មិនខុសពីការគ្រោងទុករបស់ក្រុមយោធាថៃនោះទេ នៅព្រឹកថ្ងៃទី២៤ ខែមិថុនានេះ យោធាថៃបានសម្រេចបិទច្រកទ្វារព្រំដែនតូចធំទាំងអស់ ពោលគឺខេត្តទាំង៧ ដែលនៅជាប់ប្រទេសកម្ពុជា ដោយមិនខ្វល់ពីការអង្វរក របស់ពលរដ្ឋថៃខ្លួនឯងដែលត្រូវនាំទំនិញ និងកសិផលចេញចូល និងអ្នកមកប្រកបរបរ ឬបំពេញការងារនៅលើទឹកដីកម្ពុជាឡើយ។
មន្ត្រីទទួលបន្ទុកពលករទេសន្តរប្រវេសន៍ នៃអង្គការសង់ត្រាល់ប្រចាំប្រទេសថៃ លោក លឹង សុផុន ប្រាប់វីអូឌីនៅថ្ងៃទី២៤ ខែមិថុនានេះថា លោកសង្កេតឃើញភាគច្រើនពលករសំណង់បាននាំគ្នាសម្រុកទៅកម្ពុជាវិញ ខណៈពលករធ្វើការរោងចក្រនៅតែបន្តធ្វើការងារធម្មតា។
ចំណែកអ្នកលក់ដូរនៅតាមផ្សារ ដូចជា ផ្សារឡុងកឿ ផ្សារឡែម ភាគច្រើនបានផ្អាកការលក់ដូរ។ តែយ៉ាងណា លោកបន្តថា មកទល់ពេលនេះ ក្រសួងការងារថៃមិនទាន់មានគោលការណ៍ណាមួយ បណ្ដេញពលករខ្មែរត្រឡប់ទៅកម្ពុជាវិញឡើយ។
លោក ឡឹង សុផុន និយាយថា៖ «យើងឃើញហើយថាការបិទច្រកព្រំដែនបែបនេះ វាធ្វើឱ្យប៉ះពាល់ទាំងសងខាង ទាំងបងប្អូនពលករ អាជីវករ កម្មករ អ្នកធ្វើការក៏ខាតបង់។ អ៊ីចឹងហើយប្រយោជន៍បងប្អូននៅតាមព្រំដែនហ្នឹងខាតបង់ច្រើនណាស់។ អ៊ីចឹងចង់ឃើញស្ថាប័នពាក់ព័ន្ធដោះស្រាយបញ្ហាតាមព្រំដែនហ្នឹងឱ្យបានឆាប់រហ័ស ឱ្យបានបើកឱ្យលឿនដូចដើមវិញ»។
កាលពីថ្ងៃទី២៣ ខែមិថុនា មេបញ្ជាការយោធាភូមិភាគ១ ភូមិភាគ២ និងកងទ័ពជើងទឹករបស់ថៃ បានចេញសេចក្ដីប្រកាស បិទច្រកទ្វារព្រំដែនទាំងអស់ជាមួយប្រទេសកម្ពុជា បន្ទាប់ពីស្ថានភាពតាងតឹងដាក់គ្នាលើបញ្ហាព្រំដែន។ ក្នុងលិខិតរបស់យោធាថៃនេះ មេបញ្ជាការភូមិភាគ១ថៃ បានបញ្ជាឱ្យបិទច្រកទ្វារចាប់ពីស្រុកម៉ាឡៃ ខេត្តបន្ទាយមានជ័យ រហូតដល់ខេត្តកោះកុង។ ចំណែក មេបញ្ជាការភូមិភាគ២ បញ្ជាឱ្យបិទចាប់ពីក្រុងប៉ោយប៉ែត ខេត្តបន្ទាយមានជ័យ រហូតដល់ខេត្តព្រះវិហារ។ ដោយឡែក កងទ័ពជើងទឹកថៃ បានបិទច្រកចាប់ពីព្រំដែនខេត្តប៉ៃលិន រហូតដល់ខេត្តកោះកុង។
ច្រកព្រំដែនអន្តរជាតិប៉ោយប៉ែត ខេត្តបន្ទាយមានជ័យ មានសភាពកកកុញខ្លាំង ដោយប្រជាពលរដ្ឋគ្រប់ជាតិសាសន៍កំពុងរង់ចាំម៉ោងបើកឱ្យឆ្លងទៅមក ខណៈពលរដ្ឋខ្មែរនៅខាងដីថៃវិញ ក៏កំពុងមមាញឹករៀបចំឥវ៉ាន់ចូលទៅកម្ពុជា ដោយពួកគេមានពេលឆ្លងទៅមកតែបីម៉ោងប៉ុណ្ណោះ គឺចាប់ពីម៉ោង៥ល្ងាច ដល់ម៉ោង៨យប់ មុនពេលច្រកព្រំដែនត្រូវបិទទាំងស្រុង ដោយមិនដឹងបើកវិញនៅថ្ងៃណាឡើយ។
