ក្រុមអ្នកតស៊ូមតិកម្ពុជា រកឃើញថា ប្រធានព្រឹទ្ធសភាកម្ពុជា លោក ហ៊ុន សែន កំពុងរំលោភអំណាចរដ្ឋនិងច្បាប់របស់ប្រទេស គ្មានការរំខានពីស្ថាប័នជាតិ ដែលធ្វើឱ្យកម្ពុជាកំពុងតែគ្រប់គ្រងដោយការបំភិតបំភ័យ និងគំរាមកំហែង ដែលជាមធ្យោបាយបន្តអំណាចតាមការបោះឆ្នោតបន្លំជាទៀងទាត់ មិនឱ្យមានគណបក្សប្រឆាំងខ្លាំងចូលរួមប្រកួត តាមគន្លងប្រជាធិបតេយ្យ។
នេះបើតាមសេចក្តីវិភាគកម្រាស៥ទំព័រ របស់ក្រុមអ្នកតស៊ូមតិកម្ពុជា ដែលមានមូលដ្ឋាននៅប្រទេសអូស្ត្រាលី ចេញផ្សាយនៅថ្ងៃទី១៩ខែមិថុនានេះ។
ក្រុមអ្នកតស៊ូមតិកម្ពុជា ហៅកាត់ CAT រកឃើញថា លោក ហ៊ុន សែន បានប្រើអំណាចសាធារណៈ និងគ្មានតួនាទី ក្នុងឋានៈជាសមាជិកនិងប្រធានព្រឹទ្ធសភា មានអភ័យឯកសិទ្ធិព្រឹទ្ធសភា បាននិងកំពុងនាំឲ្យសាធារណជនជាតិ និងអន្តរជាតិ មានការភាន់ច្រឡំថា តើអ្នកណាជាអ្នកដឹកនាំប្រទេសកម្ពុជា។
ក្រុមអ្នកតស៊ូមតិកម្ពុជា បានលើកយកករណីពាក់ព័ន្ធនឹងករណីរំលោភអំណាច តាមរយៈការគំរាមកំហែងជាសាធារណៈថា «នយោបាយងើបមួយវ៉ៃមួយ នៅតែប្រើនិងមានប្រសិទ្ធិភាព»។
CAT ថា អំពើរបស់ លោក ហ៊ុន សែន ក្នុងករណីនេះ មិនត្រឹមតែជាការរំលោភអំណាចរបស់រដ្ឋទេ ក៏ប៉ុន្តែជា “បទល្មើសព្រហ្មទណ្ឌ” ដែលតាមច្បាប់ លោក ហ៊ុន សែន ត្រូវរងការចោទប្រកាន់ ឬកោះហៅបញ្ជូនរឿងឲ្យស៊ើបសួរពីសំណាក់តំណាងអយ្យការ ក្នុងគោលដៅបញ្ចប់បទល្មើស ដាក់លោក ហ៊ុន សែន ឲ្យទទួលខុសត្រូវចំពោះមុខច្បាប់។
បន្ថែមលើនេះ ករណីលោក កឹម សុខា លោក សម រង្ស៊ី លោក រ៉ុង ឈុន កញ្ញា សេង ធារី លោក សុន ឆ័យ លោក ទាវ វណ្ណុល អតីតប្រធានគណបក្សភ្លើងទៀន ករណីលោក គង់ គាំ ករណីយុវជនដែលត្រូវបានឃាត់ខ្លួនពាក់ព័ន្ធនឹងរឿងការពារធនធានធម្មជាតិ ទឹកដី ត្រូវបានបកស្រាយនិងអនុវត្តច្បាប់ថា ជាបទល្មើសជាក់ស្តែង ឬប្រព្រឹត្តបទល្មើសបរិហាកេរ្តិ៍ ហើយចាត់វិធានការ ឬគំរាមទាមទារសំណងជំងឺចិត្តតាមអំពើចិត្ត។
