ប្រធានព្រឹទ្ធសភា បដិសេធទៅលើរបាយការណ៍នានា ដែលរកឃើញថាកម្ពុជាគឺជាសំបុកនៃឧក្រិដ្ឋកម្មអនឡាញ ដែលធំជាងគេនៅក្នុងតំបន់អាស៊ី និងពិភពលោក ខណៈភាគីថៃបានបន្តចោទប្រកាន់បញ្ហានេះ ដោយចាត់ទុកថាខ្លួនបានប្រឹងប្រែងទប់ស្កាត់ណាស់ដែរ ប៉ុន្តែបញ្ហាចម្បង គឺកម្ពុជាដែលជាប្រទេសជិតខាងថៃជាមជ្ឈមណ្ឌលឧក្រិដ្ឋកម្មអនឡាញដ៏ធំ នៅក្នុងតំបន់ដែលជាមូលហេតុរាំងស្ទះដល់ដំណើរការទប់ស្កាត់ និងប្រយុទ្ធប្រឆាំងអំពើជួយដូរឆ្លងដែននេះ។
ថ្លែងពីខេត្តព្រះវិហារ នៅថ្ងៃទី២៧ ខែមិថុនា ឆ្នាំ២០២៥ នេះ លោក ហ៊ុន សែន បានបញ្ជាក់ជំហរថា តាមពិតទៅកម្ពុជា មិនមែនជាប្រភព នៃអំពើជួញដូរមនុស្ស តាមរយៈរូបភាពល្បែងអនឡាញ ដូចការចោទប្រកាន់នោះឡើយ។ លោកបន្តថា បញ្ហាចម្បង នៃល្បែងអនឡាញនេះ គឺប្រភពកើតចេញពីប្រទេសថៃទេ។ ដោយសារតែឥទ្ធិពលនេះហើយបានរុញឱ្យកម្ពុជា ក្លាយទៅជាគោលដៅ នៃឧក្រិដ្ឋអនឡាញនេះ។ បើតាមអតីតនាយករដ្ឋន្រ្តី នៅចំពោះមុខនេះ ភាគីថៃបានព្យាយាមបន្លប់ស្ថានការណ៍នយោបាយ ដែលយកលេសករណីបិទព្រំដែនដោយសារជម្លោះ ទៅជាការបិទព្រំដែន ព្រោះតែប្រយុទ្ធប្រឆាំង នឹងអំពើឧក្រិដ្ឋកម្មអនឡាញទៅវិញ។ ក្នុងន័យនេះលោក ហ៊ុន សែន ចាត់ទុកថា នេះគឺជាល្បិចដ៏គ្រោធគ្រាតបំផុតរបស់ភាគីថៃ។
លោកថា៖ «ម្សិលម្ងៃនេះ លោកជំទាវបែរមកនិយាយថាបិទព្រំដែន ដើម្បីប្រឆាំងអនឡាញ ក្នុងពេលដែលព្រំដែនបិទតាំងពីថ្ងៃទី៧ មិថុនា ហេតុម៉េចបានលោកជំទាវទើបនឹងមកប្រកាសនៅថ្ងៃទី២៤ ខែមិថុនា ដើម្បីប្រឆាំងអនឡាញលោកជំទាវ តើលើលោកនេះគេល្ងង់ដូចលោកជំទាវដែរ? កម្ពុជាគ្រាន់តែជាជនរងគ្រោះនៃប្រព័ន្ធអនឡាញ របស់ថៃតែប៉ុណ្ណោះ។ ហេតុអី? មានតែប្រទេសថៃមួយគត់ដែលមានជើងអាកាស តភ្ជាប់ពីខាងក្រៅចូលមកក្នុងប្រទេសថៃ មីយ៉ាន់ម៉ា ឡាវ និងកម្ពុជា គ្មានជើងអាកាសហោះត្រង់ចូលមកទេ។ អីចឹងអ្នកឆបោកអនឡាញទាំងប៉ុន្មាន ត្រូវបានសម្រួលដោយអាជ្ញាធរថៃ»។
