Social Issues, ព័ត៌មានជាតិ, សង្គម

វិបត្តិបំណុលពលករខ្មែរ និងទាហានជួរមុខជាក្តីបារម្ភពីចលាចលសង្គម

លោក សែន សច្ចៈ
| ១៨ មិថុនា ២០២៥
ម៉ោង ២១:៣៤

បក្សប្រឆាំងជំរុញឱ្យរដ្ឋាភិបាលដោះស្រាយវិបត្តិបំណុលពលករខ្មែរ ដែលត្រលប់ពីប្រទេសថៃ រួមទាំងក្រុមទាហានជួរមុខ តាមរយៈការផ្អាកសងត្រលប់ទៅធនាគារ និងបន្ថយការប្រាក់ ដើម្បីដោះស្រាយជីវភាពពួកគេ ទប់ស្កាត់ចលាចលសង្គម ក្នុងស្ថានភាពដែលកម្ពុជាកំពុងមានជម្លោះព្រំដែនជាមួយថៃ។

ការជំរុញនេះ ចំពេលកម្តៅព្រំដែនកម្ពុជា-ថៃ នៅតំបន់មុំ៣ និងប្រាសាទបុរាណខ្មែរ បានរាលដាលដល់ការបិទព្រំដែនជាឯកតោភាគីពីប្រទេសថៃ ជំរុញឱ្យមេដឹកនាំកម្ពុជាអំពាវនាវឱ្យពលករខ្មែរធ្វើការនៅប្រទេសថៃវិលត្រលប់មកកម្ពុជាវិញបន្ទាន់។

ជុំវិញរឿងនេះ តំណាងរាស្រ្តគណបក្សសង្រ្គោះជាតិ លោក ម៉ែន សុថាវរិន្រ្ទ ជំរុញឱ្យរដ្ឋាភិបាល ទម្លាក់ថវិកាជាតិជួយដោះស្រាយវិបត្តិបំណុលពលករ ដែលពួកគេកំពុងប្រឈមគ្មានការងារធ្វើ និងជួបវិបត្តិបំណុលធ្ងន់ធ្ងរក្រោយត្រលប់ចូលស្រុកវិញ។

បន្ថែមលើនេះ លោក សុថាវរិន្រ្ទ សង្កត់ធ្ងន់ថា ក្រុមយោធាជួរមុខដែលលះបង់ការពារទឹកដី ទប់ស្កាត់ការឈ្លានពានពីប្រទេសថៃ ក៏រដ្ឋត្រូវជួយដោះស្រាយបំណុលពួកគេដែរ។

លោកថា៖ «បើសិនជាប្រជាពលរដ្ឋគាត់មិនអាចទ្រាំទ្របាន វានឹងមានចលាចល ហើយអាហ្នឹងនឹងមានបញ្ហា បញ្ហា មនុស្សម្នាក់ៗ ត្រូវការបរិភោគម្ហូបមួយថ្ងៃបីពេល។ អ៊ីចឹងទៅជួយដោះស្រាយរដ្ឋាភិបាល។ ខ្ញុំសូមអំពាវនាវឲ្យរដ្ឋាភិបាលជួយប្រជាពលរដ្ឋខ្មែរ ដែលគ្នាត្រឡប់មកស្រុកទេសវិញ ហើយនិងប្រជាពលរដ្ឋ ក្នុងប្រទេសដែលខ្វះខាត។ ពលរដ្ឋក្នុងស្រុកស្រាប់ កំពុងមានបញ្ហា អ៊ីចឹងត្រូវជួយដោះស្រាយរឿងហ្នឹងទាំងអស់គ្នា»។

ជុំវិញជម្លោះព្រំដែននៅពេលនេះ ប្រធានព្រឹទ្ធសភា លោក ហ៊ុន សែន បានប្រកាសឱ្យប្រជាពលរដ្ឋខ្មែរដែលកំពុងរស់នៅ ឬធ្វើការនៅក្នុងប្រទេសថៃ ត្រឡប់មកប្រទេសកម្ពុជាវិញ ដោយមិនអាចនៅឲ្យក្រុមជ្រុលនិយមថៃប្រមាថមើលងាយបានឡើយ។

