កម្ពុជា បានប្រកាសពីជំហរមិនបើកទ្វារព្រំដែនជាផ្នែកៗនោះទេ ដរាបណាភាគីថៃមិនកែសម្រួលរាល់បណ្តាច្រកទាំងអស់ឱ្យដំណើការប្រក្រតីដូចដើមឡើងវិញ ដូចមុនថ្ងៃទី៧ ខែមិថុនាទេនោះ។
ការប្រកាសនេះ ធ្វើឡើងក្រោយមេបញ្ជាការកងទ័ពបូព៌ាថៃ នៃខេត្តស្រះកែវ ស្នើឲ្យបើកច្រកព្រំដែន ដើម្បីឲ្យរថយន្តដឹកទំនិញរបស់ថៃបានចេញចូលមកកម្ពុជា ក្រោយឡានទំនិញរាប់រយគ្រឿងកំពុងកកស្ទះនៅច្រកព្រំដែនក្នុងទឹកដីថៃ។
នេះបើតាម នាយកមន្ត្រីកម្ពុជា លោក ហ៊ុន ម៉ាណែត ដែលបានលើកឡើងលើបណ្ដាញសង្គម នៅថ្ងៃទី២៩ ខែមិថុនា ឆ្នាំ២០២៥នេះ។
លោកបានប្រាប់ឱ្យអាជ្ញាធរថៃ ក៏ដូចជាប្រជាជនថៃ ដែលមានបំណងចង់ឲ្យមានការបើកច្រកព្រំដែនកម្ពុជា-ថៃ ឡើងវិញនោះ មិនចាំបាច់ស្នើមកកម្ពុជានោះទេ ដោយលោកណែនាំឱ្យពួកគេស្នើទៅអ្នកដែលមានអំណាចពិតប្រាកដនៅប្រទេសថៃ ឱ្យបើកច្រកព្រំដែនឱ្យមានស្ថានភាពប្រក្រតីឡើងវិញ និងផ្ដល់ការធានាច្បាស់លាស់ថា នឹងមិនមានការបិទឬបើកជាឯកតោភាគីទៀតនោះទេ។
លោក ហ៊ុន ម៉ាណែត បានបញ្ជាក់ថា កម្ពុជាយល់ច្បាស់អំពីការលំបាករបស់ប្រជាពលរដ្ឋនៃប្រទេសទាំងពីរ ដែលរងផលប៉ះពាល់ពីការបិទច្រកព្រំដែន។
ប៉ុន្តែថា កម្ពុជាមិនមែនជាអ្នកដែលចាប់ផ្ដើមបិទ-បើកព្រំដែន ជាឯកតោភាគី ហើយក៏មិនបានប្រើវិធានការបិទច្រកព្រំដែននេះទៅលើភាគីថៃមុនឡើយ ចាប់តាំងពីមានបញ្ហានៅតំបន់មុំបីកាលពីចុងខែឧសភា ឆ្នាំ២០២៥។
ការលើកឡើងថ្នាក់ដឹកនាំកម្ពុជានេះ គឺជាការឆ្លើយតបទៅនឹងសំណើសុំបើកព្រំដែនរបស់មេបញ្ជាការកងទ័ពបូព៌ាថៃ ទិសខេត្តស្រះកែវ ដែលបានស្នើមកកម្ពុជាបើកច្រកចំនួន៣ គឺច្រកអន្តរជាតិស្ទឹងបត់ ច្រកសំពៅលូន ដោយអនុញ្ញាតឲ្យរថយន្តដឹកទំនិញចេញចូលមិនលើសពី៥០គ្រឿង ចាប់ពីម៉ោង ៨ ព្រឹក ដល់ម៉ោង ៤រសៀល និងទីបី គឺច្រកម៉ាឡៃ ដោយអនុញ្ញាតឲ្យរថយន្តដឹកទំនិញចេញចូលមិនលើសពី ២០គ្រឿង ចាប់ពីម៉ោង ៨ព្រឹក ដល់ម៉ោង ១២ថ្ងៃត្រង់។
ជាមួយគ្នានេះ ថៃក៏ស្នើសុំឲ្យរថយន្តដែលជាប់គាំងដោយសារការបិទព្រំដែនតាំងពីថ្ងៃទី២៣ ខែមិថុនា បានវិលត្រឡប់ចូលប្រទេសថៃវិញផងដែរ។
សំណើរបស់អាជ្ញាធរថៃនៅពេលនេះ ទំនងបណ្ដាលមកពីប្រជាជនថៃ កំពុងជួបការលំបាកធ្ងន់ធ្ងរផ្នែកសេដ្ឋកិច្ច និងជីវភាព បន្ទាប់ពីទំនិញរាប់រយឡានកំពុងកកស្ទះនៅតាមច្រកព្រំដែន មិនអាចដឹកយកមកលក់នៅកម្ពុជាបាន ចាប់តាំងពីរដ្ឋាភិបាលថៃបានប្រើលេសរក្សាសន្តិសុខក្នុងប្រទេស ដើម្បីបិទព្រំដែនជាមួយកម្ពុជាដោយឯកតោភាគី កាលពីថ្ងៃទី២៣ ខែមិថុនា។
ក្នុងនោះអ្នកដែលប្រឈមខ្លាំងជាងគេ គឺអាជីវករលក់បន្លែផ្លែឈើ ដោយទំនិញទាំងនេះកំពុងស្អុយរលួយបណ្ដើរៗ បង្កការខាតបង់ធ្ងន់ធ្ងរ ក្នុងនោះក៏មានលេចឮថាមានពលរដ្ឋថៃធ្វើអត្តឃាត ដោយសារបញ្ហានេះផងដែរ។
ជុំវិញបញ្ហានេះ ប្រធានព្រឹទ្ធសភា លោក ហ៊ុន សែន និងលោកនាយករដ្ឋមន្ត្រី ហ៊ុន ម៉ាណែត ធ្លាប់បញ្ជាក់ជាច្រើនដងរួចមកហើយថា បើភាគីថៃបើកច្រកព្រំដែនឡើងវិញ និងផ្ដល់ការធានាច្បាស់លាស់ថា នឹងមិនមានការបិទ-បើកជាឯកតោភាគីទៀតនោះ កម្ពុជានឹងបើកច្រកព្រំដែនខាងកម្ពុជាវិញ ដោយប្រើពេលយ៉ាងយូរ ៥ម៉ោងប៉ុណ្ណោះ ដែលមានន័យថា កូនសោរដោះស្រាយបញ្ហានេះ គឺស្ថិតនៅក្នុងដៃភាគីថៃ៕
