឹងដែលលោក អ៊ុក ម៉ៅ ដាក់ទៅរដ្ឋបាលខេត្តស្ទឹងត្រែង កាលពីថ្ងៃទី១៣ ខែមិថុនា ហើយសំឡេងប្រជាធិបតេយ្យ វីអូឌី ទើបទទួលបាននៅថ្ងៃនេះ បង្ហាញថា មូលហេតុដែលបង្ខំឱ្យលោកប្តឹងបកឡើងវិញនេះ ព្រោះតែការចាប់ខ្លួនលោកធ្វើឡើងក្រោមរូបភាពបង្ខិតបង្ខំ គំរាមកំហែង បំភិតបំភ័យ និងមិនអនុវត្តក្រមនីតិវិធីព្រហ្មទណ្ឌជាដើម។
ជុំវិញរឿងនេះ វីអូឌី មិនទាន់អាចស្វែងរកការបំភ្លឺបាននៅឡើយទេ ពីលោក ម៉ែន គុង អ្នកនាំពាក្យរដ្ឋបាលខេត្តស្ទឹងត្រែង នៅថ្ងៃទី១៨ ខែមិថុនានេះ ដោយទូរស័ព្ទចូលជាច្រើនដង តែគ្មានអ្នកទទួល។
បើទោះជាបែបណា ក្រោយមានប្រតិកម្មជាបន្តបន្ទាប់ ប្រឆាំងការចាប់ខ្លួន លោក អ៊ុក ម៉ៅ ដែលធ្វើឡើងទាំងកណ្តាលថ្ងៃត្រង់ ស្ថិតក្នុងភូមិសាស្រ្ត ភូមិអន្លង់ភេ ស្រុកថាឡាបរិវ៉ាត់ ក្រសួងព័ត៌មាន បានចេញសេចក្តីប្រកាសព័ត៌មាន ដោយច្រានចោល និងចាត់ទុកថា តាមពិតលោក អ៊ុក ម៉ៅ មិនមែនជាអ្នកកាសែតទេ។
ក្នុងពេលជាមួយគ្នា ក្រសួងព័ត៌មាន បានអំពាវនាវកុំឱ្យប្រើប្រាស់រូបភាព លោក អ៊ុក ម៉ៅ ក្នុងហេតុផលនយោបាយ ឬកេងចំណេញក្នុងរូបភាពណាមួយ។
លោក អ៊ុក ម៉ៅ ដែលធ្លាប់រងបណ្តឹងតាមផ្លូវតុលាការ មិនតិចជាង១០បណ្តឹងក្នុងពេលកន្លងទៅ បានរួមចំណែកក្នុងការរាយការណ៍អំពីការកាប់ឈើ ដែលលោកចោទប្រកាន់ថា អ្នកដែលមានភាពសកម្មក្នុងបទល្មើសព្រៃឈើនេះ គឺក្រុមមន្រ្តីការពារបរិស្ថាន និងភាគីពាក់ព័ន្ធផ្សេងទៀត ដែលទទួលបានផលប្រយោជន៍ពីការកាប់បំផ្លាញព្រៃឈើនេះ។
លោក អ៊ុក ម៉ៅ ក្រៅពីដើរតួនាទីជួយការពារបរិស្ថានហើយ លោកក៏ជាអ្នកនយោបាយដ៏លេចធ្លោម្នាក់ដែរ កូតាមកពីគណបក្សដើម្បីកម្ពុជាដែរ។
ជុំវិញរឿងនេះ លោក ឯម សុខសុវណ្ណ ដែលជាប្រធានគណបក្សដើម្បីកម្ពុជា ថ្លែងនៅថ្ងៃនេះថា ការដែលគណបក្សជួយជ្រោមជ្រែងផ្លូវច្បាប់ និងឈានដល់ការដាក់បណ្តឹងឡើងនេះ គឺក្នុងទិសដៅមិនចង់ឱ្យមានការរំលោភអំណាចធ្ងន់ធ្ងរបែបនេះ នៅថ្នាក់មូលដ្ឋានពីមន្រ្តីខិលខូច។
ជាងនេះទៀត យន្តការនេះក៏ជាការព្រមានដែរ ទៅដល់មន្រ្តីមិនស្អាតស្អំទាំងនោះ ដើម្បីឱ្យពួកគេដឹងថាយុត្តិធម៌មិនមែនមានតែសម្រាប់ពួកមន្រ្តីខិលខូចទាំងនោះទេ ហើយគណបក្សដើម្បីកម្ពុជា ក៏មិនសម្ងំពួនដើម្បីយកសុខនោះដែរ។
