ប្រធានាធិបតីអាមេរិក លោក ដូណាល់ត្រាំ បានប្រកាសនៅថ្ងៃទី២៣ខែមិថុនា នូវបទឈប់បាញ់ពេញលេញមួយ រវាងអ៊ីស្រាអែល និងអ៊ីរ៉ង់ ដើម្បីបញ្ចប់សង្រ្គាម បានកើតឡើងក្នុងរយៈពេល ១២ថ្ងៃ ដែលការវាយប្រហារនេះ បានធ្វើឱ្យមនុស្សរាប់លាននាក់ភៀសខ្លួនពីទីក្រុងតេអេរ៉ាន់។ នេះបើតាមសេចក្តីរាយការណ៍របស់សារព័ត៌មានរ៉យទ័រ (Reuters)។
Reuters បានរាយការណ៍នៅថ្ងៃទី២៤ ខែមិថុនានេះថា ការវាយប្រហារនេះដែរ បានជំរុញឱ្យមានភាពភ័យខ្លាចពីភាពតានតឹងអំពីសង្គ្រាមហែកហួរនៅក្នុងតំបន់។
ប៉ុន្តែទោះជាយ៉ាងណាក៏ដោយ នៅមិនទាន់មានការបញ្ជាក់ពីអ៊ីស្រាអែលនៅឡើយទេ ហើយយោធាអ៊ីស្រាអែលបាននិយាយថា ខ្លួនបានរកឃើញមីស៊ីលដែលបាញ់ចេញពីអ៊ីរ៉ង់ឆ្ពោះទៅកាន់ប្រទេសអ៊ីស្រាអែល គិតត្រឹមព្រឹកថ្ងៃអង្គារនេះ។
ប្រភពដដែលបាននិយាយថា មន្ត្រីអ៊ីរ៉ង់បានបញ្ជាក់នៅមុននេះថា ក្រុងតេអេរ៉ាន់ បានយល់ព្រមបទឈប់បាញ់មួយ។ យ៉ាងណាមិញ មន្ត្រីក្រសួងការបរទេសបាននិយាយថា នឹងមិនមានបទឈប់បាញ់ឡើយលុះត្រាតែអ៊ីស្រាអែលឈប់វាយប្រហារខ្លួន។
ការប្រកាសរបស់លោកប្រធានាធិបតី ត្រាំ ជុំវិញជម្រើសឈប់បាញ់គ្នា រវាងអ៊ីស្រាអ៊ែល និងរដ្ឋអ៊ីស្លាមអ៊ីរ៉ង់នេះ បានធ្វើឡើងតែមួយថ្ងៃ ក្រោយអាមេរិកបើកការវាយប្រហារទៅលើប្រទេសអ៊ីរ៉ង់។
អាមេរិក បាននិយាយនៅថ្ងៃទី២៣ ខែមិថុនា ឆ្នាំ២០២៥ថា មន្ត្រីរដ្ឋបាលកំពូលសហរដ្ឋអាមេរិក ទទូចថា សហរដ្ឋអាមេរិកមិនធ្វើសង្រ្គាមជាមួយអ៊ីរ៉ង់ទេ។
បន្ថែមពីនេះ លោក ត្រាំ ក៏បានធ្វើការព្រមានទៅកាន់អ៊ីរ៉ង់ដែរថា បើសិនអ៊ីរ៉ង់មិនបង្កើតសន្តិភាពទេ សហរដ្ឋអាមរិក នឹងបើកការវាយប្រហារជាថ្មីម្តងទៀត ខណៈមានការអះអាងថា ការវាយប្រហារបានផ្តោតលើទីតាំងនុយក្លេអ៊ែរ របស់អ៊ីរ៉ង់ សំខាន់ៗចំនួនបី នៅព្រឹកថ្ងៃអាទិត្យ ទី២២ ខែមិថុនា ក្នុងនោះមានដូចជា ហ្វដូ (Fordo), ណាថាន់ (Natanz) និង អីសហ្វាហាន (Isfahan)៕