ការបដិសេធនេះ ធ្វើឡើងមិនបានប៉ុន្មានថ្ងៃផង ក្រោយពីលោកស្រី ផេថងថាន នាយករដ្ឋមន្រ្តីថៃ បានចោទប្រកាន់ថា កម្ពុជាគឺជាជង្រុកនៃឧក្រិដ្ឋកម្មអនឡាញ ដ៏ធំនៅក្នុងតំបន់។ តាមរយៈការចុះផ្សាយដោយកាសែតក្នុងស្រុករបស់ថៃ កាលពីថ្ងៃទី២៣ ខែមិថុនា លោកស្រីនាយករដ្ឋមន្រ្តីថៃ បានអំពាវនាវដោយបើកចំហរទៅមេដឹកនាំពិភពលោក អាចប្រើប្រាស់ប្រទេសថៃ ដើម្បីធ្វើជាវេទិកានៃកិច្ចប្រជុំ ដើម្បីស្វែងរកដំណោះស្រាយ ក្នុងករណីនេះ។ ហើយភាគីថៃសន្យានឹងធ្វើជាម្ចាស់ផ្ទះ ក្នុងការសម្របសម្រួលកិច្ចការនេះ ដើម្បីធានាថា ឧក្រិដ្ឋកម្មអនឡាញ ដែលកម្ពុជាគឺជាប្រភពដ៏គ្រោះថ្នាក់នៅក្នុងតំបន់ នឹងត្រូវកាត់បន្ថយ។
ការចោទប្រកាន់របស់លោកស្រី ផេថងថាន នាយករដ្ឋមន្រ្តីថៃនៅពេលនេះ គឺដូចគ្នានឹងការរកឃើញដោយក្រុមអង្គការលើកលែងទោសអន្តរជាតិមួយដែលមានមូលដ្ឋាននៅទីក្រុងឡុងដ៍ប្រទេសអង់គ្លេសដែរ។ របាយការណ៍របស់ Amnesty International ដែលត្រូវបានកាសែត Reuter ស្រង់យកមកចុះផ្សាយ នៅចំពេលដែលលោក ហ៊ុន សែន ប្រតិកម្មនៅថ្ងៃទី២៧ មិថុនា នេះ បង្ហាញថាកម្ពុជា គឺជាមជ្ឈមណ្ឌលឧក្រិដ្ឋអនឡាញ ដ៏គ្រោះថ្នាក់បំផុតនៅក្នុងពិភពលោក។
តាមរយៈរបាយការណ៍របស់ខ្លួន ក្រុមអង្គការលើកលែងទោសអន្តរជាតិ ចោទប្រកាន់ថា រដ្ឋាភិបាលកម្ពុជា ពិតជាគ្មានចេតនាក្នុងការទប់ស្កាត់ករណីនេះទេ។ មិនតែប៉ុណ្ណោះ មានមជ្ឈមណ្ឌលឧក្រិដ្ឋអនឡាញ មិនតិចជាង ៥៣ទីតាំងទេ និងមានទីតាំងច្រើនទៀតកំពុងតែមានសកម្មភាពសព្វថ្ងៃនេះ។ ហើយក្រុមឧក្រិដ្ឋជន បានប្រើវិធីសាស្រ្តឆបោកមនុស្សនៅជុំវិញពិភពលោក ក្នុងនោះមានតាំងពីកូនក្មេងឡើងទៅ។ ពួកគេ ត្រូវឃុំឃាំងនៅក្នុងអាគារបិទជិត ដោយមានការយាមកាម ក្រោមការឃ្លាំមើលពីសន្តិសុខដ៏តឹងតែងបំផុត។ ជាពិសេសនោះ អាគារឃុំឃាំងមនុស្សនីមួយៗ ត្រូវហ៊ុំព័ន្ធទៅដោយបន្លាលួសជុំវិញថែមទៀតផង។ ក្រុមអ្នកជំនាញផ្នែកសិទ្ធិមនុស្ស យល់ឃើញថា ប្រសិនបើរដ្ឋាភិបាលចង់លាងខ្លួនឱ្យបានស្អាតស្អំ នៅក្នុងរឿងក្តីជួញដូរមនុស្សនេះ ដរាបណារដ្ឋាភិបាលបង្កើតគណៈកម្មការមួយ និងបើកការស្រាវជ្រាវមុននឹងចេញរបាយការណ៍បកស្រាយដោយលម្អិត។ មិនតែប៉ុណ្ណោះ គណៈកម្មការនេះ ត្រូវចូលរួមពីក្រុមអ្នកជំនាញអន្តរជាតិ ក្រុមអង្គការមិនមែនរដ្ឋាភិបាល និងភាគីពាក់ព័ន្ធដទៃទៀត។ ហើយរបាយការណ៍ស្រាវជ្រាវនេះ ត្រូវប្រាកដថា ជាភស្តុតាងដែលសុក្រិត្យ ឯករាជ្យ និងជឿទុកចិត្តបាន៕