លោកថា៖ «ក្នុងនាមជាប្រធានគណបក្ស ខ្ញុំមិនអាចឈរមើលគេរំលោភបំពានកូនចៅបានទេ។ យើងប្រើឱ្យយុទ្ធវិធី យុទ្ធសាស្ត្រអីក៏ដោយ ដើម្បីស្វែងរកយុត្តិធម៌ ពីព្រោះគណបក្សនយោបាយនៅក្រោមច្បាប់ស្តីពីគណបក្សនយោបាយ ស្ថិតនៅក្រោមរដ្ឋធម្មនុញ្ញ ដូច្នេះអ្នកណាក៏ដោយឱ្យក្បត់ច្បាប់ ក្បត់រដ្ឋធម្មនុញ្ញ គឺជាសត្រូវរបស់គណបក្សដើម្បីកម្ពុជា»។
លោក ម៉េង ហ៊ត់ ចៅក្រមស៊ើបសួរនៃតុលាការខេត្តស្ទឹងត្រែង បានចេញដីកាបង្គាប់ឱ្យដោះលែង លោក អ៊ុក ម៉ៅ នៅក្រៅឃុំបណ្តោះអាសន្ន កាលពីថ្ងៃទី២៥ ខែឧសភា។ ការផ្តល់សេរីភាព ស្ថិតក្រោមការរិះគន់ដ៏ចម្រូងចម្រាស់នេះ គឺធ្វើឡើងបន្ទាប់ពីតុលាការចេញដីកាឱ្យឃុំខ្លួនក្នុងពន្ធនាគារខេត្តបានជិត ១០ថ្ងៃ។
ក្រោយការចាប់ខ្លួន នៅក្នុងលំនៅឋានដែលធ្វើឡើងយ៉ាងតក់ក្រហល់ ដោយមនុស្ស៣នាក់ ស្លៀកពាក់ឯកសណ្ឋានជាជនស៊ីវិល ហើយក្រោយមកទើបគេដឹងថាគឺជាមន្រ្តីកងរាជអាវុធហត្ថខេត្តស្ទឹងត្រែងនេះ បណ្តឹងច្រើនលើសលប់ពីមន្រ្តីការពារបរិស្ថាន និងមន្រ្តីក្នុងខេត្តនេះតែម្តង។ លោក អ៊ុក ម៉ៅ រងការចោទប្រកាន់ពីបទ «ញុះញង់ និងបទបរិហារកេរ្តិ៍ » ចន្លោះពីឆ្នាំ២០២៤ និងឆ្នាំ២០២៥។
ជុំវិញរឿងនេះ លោក ស៊ុន ឡង់ឌី អ្នកសម្របសម្រួលសមាគមការពារសិទ្ធិមនុស្សអាដហុក(Adhoc) ប្រចាំខេត្តស្ទឹងត្រែង និយាយថា ដើម្បីផ្តល់នូវយុត្តិធម៌ និងចៀសវាងការរិះគន់ តុលាការគួរបើកការស៊ើបអង្កេតស្វែងរកការពិត។ មួយវិញទៀត លោកថា ការប្រើប្រាស់តួនាទីដែលមាននៅក្នុងច្បាប់ ក៏បង្ហាញឱ្យឃើញថា តុលាការជាស្ថាប័នដែលផ្តល់នូវយុត្តិធម៌សម្រាប់គ្រប់គ្នា មិនមែនបម្រើឱ្យក្រុមណាមួយ។
លោកថា៖ «តុលាការខេត្តស្ទឹងត្រែង គួរតែបើកការស៊ើបអង្កេតឱ្យបានច្បាស់លាស់ ប្រកបទៅដោយតម្លាភាព ដើម្បីស្វែងរកថាតើពាក្យបណ្តឹងរបស់លោក អ៊ុក ម៉ៅ ដែលប្តឹងទៅលើបុគ្គល៣នាក់ទៀតហ្នឹង បុគ្គល៣នាក់ហ្នឹង បានប្រព្រឹត្តបទល្មើសដែលមានចែងក្នុងក្រមព្រហ្មទណ្ឌទេ»។
បើតាមលោក ស៊ុន ឡង់ឌី ការផ្អឹបសំណុំរឿងនេះទុក ដោយឥតចាត់ការជាការបង្ហាញឱ្យឃើញពីការអនុវត្តនីតិវិធីមានស្តង់ដារពីរ ហើយក៏ជាការឆ្លុះបញ្ចាំងពីគម្លាតនៃប្រព័ន្ធយុត្តិធម៌សង្គមដែរ៕