គ្រូបង្រៀននៅសង្កាត់ផ្សារកណ្ដាល ក្រុងប៉ោយប៉ែត កញ្ញា រិន ចាន់ធី ឱ្យដឹងថា ក្រោយអាជ្ញាធរបិទព្រំដែននៅថ្ងៃអង្គារនេះ សិស្សមករៀនកាន់តែតិចជាងមុន ដោយសារពួកគេមួយចំនួន ត្រូវតាមឪពុកម្ដាយរើឥវ៉ាន់ពីដីថៃមកដីខ្មែរវិញ។
កញ្ញាសង្កេតឃើញពលរដ្ឋខ្មែរមួយចំនួន គ្មានផ្ទះនៅក្រុងប៉ោយប៉ែតឡើយ ដោយសារពួកគេយកកន្លែងលក់ដូរក្នុងផ្សារនៅក្នុងប្រទេសថៃធ្វើជាផ្ទះ ជាហេតុធ្វើឱ្យពួកគេជួបការលំបាកខ្លាំងមួយកម្រិតទៀត។
កញ្ញា រិន ចាន់ធី និយាយថា៖ «សង្ឃឹមថា រដ្ឋបាលខេត្តនិងមន្ត្រីនៅក្នុងតំបន់ហ្នឹង គាត់ជួយសម្រួលដល់ពលរដ្ឋនៅក្នុងផ្សារថៃ ជួយពួកគាត់ឱ្យអស់លទ្ធភាព ដូចថា ឱ្យមើលមករដ្ឋពិតជាយកចិត្តទុកដាក់ជាមួយពួកគាត់ ដូចបើកទីតាំងណាមួយឱ្យពួកគាត់អាចលក់បាន ដូចបើកផ្សារថ្មីមួយនៅប៉ោយប៉ែត សម្រាប់អ្នកដែលគាត់មានតូបនៅផ្សារថៃ ដែលគាត់មានលិខិតស្នាមអីត្រឹមត្រូវ»។
ក្រុមយោធាថៃ ចោទថា ការបិទច្រកដោយឯកតោភាគីនៅពេលនេះ គឺជាការឆ្លើយតបទៅនឹងជម្លោះព្រំដែនជាមួយកម្ពុជា ខណៈកម្ពុជាសម្រេចប្តឹងករណីនេះទៅតុលាការយុត្តិធម៌អន្តរជាតិ(ICJ)ក្នុងសំណុំរឿងព្រំដែន។
បន្ទាប់ពីក្រុមយោធាថៃ បានទាញទ្វារបិទ និងចាក់សោរហើយនោះ បានធ្វើឱ្យខាងពលរដ្ឋខ្មែរ និងខាងពលរដ្ឋថៃ រួមទាំងជនបរទេសជាច្រើននាក់ បានកកស្ទះ និងតវ៉ាឱ្យយោធាថៃបើកច្រក ដោយខ្លះអង្គុយ និងខ្លះទៀតក្រាលកន្ទេលដេកចាំនៅច្រកទ្វារ ខណៈនៅតាមបណ្ដោយផ្លូវមានរថយន្តដឹកទំនិញជាច្រើនគ្រឿង បានឈប់បន្តកន្ទុយគ្នាដូចទូរទេះភ្លើង។
ជុំវិញរឿងនេះ ប្រធានសមាគមពង្រឹងសេដ្ឋកិច្ចក្រៅប្រព័ន្ធកម្ពុជាប្រចាំនៅខេត្តបន្ទាយមានជ័យ លោក ឌិន ពុទ្ធី សង្កេតឃើញថា ការបិទច្រកព្រំដែនទាំងស្រុងជាឯកតោភាគី របស់យោធាថៃ បានធ្វើឱ្យប៉ះពាល់ដល់ពលរដ្ឋប្រកបរបរសេដ្ឋកិច្ចក្រៅប្រព័ន្ធ ទាំងកម្ពុជា និងថៃ ធ្ងន់ធ្ងរ ខណៈប្រតិបត្តិការល្បែងកាស៊ីណូអនឡាញ ហាក់មិនបានទទួលរងផលប៉ះពាល់នោះឡើយ។
លោកថា៖ «កាស៊ីណូអនឡាញគឺមិនប៉ះពាល់ទេ ព្រោះអនឡាញគេលេងតាមអ៊ីនធីណិត ហើយពាក់ព័ន្ធនឹងជីវភាពរបស់ពលរដ្ឋវិញ នៅពេលបិទច្រកបែបនេះ គឺលំបាកខ្លាំងមែនទែន ដូចសម័យផ្ទុះកូវីដអ៊ីចឹង។ កាលណាបិទច្រកកាន់តែយូរ ប្រជាពលរដ្ឋកាន់តែខ្សត់ខ្សោយទៅៗ ដោយសារអ្នកនៅក្រុងប៉ោយប៉ែតនេះ គឺមិនមានស្រែ និងចម្ការដូចជាអ្នកនៅតាមបណ្ដាខេត្តនោះទេ»។