ដោយឡែក នាយករដ្ឋមន្រ្តីកម្ពុជា លោក ហ៊ុន ម៉ាណែត បានអំពាវនាវឲ្យសមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា ពិនិត្យលទ្ធភាពជួយសម្រាលបន្ទុកហិរញ្ញវត្ថុ សម្រាប់ពលករដែលត្រលប់មកពីថៃវិញ ចំពោះអ្នកដែលមានជាប់ជំពាក់បំណុលជាមួយធនាគារ ឬគ្រឹះស្ថានមីក្រូហិរញ្ញវត្ថុ ទៅតាមលទ្ធភាព ឬក្នុងមួយរយៈពេលកំណត់ណាមួយដែលអាចធ្វើទៅបាន។

ឆ្លើយតបការអំពាវនាវនេះ នៅពីថ្ងៃទី១៤ ខែមិថុនា ឆ្នាំ២០២៥ សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា ប្រកាសថា គ្រឹះស្ថានសមាជិកនៃសមាគមទាំងពីរ នឹងពិនិត្យឱ្យអស់លទ្ធភាពចូលរួមដាក់ចេញនូវវិធានការសមស្រប ក្នុងការបន្ធូរបន្ថយបន្ទុកហិរញ្ញវត្ថុសម្រាប់ពលករតាមរយៈការរៀបចំឥណទានឡើងវិញ។

បន្ថែមលើនេះ ក្នុងករណីមានតម្រូវការជាក់ស្តែង ក្នុងរៀបចំឥណទានឡើងវិញ ក៏ដូចជាសំណើ សុំផ្តល់ការគាំទ្រផ្សេងៗ សមាគមស្នើប្រជាពលករទាំងអស់ដែលជាអតិថិជន ទាក់ទងផ្ទាល់ជាមួយគ្រឹះស្ថានធនាគារនិងហិរញ្ញវត្ថុ នៅរៀងរាល់ម៉ោងធ្វើការ ដោយភ្ជាប់មកជាមួយនូវអត្តសញ្ញាណបណ្ណ ឯកសារឥណទាន បណ្ណ/សៀវភៅការងារ និងលិខិតពាក់ព័ន្ធនានា ដើម្បីពិភាក្សារិះរកដំណោះស្រាយដ៏សមរម្យផងដែរ។

យ៉ាងណា ប្រធានក្រុមប្រឹក្សាជាតិតស៊ូ លោក សម រង្ស៊ី បានបង្ហោះសារលើហ្វេសប៊ុកលោកនៅថ្ងៃទី១៨ ខែមិថុនានេះថា ពលករ ទាហាន មន្ត្រីរាជការ និងពលរដ្ឋទូទៅ សុទ្ធតែលង់ជាប់ក្នុងអន្ទាក់បំណុលរបស់ធនាគារខិលខូច ដែលកេងយកការប្រាក់ខ្ពស់កប់ពពក។

បើតាមលោក សម រង្ស៊ី អត្រាការប្រាក់សព្វថ្ងៃ ខ្ពស់ហួសហេតុ បើប្រៀបទៅប្រទេសជិតខាង ហើយថា ធនាគារខិលខូចទាំងនេះ បានដាក់អន្ទាក់ប្រជាជនឲ្យបញ្ចាំផ្ទះ និងទ្រព្យសម្បត្តិ រហូតជាប់បំណុលវ័ណ្ឌក ជំពាក់លុយគ្រឹះស្ថានមីក្រូហិរញ្ញវត្ថុរើខ្លួនមិនរួច។

ក្នុងន័យនេះ លោកជំរុញឱ្យពលរដ្ឋរួមគ្នា ទាមទារតវ៉ាឲ្យធនាគារផ្អាកសងបំណុលមួយឬពីរឆ្នាំ ហើយបំណុលដែលមានអត្រាការប្រាក់ខ្ពស់ ១% ឬ៣% ក្នុងមួយខែ ត្រូវកាត់បន្ថយមកក្រោម ០.៥៨%ក្នុងមួយខែ ឬ៧% ក្នុងមួយឆ្នាំ។

លោកឱ្យជាយោបល់ថា អ្នកខ្ចីដែលគ្មានលទ្ធភាពសងបំណុលវិញ រដ្ឋាភិបាលត្រូវជួយពួកគេ ដើម្បីធានាមិនឲ្យធនាគាររឹបអូសផ្ទះដែលពួកគេរស់នៅ ដែលជាជីវិតនិងសិទ្ធិរបស់មនុស្សក្នុងការរស់នៅមានជីវិត។

