ការប្រជុំចរចាលើកិច្ចព្រមព្រៀងពាណិជ្ជកម្មបដិការរវាងកម្ពុជា និងសហរដ្ឋអាមេរិក ជុំទី៣នេះ នៅតែមិនទាន់ទទួលបានលទ្ធផលជាផ្លែផ្កានៅឡើយទេ ដោយភាគីទាំងពីរ នឹងបន្តកិច្ចប្រជុំចរចានៅជុំបន្ទាប់ទៀត។
តាមសេចក្តីប្រកាសព័ត៌មានរបស់អង្គភាពអ្នកនាំពាក្យរដ្ឋាភិបាលកម្ពុជា ចុះថ្ងៃទី២៦ ខែមិថុនានេះ ឱ្យដឹងថា លោក ស៊ុន ចាន់ថុល អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា និងលោកស្រី ចម និម្មល រដ្ឋមន្ត្រីក្រសួងពាណិជ្ជកម្មកម្ពុជា កាលពីល្ងាចថ្ងៃពុធ បានជួបប្រជុំតាមប្រព័ន្ធវីដេអូ ជាមួយលោកស្រី Sarah Ellerman អនុប្រធានតំណាងពាណិជ្ជកម្មសហរដ្ឋអាមេរិកទទួលបន្ទុកតំបន់អាស៊ីអាគ្នេយ៍ និងប៉ាស៊ីហ្វិក ពាក់ព័ន្ធនឹងបញ្ហាពន្ធគយបដិការ។
ប្រភពដដែល បន្តថា ក្នុងកិច្ចប្រជុំនោះ ភាគីទាំងពីរវាយតម្លៃខ្ពស់លើវឌ្ឍនភាពជាវិជ្ជមាន នៃការចរចាកន្លងមក និងបានឯកភាពដាក់ចេញនូវសំណើររៀងៗខ្លួនបន្ថែមទៀត។
ភាគីទាំង២ ក៏បានត្រៀមខ្លួនរួចរាល់សម្រាប់កិច្ចប្រជុំចរចាជុំបន្ទាប់ និងបានប្តេជ្ញាចិត្តបន្តធ្វើការជាមួយគ្នា ដើម្បីឈានទៅដល់ការសម្រេចរួម ដែលបម្រើផលប្រយោជន៍នៃប្រទេសទាំងពីរ។
តែយ៉ាងណា អង្គភាពអ្នកនាំពាក្យរដ្ឋាភិបាលកម្ពុជា ពុំបានបញ្ជាក់ពីកាលបរិច្ឆេតថ្មី នៃកិច្ចចរចាជុំបន្ទាប់នោះទេ។
គួរបញ្ជាក់ថា ចាប់តាំងពី លោក Donald J. Trump ប្រធានាធិបតីអាមេរិក បានប្រកាសដាក់ចេញការអនុវត្តពន្ធគយបដិការទៅលើជាង១៨០ប្រទេសទូទាំងពិភពលោក កាលពីថ្ងៃទី២ ខែមេសា ឆ្នាំ២០២៥ ក្នុងនោះមានទាំងកម្ពុជាផងនោះ ភាគីកម្ពុជា និងសហរដ្ឋអាមេរិក បានជួបប្រជុំចរចាគ្នាទាំងផ្ទាល់នៅសហរដ្ឋអាមេរិក និងតាមប្រព័ន្ធវីដេអូជាច្រើនលើកច្រើនសារមកហើយ។
