នាយកដ្ឋានប្រយុទ្ធនឹងជំងឺឆ្លង ឱ្យដឹងថា គិតត្រឹមខែមិថុនានេះ អ្នកឆ្លងជំងឺផ្តាសាយបក្សី H5N1 មានចំនួន ៨នាក់ ក្នុងនោះមានអ្នកស្លាប់ ៦នាក់ ខណៈនៅថ្ងៃអង្គារនេះ ក្រសួងសុខាភិបាលបានប្រកាសពីការរកឃើញស្ត្រីវ័យ ៤១ឆ្នាំម្នាក់ទៀត បានឆ្លងវីរុសផ្តាសាយបក្សី H5N1 និងកំពុងស្ថិតក្នុងស្ថានភាពធ្ងន់ធ្ងរ។
នាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាល បានឱ្យដឹងនៅលើទំព័រហ្វេសប៊ុករបស់ខ្លួន នៅថ្ងៃទី២៤ ខែមិថុនានេះថា ត្រឹមខែមិថុនានេះ នាយកដ្ឋានរកឃើញអ្នកឆ្លងជំងឺផ្ដាសាយបក្សីចំនួន ៨នាក់ ក្នុងនោះ ៦នាក់បានស្លាប់ ដែលភាគច្រើនជាកុមារ។
ប្រភពដដែលនេះ បញ្ជាក់ថា គ្រប់អ្នកជំងឺទាំងអស់ សុទ្ធតែមានពាក់ព័ន្ធប៉ះពាល់ ឬយកមាន់ទាឈឺឬងាប់ យកទៅរៀបចំជាអាហារទទួលទាន។
នៅថ្ងៃដដែលនេះដែរ ក្រសួងសុខាភិបាល ក៏បានចេញសេចក្តីប្រកាសព័ត៌មានដែរថា មានអ្នកជំងឺផ្តាសាយបក្សីម្នាក់ ជាស្ត្រីអាយុ ៤១ឆ្នាំ រស់នៅស្រុកពួក ខេត្តសៀមរាប មានផ្ទុកវីរុសផ្តាសាយបក្សីប្រភេទ H5N1 ដោយអ្នកជំងឺមានរោគសញ្ញា គ្រុនក្តៅ ក្អក ហត់ និងពិបាកដកដង្ហើម។
ក្រសួងបញ្ជាក់ថា បច្ចុប្បន្ន អ្នកជំងឺកំពុងស្ថិតក្នុងស្ថានភាពធ្ងន់ធ្ងរ និងកំពុងទទួលបានការថែទាំយ៉ាងយកចិត្តទុកដាក់ពីសំណាក់ក្រុមគ្រូពេទ្យ។
បើតាមការសាកសួរបង្ហាញថា នៅផ្ទះអ្នកជំងឺ និងផ្ទះអ្នកជិតខាងមានមាន់ទាឈឺនិងងាប់ ហើយអ្នកជំងឺបានកាន់និងប៉ះពាល់មាន់ឈឺនិងងាប់ រួចយកទៅធ្វើម្ហូបទទួលទាន ៥ថ្ងៃមុនថ្ងៃដែលអ្នកជំងឺចាប់ផ្តើមឈឺ។
ពាក់ព័ន្ធនឹងករណីនេះ ក្រុមឆ្លើយតបបន្ទាន់របស់ក្រសួងសុខាភិបាលថ្នាក់ជាតិ និងថ្នាក់ក្រោមជាតិ បាននិងកំពុងសហការជាមួយក្រុមការងារនៃមន្ទីរកសិកម្មខេត្ត និងអាជ្ញាធរមូលដ្ឋានគ្រប់លំដាប់ថ្នាក់ ធ្វើការអង្កេតស្រាវជ្រាវលើការប្រភពចម្លងទាំងលើសត្វ និងមនុស្ស និងស្វែងរកករណីសង្ស័យនិងអ្នកប៉ះពាល់ ដើម្បីទប់ស្កាត់ការឆ្លងបន្តក្នុងសហគមន៍ ព្រមទាំងចែកជូនឱសថតាម៊ីហ្លូ ដល់អ្នកប៉ះពាល់ជិតស្និទ្ធ និងធ្វើយុទ្ធនាការអប់រំសុខភាពប្រជាពលរដ្ឋនៅក្នុងភូមិដែលកើតហេតុ។
ជាមួយគ្នានេះ ក្រសួងសុខាភិបាល ក៏បានអំពាវនាវដល់ប្រជាពលរដ្ឋទាំងអស់ បន្តបង្កើនការប្រុងប្រយ័ត្នលើជំងឺនេះ ព្រោះជំងឺផ្តាសាយបក្សី H5N1 នៅតែបន្តគំរាមកំហែងដល់សុខភាពប្រជាពលរដ្ឋ ហើយប្រសិនបើមានអាការៈក្តៅខ្លួន ក្អក ហូរសំបោរឬពិបាកដកដង្ហើម និងមានប្រវត្តិធ្លាប់បានប៉ះពាល់បក្សីឈឺឬងាប់ក្នុងអំឡុង១៤ថ្ងៃ មុនចាប់ផ្តើមមានរោគសញ្ញា ត្រូវប្រញាប់ទៅពិគ្រោះយោបល់ និងការពិនិត្យព្យាបាលនៃមណ្ឌលសុខភាព ឬមន្ទីរពេទ្យជាបន្ទាន់ ជៀសវាងពន្យាពេលធ្វើឱ្យប្រឈមនឹងហានិភ័យខ្ពស់នៃការស្លាប់ជាយថាហេតុ៕