បន្ថែមលើនេះ លោកថា រដ្ឋាភិបាលត្រូវធ្វើការជាមួយធនាគារ ដើម្បីពិនិត្យករណីនីមួយៗដោយឯករាជ្យ និងបង្កើតកម្មវិធីបន្ធូរបន្ថយសម្រាប់អ្នកដែលមិនអាចសងបំណុលគេបាន ដូចជាបន្ថយអត្រាការប្រាក់ ផ្អាកការទូទាត់ប្រចាំខែក្នុងពេលវេលាសមរម្យ ឬឲ្យពួកគេបង់ប្រាក់ទាបបំផុតក្នុងរយៈពេលយូរ ឬស្វែងរកឱកាសឲ្យពួកគេធ្វើការ ដើម្បីពួកគេអាចសងបំណុលវិញបាន។

នាយកទទួលបន្ទុកិច្ចការទូទៅនៃអង្គការសិទ្ធិមនុស្ស លីកាដូ លោក អំ សំអាត គាំទ្រចំពោះរដ្ឋាភិបាលកម្ពុជាដែលប្រកាសជួយដល់ពលករខ្មែរ តែលោកចង់ឃើញភាគីធនាគារមានវិធានការជាក់ស្តែង និងតម្លាភាពបន្ថែមទៀត ដើម្បីដោះស្រាយបញ្ហាបំណុលពលករនៅក្នុងស្ថានភាពលំបាកនេះ។

លោកថា៖ «អ្វីដែលសំខាន់នៅលើមីក្រូហិរញ្ញវត្ថុក៏ដូចជាធនាគារ ត្រូវតែមានយន្តការដាក់ចេញយ៉ាងម៉េចឲ្យបានសមស្របនឹងការអំពាវនាវរបស់រាជរដ្ឋាភិបាល ដើម្បីធ្វើម៉េចឲ្យបងប្អូនពលករខ្មែរ ឬក៏ប្រជាពលរដ្ឋទទួលបាននូវការសម្របសម្រួលណាមួយទាក់ទងនឹងបំណុល មីក្រូហិរញ្ញវត្ថុ ឬក៏ធនាគារហ្នឹង ឲ្យគាត់មានលទ្ធភាពឬក៏អាចទុកពេលវេលា ឬក៏មានដំណោះស្រាយមួយ ដែលសមស្របសម្រាប់ពួកគាត់ ដើម្បីកុំឲ្យពួកគាត់មានការបារម្ភ ហើយពួកគាត់អាចនឹងត្រូវបង្ខំចិត្តក្នុងការលក់ដីលក់ធ្លី ឬទ្រព្យសម្បត្តិដើម្បីសងបំណុល »។

ការិយាល័យឥណទានកម្ពុជា ហៅកាត់ថាCBC ថ្មីៗនេះ បានចេញរបាយការណ៍មួយដោយកត់ត្រាថា គិតត្រឹមបំណាច់ឆ្នាំ២០២៤ ពលរដ្ឋខ្មែរបានជំពាក់បំណុលធនាគារ និងមីក្រូហិរញ្ញវត្ថុជិត ៦០ពាន់លានដុល្លារ។

បើតាមរបាយការណ៍នោះ ក្នុងចំណោមសមតុល្យឥណទានជិត ៦០ពាន់លានដុល្លារនេះ CBCបានរាយការណ៍ថា ប្រមាណ៦០% ត្រូវបានគ្រឹះស្ថានធនាគារ និងហិរញ្ញវត្ថុផ្តល់ទៅឱ្យពលរដ្ឋរស់នៅក្នុងរាជធានីភ្នំពេញ ខេត្តកណ្តាល និងសៀមរាប។

ដោយឡែក របាយការណ៍ការសិក្សាមួយដែលផ្សាយកាលពីឆ្នាំ២០២២ ដែលផ្តល់មូលនិធិដោយក្រសួងសហព័ន្ធ និងសហប្រតិបត្តិការសេដ្ឋកិច្ចរបស់រដ្ឋាភិបាលអាល្លឺម៉ង់ ដែលជាអ្នកផ្តល់មូលនិធិឈានមុខគេមួយរបស់ឧស្សាហកម្មគ្រឹះស្ថានមីក្រូហិរញ្ញវត្ថុ បានឱ្យដឹងថា ពលរដ្ឋកម្ពុជាប្រមាណជាង ១សែន៦ម៉ឺនគ្រួសារ (១៦៧ ០០០គ្រួសារ) បានលក់ដីធ្លីរបស់ពួកគេ ដើម្បីសងបំណុលក្នុងរយៈពេល៥ឆ្នាំចុងក្រោយនេះ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។