ដោយឡែក ជម្លោះព្រំដែនកម្ពុជា-ថៃ លោក ហ៊ុន សែន បានដើរតួជំនួស និងបាននិយាយក្នុងន័យជាការបង្គាប់បញ្ជាឲ្យរាជរដ្ឋាភិបាល រៀបចំឯកសារប្តឹងទៅតុលាការយុត្តិធម៌អន្តរជាតិ(ICJ) ក្រោយពីលោក ហ៊ុន សែន បានប្រកាស លោក ហ៊ុន ម៉ាណែត ក៏បានប្រកាសភ្លាមៗថា រាជរដ្ឋាភិបាលបានសម្រេចចិត្តប្តឹង។
ក្រោយមកទៀត លោក ហ៊ុន សែន ក៏បានធ្វើអត្ថាធិប្បាយអំពីការកែសម្រួលទីតាំងឈរជើងរបស់កងទ័ពការពារព្រំដែន ក្នុងតំបន់ទាំងបីថា ជាការបន្ធូរបន្ថយស្ថានការណ៍។
ក្នុងន័យនេះ CAT ថា ការចេញមុខម្តងហើយម្តងទៀត ក្នុងកិច្ចការព្រំដែនពីសំណាក់លោកហ៊ុន សែន គឺជាការជ្រៀតជ្រែក និងរំលោភបំពានអំណាចរដ្ឋម្តងហើយម្តងទៀត ដោយគ្មានស្ថាប័នរដ្ឋណាមួយធានាឲ្យគាត់គោរពរដ្ឋធម្មនុញ្ញ និងច្បាប់របស់ប្រទេសកម្ពុជាបន្តិចណាឡើយ។
ក្រុមអ្នកតស៊ូមតិកម្ពុជា លោក ហុង លឹម ប្រាប់ VOD បន្ថែមថា លោក ហ៊ុន សែន កំពុងចាត់ចែងការងារប្រទេសជាតិតាមទំនើងចិត្ត ផ្ទុយពីស្មារតីរដ្ឋធម្មនុញ្ញ ដើម្បីតែមហិច្ចតាអំណាចរបស់ខ្លួនគ្រោះថ្នាក់ដល់ពលរដ្ឋទូទាំងប្រទេស។
លោកថា៖ «ស្រវឹងពុលនឹងអំណាច ឈ្លក់នឹងអំណាចហ្នឹង វាលើសលប់ពេកទៅណាស់ គឺថាឥឡូវហ្នឹង ហ៊ុន ម៉ាណែត មិនទាំងហ៊ាននិយាយអីផង ព្រោះវាខ្លាចប្រទូសប្រទាស់គ្នា។ គាត់និយាយតាមតែគាត់នឹកឃើញ ប្រើតែអំណាចធម៌ក្តៅ ហែង មិនតាមអញ គឺថា ត្រូវតែប្រកាច់ចាប់ដាក់គុកឬក៏ចោទប្រកាន់មួលបង្កាច់ បង្កើតតែរឿង ហើយធ្វើម៉េចគឺថាឲ្យតែគេខ្លបខ្លាចខ្លួន និងលួចថតសំឡេងគេយកមុខរបរគាត់ធ្វើតែតាមហ្វេសប៊ុកដែរ នាយករដ្ឋមន្ត្រីហ្វេសប៊ុក មិនដែលគេមានអ្នកណាគេធ្វើក្រោមមេឃលើដី។ ឃើញគាត់ឃើញហ្នឹងវាជ្រុលហួសហេតុពេក»។
ឆ្លើយតបរឿងនេះ អ្នកនាំពាក្យគណបក្សប្រជាជនកម្ពុជា លោក ជា ធីរិទ្ធ ចាត់ទុកការវិភាគនេះ ជារឿងដដែលៗ ដែលមានចេតនាបំរើបរទេស ហើយមកបំបែកបំបាក់សាមគ្តីផ្ទៃក្នុងរបស់ជាតិ។