សម្រាប់កម្ពុជា គឺសហរដ្ឋអាមេរិក គ្រោងនឹងដំឡើងពន្ធគយរហូតដល់ ៤៩ភាគរយ។ ការដំឡើងពន្ធដល់ ៤៩ភាគរយលើទំនិញកម្ពុជា នាំទៅកាន់សហរដ្ឋអាមេរិកនេះ ជាកម្រិតខ្ពស់បំផុត បើប្រៀបធៀបទៅនឹងបណ្តាប្រទេសនានានៅលើពិភពលោក ក្នុងនោះប្រទេសវៀតណាម ៤៦ភាគរយ, ថៃ៣៦ភាគរយ ឡាវ៤៨ភាគរយ ចិន ៣៤ភាគរយ និងសិង្ហបុរី១០ភាគរយជាដើម។
តែយ៉ាងណា ក្រោយពីការប្រកាសដ៏ភ្ញាក់ផ្អើលនេះ បានប្រមាណមួយសប្តាហ៍ គឺនៅថ្ងៃទី១០ ខែមេសា រដ្ឋបាល លោក ដូណាល់ ត្រាំ បានប្រកាសជាថ្មីទៀត ដោយពន្យាពេលដាក់ពន្ធគយទៅលើបណ្តាប្រទេសផ្សេងៗ រួមទាំងកម្ពុជាផងដែរ រយៈពេល ៩០ថ្ងៃ ដោយកំណត់បន្ទាត់ពន្ធត្រឹម ១០ភាគរយស្មើគ្នា។
ជុំវិញបញ្ហាពន្ធនេះ អ្នកជំនាញ និងមជ្ឈដ្ឋានជាច្រើន បានព្រមានថា កម្ពុជានឹងជួបវិបត្តិសេដ្ឋកិច្ចធ្ងន់ធ្ងរ ពីព្រោះរោងចក្រជាច្រើនអាចនឹងបិទទ្វារ ដែលនឹងធ្វើឱ្យកម្មករកាន់តែច្រើន អត់ការងារធ្វើ ប្រសិនបើរដ្ឋាភិបាលមិនចាត់វិធានការឱ្យបានទាន់ពេលវេលា ចំពោះការដំឡើងពន្ធលើទំនិញកម្ពុជា រហូតដល់៤៩ភាគរយរបស់សហរដ្ឋអាមេរិកទេនោះ។
ចំណែក ក្រុមប្រឹក្សាជាតិតស៊ូ កាលពីថ្ងៃទី៩ ខែមេសា ក៏បានចេញសេចក្តីអំពាវនាវមួយថា ស្ថានភាពនៃការយកពន្ធរបស់អាមេរិកដល់ ៤៩ភាគរយ នឹងធ្វើឲ្យសេដ្ឋកិច្ចកម្ពុជា ធ្លាក់ក្នុងវិបត្តិងើបមិនរួច ហើយកម្មករនឹងបាត់បង់ការងាររាប់សែនកន្លែងថែមទៀត កសិផលរបស់កសិករកាន់តែគ្មានទីផ្សារ អាជីវករនឹងលក់មិនដាច់។
ប្រធានក្រុមឃ្លាំមើលកម្ពុជា លោក ម៉ែន ណាត ធ្លាប់ផ្តល់ជាយោបល់ដែរថា ដើម្បីបញ្ចៀសពីការដំឡើងពន្ធខ្ពស់ពីសហរដ្ឋអាមេរិក មេដឹកនាំគ្រួសារហ៊ុនត្រូវបន្ទន់ឥរិយាបទស្តារប្រជាធិបតេយ្យ គោរពសិទ្ធិមនុស្ស ជាពិសេសលុបបំបាត់អំពើពុករលួយ និងបក្ខពួកនិយម។
លោកបន្តថា បើមេដឹកនាំគ្រួសារហ៊ុន នៅតែប្រកាន់ជំហរមិនព្រមស្តារប្រជាធិបតេយ្យ ហើយបន្តដឹកនាំប្រទេសតាមគោលនយោបាយប្រជាភិថុតរបស់ខ្លួន ដូចឳពុករបស់លោក ដើម្បីតែចង់សម្រេចមហិច្ឆតាក្តោបអំណាច នោះបញ្ជាក់កាន់តែច្បាស់ថា គ្រួសារហ៊ុនជាអ្នកធ្វើឱ្យពលរដ្ឋ ១៧លាននាក់ ក្លាយជាអ្នករងគ្រោះ៕
