ប្រធានាធិបតី វ្លាឌីមៀ ពូទីន នឹងមិនធ្វើដំណើរទៅចូលរួមក្នុងកិច្ចប្រជុំកំពូល ប្រ៊ីក(BRICS)ទេ នៅសប្តាហ៍ក្រោយនេះ ដោយមានដីកាមួយចេញដោយតុលាការឧក្រិដ្ឋកម្មអន្តរជាតិអាយស៊ីស៊ី(ICC)ហៅស៊ើបសួរ។ នេះបើតាមសេចក្តីរាយការណ៍ដោយសារព័ត៌មានរ៉យទ័រ(Reuters)។
Reuters បានរាយការណ៍នៅថ្ងៃទី២៥ ខែមិថុនា ឆ្នាំ២០២៥នេះថា រុស្សីបានបដិសេធការចោទប្រកាន់នៃតុលាការឧក្រិដ្ឋកម្មសង្រ្គាមមួយនេះ ហើយវិមានក្រឹបឡាំង មិនបានចុះហត្ថលេខាលើសន្ធិសញ្ញាបង្កើតអាយស៊ីស៊ី(ICC)ទេ និងបានច្រានចោលដីកាទុកជាមោឃៈ។
បើតាមប្រភពនោះ វាមានន័យថា លោក ពូទីន ត្រូវតែថ្លឹងថ្លែងពីហានិភ័យដែលគាត់អាចនឹងចាប់ខ្លួន ប្រសិនបើគាត់ធ្វើដំណើរទៅប្រទេសផ្សេង ដែលជាហត្ថលេខីនៃសន្ធិសញ្ញា អាយស៊ីស៊ី។
ប្រភពដដែលបន្តថា លោក Ushakov បាននិយាយថា លោក ពូទីន និងចូលរួមតាមរយៈដំណភ្ជាប់ក្នុងថ្ងៃទី៧ និងថ្ងៃទី៨ ខែកក្កដា ខាងមុខនេះ នៃកិច្ចប្រជុំកំពូលប្រ៊ីក(BRICS)ក្នុងប្រទេសប្រេស៊ីល(Brazil)។
លោក Ushakov និយាយទៀតថា នេះដោយសារតែការលំបាកមួយចំនួន នៅក្នុងបរិបទតម្រូវការនៃអាយស៊ីស៊ី។ ក្នុងបរិបទនេះ រដ្ឋាភិបាលប្រេស៊ីល មិនអាចប្រកាន់ជំហរច្បាស់លាស់ថា នឹងអនុញ្ញាតឱ្យប្រធានាធិបតីរបស់ពួកយើង ចូលរួមក្នុងការប្រជុំនេះទេ។
យ៉ាងណាក៏ដោយចុះ ប្រភពបញ្ជាក់ថា តុលាការឧក្រិដ្ឋកម្មអន្តរជាតិអាយស៊ីស៊ី(ICC) បានចេញដីកានេះក្នុងឆ្នាំ២០២៣ ត្រឹមតែជាងមួយឆ្នាំ បន្ទាប់ពីរុស្សីបានចាប់ផ្តើមធ្វើសង្រ្គាមទ្រង់ទ្រាយធំ ប្រឆាំងនឹងអ៊ុយក្រែន និងមានការចោទពូទីនពីឧក្រិដ្ឋកម្មសង្រ្គាម ក្នុងការនិរទេសកុមាររាប់រយនាក់ពីអ៊ុយក្រែន៕