លោកថា៖ «ចំពោះសម្ដេចតេជោ អ្វីដែលលោកបានអនុវត្ត គឺទៅតាមរដ្ឋធម្មនុញ្ញច្បាស់លាស់ណាស់ ហើយអ្វីដែលលោកបានលើកឡើងទាក់ទងបញ្ហាព្រំដែន ក្នុងឋានៈលោកជាប្រធានគណបក្សកាន់អំណាច។ ប្រធានគណបក្សកាន់អំណាច គោលនយោបាយផ្សេងៗ រដ្ឋាភិបាលបច្ចុប្បន្នគឺចេញអំពីគោលនយោបាយរបស់បក្ស ហើយលោកជាប្រធានគណបក្សកាន់អំណាច! លោកគឺជាអ្នកមានសិទ្ធិអំណាចមួយដ៏ធំ នៅក្នុងជោគវាសនារបស់ប្រទេសជាតិដែរ ពីព្រោះ លោកជាប្រធានគណបក្សកាន់អំណាច។ ខ្ញុំគិតថា ពួកគេមិនយល់អ្វីទៅជារដ្ឋធម្មនុញ្ញ មិនយល់អ្វីទៅជាច្បាប់ ឬក៏រំលោភអំណាច គ្រាន់តែគេលើកឡើងតាមការនឹកឃើញ ហើយចេតនារបស់ពួកគេក្នុងគោលដៅគ្មានអ្វីចង់ពីការបំបែកបំបាក់សាមគ្គីជាតិ នៅក្នុងពេលដែលប្រទេសរបស់យើងកំពុងតែត្រូវការរួបរួមសាមគ្គីគ្នាតែប៉ុណ្ណោះ ហើយការបំបែកបំបាក់នេះគឺជាការបម្រើដល់សត្រូវឈ្លានពានរបស់យើង ដែលជាសកម្មភាពមួយដែលយើងចាត់ទុកថា ជាការធ្វើវិទ្ធង្សនា និងគ្មានមនសិការស្នេហាជាតិ»។
យ៉ាងណា ការវិភាគរបស់ក្រុមអ្នកតស៊ូមតិកម្ពុជា ពន្យល់ថា ក្នុងឋានៈជាប្រធានព្រឹទ្ធសភា លោក ហ៊ុន សែន មានតួនាទីសម្របសម្រួល ដឹកនាំកិច្ចប្រជុំព្រឹទ្ធសភាដើម្បីពិនិត្យ និងអនុម័តច្បាប់នានាដែលរដ្ឋសភាបញ្ជូនទៅ ហើយព្រឹទ្ធសភា មិនមានអំណាចប្រតិបត្តិច្បាប់ ទប់ស្កាត់សកម្មភាពពាណិជ្ជកម្ម ឬទប់ស្កាត់សកម្មភាពបុគ្គលណាទេ រួមទាំងមិនមានអំណាចការទូត ឬ កិច្ចការបរទេសផង។
ក្រុមអ្នកតស៊ូមតិកម្ពុជា ថា លោក ហ៊ុន សែន ជាប្រធានគណបក្សប្រជាជន ហើយក្នុងក្របខ័ណ្ឌច្បាប់ស្តីពីគណបក្សនយោបាយ លោក ហ៊ុន សែន មិនមានអំណាចសាធារណៈទេ ក៏ប៉ុន្តែមានសិទ្ធិ តួនាទី និងកាតព្វកិច្ចដូចគណបក្សនយោបាយឯទៀតដែរ។
បន្ថែមលើនេះ CATថា លោក ហ៊ុន សែន បានអស់អំណាចប្រតិបត្តិ តាំងពីក្រោយការបោះឆ្នោតជាតិ កាលពីខែកក្កដា ឆ្នាំ២០២៣មកម្លេះ។ លោក ហ៊ុន សែន លែងជាអគ្គមេបញ្ជាការ និងលែងមានតួនាទី បញ្ជាទៅអំណាចសាធារណៈដូចមុនឆ្នាំ២០២៣ហើយ។
តំណាងរាស្រ្តគណបក្សសង្រ្គោះជាតិ លោក ម៉ែន សុថាវរិន្រ្ទ ព្រមានថា របបដឹកនាំបែបគ្រួសារនិយមនៅកម្ពុជានេះ ទីបំផុតទៅនឹងដួលរលំក្រោមអំណាចមហាជន ព្រោះបានបន្សល់ទុកវិបត្តិសង្គមជាច្រើន រួមមាន បំណុល ជីវភាពពលរដ្ឋក្រីក្រ បំផ្លាញធនធានធម្មជាតិ វិបត្តិការងារ ចំណាកស្រុក ជាដើម។