យ៉ាងណាក៏ដោយចុះ រហូតមកដល់ពេលនេះ មិនទាន់មានការឆ្លើយតបផ្លូវការណាមួយពីរដ្ឋាភិបាលកម្ពុជា ចំពោះការបិទទ្វារព្រំដែន ដោយឯកតោភាគីពីសំណាក់ក្រុមយោធាថៃ និងការចាត់វិធានការជួយសង្គ្រោះជីវភាពរបស់ពលរដ្ឋ ដែលរស់នៅជាប់ព្រំដែននេះនៅឡើយ។
ពាក់ព័ន្ធនឹងវិវាទព្រំដែននេះដែរ ឧបនាយករដ្ឋមន្រ្តី និងជារដ្ឋមន្រ្តីក្រសួងការពារជាតិថៃ លោក ភូមថាំ វិឆាយ៉ាឆៃ នៅថ្ងៃទី២៤ ខែមិថុនានេះ បានអះអាងថា លោកបានអនុញ្ញាតឱ្យមេទ័ពភូមិភាគ២ គឺលោក ប៊ុនស៊ីន ផាតក្លាង បិទប្រាសាទតាមាន់ធំ មិនឱ្យភ្ញៀវទេសចរចូលទស្សនា ប្រសិនបើភាពតានតឹងរវាងកម្ពុជា និងថៃ មានការកើនឡើង ដោយមិនខ្វល់ពីកិច្ចព្រមព្រៀងជាមួយកម្ពុជាឡើយ។
សារព័ត៌មាន ថៃ ភីប៊ីអេស(Thai PBS WORLD) បានចេញផ្សាយនៅថ្ងៃទី២៤ ខែមិថុនានេះ ដោយស្រង់សម្ដីអ្នកជំនាញសន្តិសុខ និងកិច្ចការអន្តរជាតិរបស់ថៃ លោក ប៉ានីតាន់ វឌ្ឍនាយ៉ាកន (Panitan Wattanayagorn) ថា ការបិទព្រំដែនដំណាក់កាលដំបូងៗ វាប៉ះពាល់ដល់ពលករខ្មែរ និងសហគ្រិនខ្មែរក្នុងរយៈពេលខ្លី ក៏ប៉ុន្តែអាចនឹងផលប៉ះពាល់ដល់អាជីវករថៃរយៈពេលវែង។
លោក ប៉ានីតាន់ សង្កេតឃើញថា ភាគីកម្ពុជា ហាក់មានសាមគ្គីភាព ជាងភាគីថៃ ដែលមិនសូវមានភាពចុះសម្រុងនឹងគ្នាក្នុងជួររដ្ឋាភិបាល។ អ្នកជំនាញរូបនេះ បន្តថា រដ្ឋាភិបាលថៃ គួរតែដោះស្រាយបញ្ហានេះ តាមយន្តការផ្លូវទូត និងចរចាជាមួយភាគីកម្ពុជា ដើម្បីបញ្ចប់ជម្លោះ។
ជម្លោះព្រំដែន រវាងកម្ពុជា និងថៃ បានរាលដាលកាន់តែខ្លាំង ទៅជាជម្លោះសេដ្ឋកិច្ច វប្បធម៌ និងការទូត បន្ទាប់ពីទាហានថៃបានលួចវាយឆ្មក់មកលើកងទ័ពកម្ពុជា ដែលឈរជើងនៅតំបន់មុំបី ក្នុងខេត្តព្រះវិហារ ដែលធ្វើឱ្យទាហានខ្មែរម្នាក់បានពលី កាលពីថ្ងៃទី២៨ ខែឧសភា។
ជម្លោះនេះ បង្កឱ្យមានភាពតានតឹងកាន់តែខ្លាំងថែមទៀត ក្រោយប្រធានព្រឹទ្ធសភាកម្ពុជា លោក ហ៊ុន សែន បានធ្វើឱ្យបែកធ្លាយសំឡេងសន្ទនាតាមទូរស័ព្ទ ជាមួយនាយករដ្ឋមន្ត្រីថៃ លោកស្រី ផែថងថាន ស៊ីណាវ៉ាត់ ដែលធ្វើឱ្យលោកស្រីប្រឈមនឹងការបណ្ដេញចេញពីតំណែង និងទទួលរងសម្ពាធពីមេយោធាថៃ ហើយកម្ពុជា បានបិទការនាំចូលប្រេងឥន្ធនៈ អាហារ ភេសជ្ជៈកំប៉ុង និងបន្លែផ្លែឈើ ពីប្រទេសថៃ ខណៈមេដឹកនាំថៃ បានចោទក្រុមមេដឹកនាំកម្ពុជា ថាជាមេខ្លោងនៅពីក្រោយឧក្រិដ្ឋកម្មឆបោកតាមអ៊ីនធឺណិត លាងលុយកខ្វក់ និងជួញដូរមនុស្ស៕
