អតីតនាយករដ្ឋមន្ត្រីកម្ពុជា លោក ហ៊ុន សែន បានចុះជួបមេទ័ពមួយចំនួន ចំពេលស្ថានភាពកងទ័ពនៅខ្សែត្រៀមជួរមុខ កំពុងតានតឹងជាមួយទាហានថៃ ជុំវិញជម្លោះព្រំដែន ដែលបានអូសបន្លាយជិត១ខែទៅនេះ ក្រោយទាហានថៃបើកការបាញ់ប្រហារសម្លាប់ទាហានខ្មែរម្នាក់ នៅតំបន់មុំ៣ ខេត្តព្រះវិហារ។
បើតាម លោក ជា ធីរិទ្ធ មន្ត្រីអ្នកនាំពាក្យ ដែលគេដកស្រង់សម្តីយកមកផ្សព្វផ្សាយលើបណ្តាញសង្គម រួមទាំងហ្វេសប៊ុក លោក ហ៊ុន សែន ផងនោះ បានឱ្យដឹងថា នៅព្រឹកថ្ងៃទី២៦ខែមិថុនានេះ លោក ហ៊ុន សែន ដែលនៅកាន់តំណែង ជានាយឧត្តមសេនីយ៍ផុតលេខផ្កាយមាស៥ ផងនោះ បានបង្ហាញវត្តមាននៅខេត្តឧត្តរមានជ័យ ជាខេត្តជាប់ព្រំដែនថៃ ជួបមេទ័ពមួយចំនួន និងមន្ត្រីពាក់ព័ន្ធ។
សារសំខាន់របស់នាយឧត្តមសេនីយ៍ផុតលេខរូបនេះ ដែលគេទម្លាយចេញ គឺបានរំឭកកងទ័ពថា «កុំខ្លាច នៅក្នុងការវាយប្រហារជាមួយសត្រូវដែលឈ្លានពានទឹកដី»។
លើសពីនេះ សារនៅលើហ្វេសប៊ុក លោក ហ៊ុន សែន ក៏បានទាញការចាប់អារម្មណ៍ ពីការត្រៀមជើងការដើម្បីឆ្លើយតបទៅនឹងទង្វើឈ្លានពានពីសំណាក់ប្រទេសថៃនេះផងដែរ។
បើតាមប្រភពនោះ កងទ័ព និងសព្វាវុធដ៏ទំនើបៗរបស់កម្ពុជា ត្រូវបានចល័តចេញពីបន្ទាយឆ្ពោះមកកាន់ខេត្តជាប់ព្រំដែនថៃ ទិសខេត្តឧត្តរមានជ័យ និងព្រះវិហារ បន្ទាប់ពីទាហានថៃ លបលួចបាញ់ប្រហារទាហានខ្មែរលើដីខ្មែរ កាលពីថ្ងៃទី២៨ ខែឧសភា ឆ្នាំ២០២៥ ហើយថា មកដល់ពេលនេះ ទាំងទាហាន និងសព្វាវុធរបស់កម្ពុជា ត្រូវបានត្រៀមបម្រុងជាប់ប្រចាំ ដើម្បីការពារទឹកដីក្នុងករណីមានការឈ្លានពានណាមួយពីកងទ័ពថៃ។
យ៉ាងណា ក្រុមអ្នកនយោបាយប្រឆាំង ធ្លាប់អះអាងថា ក្រោមការដឹកនាំរបស់ លោក ហ៊ុន សែន ធ្វើឱ្យរបូតទឹកដីទៅប្រទេសជាតិខាងទាំងវៀតណាមនិងថៃ។
ដូចករណីផ្ទះអាវុធជាមួយថៃនៅឆ្នាំ២០០៨ និង២០១១ តែទីបំផុតថៃ បានដណ្តើមការគ្រប់គ្រងតំបន់វាលឥន្ធ្រីយ៍ និងភ្នំទ្រព្យជិតប្រាសាទព្រះវិហារ និងគ្រប់គ្រងប្រាសាទតាមាន់តូចទាំងស្រុង និងមួយផ្នែក ប្រាសាទតាមាន់ធំ និងប្រាសាទតាក្របី។
យ៉ាងណា ជម្លោះព្រំដែន ដែលបានកើតឡើងពីថ្ងៃទី២៦ខែឧសភា ដែលទាហានថៃបើកការបាញ់ប្រហារ ទៅលើមូលដ្ឋានកងទ័ពកម្ពុជានៅតំបន់មុំ៣ រហូតស្លាប់ទាហានខ្មែរម្នាក់នោះ កម្ពជាបានប្រកាសថា បានជូនដំណឹងរួចហើយទៅតុលាការយុត្តិធម៌អន្តរជាតិ(ICJ) ពីបំណងប្តឹងថៃ លើទីតាំង៤ចំនុច។
បើតាមរដ្ឋាភិបាល ទីតាំងដែលកម្ពុជាប្រកាសប្តឹងថៃនោះ គឺចំនុចទីតាំងប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំ៣។
ប៉ុន្តែវាលឥន្ទ្រីយ៍ និងតំបន់ភ្នំទ្រព្យ រួមទាំងដែនសមុទ្រ រួមទាំងកោះគុត ស្ថិតក្នុងខេត្តកោះកុង ដែលថៃកំពុងគ្រប់គ្រងដែរនោះ រដ្ឋាភិបាលមិនទាន់បង្ហាញបំណងប្តឹងថៃទៅ(ICJ) នៅឡើយទេ៕