លោកថា៖ «លោក ហ៊ុន ម៉ាណែត គាត់គ្មានសមត្ថភាពទេ គឺការលើកបន្តុបរបស់ឪពុកគាត់ ប៉ុន្តែអ្នកដែលបញ្ជាពីក្រោយ អ្នកទាញខ្សែពីក្រោយគឺលោក អតីតនាយករដ្ឋមន្រ្តី លោក ហ៊ុន សែន ប្រទេសខ្មែរគឺក្រោមបញ្ជា លោក ហ៊ុន សែន ជាអ្នកបញ្ជាទាំងអស់ ក្នុងនាមគាត់ជាមេបក្ស គាត់ជាប្រធានបក្ស អ៊ឺចឹងលោក ហ៊ុន ម៉ាណែត មិនអាចដើរឆ្លងពីគន្លងរបស់ប្រធានបក្សទេ ជារបបផ្តាច់ការ ជារបបកុម្មុយនីសផ្តាច់ការ គាត់មិនអាចដើរឆ្លងទេ គឺគេត្រូវដកគាត់ចេញហើយ»។
យ៉ាងណាសម្រាប់ ក្រុមអ្នកតស៊ូមតិកម្ពុជា យល់ថា លោក ហ៊ុន សែន បានដឹងថា កូនរបស់គាត់ជានាយករដ្ឋមន្ត្រីដែលគាត់រៀបចំផ្ចុងផ្តើម មិនទាន់មានសមត្ថភាពដឹកនាំ ប្រៀបបាននឹងដើមឈើមិនមានខ្លឹម មានតែសម្បកដែលបំពាក់ឲ្យគាត់ប៉ុណ្ណោះ។ សកម្មភាពរបស់ លោក ហ៊ុន សែន បញ្ជាក់ច្បាស់ថា កូនរបស់គាត់ គឺជានាយករដ្ឋមន្ត្រីហាត់ការ និងជាការមើលស្រាល មិនឲ្យតម្លៃ។
ក្រុមអ្នកតស៊ូមតិកម្ពុជា គូសបញ្ជាក់ថា ការផ្សាយអត្ថបទរបស់ខ្លួននៅពេលនេះ ដើម្បីជូនប្រជាជាតិ និងអន្តរជាតិថា នៅកម្ពុជា ពេលលោក ហ៊ុន សែន និងក្រុមរបស់គាត់ប្រកាសថា ចាត់វិធានការច្បាប់ គឺសំដៅលើយុទ្ធនាការបង្ក្រាបអ្នកមានមតិផ្ទុយពីគាត់ និងគណបក្សរបស់គាត់ ក៏ប៉ុន្តែសកម្មភាពរំលោភអំណាច និងបទល្មើសដែលគាត់ប្រព្រឹត្ត គឺគាត់យកពាក្យធានាសន្តិភាព និងអធិបតេយ្យភាព អំណាចរដ្ឋទៅបិទបាំងទាំងស្រុង។
សកម្មភាពខុសច្បាប់ និងរំលោភអំណាចរដ្ឋជាច្រើន ត្រូវបានការពារដោយស្ថាប័នរដ្ឋ និង យន្តការតុលាការរបស់របបគ្រប់គ្រងរបស់គណបក្សប្រជាជន និង លោក ហ៊ុន សែន ។
ក្រុមអ្នកតស៊ូមតិកម្ពុជា ដឹងថា កម្ពុជាកំពុងតែគ្រប់គ្រងដោយការបំភិតបំភ័យ និងគំរាមកំហែង ដែលជាមធ្យោបាយបន្តអំណាចតាមការបោះឆ្នោតបន្លំជាទៀងទាត់ និងមិនអនុញ្ញាតឲ្យមានគណបក្សខ្លាំងចូលប្រកួត៕
